فوت اصعب ايام حياتي

فوت اصعب ايام حياتي وفيصل وقف معايا مخلانيش حتى دقيقة فاتو عليا شهرين وانا ماعارفة لا ليلي ولا نهاري طحت فراش كنت نقاوم غير نهار نروح لبابا نحاول نكورج روحي غير قدامو ؛ بعد الفترة الصعيبة لي فوتها تحسنت شوي واصلا لازم عليا نستحمل ومنقطش من رحمت ربي اما الحزن يبقى ديما في لقلب والحياة تبقى مستمرة ماعندنا واش نديرو  وعلى جال ادم لازم نكوراجي روحي ومنضيعش وليدي... كي شافني فيصل بلي تحسنت حالتي وتجاوزت شوية رجع لخدمتو وتفاهمت معاه باش نروح نقرا ونخلو 

ادم عند وحدة جارتهم تحكم لولاد يعني كونفيونص بذراع باه قبل متقبلش الفكرة انو اي واحد يربيلو ولدو بصح انا عندت وبقيت في قراري وكانت  المهاوشة ديما بينتنا غير على هذا الامر كيفااه تروحي وتخليه وبصح كنت ندير في راي ووليدي منيش راميتو في الشارع راه عند وحدة ثيقة وتخدم في خدمتها ، هاذو نهرات مروحتش نقرا كي عدت مريضة بلاقريب والحمى طحت فرااش غير على والو نمرض ومتأثرة 

بفقدان ماما غير تجيني حاجة نطيح فراش ،سمانة وانا هكاك كي تحسنت شوي قلت غدوة نروح نقرا ونعوض واش فاتني نضت فليل  وجدت روحي ودوشت وعيطت لشيماء(لي حاكمتلي ادم)باه غدوة صباح بكري نجيبوهلها حكمت بلاصتي قعدت نلعب مع ادم لوحيد لي يخرجني من حالتي ويعطيلي طااقة ايجابية  كل ما يكبر يزيان ويتبطبط ضك ولى في عمرو خمس اشهر بدا يلاغي ويضحك منحي عليا ضيقت الروح، 

عيطلي فيصل حكيت معااه فلكام قتلو غدوة اني رايحة نقرا_كيفاه منال تروحي تقراي وادم تخليه وحدو؟_كيفاه نخليه وحدو مزلنا برك في نفس الاسطوانة يخي كيما موالفة نديه لشيماء تحكمولي ولعشيا نروح راني مراطيا بزااف كيفاه حابني نزيد نضيع عامي باه يقصوني ونقعد غير نعاود تعبي وسنين يروحو غير في الباطل_متروحيش منال انا ضك نكمل لخدمة  ونديماري مع صباح تحيرت عليك كي عدتي مريضة وجاي نشوفك  كيفاه نجي لدار ومنلقاك لا نتي لا ادم نلقى دار فارغة خلي متروحيش غدوة استقبليني وبعد .

صباح نضت روطاار  عدت نجري ونوجد في ادم وحوياجي ونوجد في روحي بلجري خيماري لبستو في دروج حطيت ادم عند شيماء وحكمت ديراكت طاكسي  وصلت للكلية وانا مشلوشة وهارجة من حالي قريت ودرت ليزانتيغو، وقلبي مزيرني وحاسة حاجة راح تصرا خرجت على 3 نتاع العشيا جيت رايحة مزروبة نحكم طاكسي ونرجع لدار حتى حسيت بلي راني مشمخمة حطيت يدي على حيجابي ملور حسيتو مشمخ ومشوه (هبطت عليا ليغاقل ومفقتش بيها) جبدتو هك بشوي نلقى حجابي كامل مطلي بدم تبهدلت تبهديلة كحلة ومنقدرش نرجع ندخل نشري ليبوند من الفوايي ولا كيفاه نبدل لحجاب ،  عجزت وحشمت بقيت غير نخبي في روحي على الناس باه ميتولهوش ليا وقفت تحت الشجرة ، جبدت تلفوني عيطتلو محبش يربوندي عليا بقيت نعيط ونعيط والو دزيتلو ميسجاات وحكيتلو بلي راني في حالة ومتبهدلة 

رجعلي_اتحملي مسؤوليتك مقوتلكش اخرجي وديري رايك وراني في طريق وقريب نلحق، عندك ساعة في يدك منال ومنلقكاش في دار نخليها عليك كوبا عليا وخلاني نفور من هدرتو ومن حالتي لي راني فيها راح الحال وكنا زمان الشتا الضلمة بالخف طيح ماصبت لانوض ولا نقعد حيجابي كامل موسخ راح نبكي من الحالة لي راني فيها ، بقيت نخمم في حل مالقيت كفاه ندير كل الحلول لي خممت فيها ماتسلكنيش حتى لحوانت باه نشري حيجاب بعاد عليا مانجي نلحق حتى ناس كامل تشوفني يا ربي هذيك التبهديلا، كنت مهبطا راسي ونخمم حتى نشوف في رونق جاية من جيهتي سلمت عليا بقات تسقسي وش حوالك صفا؟! وانا مش حاطة معاها طول كي شافتني هكاك متوترا وحاكمة حيجابي شافتو  مبهدل  _منال وش 

هذي الحالة يخااه تقول مجزرة واش صرالك،  حكيتلها وكنت حاشمة من عمري ومغطية روحي بصاك ومتكية على شجرة باه ميفيقوش بيا  _منال  هيا نديك لوحدة صحبتي تسكن في هذو لي بارتمو نقلها تسلفلك حيجاب اغسلي وبدلي فلول محبيتش نروح مي كي شفت ناس اكل راحو وبدات طيح الضلمة وفيصل محبش يجيني كثرو الافكار فراسي وهي بقات فوق راسي تقنع فيا_ هيا هيا ميصرا والو وليت وافقتها  باسكو معندي حتى حل قريب ليا من غير هذا الحل منقدر نبوجي ولا نخمم روحنا نجريو بزربة لحقنا لدار كانت في ريتشوصي طبطبت الباب رونق حلت عليها وحدة شبه عارية(شورت وبيستي فوق السرة) والغنى