عشق مرهق جميل

ت حليت الباب دوش غسلت وخرجت للكوزينة حليت الفريجيدار جبدت وحدة نوتيلا طلعت فوق البوطاجي وقعدت ناكل بصبعي حتى دخل عليا صباح الخير  نوتيلا  ،صباح نور جا عندي حط يديه على البوطاجي وانا فالوسط كيفاه نروح ضك للخدمة  ،علاه_كيفاه نخلي هذ النوتيلا ونروح ،شكون قالك روح _نسيت انتي كون تصيبي نقابلك ليل مع النهار ،واش ندير اذا عدت نحبك ومانقدرش بلا بيك طبع بوسة خفيفة على  شفتي اممم عسل بقيت ناكل ومانيش معاه غير هزيت عينو لقيتو يشوف معايا درتلو براسي وشنو _كيفاه نديرلك راكي غير تحلاي درتلو بكتفي مانعرف _يما والله ما صحيحة في راسها ،لاه _راهي تقولي طلقها ،طلقني _نطلق روحي ومانطلقكش انتي ،علاه _وين نلقا وحدة كيفك ،كاين غير هما _ممكن بصح ماتحلالي غير انتي ،عادي طلقني وجيب غيري تنسيك فيا _واش ينسيني فيك واش ينسيني في هذا الزين والحلاوة والدلال شكون راح يحبني كيفك ويدللني ويحملني شكووون ،مكانش _علبالك يما لي جابتني من كرشها والله ماتحملني ،مكانش منها راهي امك هذه _مانيش نهدرلك هكذا باه نتمعشق راني نهدرلك حقيقة يما ماتحملنيش كيما حملتيني انتي ول البارح الحالة لي حكمتني ول البارح ماشي اول مرة تحكمني فالدار واحد ماكان يقدم مني خطوة ڨاع يهربو مني ويغلقو البيبان حتى يما حطيت نوتيلا وحظنتو كون بخير وانا مستعدة نحمل كلش علاه شحال من هشام  عندي  انا روحي وعمري وحياتي وراحتي فيداك انت بقا حاط وجهو في رقبتي وساكت , نديرلك لفطوور جبد روحو لا ماديريش راح الحال ،مزال الحال خلي نديرلك _لا مكلاه بصح كون تعطيني شوية من هذا النوتيلا مانقولش لالا ،جيب وحدة راهي فالفريجيدار _لاه وهذه لي في يدك واشبيها ،كليت منها _وامبعد ،ياك تعاف  _ايه معفاف بصح انتي الوحيدة لي مانعافكش ناكلك ونسرطك نورمال جيت نجيب المغرفة لا ناكل من صبعك دار صببعي  في نوتيلا وبقا ياكل منها وانا نشوف معاه عاقدة حواجبي شاف معايا واش ،بصحك تاكل من صبعي غمزلي نفكرك واش نبات  ناكل من عندك  ولا ما يشقاش ولا نسقسو السرير ضحكت قرصني من خدي هيا بطبوطة انا نروح العشية نشالله ،نشالله جا باسني وراح 
طاح عليا النشاط درت شغلي وسخفت على شحال من حاجة وليت نصنف ونحط وفلخر ماكليت والو قعدت نتفرج سمعت الباب يطبطب نضت قعدت شكون راح يطبطب عليا الباب هو عندو المفتاح حتى الباب تاع الحديد مغلقوش بااه يطبطب نضت خرجت لكلولوار وصلت للباب بقيت واقفة والباب يطبطب ويعاود وليت قلت شكوووون جاني صوت غريب انا حلي  ماهدرتش خفت وخفت من هشام يقولي لاه هدرتي مع راجل غريب بقيت ساكتة وهو يقولي افتحي ،شكون انت مانقدرش نفتح راجلي مكانش هنا _انا باباه حلي كي قالي هكذا حسيت بقلبي رجف من الخوف للحظة جاني الف إحتمال قلت ضك يحاوزني ضك يضربني ووو شفت مع روحي لابسة فيزو لركبة وبيستي رحت نجري لشمبرة لبست روبة بالذرعين ورجعت بقيت واقفة ماعرفتش واش ندير نفتح ولا لالا زاد طبطب بالقاوي ياوو حلي وليت حليت لقيتو في وجهي عاقد حواجبو ساعة باه تحلي الباب عليا ،خفت حتى عرفت بلي انت _راح تخليني هنا على الباب  جبدت روحي على الباب لا مرحبا بك تفضل دخل يمشي بهدوء ورزانة مشيتو عندها وزن راح طل على الكوزينة بقا يشوف معاها زاد فات لشمبرة طل عليها ورجع لشمبرة الصغيرة حل الباب ودخل لقاها فرغانة نحا المونطو تاعو روحي جيبيلي حاجة فرشيهالي هنا رحت نجري للكوزينة جبتلو كرسي _قتلك فرشيلي ماشي جيبيلي كرسي حطيت الكرسي وخرجت لشمبرة واش نفرشلو ماعندي والو شفت مع السجادة لي فالشمبرة مفرشة طبقتها بقيت نشوف مع الشمبرة واش نفرشلو لا مطرح لا ماطلة تفكرت زوج باساطات تاع الريش فالازرق بالمخايد تاعهم شراهم هو خطرة حطيتهم تحت السرير طلعت السرير جبدتهم وجبدت الغلافات لي جاو معاه غلفت بيهم المخايد الصغار هذه حالة لي جي بلا جهاز هو مسكين الله غالب الدورو لي يجي في يدو يجيب بيه حاجة وهكذاك نص الحوايج مكانش