روحي محڨورة قبل
زادو دخلو خاوتو ڨاع عندو يحظنو ويبوسو هو ثم ثم تحسنت نفسيتو غير يضحك بقيت نشوف معاهم كيفاه دايرين بيه وماصدقو بلي وسطهم ونساو كلش المشكل والخلاف لي صرا وتصالحو وتصافوا كشغول ماصرا والو غير انا لي خسرت كلش حتى ختي الوحيدة خسرتها هو عندو لمن يرجع بصح انا كون بعيد الشر كاش ما يصرا ماعندي وين نروح حتى ويصرا ومشكل ونجي نصد كيما ڨاع نسا ماعنديش لمن نروح ماعنديش يما تنصحني وتغلقلي عيني وتحذرني وتوريلي ولا اب سند يخافو منو ويهابو ويضرب صدرو عليا ولا اخ يوقف في ظهري ويضرب على جالي ولا ختي توريلي وترشدني راح نحمل المعيشة كيف ما كانت تكون لا ضربني نحمل ولا عنفني نحمل ولا حڨرني نحمل ولا ذلني نحمل شفقت على روحي حسيت روحي محڨورة قبل مانتحڨر عينيا دمعو كي شفتو هو راجل ودايرين بيه 6رجال ويماه وباباه وبلا عمومو وولادهم وخوالو وولادهم فالعشا فامليتو ڨاع حضرت مالغري مهرب وحدة وحتى هو غلط بصح وقفو معاه وسهلولو كلش وانا لي ولية ونحتاج سند ماعندي والو حتى القعاد بقيت قاعدة بعيدة عليهم راح نبكي وسطهم غير شفت معاه لقيتو يشوف معايا درتلو براسي هيا ناض وقف انا نوض نرقد شوية عييت شاف معايا هيا معايا زربت نضت خرجت لبرا خليتو هو يهدر معاهم حتى خرج عندي شاف معايا واشبيك درتلو براسي والو _هيا رواحي دخلنا لكولوار لي فيه شمبرتو ويبان باب في كوانة تاع اليمينيوم يبان دوش وتولات جبد المفتاح حل الباب دخلت ودخل هو غلق الباب نحيت الخمار وقعدت على السرير هو نحا قشو ورما روحو على السرير عدلت روحي تكيت على المخدة واشبييك شفت معاه دارلي نفس الحركة براسو وغمزة واش ،ياريت ماجيتش معاك _علاه ،مانيش مرتاحة _ماكيش مجبورة ترتاحي حاولي تتاقلمي حتى نروحو بقيت نشوف معاه نزلو دموعي _ياعمري تبكي جبدني من ذراعو رقدني على صدرو علاه ديري هكذا وتفسدي عليا كي نشوفك هكذا ماكيش مرتاحة حتى انا مانرتاحش جبتك هنا باه تغيري الجو وتنحي على خاطرك واذا بك كلام يما ماتحطيهش ڨاع في راسك ،خايفة _من واه خايفة ،كيفاه نقابل الناس علبالي راح يهدرو عليا وكل واحد يسمعني كلمة _شكون يهدر عليك ويسمعك كلام والله لي يغلط معاك بحرف غير نحسب ربي ماخلقو ولي سمعك كلمة خبريني غير انتي خط احمر عندي اغلى من روحي شفت معاه باسني على شفتي صاي تفاهمنا ماتعمري راسك بحتى حاجة وخمي غير فيا شروق غير فيا بقيت ساكتة مانيش مقتنعة طبعني وطلع فوقي شاف معايا فهمتي شروق تخمي غير فيا انا لي نشغل بالك ماشي الناس وهدرتهم عرف يسكتني ويقنعني
فطنت على صوت الباب هزيت راسي من صدرو شفت معاه لقيتو فطن شكوووون جا صوت وهيبة من ورا الباب _اذا شروق قاعدة تجي تقعد معانا _ضك شوية وجي شفت معاه _ نوضي روحي اقعدي معاهم وماتخافيش لي هدرت معاك كلمة رواحي قوليلي ،مانيش حابة نروح _نوضي عمري نوضي مكان لاه تخافي وراني قتلك لي هدر معاك قوليلو واش دخلك وماتخافيش انا وراك وراهم يعرفو العقلية مليح هيا نوضي البسي وماتخرجليش بلا خمار خاوتي هنا يدورو وروحي اقعدي معاهم اذا ماعجبكش الحال ارجعي هنا عند راجلك بستو على خدو ونضت رحت لدوش شليت روحي لبست روبة دار بالذرعين مكيجت ودرت الخمار وخرجت للهول شفت وهيبة داخلة عيطتلي ارواحي رانا قاعدين هنا رحت عندهم دخلت هي وانا وراها هاي جات العروس دخلت لقيت نسا خاوتو شفيت عليهم ناضو سلمو عليا غير قعدت معاهم بقاو يسقسو فيا ويدو فالاخبار بصح ماعطيتهم والو نهدر قيس الكلمة هدرتهم قاع معاني غير وهيبة ارتحتلها هما هدرتهم ڨاع فوخ وزوخ سورتو لي اسمها سكينة حنا هكذاك نهدرو حتى دخلت وحدة لابسة روب قطيفة وميني لركبة وديميمونش ومطلعة شعرها كوتشفال وبشرتها مزيجة بين السمورة والزروقة سمينة عليا وتكون نتيجة هشام شافتني اهلا اهلا بالعروس الهاربة وضحكت جات سلمت عليا ياك مزعفتيش مني وتمضغ فالشوينڨام درتلها براسي لا عادي راحت قعدت مع سكينة ماعرف واش بقاو يهدرو دارت عندي سكينة هذه منيرة ختي بقا هذا الاسم يتعاود في راسي كشغول سمعاتو هما يهدرو وانا حابة نتفكر وين سمعتو حتى تفكرت جداتو كي قاتلي تهنا من منيرة الموسخة واش قصدها بالهدرة هذه بقيت نطلع ونهبط مالقيت حتى جواب وليت نضت سمحولي انا نوص جيت ماشية نطقت منيرة ورايا واش راه هشام توحشناه عندنا بزاف ما شفناهش درت عندها كاش ما بينك وبين هشام حتى تقولي توحشتو _عادي جاري وتربيت انا وياه وكبرت انا وياه وعايشة هنا عندهم وسلف ختي سكينة يعني نعرفو بعضانا مليح وعلاقتنا اقوى منزاي علاقة علابيها قتلك توحشناه ،معليش جيت ماشية زادت نطقت ساليلي عليه شفت معاها بطرف عيني _واش واقيلا ماعجبكش الحال نورمال مافيها والو ياك ماكيش من النسا لي يغيرو على رجالتهم من بنات خوالهم وعمومهم وبنات الجيران ،بعيد الشر لا يغار إلا الناقص عوجت فمها حتى انا عوجت شنايفي وخرجت شفت العجوز هي وسلسبيل فالكوزينة نسمعها في تقولها اعندك لا تتحرق عسيها هذه درتها سبيسيال لخوك عرفتها توجد لهشام
