:مـذهـلـهہ وڪـأنـك مُـقـتـبـسـهہ مِـن ضـوء القـمّـر قصة حب

#الجزء_الاول:
اليوم خطبه عاليه ومضر ... اليوم للي  كانوا مسمينه اليوم المنتظر ..عاليه كانت معجوقه بالصالون لحتى تخلص تسريحه شعرها ومكياجها ..ولسا بدا تمر عالبوتيك مشان الفستان ... 
عاليه...28 سنه وخطيبها مضر عمره 31 سنه ... عاليه  ومضر بيعرفو بعض من زمان كتير بحكم صداقه الأهالي القديمه .... كانت العائلتين تعتبر من العائلات الأرستقراطية بالبلد واللي الها كتير مشاريع مهمه ... ومن اول ماتعرفوا العائلتين ع بعضهن ساهموا كتير انو يقربوهن من بعض طبعا هالشي كان لمصالح العائلتين ...مضر وعاليه  بيشتغلوا  بشركه هندسيه  كانت الشركه ملك  العيلتين 
عاليه  درست هندسه معمارية ومضر هندسه مدني ...
كانوا دايما قريبين من بَعضن ، طول الوقت بالنهار وبالليل 
بالنهار بمجال شغلن وبالليل بحفلات الفيلا او دعوات او اجتماع العائلات مع بعضها ... 
عاليه بنت هاديه كتير وبارده ..عمليه راكزه واعيه..ليدي بكل معنى الكلمه ..وتصرفاتها وكلماتها محسوبه كتير منيح ....شخصيتها قياده وقويه ومضر  كان متلها هادي وعملي ..
واغلب الأرستقراطيين كانت هيك اطباعهن...
كانت عاليه  جميله كتير... طويله شعرا لعند كتافا وأشقر وعيونا خضر..كانت تعتبر البنت المثاليه للي مابينقصها شي ...ومضر طويل واسمراني بشعر اسود وعيون سود متل الليل بس كان شخصيه وعاطي هيبه ... كانوا بيحبو بعض  بس حب هادي عقلاني... 
خلصت عاليه شعرها بسرعه بما انو كان قصير وسبل ومابيعذب... وعملت مكياج ناعم خفيف ..كانت مابتحب  كتره المكياجات وبما انو كان جمالا طبيعي كانت تشوف حالا  انو مانها بحاجه المكياج .... طلعت من الصالون وكان السائق عم يستناها
..طلعت وراحت فورا عالبوتيك مشان الفستان ...
نزلت ولاقت المصممة فتون عم تستناها..
فتون : اهلا وسهلا نور المحل فيكي ست عاليه...الفستان جاهز 
عاليه : كيفك فتون ...ممكن حدا يساعدني بلبسه!!!
فتون : اي طبعا دخلي لبسيه وهلق ببعتلك شذى تساعدك ..
فاتت ولبست الفستان واجت الموظفه ساعدتا فيه... كان فستان بسيط وناعم واكابري ولونو لون الفستق... والو حبات لولو بيضا بكل محل 
فتون : كيف ياانسه ان شالله عجبك ؟؟
عاليه : اي كتير حلو وناعم تسلم دياتك...
حاسبتها فيه وحطت عليها الجاكيت وطلعت من المحل والسائق وصلها عالفيلا...
طلعت ع غرفتها ولبست طقما الألماس كمان كان كتير نواعم ... ونزلت وكانوا المعازيم واصلين... وفجاه بتطفي الموسيقا بيجي ابوها لعندا ..وبمشي معها عالسجاده لعند كوشه العروسين والنَّاس عيونها متعلقة عليهن وهونيك كان مضر عم يستناها ...مسك ايدا  وقعدوا سوا عالكوشه
مضر : طالعه بتجنني كالعاده... انا جد محظوظ فيكي 
انا : وانت كمان حبيبي طالع كتير جنتل مان ...جمالي كلو اثر فيك ههه
كان كلامن كتير عادي وبارد ...بس
هيك كانت شخصياتن وهيك متعودين يكونوا مع بَعض ...ماعندن كتير اُسلوب مدح ووصف ..كانت كلماتن جديه ...مختصر مفيد 
قاموا رقصوا ع رواق وقعدوا والمعازيم كانوا مبسوطين وعم يرقصوا ويتعشوا ...والكل حاسدهن عاللي هنن فيه ...والكل مالو حديث غيرن
وحده من المعازيم عم تقول للتانيه: شوفي مااحلاهن،، هدول الناس الله بيكملها معهن من كل شي ..

يتبع للجزء الثاني…