مشهد من فيلم أنا حرة

- اقدر اعرف انتى ليه عايزة تخشى الجامعة؟
- عشان اتعلم
- العلم فى الكتب و مش ضرورى تخشى الجامعة علشان تقرئي أى كتاب 
- محدش هيصدق انى اتعلمت غير و في ايدى شهادة
- عايزة شهادة تعملى بيها ايه؟
- تبقى سلاح فى ايدى استغنى بيها عن الناس 
- حتى انا؟
- جوزى طول ما هو بيصرف عليا يقدر يذلنى ويفرض عليا ارادته و يعمل اللى هو عايزُه ... انا استحملت كتير علشان كنت محتاجة عمتى و جوز عمتى ...مقدرش افضل مستحملة طول عمرى علشان محتاجة جوزى
- الجواز مش اكل عيش يا امينة... الجواز يعنى اتنين بيحبوا بعض و بيثقوا فى بعض وعايزين يعيشوا مع بعض والراجل مبيصرفش على مراته علشان يذلها ولكن علشان هو محتاجلها زى ما هى محتاجاله ويمكن اكتر... هما الاتنين بيتعاونوا على الحياة ...هو بيشتغل بره البيت و هى بتشتغل جوه البيت
- بتشتغل فى البيت خدامة... يطردها وقت ما يعوز و يمرمط فيها وقت ما يعجبه... و افرض الحب اللى بتقول عليه ده انتهى تعمل ايه الست ...تفضل مستحملة الهم لانها مضطرة تعيش معاه...لأ... علشان كده لازم يبقى معايا شهادة ..مضطرش أقعد فى بيت مش عايزة أقعد فيه و ابقى حرة و جوزى يفهم انى زيي زيه .. أقدر استغنى عنه زى ما يقدر يستغنى عنى و يمكن لما يعرف كده يحترمنى و يبقى عليا
- عمر ما راجل احترم مراته علشان عندها شهادة ... بيحترمها لانها ست محترمة و يبقى عليها لانه محتاجلها و لأنه سعيد بيها و لأنها جزء من حياته
- و انت خاسس عليك ايه؟.. مش يبقى احسن لما اخد شهادة و أشتغل  و أحط فلوسى على فلوسك و نعيش أحسن ما كنا هنعيش
- انتى كمان عايزة تشتغلى !!
- و ليه لأ؟
- شغل البيت كفاية على الست بياخد كل وقتها 
- يعنى عايزنى اكنس واطبخ طول النهار والليل
- كفاية انك تقعدى فى انتظار جوزك ... الانتظار بيولد الشوق ... و الشوق بيولد الحب ... و الحب هو السعادة
- اسمحلى اقولك انك راجل خيالى مش واقعى
- اسمحى لى اقولك انك مش عايزة تتجوزى

فيلم أنا حرة - انتاج عام ١٩٥٩م.