يوميات طالبة جامعية

انا موناليزا مش حابة اقول اسمي الحقيقي 

انا عندي 18سنة كنت تالته ثانوي علمي علوم 

يوم النتيجة دا انا عمري ما هنساه ف حياتي كان يوم الثلاثاء 6/8/2024  كنت بتفرج علي فيلم خلاويص و لقيت بنت خالي بتكلمني بتقولي عملتي ايه ف النتيجة بقولها هي طلعت قالتلي اه قولتلها ماشي هبقي اجيبها بكره  و قفلت معاها و حاولت اجيبها و انا رايقه و مش متوترة خالص و كنت بكتب رقم الجلوس غلط و برضو مش متوترة و ماما كانت متوترة وانا اللي كنت بهديها و جبتها 67.56% و كنت فرحانه و راضيه اوي و اهلي ف الاول كانوا عادي هما اه مش فرحانين اوي بس عادي و نزلت روحت ل مدرس الانجليزي بتاعي مكنتش فاهمه حاجه المجموع دا يدخلني ايه ف هو كان مصدوم بس قالي ادخلي تجارة أو اداب انجليزي  بس انا جايبه 37 من 50 فيه وكان مصدوم برضو دا انا كنت أشطر واحده عنده أصلا و انا أصلا بحب الانجليزي و حليت فيه كويس و كنت طالعة بقول انا مقفلة انجليزي طب ازاي بجد حسبي الله ونعم الوكيل فيهم  اي حاجه كنت بفكر ادخلها مش هينفع بسبب الانجليزي اكيد ربنا ليه حكمه ف كدا 

و هدخل آداب علم نفس دي اصلا كانت plan B الحمدلله 

Plan A كانت حاسبات ومعلومات 

و روحت ل واحده من صحابي و اول ما شافتني عيطت و فضلت أهديها و اتكلم مع مامتها شويه و روحت نمت و صحيت كان خالتي الصغيرة و تيتا و خالي الصغيره موجودين و خالتي ادتني 200 جنيه و تيتا برضو و كانوا جايبين حاجه ساقعه و خالي مدانيش حاجه و لا كان جايب حاجه 

هما كانوا زعلانين و انا كنت بقولهم انتوا زعلانين ليه انا نفسي والله فرحانه و اتخانقنا كتيير بسبب أنهم عاوزني ادخل تربية و انا أصلا مجموعي مش جايبها و كمان مش هتقبل ف ولا قسم فيها و الحمدلله كتبت الرغبات بنفسي و هدخل الكلية اللي ربنا اختارهالي 

محدش كان راضي عن النتيجة دي و معرفتش افرح بسببهم و بابا كل شويه يقولي مجموعك دا هيدخلك ايه و كل شويه يزعقلي علي اي حاجه 

ولما قولتله انا عاوزه تليفون جديد قالي انا كنت قايلك لما تدخلي كلية الطب بيحسسوني بالعجز يعني أنا كان في أيدي ايه اعملوه و معملتوش 

ماما كانت كل شويه تقولي مش كنتي غشيتي كنتي زمانك دلوقتي داخلة كلية طب 

وكل شويه تزعقلي و تتخانق معايا من غير سبب انا بقيت مريضة نفسية بسببهم 

وانا كنت لسه ف تالته ثانوي من اول السنة لحد آخرها و هي تقولي تغسلي المواعين و تروقي و تطبقي الغسيل و لو معملتش حاجه منهم تفضل تتخانق معايا و تقول ل بابا و طبعاً أنا اللي ببقي غلطانه ما اهم حاجه رضا الوالدين و كانت كل ما تكلم عمتي أو خالاتي أو أي حد تقوله دي مبتعملش حاجه دي علي طول قاعده ماسكة التليفون كان بيبقي عندي دروس من 7 الصبح ل 8بليل و كنت ببقي مطبقة و كنت برجع ببقي بموت ومش قادره اتحرك و كانت برضو تخليني اعملهم و كنت ارجع اقولها فين الأكل تقولي اعملي ل نفسك وأما اقولها مش هاكل تقولي قومي اعملي ل اخوكي عشان جاي من الشغل تعبان و انا اللي كنت بلعب يعني ما أنا عندي دروس و بتعب اكتر منه مكنتش بتكلم كنت بعيط بس بقيت بتمني اليوم اللي همشي فيه من البيت دا و مش هرجعله تاني 

هما محدش فيهم يعرف عني اي حاجه صحابي بس هما اللي يعرفوا كل حاجه ربنا يخليهم ليا 

نقف لحد هنا انهارده و نكمل يوم تاني لسه ف حاجات كتير اوي عاوزه احكيها😂♥️