صوفيا وتيمور (نص مسرحى)
النص المسرحى................... (صوفيا وتيمور) للكاتب المسرحى إيهاب محمد حسن
مأخوذ عن النص المسرحى(شاعر على القمر) للكاتب المسرحى توفيق الحكيم
الفصل الأول
على سطح القمر..الإضاءة خافتة تشبه الغروب .. وميض متلاحق كوميض البرق يصاحبه موسيقى تحذيرية صاخبة
حالة من التوجس والارتباك.. تغشى المكان ..
مخلوق فضائي رقم 1لارين يندفع مسرعا.. وهو يصيح/
أستر يارب..أستر يارب....لازم نعلن حالة الطوارئ بسرعة...لازم نعلن حالة الطوارئ بسرعة..القمر فى خطر..القمر فى خطر..
مخلوق فضائى رقم2بارين يردد بشكل هستيرى/ يا قاعدين يكفيكو شر الجايين.. ياقاعدين ..يكفيكو شر الجايين..
يركض نحوه مخلوق فضائى رقم3زنزون/ إيه ده!!!؟..هو فيه إيه..//!!؟ هو فيه حاجة حصلت ولا إيه..!!؟
لارين /إيه يازنزون..هو إنت مش فى الدنيا ولا إيه.. ده سكان القمر كلهم عرفو الخبر..
بارين /ده خبر أسود ومنيل.. من ساعة ماعرفتو وأنا مابنمش من القلق
زنزون/ قلقتونى ياحماعة..هو فيه إيه!!؟
لارين/البشر
زنزون/اللهم أحفظنا..ماتفتكرولنا حاجة عدلة يا جدعان..مالهم البشر! ٱن شاء الله !!؟
بارين/جاين فى الطريق..
زنزون/يانهار أزرق..جاين يهببو إيه دول. .!!؟..
لارين/ قال إيه..جاين يعملو أبحاث علمية وياخدو عينات من
الصخور بتاعتنا عشان يفحصوها فى معاملهم الأرضية
بارين/ يا جماعة أنا مابطمنش للبشر دول خالص..ولا بتفائل بيهم..جيتهم عندنا هنا فى القمر.نذير شؤم.وخراب مستعجل..
زنزون/ والله العظيم إنتى عندك حق.. ده البشر دول
تاريخهم ماليان بلاوى..برك دم ..وحروب وظلم مالوش نهاية...
لارين/إحنا لازم نأمن على نفسينا من شرهم..ونحمى القمر
وسكانه من بطشهم ..
بارين/ لازم القمر يفضل دايما..قبلة الشعراء..ومصدر ألهامهم ..
لارين/ويفضل دايما وللأبد..عنوان المحبة..ورمز السلام..
أغنية عن السلام والمحبة تصحبها رقصة معبرة................
..............................................................................
تنتهى الرقصة...... تهبط على أرض القمر مركبة فضائية
يخرج منها ثلاث رواد فضائيين .. إثنين منهم يشرعان فى
إخراج أجهزة ومعدات تمهيدا لجمع عينات من الصخور والحجارة بينما الرائد الثالث ما ان تلامس قدماه أرض القمر حتى يقف مشدوها بلا حراك
الرائد الأول يهمس/ هو مالو متنح كدة ليه!!!؟
الرائد الثانى هامسا / الراجل ده أمره غريب بصراحة..بيسرح كتير ودايما مخه شارد..مايكونش مجنون!!؟
الرائد الأول/مجنون مين ياعم...ده مخه يوزن بلد... ده أنا قريت له ديوان شعر إنما إيه..!! عبقري..يخلى الحجر ينطق
الرائد الثانى/ إيه ده !!..هو شاعر!!؟..
الرائد الأول/ هو إنت ما تعرفش ولا إيه!!؟..ده شاعر كبير إوى
ومعروف.. ده ليه ديوان شعر مكسر الدنيا..إسمه أزهار السلام
الرائد الثانى/ أزهار السلام..!!..ياسلاااااام..ده عنوان جميل أوى..
الرائد الأول متداركا/ إيه ده..!!.. إحنا نسينا نفسينا..والكلام خدنا..يلا بينا نكمل شغلنا بسرعة..الوقت ضيق..عندنا مهام كتيرة لازم ننحزها...
الرائد الثانى/أه والله عندك حق.. يلا بينا...
يمضى الرائدان بعيدا..ويغيبان عن الأنظار ..
الرائد الثالث(الشاعر) مخاطبا كائنات غير مرئية/ أنا مش مصدق نفسى..!!.معقول أنا جيت عندكو هنا..!!..واقف وسطيكم..!!..بمشى على أرضكم..!!..شايف إللى إنتو شايفينو..وحاسس باللى إنتو حاسينو.. وكأنى واحد منكم..!!
تقترب منه فتاة جميلة فى ثوب أبيض
الفتاة(صوفيا)/ بسم كل سكان القمر اللامرئيين.. برحب بيك على أرض القمر..
الشاعر متداركا/ صوتك مش غريب عليا..تقريبا هو نفس الصوت إللى سمعتو بيهمس فى ودانى وأنا بكتب أول قصيدة فى ديوانى .. أزهار السلام..
صوفيا/معقول ..!!..لسة فاكر صوتى .!!..
الشاعر/طبعا..وهو ده صوت يتنسى..؟
صوفيا / همس القمر همسة وجع ..همس القمر همسة وجع
سمعها ورق الشجر وقع .. سمعها ورق الشجر وقع
لما الزتون شجره إتنزع... لما السلام عالأرض إتمنع
بكى اليمام..وبكى البجع ..
الشاعر /دى كلماتى..أول قصيدة فى ديوانى !!!!
صوفيا/وعشانها . اروع كلمات إتقالت وبرغم حزنها أهل القمر عشقوها ..ومش كدة وبس ده انا عندى ليك خبر هيفرخك
الشاعر/ إيه هو؟
صوفيا/ مجلس إدارة المناخ القمرى أعتمد قصيدتك دى إ
عشان تكون النشيد الوطني لكل سكان القمر..
الشاعر متهلل الأسارير/ مش معقول!!. ده أحسن خبر سمعتو فى حياتى...
صوفيا/ أقولك على سر كمان..
الشاعر/قولى..
صوفيا/ صدر قرار رسمى إنهردة من مجلس إدارة المناخ القمرى..إن إنت تكون الأنسان الوحيد من أهل الأرض إللى يقدر يشوف جميع سكان القمر الغير مرأيين.. وتسمع صوتهم كمان..
الشاعر متهلل الأسارير/ مش معقول!!..ده خبر مذهل..بتهيألى ده أسعد خبر.. مر عليا فى حياتى كلها..يا..يا.. إلا بالحق...إنتى أسمك إيه؟
صوفيا/أنا صوفيا..
الشاعر/ الله..إسم جميل..كأنه إسم ملك...لكن صحيح..إنتو.
..إنتو... إيه!!!بالظبط؟
صوفيا/مش فاهمة..!!؟
الشاعر/قصدى يعنى..!!...أنتو ملايكة...ولا جن..ولاإنس..ولا إيه بالضبط.
صوفيا/ إحنا بإختصار..مخلوقات مخلوقة من طيبة البشر ونور الملايكة...وعفرتة الجن... إحنا سر غريب من أسرار الرحمن ..ملوش مثيل..ولا ونظير فى الكون ده كله.
الشاعر/سبحان الله...الخلاق البديع
تقترب فتاة أخرى فى ثوب أبيض على رأسها تاج فضى لامع
الفتاة(أوليفيا)/أيها الأنسان المحبوب على وجه القمر..الشاعر تيمور.. ياذو القلب الطاهر .... عندنا ليك هدية
الشاعر (تيمور)مندهشا/هدية...!!
صوفيا/إعرفك..أختى أوليفيا..أميرة الهدايا على سطح القمر
الشاعر مندهشا/ أميرة الهدايا..!!!
أوليفيا/ هديتى ليك هى..تاج النور...
الشاعر/تاج النور!!!!
صوفيا/ دى أغلى هدية ممكن تمنح لمخلوق على وجه القمر.
أوليفيا/مصنوع من ياقوت بركان الفضيلة
الشاعر(تيمور)/بركان الفضيلة!!!!
أوليفيا/ده بركان خامل فى منتصف القمر...فى قاع البركان ده ثروة عظيمة من اللألئ والجواهر والياقوت
الشاعر(تيمور)/ كأنى فى حلم
أوليفيا تضع التاج على رأس تيمور
أوليفيا/بإسم شعب القمر العظيم..منحناك تاج النور..يا أمير النور....
يقترب من بعيد رائدى الفضاء يحملان صندوق ثقيل به عينات من الأحجار والصخور الملونة والمضيئة والفسفورية...
تمر كلا من صوفيا وأوليفيا من أمام الرائدين وتتوقفان للحظة..تدور كلا من صوفيا وأوليفيا حول الرائدان... اللذان
لايراهما وكأنهما شفيفتين..
تعبث صوفيا بقفى الرائد الأول ...الذي يتوقف للحظة...
الرائد الأول/إيه ده...!!؟ حاسس بهرش فى مناخيري...الله الله الله....حاجة بتلعب فى....قفايا ....هههههههه
الرائد الأول يتلوى/...وقف..وقف...نزل الصندوق. ياعم .. ههههههههههه....إيه ده...!!؟..إيه ده...!!؟حاجة غريبة قوى...
هههههههه...
الرائد الثانى/مالك يابنى فيه إيه...!!!؟ هو إحنا جاين هنا نهرج ولا إيه..!!!؟
الرائد الأول/لا ولا حاجة خلاص...الهرشة راحت....يلا بينا ..
أوليفيا تعبث فى قفا الرائد الثانى...الذى يضحك بدوره. ويتلوى ..
الرائد الثانى/إيه ده...!!!؟...هههههههه..حاسس بحاجة بتلعب فى أفايا.أنا كمان .. ....ههههههه ....
الرائد الإول/بسم الله الرحمن الرحيم...مايكونش القمر ده مسكون. ...
الرائد الثانى/ قصدك فيه عفاريت !!!؟
الرائد الأول/ وطى صوتك...ربنا يجعل كلامنا خفيف عليهم...
الرائد الثانى/ ياعم الشر برا وبعيد...ماتخوفنيش الله يخليك...
الشاعر مندهشا/غريبة ...!!! ده ماحدش منهم شايفكم خالص.....
صوفيا/ما أنا قولتلك...إنت الأنسان الوحيد فى الكون ده كله...إللى يقدر يشوفنا..ويسمعنا... لأننا بنظهرلك إنت بس فى صورة بشر..
تيمور/ صدق اللى قال ..إن القمر بلد العجايب .
أوليفيا/ فعلا قمرنا ده هو اعجب..وأغرب..وأطيب مكان فى ألدنيا دى كلها
صوفيا/والدليل على صدق كلامنا إن قمرنا العظيم..إنشق..من أكتر من ألف وربعميت سنة وكان السبب غضبه من ظلم الأنسان لأخوه الإنسان
تيمور/فعلا أنا قريت عن الموضوع ده فى كتب التاريخ والجولوجيا..وكمان القرٱن العظيم أكد عالحقيقة دى
الرائد الأول /إيه ياعم الشاعر ..!!؟. .إنت يتكلم نفسك ولا إيه...!!؟..
الرائد الثانى هامسا /ده شكله إتهبل ياعم...هما أصلا الشعراء دول مخهم طائئ..يعنى مالٱخر كدة..لاسعين.
الرائد الأول/هههههههه..ٱه والله عندم حق...لكن هو ٱتحدف علينا من أنهى داهيا ده.!!؟..
الرائد الثانى/ حسام بيه ياسيدى..هو إللى إعتمد ورقه كرائد فضاء بعد مانجح فى الكشف الطبى وكشف الهيئة..
الرائد الأول/طب وإيه يعني..!!!ما فيه ناس كتير إنطبقت عليهم كل الشروط اللازمة ونجحو كمان فى الكشف الطبي وكشف الهيئة..ومع ذلك إترفض ورقهم ومتقبلوش
الرائد الثانى/مالٱخر كدة..حسام بيه عايز يعمل منه ترند..دعاية إعلامية للمؤسسة الفضائية بتاعتنا.. عشان يتقال.إن ده أول شاعر مشهور فى الدنيا دي كلها يطلع على سطح القمر....
الرائد الأول مندهشا/ يخرب بيت دماغك ياحسام بيه .!!..ده انت طلعت عوقر....!!!..يعنى مالٱخر كدة.. عايز يعمل مصلحة على قفى الزبون...
الرائد الثانى /بالظبط كدة...القرد أبو سديرى ..إللى هياكل وش الترند...ويسمع فى كل حتة..
أوليفيا/ يا أمير النور..هنغيب عنك شوية..ونرجعلك...سلام..
تذهب كلا من صوفيا وأوليفيا....
تيمور ملوحا/سلام....سلام..يا أطيب مخلوقات الكون. يا أجمل من رأت عينى...
الرائد الأول هامسا / ده لسة بيكلم نفسه..!!
الرائد الثانى/تصدق إه... ....
الرائد الأول/ مايكونش ٱتهبل..!!؟
الرائد الثانى هامسا / مش بعيد. يكون فعلا إتهبل. طب وهنعمل إيه بقى دلوقتى...!؟...ده ممكن يبقى مصدر خطر علينا...ويبوظ رحلتنا العلمية دى..
الرائد الأول/ده مش كدة وبس...ده ممكن يأذينا كمان..
الرائد الثانى/لازم نبلغ مركز القيادة بالموضوع ده فورا عشان نخلى مسئوليتنا...
الرائد الأول/فعلا صحيح...لازم..
الشاعر/إنتو بتتوتوتو مع بعض بتقولو إيه!!!؟
الرائد الأول متلعثما/لا ولا حاجة...إحنا ..إحنا...إحنا...
الرائد الثانى/إحنا لازم نرجع الأرض دلوقتى حالا .
الشاعر /ليه بقى إن شاء الله..!!؟؟.و.إيه إللى مخليكو مستعجلين قوى كدة!!!؟
الرائد الأول/بصراحة... إحنا معانا فى الصندوق ده..كنز عظيم...ولازم نسلمه حسام بيه مدير مركز القيادة على وجه السرعة...
الشاعر مندهشا/ كنز عظيم!!!؟ وإيه هو الكنز ده!!!؟؟
الرائد الثانى/ عينات احجار وصخور مذهلة جمعناها من حوالين البراكين الخاملة إللى هناك دى...
الشاعر يفتح الصندوق فينتابه الذهول من روعة محتواه
الشاعر/دى أحجار كريمة..من الدهب الخالص واللؤلؤ المضئ والياقوت الأزرق...
الرائد الأول متهلل الأسارير/ هنبقى أغنى ناس فى العالم ..لأن الثروة دى نقطة فى بحر من الكنوز والمعادن النفيسة إللى شوفناها جنب البراكين الخاملة إللى هناك دي
الرائد الثانى/ شعبنا هيبقى أغنى شعب فى العالم..لما يمتلك كل الثروات العظيمة دى
الرائد الأول/وبلدنا هتبقى أغنى بلاد العالم...على الإطلاق
تيمور/بس الثروة دى ..مش من حق بلدنا بس .. دى من حق كل الأنسانية..وكل ٱنسان فى الأرض من حقه يكون له نصيب فيها
الرائد الثانى/ بس ٱحنا هنا بنمثل حكوميتنا ..يعنى حكوميتنا هى إللى أكتشفتها...
الرائد الأول/فعلا ده گلام سليم...يعنى هى ليها سبق الأمتلاك. والأنتفاع ..دونا عن كل حكومات العالم..
الرائد الثانى/ وإحنا كمان من حقنا نكون أغنى شخصين فى العالم. بصفتنا أول إتنين أكتشفو الثروة دى ..
الرائد الأول/من حقنا نمسك أعظم مناصب فى البلد...
الرائد الثانى/ وبنفوذنا وفلوسنا نقدر نصنع أعظم قنبلة نووية فى التاريخ. ترعب كل العالم
الرائد الثانى/قنبلة نقدر ندمر پيها العالم كله...ونبقى ٱحنا بس...ملوك الأرض. ..
الشاعر/ من هنا ييبدأ الطمع والجشع..والأنانية...من هنا بتتفتح أبواب الشرور والحروب .من هنا بيعزف الشيطان على قيثارة الجنون
الرائد الأول هامسا/..المجنون ده مش ناوى على خير...شكله كدة عايز يبوظ رحلتنا...ويضيع مستقبلنا ومستقبل بلدنا ...
الرائد الثانى/ شكله كدة فعلا...بس أنا مش هسمحلوه بكدة...
ولو على جثتى ..
تيمور/نصيحة منى مافيش داعى ننزل بالصندوق ده لكوكب الأرض. ولا نسلمه لمركز القيادة الأرضية..
الرائد الأول/ ممكن بقى ...ياحكيم زمانك تقولنا ليه عايزنا نسيب الثروة الضخمة دى هنا وننزل كوكب الأرض إيد ورى وأيد قدام..
الرائد الثانى متهكما/أقولك انا ليه ياصاحبى...لأنه من الٱخر كدة راجل فقرى...ووش فقر..وبيكره الخير لنفسه..ولبلده
الرائد الأول/عندك حق..وزود عندك كمان..إنو راجل مريض نفسى ومجنون ..
الشاعريصرخ/لا..أنا مش مجنون..أرجوكو أفهموني...أنا إنسان ..إنسان..عايز يعيش فى سلام...وبلده تعيش فى سلام..
الرائد الأول/ الثروة هى السلام....
الشاعر/الثروة هتفتح ابواب الطمع بمفاتيح الأنانية وهتجلب
على الناس ويلات الحروب
الرائد الثانى/أسكت يامحنون...إنت مش فاهم حاجة...الثروة يعنى القوة يعنى العز والجاه
الشاعر/الثروة فى إيد الأنسان بفيت فى معظم الأحيان معول للهدم و التدمير..
تمر لارين فى صورة فتاة فى ثوب أبيض
لارين /مع إنها فى الأصل كانت أداة للبناء والتعمير
تيمور/الثروة فى إيد الأنسان فى معظم الأحيان بقيت سلاح التجويع والحرمان...
تمر بارين في صورة فتاة فى ثوب أبيض
بارين /مع إنها فى الأصل كانت بوابة الشبع وطريق العطاء
تيمور/الثروة فى إيد الإنسان بقيت سجان غضبان وقضبان وقاضى ضميره خربان
يمر زنزون فى صورة فتى فى جلباب ابيض
زنزون /مع إنها فى الأصل كانت حصان يركض فى بستان العدل وجناين أمان
تيمور يصيح/يا أهل القمر ساعدونى ..إمنعو وصول كنوز القمر للأرض. يا أهل القمر ساعدونى أمنعو وصول كنوز القمر
للأرض...
الرائدان بصوت واحد مجنون ...مجنون...فقرى ومجنون
الشاعر يسقط أرضا..يتقوقع ألما
يمر زنزون بجوار رائدى الفضاء
زنزون فى صورة إنسان يرتدى جلباب ابيض/ لا للتنمر....لا للتنمر..
تمر لارين فى صورة فتاة فى ثوب اليض
لارين/لا لسوء الظن..وأهل الشر فى كل مكان وزمان
تمر بارين فى صوة فتاة فى ثوب أبيض
بارين/ لا لكل أعداء المناخ فى كل مكان
تمر أوليفيا فى ثوبها الابيض
أوليفيا /لا لهمجية الإنسان
تمر صوفيا/لا للطمع لا للجشع...والجهل كمان ..
تيمور ينهض
تيمور/ساعدونى .ساعدونى ...ساعدونى يا أطيب مخلوقات الكون
الرائد الأول/هههههههه...المجنون رجع يكلم نفسه تانى.
الرائد الثانى/ صدق اللى قال..لا تصاحب المجنون...ولا تروح معاه حتة.... هههههههه
الرائد الأول هامسا / إيه رأيك نخبطه على دماغه. وأول مايغمى عليه نحطه فى المركبة الفضائية وتربطه بحبل لحد مانوصل كوكب الأرض وهناك نقدم للقيادة تقرير باللى حصل
الرائد الأول/ لا ياعم...ليموت ولا حاجة من الخبطة..وندخل فى سين وجيم...وبدل مانتهنى باللى فى الصندوق...تروح أبو زعبل....
صوفيا/ يا أمير النور...أرجع كوكبك...وقلوبنا معاك. وروحنا معاك...
الشاعر/ حاولت على قد ماقدرت لكن طمعهم كان أقوى منى
أوليفيا/يا أمير النور..أرجع كوكبك...وقلوبنا معاك...وروحنا معاك...
يعود الشاعر للمركبة صاغرا منكسرا...وهو يشير للفضائيين
هامسا
الشاعر/سلام...يا إطيب مخلوقات الكون..يا أجمل من رأت عينى...
الفصل الثاني
غرفة مكتب مدير هيئة غزو الفضاء العلمية..
المدير يجلس إلى مكتبه منهمكا فى قراءة سطور أحد أوراق ملف بإهتمام..خلف مكتبه شاشات تلفزيونية تنقل صور مباشرة للفضاء الخارجى وحركة الكواكب والمجرات.
تليفونه الأرضى يرن...يرفع سماعة التليفون
المدير ينتفض مرتبكا/تحت أمر معاليك يافندم..التقرير هيكون على مكتب سيادتك بكرة الصبح إن شاء الله
لحظة صمت وإصغاء
المدير/ماهو يافندم...أصل. إييييه..
لحظة صمت...
المدير/ حاضر يافندم ..إللى تشوفوه يافندم .. إحنا خدامين سيادتك يا معالى الباشا.. ..هبذل كل جهدى إن شاء الله إن التقرير يوصل سيادتك بعد ساعة من دلوقتى...
لحظة صمت وإصغاء.
المدير/ حاضر..يا معالى الباشا..إن شاء الله يكون تقرير إيجابى..ويسعد قلب سيادتك
الطرف الٱخر يغلق سماعة التليفون..المدير يغلق السماعة .
المدير زاعقا/ يارباب...يارباب...
تركض رباب السكرتيرة مهرولة
رباب/خير ياحسام بيه....فيه إيه...!!!؟..
المدير(حسام)/ الدنيا كلها مقلوبة فوق دماغى..وزير الأعلام بنفسه لسة مكلمنى دلوقتى..
رباب/وإيه طلبات سيادته ؟
حسام/ عايز تقرير بالعينات إللى جات مالقمر إمبارح.. بيقول إن كل وكلات أنباء العالم..فى إنتظار نتيجة التقرير ده...
رباب/يافندم التليفونات مابتبطلش رن..مكتب حهاز شئون البيئة..وزارة المالية.. السفارات..الصحافة..المراسلين. الدنيا كلها بتسأل...العالم هيتجنن..وكأن التقرير ده هو المنقذ للبشرية دى كلها...
حسام/إنتى بتقولى فيها...!!. ماهو فعلا العالم بقى زى الغرقان..إللى بيدور على قشاية..يتعلق فيها..
رباب/وطبعا التقرير ده..هو القشاية..إللى هتنقذ العالم...
حسام/بالظبط.. أو تقدرى تقولى هو بوابة على بابا..إللى هندخل منه العالم عشان يغرف من خير القمر...
رباب/ يعنى يافندم.. العالم ده كله هينتعش إقصاديا وهيبقى عالم مترف
حسام/بالعكس العالم كله هيبقى فقير..وبلدنا بس إللى بنوكها هتبقى متخومة بالفلوس
رباب/ وساعتها هتنبقى إحنا فوق فوق والعالم كله تحت رجلينا .
يدخل إلى الغرفة تيمور...
تيمور/ هنبقى إحنا فوق فوق والعالم كله تحت رجلينا. إحساس عظيم....إنك تحس..إنك بقيت فيل..والعالم كله بقى مجرد نملة تحت رجليك ..مش كدة يا حسام بيه..؟
حسام/ شكلك عقلت ياتيمور ..وبدأت تعرف فين مصلحتك
تيمور/ كلها نص ساعة ونعرف كلنا مصيرنا
حسام/ قصدك نتيجة التقرير هتظهر بعد نص ساعة؟
رباب/أيوة يافندم..أنا لسة جاية دلوقتى من المعمل وقالولى إنهم هيبعتو تقرير العيينات على الأميل بتاع سيادتك بعد نص ساعة بالظبط
تيمور يخرج ورقة من جيب سترته و يضعها على سطح مكتب حسام
تيمور/ مبروك عليكم خير القمر كله..وٱدى إسقالتى
حسام/ياسلام ..بس كدة ..
حسام يوقع على الأستقالة
حسام/ ده يوم الهنا ويوم المنى لما نمضيلك على إستقالتك من عندنا ..طالما دى رغبتك ياشاعرنا العظيم...
تتهلل أسارير رباب..مع صوت نغمة رسالة وصلت لتوها على جهاز الكمبيوتر على مكتب حسام
رباب/يظهر إن التقرير وصل يافندم..
حسام /إطبعى التقرير فورا .
تطبع رباب التقرير ورقيا وتسلم الورقة لحسام
يا تفحص حسام محتوى الورقة بدقة..وإهتمام بالغ
يغشى الوجوم وجه حسام وتتسمر ملامحه
رباب/خير يا حسام بيه!!!؟...إيه الأخبار..!!!؟
حسام/ العيينات ماطلعتش أحجار كريمة...ولا دهب لولا ياقوت..
رباب/أمال طلعت إيه..!!!؟
حسام/طلعت مجرد صخور وحجارة...حاجات مالهاش أى لزمة...
رباب/يا خسارة...صدق اللى قال..جات الحزينة تفرح..مالقيتش ليها مطرح ..
تيمور...ينظر إلى باب الغرفة.. حيث تدلف منه صوفيا فى ثوبها الأبيض...
صوفيا/ بسم كل سكان القمر اللامرئيين بهنيك بإنتصار السلام
تيمور مذهولا/إنتى إللى غيرتى نتيجة التقرير!!!؟
صوفيا/أنا إللى بدلت العيينات القمرية..بصخور وأحجار عادية..تشبه كتير صخور وأحجار أرضكو...
تيمور مبتهجا/ألف حمد وشكر ليك يارب.. ألف حمد وشكر ليك يااااارب ...
تمت بحمد الله وفضله
بقلمي/إيهاب محمد حسن
