"ليلة سقوط روما" الجزء ٣
*«لـيـلـة سـقـوطـ رومـا».*
*الـجـزء الـثـالـث.*
بصالة كبيرة بواحد من الفنادق اللي بالبلد .. كل حدا بيجي لهون لغاية معينة .. شي جاي يصرف مصاري على لعب البوكر .. شي جاي مشان رغباتو الشهوانية .. شي جاي يعوض خسارة.. وشي جاي مشان ينسى همومو ويغرق حالو بمتاهات جديدة
عوحدة من الطالولات كانت قاعدة روما بكل ثقة عم تلعب بقلب قوي وما هامها شي ..
فجأة حست بإيد انحطت على كتفها .. رفعت عيونها لفوق وشافت واحد غريب واقف جنبها وايده على كتفها بكل وقاحة
مسكت ايده ونزلتها بكل هدوء .. بس رجع حطها على كتفها
نزلت عيونها واخدت نفس وتمتمت ..: انا ما عم احسِن عيش ليلة هادية بدون ما كسر راس حدا
قرب وجهو منها ..: حكيتي شي
بحركة سريعة رجعت راسها لورا وضربت وجهو بمأخرة راسها ..
من قوة الضربة اختل توازنو ورجع لورا والدم على انفو
هجم عليها وحاوط بإيده رقبتها
روما من بين اسنانها ..: انت طلبتها
رفعت رجلها وضربتو ضربة قوية تحت الحزام
ترك رقبتها ووقع عالارض موجوع
اطلعت عليه بإحتقار ..: لما بدك تدخل على عش الدبابير بدك تعمل حساب لسعهن
حملت حالها وطلعت من الصالة
قبل ما تطلع من الصالة كزت على اسنانها ورجعت لعند الرجال وعيونها بنقطو غضب .. مسكت قنينة مشروب وكسرتها براسو
اخدت نفس ..: لسا ما نشفى غليلي .. انا بعرف كيف ربيك
حاولو حراس الصالة يهدوها ويمسكوها بس ما عم يقدرو
انتبه واحد من الحراس على الرجال اللي ضربتو مرمي عالارض وفي دم نازل من راسو
صرخ فيها ..: لك انت شو عملتي .. اطلبو الاسعاف
صرخت روما ..؛ اسعاف شو .. خليه يموت لحتى يعرف كيف يتحرش فيني تاني مرة
الحارس: امسكها لا تخلوها تروح
مسكوها تنين من الحراس والثالث طلب الاسعاف وواحد طلب الشرطة
روما بتهكم ..: ولااااو كل هالشي مشان واحد ما بسوى قشرة بصلة .. متحرش حيوان
الحارس : هدا صاحب المكان اللي حضرتك فيه
روما بإستهزاء ..: OMG. ياه ما عاد فيني وقف على رجلي من الخوف .. اسندني .. وشو اعملو . غلط وتربى .. نقطة واقلب صفحة
لفت حالها مشان تمشي .. بس الحارس كان اسرع منها ومسكها من ايدها
الحارس؛ على وين يا حلوة ..
لفت ايده وحطتها ورا ظهرو ..: بتحب لقحك جنبو !!
بنفس الوقت وصل الاسعاف للفندق وبعدها وصلت الشرطة
حملو الاسعاف صاحب الصالة والشرطة اخدت روما للمخفر
__
بالمخفر
خبط الشرطي المناوب على الطاولة بعصبية ..: عم احكي معك .. وقفي متل الناس بلا ما حطك بالحجز
روما: لي جايبيني لهون وانا اللي مُعندى عليي
الشرطي : فتحتي راس واحد وبتقوليلي مُعتدى عليه !!
روما: تحرش فيي اسكتلو!
الشرطي: لا افتحي راسو
روما: وهدا اللي عملتو .. تحرش فيي ودافعت عن حالي .. بسمو بالقانون الدفاع عن التفس
زادت عصبية الشرطي اكتر من برودها وصرخ ..: يا عسكري
دخل العسكري
الشرطي: خدها وحطها بالحجز ليبان لالها صاحب
قرب العسكري منها
بعدت عنو وقربت لمكتب الشرطي ..: انت لو تخليني اقابل واحد رتبتو اعلى منك رح تكون مبسوط
صرخ الشرطي:يا عسكري ..
روما: انت عارف انو فرع مكافحة المخدرات قالبين الدنيا عليه لهدا الحشرة ومو عارفين يمسكو عليه دليل
ركز الشرطي معها وبكلامها
روما: وانا عندي الدليل
صفن بكلامها شوي ..: يا عسكري خليك معها هون ..
طلع الشرطي من مكتبو وتوجه لرئيسو وخبرو بكلامها .. طلب من رئيس القسم انو يتواصل مع فرع المخدرات باسرع وقت
_____
بعد ساعة
وقفت روما بنص المكتب ..: انا لامتى بدي ابقى ناطرة .. انتو مفكرين اني هالقد فاضية
الشرطي: احترمي حالك ولي بلا ما ارميكي بالحجز
روما : جرب اشوف ..
خبط الشرطي عالطاولة..: بلا وقاحة .. لا تخليني اقلب عوجهي التاني
كانت رح تحكي وترد عليه بس سكتت لما شافت الباب انفتح ودخل منو شخصين والشرطي وقف واعطى التحية
الشرطي: احترامي سيدي .. تفضل حضرة المقدم كريم .. تفضل حضرة الرائد ماجد
كريم: وين البنت اللي قلت عليها
روما: بنت!!
التفت كريم للصوت وشاف روما واقفة وعلى وجهها علامات انزعاج
ركز فيها منيح وبلش يراجع ذاكرتو وين شافها
صحي من شرودو على صراخها
روما بصراخ ..: مين هدول اللي جايبهم .. لحظة مو انت تبع الفراولة
صدحت ضحكتها بكل المكتب
ابتسم كريم ابتسامة صغيرة بعد ما تذكرها وعرف وين شايفها
اطلعت عليه روما وشافت ابتسامتو..: وانت عشو بتتبسم
صرخ فيها الشرطي..: احترمي حالك
روما : انا محترمة غصب عنك
رفع كريم ايده ..: فيكو تتركونا لحالنا
الشرطي: حاضر سيدي
طلع الشرطي وماجد من المكتب وبقي كريم وروما
قعد كريم عالكرسي ورا طاولة المكتب واشر لروما تقعد
كريم: تفضلي انا سامعك .. شو اسمك بالاول
ركزت روما قعدتها ..: ملاك.. اسمي ملاك
ركز كريم فيها وبعيونها ولاحظ انن عاديات مو ملونة ..: ملاك .. حلو
روما بعصبية..: جاي لهون لتتغزل بإسمي
كريم: ابداً .. انا المقدم كريم .. حكالي الشرطي انو عندك معلومات عن صبري .. تفضلي انا سامعك
روما: ايه ها هيك فتنا بالجد .. بالصالة اللي كنت فيها شفت حركة غريبة عند المصعد اللي باخر الصالة .. المصعد الخاصة بالعاملين عاساس ..
كريم: وكيف قررتي انو في حركة مو مزبوطة
روما: المصعد ما في عليه حراسة ابداً .. مع انو كل شبر بالصالة عليها حراسة .. وما في غير صاحب الصالة ومديرها اللي بنزلو بهدا المصعد .. رغم انو المصعد للعمال بالاساس .. وانا واعوذ بالله من كلمة انا .. هيك بصنعة لطافة رحت لهناك بدون محدا ينتبه ونزلت للطابق السفلي وشفت كل شي بصير هناك وصورت كل شي بتلفوني ..< طلعت تلفونها وفتحت عالصور>..
كريم: وكيف محدا شافك
روما: قتلك ما في حراسة وكأنها منطقة ميتة وانا شكيت من هالشي وكأنو محدا بعرف فيها غير صاحب الصالة والمدير ..
كريم: حلو كتير .. انت رح تبقي معنا هون لحتى اتأكد من كل شي حكتي
روما: لي بدي ابقى هون .. انا لازم روح
تجاهل كريم كلامها واخد تلفونها ..: وهدا رح يبقى معي .. يا عسكري .. شوف مكان مناسب تنام فيه الانسة ..< اطلع عليها بنظرات تفحصية >.. انسة مو !!
تجاهلت كلامو ومشت من جنبو ووجهت كلامها للعسكري..: وبدي اكل كمان
كريم : جبلها اكل
العسكري حاضر سيدي
__
بفرع مكافحة المخدرات
دخل كريم وماجد بسرعة لغرفة الاجتماعات
كان اللواء ساهر على راس الطاولة وعلى يمينو سهر وبعض الضباط
وصل التلفون بشاشة العرض ..: وصلنا اخبارية عن المكان اللي صبري ال*** بخزن فيه بضاعتو.. شوفو معي الصور .. المكان بنفس صالة الالعاب بالطابق الارضي
اللواء ساهر: وكيف وصلت لهاي المعلومات والصور
كويم: المهم وصلنا .. حالياً صبري بالمشفى بعد ما تعرض لاعتداء .. ومتل ما وصلني انو ما في حدا بعرف بالمخرن غير صبري ومدير الصالة .. ومدير الصالة حالياً برا البلد .. راح استغل هالشي واروح انا وماجد للصالة ونشوف المكان منيح
___
نزل كريم من سيارتو بعد ما وقفها قدام الفندق
دخل وراه ماجد بكل هيبة للصالة وتوجهو لوحدة من الطاولات القريبة عالمصعد اللي قالت عنو روما
قرب ماجد من كريم وهمسلو ..: انا مو مرتاح لهاي البنت.. وشكلو في وراها سر كبير
كريم: لي انا مرتاحلها يعني.. !!
ماجد: انا شاكك انها كانت تعرفو لصبري من قبل .. مو معقول هيك بدون سبب تخبر عنو ومعها كل الادلة
كريم: بدي شوف لوين حابة تصل .. وهيك بنضرب عصفورين بحجر
ماجد: شو ناوي
كريم: كل شي بوقتو حلو .. هلق اسمعني .. انت اقعد العب شوي وانا راح شوف المكان
ماجد: حاضر
قام كريم وقعد ماجد مكانو
توجه لعند المصعد وتفاجئ انو جنب المصعد في حمام مو للاستعمال .. التفت حولو وشاف الحراس عند الباب الامامي للصالة بس عيونهن مسلطة على الطاولات .. ومتل ما حكت روما هاي البقعة الوحيدة الميتة بالصالة بدون حراس وبدون كاميرات
ضغط على الزر المصعد وفتح بسرعة … نزل فيه بهدوء للطابق الارضي
متل ما حكت كان ممر مظلم وفي كتير غرف .. فتح اول غرفة وابتسم ابتسامة عريضة بعد ما شاف البضاعة مخزنة فيها
بسرعة اعطى اشارة لماجد وللقوات لحتى تقتحم المكان .. واعطى اشارة للعساكر اللي بالمشفى لحتى يتحفظو على صبري ويأمنوه منيح
خلال دقايق كانت القوات محاصرة الصالة ومتحفظة على كل البضاعة
_____
طلع كريم بسيارتو وتوجه للمخفر اللي مووجودة فيه روما
دخل للغرفة لعندها ..: اعطيني بطاقة الهوية
وقفت روما ..: لي بدك ياها ؟
كريم: شو لي .. حابة تبقي هون يعني ؟
طلعت جواز السفر من جيبها ..: لا شو ابقى هون .. تفضل هدا جواز السفر ما معي هوية مضيعتها
اطلع عالجواز منيح ..: معك الجنسية الالمانية
روما: ايه امي المانية ونولدت بالمانيا
ما علق على كلامها وركز بعيونها منيح ..
روما بعصبية..: هالوو عيونك بقلعهن .. ركز بشغلك بس
طلع من الغرفة اخد صورة للجواز وبعتو مسج لماجد ( اكشفلي عليها )
رجع دخل لعندها ..: تفضلي فيكي تروحي
روما: قبضتو عليه
كريم : مو شغلك
قربت منو بكل اغراء .. رجعت شعرها لورا ..: لي هيك ناشف انت
قرب تمو من ادنها ..: بلاها هاي الحركات الرخيصة
لف حالو وطلع من المخفر وهي بعدها مصدومة من كلامو
كزت على اسنانها وتمتمت ..: الا اطلع بروحك يا دون .. انا ينقلي رخيصة .. بس هدا الكلب وين بدي الاقي هلق .. ماشي كلو محسوب عليه .. والكلب التاني رح رجعك لعند سرمايتي
لفت شعرها كعكة بطريقة عشوائية وطلعت من المخفر متوجهة لبيتها
_____
بفرع مكافحة المخدرات وبالتحديد بغرفة التحقيق
قاعد كريم عالكرسي بطريقة مستفزة ..: جبنالك رفيقك لهون واعترف من اول سؤال حتى ما لزم الامر للعنف .. شو رايك تعترف انت كمان .. اساساً ما في داعي .. كل الادلة ضدك والمدير اعترف عليك والصالة الك والبضاعة موجودة فــــــ .. القضية طلعت عمقاسك ..
التزم صبري الصمت وما جاوب
ضحك كريم بصوت عالي ..: حلو جو السسبنس اللي عاملو ..
فتح الكمبيوتر اللي قدامو ..: شكلك ما عم تصدقني .. لحظة شوف ..
لف الكمبيوتر لعندو وشغل فيديو اعتراف شريكو
كريم: يلا .. هات نسمع منك ..
صبري: هاي البضاعة لدون ..
ابتسم كريم ..: قول غير هيك
صبري: اخدتها منو من فترة .. اخدتها بعد ما سلمتو للشرطة ..
فتح كريم على صورة ملاك ..: وهاي بتعرفها
كز صبري على اسنانو ..: بنت الحرام
كريم: بتعرفها
صبري: لا .. بس واضح وجهها سعد عليي
صرخ كريم ..: يا عسكري .. خدوه
دخلو ثلاث عساكر وكلبشو ايدين صبري واخدوه
كريم: دخلي الباقي
دخل العسكري واحد من الحراس وبلش تحقيق معا .. بس اتبين انو الحراس ما بعرفو شي عن شغل صبري وشريكو
فتح كريم كمان مرة على صورة ملاك ..: وهاي بتعرفها ؟ يعني اجت قبل بمرة عالصالة
الحارس: سيدي الصالة كل يوم بفوتها الف شخص كيف بدي اتذكر كل شخص
كريم: اكيد زباين الصالة معروفين
الحارس: طبعاً .. الزباين الكبار معروفين .. وبعرفهن واحد واحد
كريم: وهاي ما شفتها قبل
الحارس: لا سيدي.. هاي كانت اول مرة بتيجي عالصالة ..
ابتسم كريم ..: تفضل
_____
دخل كريم على مكتبو ووراه دخل ماجد
قعد ورا مكتبو ..: متل ما توقعت .. هاي في حدا باعتها لعند صبري ومفهمها شو تعمل
ماجد: مين رح يكون؟
ايتسم كريم بخباثة وهمس بداخلو ..: (دون)
ماجد: شبك بتتبسم لحالك
كريم: لا ابداً .. بس انا متأكد انها غبية وهيك عملة ما بتنعمل .. بس رح امشي وراها لشوف شو اخرتها
ماجد: شو تمشي وراها يعني .. بدك تراقبها ؟
حمل اغراضو وتوجه للباب ..: كل شي بوقتو حلو
__
بمكان بعيد عن المدينة
كان دون واقف قدام المراي وعم بحط اللمسات الاخيرة .. مسك العطر وبخ على حالو
زبط ياقة القميص واخد نظرة سريعة على حالو وطلع
نزل عالدرج بكل وقار
فؤاد: ايــه شو هدا يا معلم .. نار..
دون: خلصت وصلتك .. الحقني
فؤاد: وراك
تناول فؤاد كاسين مشروب وتوجه لعند دون
قدم كاس المشروب
دون : شو في جديد
فؤاد: اي جديد
دون: روما ..
فؤاد: كل يومين عم تتصلي بدها تقابلك او تحكي معك
دون: بلشت تعملي وجع راس ..
فؤاد: بس انا عندي سؤال .. هاي المهمة اللي كلفت روما فيها شو كان الها داعي .. برصاصة وحدة كان فيها تنهي الموضوع ولا هاللفة كلها ..
ركز نظرو بالعدم ..: لا لازمة .. بخلص من عصفورين بحجر واحد
بانت علامات الصدمة على وجه فؤاد..: شو ..!!!! بدك تتخلص من روما
درن: بلشت تعملي مشاكل انا بغنى عنها .. وما اللي خلق على وجع الراس .. بدي ارجع للشغل النظيف
فؤاد: بس انت ..
قاطعو ..: لا تقلي بحبها ولا شي .. ما في عواطف بالشغل .. ورما بلشت تطلع عن سيطرتي وما عاد فيني اضبطها وانت شايف هالشي
فؤاد: بس انو تخلص منها ..
دون بغضب ..: ما تركتلي مجال للتفكير .. وبطلت متل الاول .. بطلت البنت الذكية اللي كنت اعتمد عليها .. المهمة كانت عادية بس من بعد القصة اللي عملتها غيرت كل الترتيب ..
اطلع عليه فؤاد بنظرات استغراب
دون: لا تطلع عليي هيك .. لو بعدها ذكية متل الاول كان ما مرقت عليها شغلة صبري بهالسهولة ..
فهم فؤاد قصد دون ..: معك حق .. اساساً انا كنت متحملها ومتحمل تصرفاتها مشانك بس .. بس في شغلة يمكن انت ناسيها
اطلع عليه ..: شو ؟
فؤاد: اذا قبضوا عليها وعرفوا حقيقتها ..
قاطعو..: شغلة من تنتين .. يا اما بتقتل حالها .. يا انو بحاولو يقتلوها .. وبأحسن الحالات بترجعلي وانا بقتلها بإدي
فؤاد: او بمسكوها وبتعترف علينا
ضحك دون بمسخرة..: لهيك اخر فترة حاولت خليك تبعدها عن الشغل الاساسي..
ضحك فؤاد بصوت عالي ..: والله مالك قليل .. داهيـــــة
____
بعد مرور اسبوع
قاعدة بالبيت اللي استأجرتو جديد وعم تقلب بالتلفون
صايبها ملل رهيب ..
عصبت ورمت فنجان القهوة بالحيط ..: وبعدين مع ام هالعيشة .. انا بدي ابقى محبوسة هيك كتير
مسكت التلفون كمان مرة ..: وهدا الحيوان ما بدو يدقلي .. مرق اسبوع وما تحرك
وقفت واطلعت على انعكاس صورتها بقزاز الشباك وابتسمت بخباثة ..: لابد بالهجوم المباشر
بسرعة توجهت لغرفتها واخدت بنطلون وبدي اسود لبست تيابها.. فردت شعرها على كل ظهرها .. اخدت نظرة سريعة على حالها .. كانت رح تمشي بس رجعت شالت العدسات عن عيونها وطلعت من البيت
ركبت سيارتها وتوجهت للكافية ..
دخلت للكافيه اخدت قهوتها وطلعت .. وصلتها مسج ابتسم ابتسامة صغيرة وانطلقت
بعد مشي بالسيارة تقريباً ربع ساعة وصلت للمكان المحدد
وقفت سيارتها على جنب الطريق واخدت نظرة سريعة عالشارع ..
ابتسمت لما شافت سيارة كريم واقفة جنب الشارع ..: سامحني بس انت اجبرتني اعمل هيك من يباسة راسك
نزلت من السيارة ودقت لحدا .. ضلت تمشي لوصلت للبناية اللي براقب فيها كريم
حطت التلفون على ادنها وتعمدت توقف بنص الشارع ..: ايوا انا وصلت البناية اللي عاليمين ولا اليسار
بالمقابل كان كريم مع افراد الشرطة بالسيارة .. توسعت عيونو بس لمحها من بعيد واقفة بنص الشارع
واحد من افراد الشرطة..: حضرة الضابط وصل الهدف التاني
كز كريم على اسنانو..: اي هدف تاني !! هدا مو الهدف التاني
بهالاثناء وصلت سيارة سودا وقفت قدام البناية المقصودة ونزل منها ثلاث شباب معن ثلاث شنطات
كريم : هلق وصل الهدف التاني
دخلو الشباب للبناية وبعدها نزلو للطابق الارضي
كريم : جاهزين
الكل : جاهزين
بهالوقت روما دخلت للبناية التانية ووقفت ورا الحيط لحتى تراقب شو عم يصير
نزل كريم وفريقو بهدوء ودخلو للبناية تحت انظار روما
خلال دقايق كانو ماسكين العصابتين ومحرزين البضاعة واخدوهن للفرع
طلعوا افراد الشرطة بالسيارات وبقي كريم بالشارع عينو على البناية اللي دخلت فيها روما
اخد قرارو وراح للبناية .. دخل وشافها نازلة عالدرج وعم تحاكي حدا وتودعو
وقف باول الدرج ..: رح حاول صدق انها صدفة
اطلعت عليه من فوق لتحت ..: بس ما تكون مفكر اني عم راقبك مثلاً..
كريم : مثلاً
تجاهلتو وكملت مشي بس مسكها من ايدها وشدها لعندو .. التقت العيون ببعضها .. صابو قشعريرة بكل جسمو بعد ما شاف عيونها ..
بعدت ايده عنها ..: لو سمحت .. لازم روح
طلع من شرودو ..: ممكن تقبلي عزيمتي على فنجان قهوة ؟
روما: بعتذر ما تعودت اطلع مع حدا
تركتو ومشت بسرعة ..
بس هالمرة كان مستحيل يتركها .. في شي بداخلو بقلو لازم يبقى معها اطول فترة ممكنة
ركض وراها بسرعة ووقفها ..: هون قريب
روما بغرور..: ما بنفع .. عندي شغل مهم
ركبت سيارتها وما اعطتو اي اهتمام وانطلقت .. تاركتو وراها عم يسب حالو لي حكى معها هالكلمتين وازعجها
_____
ابتسامة عريضة على وجهها بعد نجاح خطتها .. متل ما قال دون .. عيونها ساحرات وممكن يسحرو اكبر رجال بالدنيا ..
وصلت لبيتها وقفت السيارة بموقف البناية الخارجي وطلعت لبيتها
دخلت عملت فنجان قهوة وحطت على الساعة عشر دقايق توقيت وابتسمت
مرق عشر دقايق ورن جرس الباب .. ابتسمت وكانت عارفة انو كريم عالباب .. كانت متأكدة انو رح يجيي وراها ويعرف بيتها من العنوان اللي تركتو اخر مرة بالمخفر
وقفت بكل ثقة وراحت فتحت الباب
روما: هدا انت؟ خير شو بدك؟
كريم: لازم نحكي
روما: هون..
وقبل ما تكمل جملتها كان فايت
روما: يا حضرة الضابط ما بنفع هيك ..
كريم: مين انت ؟
صفنت روما فيه وبملامحو الجدية ..: شو يعني مين انا ؟
استعاد كريم ملامحو الباردة ..: يعني هيك بدون سبب جيتي وسلمتينا تاجر مخدارت .. يعني يوم واحد دخلتي عالصالة واكتشفتي كل شي موجود هناك وجيتي خبرتي عنو .. وما بدك اسألك مين انت
روما: بترتاح اذا قلتلك اني بشتغل مع تاجر مخدرات .. هدا اللي حابب تسمعو
كريم: ..
روما: واحد حيوان متحرش وانكب بالسجن لي شاغل بالك فيه
وقف وراح لعندها وعيونو بعيونها ..: ملاك ..
للحظة دق قلبها بدون ما تعرف السبب
كريم: عيونك حلوات وغريبات ..
روما: …
كريم: بس لما شفتك بالمخفر ما كانو بهالالوان
اخدت نفس ..: بحط عدسات .. مشان مو كل حدا شافهن ينغرم فيهن
تنحنح كريم وعرف حالو خبص ..: احــم .. ما بدك تشربيني شي ؟
روما: لا ..
كريم: ماشي.. تفضلي اعزمك عشي .. شفت كافية قريب من هون
حملت تلفونها ..: يلا ..
وصلوا للكافية .. قعدوا عوحدة من الطاولات وطلبو قهوة
وصل طلبهن وكان الصمت سيد المواقف
كسرت روما هالصمت ..: ايــه عزمتني لهون لحتى تسكت
كريم: الماتور الك ؟
روما : أي ماتور ؟
مريم: اللي شفت فيه اول مرة بالكافيه .. العصير ..
ضحكت روما ..: ايه الي
كريم : غريب ، بنت وراكبة ماتور .. وبتسوقو بكل سلاسلة
روما : هدا رفيقي الوحيد
كريم: انت بتشتغلي ؟؟
توترت روما من سؤالو ..: ايه بشتغل
حس كريم بالغموض من ناحيتها وكأنو في شي عم تخبي
شافت الشك بعيونو وحاولت تتدارك الموقف ..: بشتغل بشركة لبيع العقارات .. شركة ال****
كريم: مممم هاي برا البلد
روما: ايه ، بس انا بشتغل بالفرع التابع لهاي المنطقة
كريم: بالتوفيق
سكت شوي وسرح بعيونها
لاحظت روما كل تركيز كريم على عيوننا ..: شو هالقد عيوني عاجباتك ؟
انتبه كريم على حالو ..: كتير غريبات .. بحياتي ما شفت هيك عيون
روما: وهلق شفت
كريم: بتعرفي انو الهن سحر خاص .. بس اللي مخليني مركز فيهن اكتر انو بشبهو عيون بنوتة صغيرة كنت اعرفها زمان
ابتسمت روما على كلامو وحست انو خطتها بلشت تمشي بمسارها الصحيح
كريم: انت جديد رجعتي على البلاد.
روما:ايه
كريم: بس واضح من لهجتك انك من زمان هون .. كانو ما طلعتي ابداً
بانت علامات التوتر على وجهها .. رجعت شعرها لورا وبينت رقبتها
ركز نظرو على رقبتها بعد ما شاف علامة جرح قديم ..: شو هدا اللي على رقبتك
حسست بإيدها على الجرح ..: جرح قديم
اطلع على ساعتو
روما: عندك شغل ؟
كريم: صراحة عندي .. بس اذا بتسمحيلي حابب نلتقي كمان مرة .. اذا ما عندك مانع .. حابب اتعرف عليكي اكتر
روما: ما فهمت .. لشو تتعرف عليي
كريم بعجرفة..: عرفت بنات كتير بحياتي .. بس ولا وحدة كانت شخصيتها متلك .. اذا بتسمحيلي حابب اكتشف شخصيتك اكتر
ابتسمت روما برضا وهي شايفة الخطة رح تتكلل بالنجاح ..: ما عندي مانع ..
وقف كريم ..: ممكن رقم تلفونك
اخدت روما منو التلفون وسجلت رقمها
كريم: بخاطرك .. بشوفك
———————-
بعد يومين
رن تلفون روما برقم كريم
مسكت روما تلفونها بعد ما شافت رقمو منور شاشة التلفون .. ابتسمت وزبطت قعدتها ..: ايوة
كريم: كيفك ملاك ؟
روما: مين معي ؟
ضحك كريم ..: رح صدق انك مو عارفة مين معك .. انا كريم ..
روما: اهلاً حضرة المقدم ..
كريم: قلت انك ما عندك حركات بنات هاليومين .. شكلي رح غيّر رأيي !!
روما بمسخرة ..: عم هِز الورد لشم عطرو
ضحك كريم عليها ..: هاي جديدة .. قوليلي بنفع نلتقي بالكافية
روما: يلا .. بس مو للكافية .. رح اخدك لمكان انا بحبو كتير .. وانا صغيرة كان حلم بالنسبة الي
كريم: موافق .. عشر دقايق وبكون تحت البيت عندك
سكرت الخط وقامت من مكانها ترقص .. بسرعة بدلت تيابها ورتبت شعرها ..
دقلها كريم وخبرها انو تحت البيت
نزلت روما ركض عالدرج وطلعت جنبو بالسيارة
كريم: وين المحل اللي رح تاخديني عليه
روما: امشي
وصلوا لشط البحر .. نزلوا من السيارة ووقفوا عند صخرة كبيرة .. كان الهوا قوي والموج عالي
وقفت روما وعيىنها مسلطة عالبحر ..: كان حلم طفولتي اجي واوقف هون واشم ريحة البحر .. ولما كون معصبة كنت نام واتخيل حالي بسبح بالبحر والموج يضرب بجسمي
كريم: لي ما كتتي تقدري تروحي عالبحر مع عيلتك
غصة كبيرة غزت قلبها ..: كنت بمدرسة داخلية .. وبالعطل اهلي يكونو مشغولين ..
اطلعت عليه وابتسمت..: بتعرف شغلة
كريم؛ شو ؟
ابتسمت ابتسامة طفولية ..: بالمدرسة الداخلية كانو البنات يكرهوني والاولاد ما يقدروا يشوفو صورة وجهي ..
ابتسملها ..: لي بقى؟
روما: كنت متل الوحش .. ما كنت حب حدا .. وكنت اضرب كل الموجودين بالمدرسة حتى المربيات
اطلع عليها بإستغراب ..: شو كمان .. احكيلي
اطلعت عليه ..: اذا بقلك شغلة رح تستغرب
كريم: لا ما رح استغرب .. واضح انك كنتي مشكلجية
روما: كل الناس والبشر بنامو على التخت .. إلا انا كنت انام تحت التخت
ضحكت من كل قلبها على ذكرياتها اللي حاولت تجملهن وتعمل منن ذكريات حلوة
وقف عقل كريم عند هاي النقطة ( تنام تحت التخت .. )
روما: انا صار لازم ارجع للبيت ..
صحي من شرودو ..: ممكن وصلك
روما: لا حابة امشي لحالي .. بشوفك
مشت بطريقها للبيت وهو بقي واقف مكانو
كل كلمة حكتها علقو براسو .. دقات قلبو سريعة .. توجه لسيارتو وانطلق لبيتو
____
دخل كريم بيتو والارهاق والتعب على وجههو .. رمى حالو على التخت بدون ما يبدل تيابو .. غمض عيونو بتعب بس كانت عيون ملاك مأنسة وحدتو ..
قام عن التخت بسرعة ونفض هالافكار من راسو .. توجه للحمام اخد دوش سريع ورجع تسطح عالتخت
سلط عيونو على السقف ..: هاي العيون مو غريبة عني ابداً .. بحياتي ما شفت متلن غير ..
سكت شوي بعد ما تذكر صاحبة العيون الغريبة وتمتم ..: مــــلاك !!
فـــــــلاش بــــــاك
مع اشراقة نهار جديد دخلت اشعر الشمس على غرفة كبيرة مليانة سراير عليها بنات بكل الاعمار بميتم كبير وقديم ..
ومع صوت الجرس بلش قسم من البنات يصحى من النوم وقسم غاطط باحلى نومة وبالنسبة الن النوم حل لمشاكل كتير
فجأة طلعت بنت بعمر ال ١٢ سنة من تحت التخت .. وقفت على رجليها ونفضت الغبرة عن تيابها
صرخت بكل صوتها ..: إصحووووووووا
قربت على تخت وحدة من البنات وشدتها من شعرها وصرخت..: ختااااااام قومي
قامت ختام مفزوعة ..: ملااك بطلي هالعادة .. ولا بترتاحي بس تشوفي شعري بين ايديكي
ملاك: تقومي ولا افوت عالمرحلة التانية ..< رجعت تصرخ>.. إصحوووووووووووا
صحيو كل البنات على صوتها وخوف من بطشها يلي برغم صُغر سنها إلا انها فارضة شخصيتها على كل البنات بالميتم وكل بنت مهما كان عمرها بتعملها الف حساب ، كل بنت موجودة بهاي الغرفة بدِب الرعب بقلبها بس يتسكر باب الغرفة ويجي وقت النوم ويلي بتفلت من ايد ملاك بهاي الليلة بكون الحظ بصالحها
وحدة من البنات ..: انت ايمتى بدك تبطلي عادة النوم تحت التخت .. يا حبيبتي التخت انعمل لحتى العالم ينامو عليه .. كل العالم متفقين على هدا الموضوع الا انت عكس الناس
ملاك: صايرة ظريفة سارة صح يا ختام
مشت ملاك لجهة الباب ورجعت بسرعة لعند سارة وطلعت على تختها بحركة سريعة وسحبتها من شعرها
ملاك : لسانك بدو قص صح ولا بتهيألي؟؟
سارة بألم ..: اسفة اسفة ما كان قصدي شي
تركت ملاك شعر سارة ..: صوتك ما عاد تسمعيني ياه فاهمة
سارة: فاهمة فاهمة
راحت لعند الباب وصارت تخبط..: افتحووووا بدنا نتنفس
انفتح الباب ووقفت ملاك جنبو ..: يلاا تفضلو .. الكل يكون جاهز خلال عشر دقايق للفطور
بلشت البنات تطلع من الباب والكل يتمتم
..: الله يوخدك يا ملاك
..: اشوف فيكي يوم
..: اللهي اصحى الصبح على خبرك
..: انشالله اشوفك معلقة من رموشك يا بعيدة
ملاك : سامعتك ولي انت وهي .. بلاش انا اعلقك من حواجبك .. انصراااف
طلعت ملاك على الباحة بعد ما خلصت فطور وراحت لمكانها المفضل خلف الباحة عند الشجرة الكبيرة
..: خلصت مناوبتك ؟؟
نقزت لما سمعت صوتو
قربت منو بعد ما طلع من ورا الشجرة ..: كريم !! شو بتعمل هون ؟
كريم : بعرف بعد الفطور بتحبي تقعدي تحت الشجرة قلت باجي وبشوفك هون
ملاك بطفولة ..: بس انا بحب اقعد احالي ما بحب هدا يشاركني بشجرتي
كريم: ولا انا ؟
سكتت وما عرفت ترد
قعدت تحت الشجرة وقعد كريم جنبها
كريم : ما شفتك مبارح وين كنتي ؟
ملاك : كان التخت مكسور وكنت صلح فيه
كريم : لي رجعتي تنامي عليه عادي؟
ملاك : لا كان في خشبة نازلة منو وبتزعجني بالنومة .. صلحتها
ابتسم كريم بحب وبادلتو الابتسامة
**
(ملاك بنت بعمر ال ١٢ قوية وقادرة لقوها عباب الميتم باللفة وعمرها يوم .. لسانها سليط وايدها طويلة حتى المديرة والمساعدات ما خلصو من شرها واغلب ايامها قضتو بغرفة العقاب لانها كانت تطاول على المديرة وتضرب المساعدات لحتى فقدو الامل منها او انها تصير متل باقي البنات لهيك قرروا انو الحل معها هو التجاهل)
(كريم ولد بعمر ال ١٧ كان وسيم نسبياً اهلو توفو بحادث سير وهو بعمر العشر سنين وما كان اله غير عمو يلي عايش باميركا بس ما كان في تواصل بين ابوه وعمه .. وبيوم الحادث عمه كان عنده عملية استئصال ورم بالدماغ وزوجتو عرفت بالخبر بس ما قلتلو خافت صحتو تتراجع بعد العملية اذا عرف بالخبر واستغلت الخلاف يلي بين زوجها واخوه واخفت عنو الحقيقة .. الشرطة حطت كريم بالميتم بعد طلب زوجة عمو )
******
قرب كريم من ملاك وطلع حبة شكولاطة من جيبتو ومسك ايدها لحتى يحطها بإيدها
وبحركة سريع من ملاك مسكت ايده ولزقتو بالشجرة ..: ايدك وإلا بقطعها
كريم : شبك !؟
فتح ايده وطلع الشكولاطة ..: جبتلك هاي
بعدت عنو بهدوء..: اذا كمان مرة بتفكر تتمادى معي يا ويلك
قامت من مكانها وسحبت حبة الشكولاطة وراحت للغرفة
بقي كريم قاعد مكانو وعلامات الصدمة على وجهو ..: مجنونة بربي مجنونة هالبنت
بـــــــــــاك
اجى براسو الجرح اللي على رقبتها .. وكل كلامها عن طفولتها
توسعوا عيونو..: بتنام تحت التخت ..
غمض عيونو وفات بنوم عميق بعد ما اتخذ قرار مهم لتاني يوم ..
#يتبع
