"ليلة سقوط روما"_ الجزء ٨ و الاخير
*«لـيـلـة سـقـوطـ رومـا».*
*الـجـزء الـثـامـن والأخـيـر.*
وقف سيارتو بمنطقة مقطوعة بالجبل بتطل على المدينة كلها
نزل من السيارة وعيونو مسلطة على اضواء المدينة
بقي على حالو دقايق لحد ما سمع الصوت اللي بستناه
التفت لجهة الصوت وشافها على ماتور لابسة خوذة
شالت الخوذة وانسدل كل شعرها الاسود الناعم على ظهرها بكل انسيابية
قربت منو بهدوء ووقفت جنبو ..: بتعرف شو اصعب شعور؟
اطلع عليها بإستغراب ..: شو؟
ابتسمت نص ابتسامة ..: تشوف حالك عم تندفن للمرة التانية
ابتسملها بحب ..: بتعرفي احلى شي بالدنيا ؟
اطلعت عليه..: شو ؟
لف وجهو عنها ..: انو كل شي خلص
التفتت عليه ..: شو رح نعمل هلق .. رح نسافر سوا
كريم وعيونو مسلطة لبعيد..: لا ..
روما : شو لا .. ما فهمت .. لكن شو رح نعمل
التفت عليها …: انا رح كفي حياتي .. وانت كمان كفي حياتك
روما بإبتسامة ..: ونحنا مع بعض طبعاً
كريم : ما في نحنا .. انا صار لازم روح ..
تركها ما عم تستوعب شو قال .. ركب سيارتو وانطلق بسرعة عالية
لحقتو بسرعة بالماتور ومشت بسرعة عالية
صارت جنبو .. رفعت الغطا عن وجهها ..: اذا ما وقفت هلق رح نتدم
اطلع عليها ..: شو رح تعملي يعني ؟
روما : لا تختبر جنوني ؟
كريم بإستفزاز..: لا حابب شوف جنانك
روما : انت طلبتها
نزلت الغطا على وجهها وزادت سرعتها .. تجاوزتو وما عاد شافها
فجأة شحط فرام قوي بعد ما شافها واقفة بالماتور بنص الشارع
ضرب وجههو بالمقود بسبب الفرام القوي ..: بربي مجنونة
نزل من السيارة وعلامات الغضب على وجههو …: حابة تموتي يعني
شالت الخوذة عن راسها ..: بتحبني ؟
اطلع بعيونها وما حكى
انغاظت منو ..: عم اسألك .. بتحبني ؟
كريم بإستفزاز ..: لا .. ما بحبك
استغربت كلامو …: لي قلتلي انك بتحبني لما جيب عاليونان .. واللي صار بينا ؟
قرب منها وعيونو بعيونها …: مشان استغلك .. لحتى نمسك دون متلبس .. بس انت نهيتي كل شي من عندك وغيرتي الخطة اللي المفروض ننفذها
شغلت الماتور وانطلقت فيه .. وقفت بعيد عن كريم وسيارتو ووجهها لعندو ..
ضغطت بقوة على مقبض البنزين وهي واقفة مكانها وعملت وراها غبرة قوية
صرخت بكل صوتها ..: بتحبني
استغرب تصرفها وما رد عليها
روما : انت طلبتها ..
تركت مقبض الفرامل وداست على مقبض البنزين وانطلقت بإتجاهو بسرعة عالية
ثواني واستوعب كريم اللي بتعملو وفهم على شو ناوية
وقبل ما توصل للسيارة وتصتدم فيها .. صرخ بكل صوتو …: لك بحبك يا مجنونة
شحطت فرام بسرعة ووقفت الماتور قريب
نزلت عن الماتور وراحت لعندو
حط ايده بشعرها وقربها منو وهمس ..: شو عم تحاولي تعملي ؟
روما بحب ..: بحاول خليك تفهم اني بحبك
كريم: ايمتى بدك تبطلي هاي التصرفات الطايشة .. ايمتى بدك تفهمي انو مو كل مرة بتسلم الجرة .. لايمتى بدك اضلي انانية بتصرفاتك وما تعملي حساب لشي
روما بعدم فهم …: لشو هالمحاضرة هلق .. هو سؤال وجواب .. بتحبني ايه او لا .. لشو طولة السيرة ؟
اطلع بعيونها ..: لازم تفهمي انني ما عاد فيي اتحمل كل تصرفاتك الطايشة.. تعبت بكل مرة كنت تتعمدي تأذي حالك لحتى تبيني للعالم انك ما بتخافي ..
روما: بس انا فعلاً ما بخاف
صرخ بوجهها ..: بس انا بخاف ..
روما : من شو بتخاف؟
شد ايده على رقبتها وعيونو بعيونها ..: بخاف اخسرك ..
روما : يعني بتحبني !
كريم: انت الماضي بنسبة اللي .. الماضي اللي ما ممكن انساه ابداً .. الماضي اللي بنيت عليه حاضري وكنت ناوي ابني عليه مستقبلي
روما: مستقبلك .. كنت ناوي!!.. ما بدك كون موجدة بمستقبلك؟
غمض عيونو بقهر .. بس كان مجبور ينهي الموضوع هيك ..: روحي ملاك ..
روما: ما رح كون موجودة بمستقبلك .. جاوبني
كريم بغصة ..: ما ممكن تكوني بمستقبلي .. روحي من هون .. ما عاد بدي شوفك
مسكتو من ياقة قميصو ..: لك ليش .. ليش عم تعمل هيك ..
كريم : انا ما فيي اتخطى كل شي عملتي .. انت بالنسبة للدولة ميتة .. بس بالنسبة لالي لسا عايشة .. ما فيي انسى شي من اللي عملتيه ..
شدت على رقبتو ..: رح تخلف وعدك للمرة التانية ..
كريم: ما كان وعد
روما بقهر ..: شو كان ؟
لف وجهو للجهة التانية : فيكي تقولي صفقة ..
توسعت عيونها ..: صفقة!
مسكت وجهو بقوة .. حطت عينها بعينو …: قلي انها صفقة وعيونك بعيوني ..
كريم :…
روما بصراخ .. قـــــــول !!
اطلع بعيونها ..: صفقة .. وبس صفقة .. وانا ما بحبك .. ولا بدي تكوني بمستقبلي .. وانا عندي حياة بدي عيشها .. بس انت مو فيها .. بدي تطلعي من حياتي نهائياً .. ما بدي شوفك لحتى موت ..
ارتخت ايديها عن وجههو بعد كلامو اللي صابها متل اسهم بصدرها ..: لي كل هدا ..
كريم : انا كنت مقدم سابق بالداخلية .. وولائي للوطن دايماً وصعب شوف غلط وما حاسب اللي عمل الغلط .. انا صحيح ساعدتك ورح اسمحلك تهربي .. بس هدا مو حُب .. هاي كانت مصالح مشتركة .. انت سلمتينا بضاعة دون وقسم كبير من رجالو وشركائه .. يعني انت انجزتي مهمتك على اكمل وجه ورح تاخدي حريتك بالمقابل
سكتت وما عرفت ترد
اطلع بعيونها اخر نظرة وشاف دموع متجمعة بعيونها .. غمض عيونو بقهر .. : روحي .. ما عاد بدي شوفك ..
اطلعت عليه اخر نظرة وملت عيونها فيه .. لبست الخوذة على راسها .. ركبت الماتور وانطلقت بسرعة عالية ..
خلال ثواني معدودة كانت مختفية من قدامو بدون اثر ..
__
ماشية بسرعة عالية بالماتور وكأنها بتحاول تنهي حياتي بأي شكل .. ما عاد في شي بالحياة يستاهل انها تعيشها .. الامل الوحيد اللي بقي الها راح .. كانت صفقة بالنسبة الو..
وقفت الماتور جنب البحر .. نزلت عن الماتور ولسا الخوذة على راسها .. قعدت على صخرة وراحت بذاكرتها لايام الميتم ..
فـــــــلاش بـــــــاك
ولاد وبنات كتير متجمعين بنص الباحة ..
..: قيمو من بين ايدها
..: حرام عم تتفرجوا .. لك اسحبو منها
..: لك اكلتو للصبي بلا ملح
..: لك يعدملي ياكي يا ملاك شو انك مفترية
..: يا ربي شو عمللها لحتى نازلة فيه ضرب هيك
..: وين المديرة والانسات ..
قرب كريم من الجمعة وسامع كلام الاولاد .. وفهم شو اللي عم يصير
دخل من بين الاولاد وشاف ملاك نازلة طحن بولد من الميتم
قرب منها ومسك ايدها قبل ما تضرب الولد بوكس ..: شو عم تعملي ولي!!
اطلعت عليه بعيون نار..: اترك ايدي بلا ما لقحك جنبو
كريم: قلت اتركي ومشي معي
ملاك بغضب ..: اتركني
نزلت عيونها عالولد ورفعت ايدها لتكمل ضرب
صرخ كريم ..: مــــــــلاك !!
رجف جسمها من صوتو ،،ارتخت ايدها عن الولد واطلعت بكريم بخوف ..
كريم بغضب ..: قومي ..
بسرعة قامت عن الولد ومشت قدام كريم
طلعوا من بين جمعة الاولاد .. لمح كريم المديرة والانسات طالعات من مبنى الميتم وحاملات بايدهن عصي
بسرعة مسك ملاك من ايدها وسحبها لورا .. دخلو بين الاولاد وركضوا لورا المبنى
وقفوا جنب الملحق وعلامات التعب على وجه ملاك
اطلع عليها كريم بغيظ ..: وبعدين معك انت كل مرة بدي اجي شيلك عن ولد
دفشتو من صدرو ..: وانت شو دخلك .. ما بظن اني طلبت منك ..
حط ايدو على تمها ودفشها عالحيط وخباها بحضنو ..: هششش .. المديرة جاية لهون
رفعت عيونها واطلعت عليه .. لاول مرة بتسمح لحالها تتمعن بوجهو وعيونو هيك
نزل عيونو وشافها بتتأمل فيه بنظرات براءة اول مرة .. حس بدقات قلبو تسارعت من قربها بس حاول ما يظهر هالشي
بعد عنها بعد ما شاف المديرة توجهت لمكان تاني .. سحبها من ايدها ودخلها لجوا المبنى واخدها لغرفة الصبيان
كريم بحزم ..: بتبقي هون الليلة .. ما بتتحركي من مكانك
كانت رح تصرخ بوجهو بس سكتت
كريم بغضب..: ولا كلمة .. ما بدي اسمع حرف منك .. لايمتى بدك تبقي هيك .. ما بترتاحي غير لما تعملي مشاكل .. ما بتعملي حساب تنأذي مرة
ملاك : ما حدا بقدر يأذيني .. بقطع خبرو اللي بس بفكر يقرب مني
كريم بغضب..: قلتلك اخرسي .. ما بدي اسمع صوتك .. اقعدي هون وما تتحركي
انصاعت لكلامو وقعدت عالتخت
لف حالو لحتى يطلع من الغرفة
ملاك بحزن ..: زعلان مني يعني ؟.
اطلع عليه ..: زعلان عليكي
وقفت بغضب ..: قصدك اني بشفّق؟
كريم: ما قلتلك تخرسي!!!
رجعت قعدت مكانها بدون اي كلمة
طلع من الغرفة وتوجه للباحة .. شاف المديرة واقفة ولسا بفتشو على ملاك
المديرة : كريم .. تعال لهون
كريم: نعم انسة
المديرة : وين ملاك ؟
كريم: ما بعرف
المديرة بغضب ..: لا بتعرف .. الاولاد قالو انك اخدتها
كريم: ما بعرف .. انا كنت بغرفة التدريس .. لي شو عاملة لحتى عم تفتشوا عليها هيك .. بس ما تكون عاملة مصيبة .. واذا عاملة لي بدك تعاقيبها .. انت بتعرفي انو ما عاد ينفع معها العقاب القاسي ..
المديرة : وشو بتريد حضرتك اعملها
قرب كريم من المديرة وهمس ..: انا برأيي تعطيها مهام شاقة
استغربت من كلامو ..: متل شو؟
اطلع حولو بخباثة …: اعمال المطبخ مثلاً .. تنظيف وهيك يعني .. حضرتك بتعرفيها لملاك ما الها بهاي الامور .. وهدا رح يكون عقاب اقسى من الحبس والضرب .. ولا شو رأيك !
ابتسمت المديرة ..: الله يحميك شو ذكي .. فكرة حلوة ما خطرتلي ابداً
كريم: انت بتعرفي اني ما بحب كذّب عليكي .. ملاك بغرفة الصبيان بس خليها هناك .. خليها تخاف شوي
مسحت على ظهرو بحب ..: ماشي .. خليها شوي
طلع كريم لعند ملاك عالغرفة .. حرك حجر عينو بالغرفة وما كانت موجودة اطلع بمكان واحد وسلط نظرو عليه .. ابتسم نص ابتسامة وتوجه لتختو .. رفع الغطا شوي شوي واطلع تحت التخت …: ما بتغيري عادتك ابداً
اطلعت عليه …: شو صار
كريم بخباثة ..: اخدو الولد عالمشفى وانت بدن يبعتوكي للسجن
طلعت من تحت التخت بسرعة وقربت منو ..: لي كل هدا .. شو عملت يعني .. كلها كفين وبوكس
كريم: كفين وبوكس!! الولد مغمى عليك ومو مبينة ملامح وجهو من الضرب
قربت عليه اكتر ولفت ايديها على خصرو …: ما بدي روح عالسجن .. مشان الله بعمل اللي بدكن ياه بس بلا السجن .. كريم مشان الله ساعدني
رفع راسها وركز بعيونها اللي بشلو حركتو بس يشوفهن ..: بتوعديني اخر مرة تعملي هيك .. وما عاد تضربي اي حدا ؟
ملاك بخوف ..: بوعدك . بوعدك .. خلص ما عاد اضرب حدا .. بوعدك
كريم بحب ..: خلص ماشي .. رح حاكي المديرة .. بس بتنفذي كل شي بتطلبو منك فاهمة
هزت راسها ورجعت دفنت حالها بحضنو
___
مرق كم يوم على خير وملاك بتنفذ طلبات المديرة والانسات بدون اعتراض
بيوم كانت عم تنظف بالحمامات دخل لعندها مجموعة من الاولاد وصاروا يتمسخروا عليها ويسمعوا فيها كلام بلا طعمة
شدت على قبضة ايدها ..: انا بعرف اني صعب اوفي بوعودي .. بس مو مشكلة ..
حملت عصا المكنسة وضربت فيها واحد من الاولاد
مسكت التاني وحطت راسو بسطل المي .. وهجمت عالثالث ونزلت فيه ضرب
هرب واحد منن وراح خبر المديرة
اجت المديرة عالحمامات وشافت الاولاد على الارض وملاك لسا بتنظف بارض الحمام
صرخت المديرة ..: ملااك .. شو هدا
ملاك بلامبالاه ..: تغالظوا عليي وربيتهن ..
مسحت المديرة على وجهها بنفاذ صبر ..
اجى كريم وشاف ملاك شو عاملة .. تنهد ورفع عيونو لفوق ..: وبعدين معك !! ما في منك فايدة ..
صرخت المديرة بالانسات ..: خدوها للعقاب لاخر الاسبوع
رمت ملاك الممسحة عالارض ..: كان من الاول ..
بـــــــــــاك
ابتسمت بحزن وهمست .. : كنت دايماً جنبي وما تخليت عني ابداً شو اللي تغير فيك يا كريم ..
___
بعد سنة
ببيت كبير بالجبل عليه حراسة مشددة
صحيت من النوم .. اخدت تلفونها ودقت لرقم ..: ايوة .. اي ساعة اجتماع المنظمة اليوم .. ماشي سلام
قامت من التخت ووقفت عند الشباك .. اطلعت عالسما اللي كانت لونها رمادي معنلة عن قدوم الشتاء .. اخدت نفس طويل وزفرتو بقهر وتمتمت ..: مرقت سنة وانا لسا هربانة ببيت الجبل .. يا ريت تنحل الامور اليوم وانضمامي للمنظمة يكون الحل لمشاكلي ..
دخلت لعندها الخدامة ..: الحمام جاهز انسة روما
توجهت للحمام ودخلت للبانيو .. غمضت عيونها واجت صورتو قدامها .. تنهدت بحسرة ..: كان نفسي تكون جنبي ..
_____
بساعات منتصف الليل
بمنطقة بعيدة عن المدينة .. بالتحديد بمنطقة معزولة عالجبل .. سيارات كتيرة مصفوفة .. سيارات سودا مفيمة كلها موديلات غالية .. جواها رجال
نزلو كل الرجال من السيارات وفتحو باب السيارة الخلفي لرجال اعمال مهمين بالبلد
تزامن نزول رجال الاعمال مع وصول سيارة جيب سودا
وقفت السيارة بالنص بين السيارات .. نزل منها السائق وتوجه للباب الخلفي وفتح الباب
نزلت من السيارة ووقفت .. كانت بكل اناقتها .. جمالها الملفت للنظر .. اناقتها الساحرة
قرب منها واحد من رجال الاعمال ..: انسة روما .. تشرفنا بلقاءك
مد ايده لحتى يصافحها ..: رح يكون دخولك بالمنظمة اعظم انجازات المنظمة
صافحتو روما بكل وِد ..: هدا شرف كبير اللي
__
انضمت روما للمنظمة بعد جهد كبير .. كانت المنظمة اجنبية مسؤولة عن بيع المخدرات بالمنطقة .. شكلت روما عصابتها وعملت كل جهدها لتدخل المنظمة لتاخد الحماية منهن .. بس ما كانت عارفة بنفس اللحظة اللي رح تدخل فيها للمنظمة رح تنقلب حياتها ..
__
بعد مرور فترة منيحة على انضمامها للمنظمة
بيوم كان عندها تسليم بضاعة بمنطقة مقطوعة بالغابة ..
سلمت البضاعة وكل شي كان تمام والامور هادية .. تحرك المشتري مع رجالو وبقيت روما ورجالها ..
فجأة سمعت صوت اطلاق نار ..
صرخت بكل رجالها ..: اهربو بسرعة
كان صعب عليها ترجع لعند السيارة وتهرب فيها .. فضلت تهرب على رجليها ..
بلشت تركض وحاسة انو في حدا مطاردها ..
بعد مطاردة قصيرة .. وقفت بسرعة بعد ما سمعت صوت اطلاق نار بإتجاهها ..
..: لا تتحرك .. اي حركة رح تكلفك حياتك
جمدت مكانها بعد ما سمعت هالصوت ..
همست بخفوت ..: كريم
كريم : كل رجالك نمسكوا .. سلم حالك بدون مقاومة
نزلت دمعة من عيونها حرقت خدها .. التفتت عليه ولسا الغطا على وجهها .. شلحت الجاكيت اللي كانت عاطيتها مظهر رجولي وبقيت بتياب بتبرز كل انوثتها .. شالت الشال عن وجهها .. خلص استسلمت بشكل نهائي بعد ما عرفت انها وصلت لنقطة مسدودة .. خلص ما عاد في مفر من الواقع اللي عم تحاول تهرب منو ..
التقت عيونو بعيونها ولسا رافع المسدس عليها .. غص بكلماتو ..: هدا انت ؟؟
ابتسمت بحزن ..: شايف على هالصدفة مأحلاها ..
صرخ فيها ..: ليش!!!!
روما بغصة ..: كل حدا بخلق على هالدنيا في الو هدف او حلم .. بس لكل قاعدة في شواذ .. وانا من هالشواذ .. ما حدا اعطاني مجال اني احلم او احط هدف قدامي لاحققو .. من عمر ١٢ سنة انحكم عليي ادخل هدا العالم .. وما لقيت حدا يوقف جنبي ويمنعني .. او حتى يمسك ايدي ويوجهني للطريق الصح ويغير مستقبلي .. ما اخدت فرصة من الاساس لاقرر .. ولما اجت الفرصة لابدأ حياة جديدة ونظيفة .. كمان مرة انخذلت .. اللي كنت مفكرة وانا معو رح اطلع من هالمستنقع خذلني .. اخدني معو للسما ومرة وحدة رماني عالارض .. انت عملت هيك .. انت كنت متلن بالزبط .. انت تخليت عني وانا بأمس الحاجة الك
كريم بغضب ..: انت كل عمرك هيك .. فاشلة بكل شي وبترمي فشلك على غيرك
روما : ما فيك تحدد اذا كنت فاشلة ولا لا .. في فرق بين انك تكون فاشل وانك ما اخدت فرصة لتثبت انك مو فاشل
صرخ فيها بكل صوتو ..: خلص بكفي .. سلمي حالك .. رح اعطيكي الفرصة اللي بتحكي عنها
ابتسمتلو ببرود ..: بكل سنيني اللي مرقت وانا بين المافيا والعصابات تعلمت شغلة وحدة .. تعلم اني ماثق بالشرطة ابداً.. بس هالقلب كان غبي وثق فيك .. بس كمان تعلمت انو بس الحمار بوقع بالجورة مرتين .. انا يمكن غبية .. بس ابداً ماني حمارة
مشط كريم المسدس ..: بقلك سلمي حالك
روما ببرود ..: رح اعطيك كمان معلومة اخدتها باول يوم دخلت فيه لهالعالم .. ما بعرف اذا رح تفيدك بس رح قلك .. اذا بيوم انمسكنا من الشرطة .. لازم نختار خيار واحد من تنين صعبات .. الاول نسلم حالنا للشرطة ونتحمل كل التعذيب وما ننطق بأي حرف .. او نختار الخيار التاني الاصعب .. وهو نقتل حالنا .. شايف قدي صعبات .. بس بالنسبة الي الخيار التاني اسهل .. بتعرف لي!!
كريم :…
رجعت ايدها لورا ظهرها وسحبت المسدس من تيابها وكملت بحزن ..: خوفي الوحيد بهاي الدنيا اني موت وحيدة .. موت بيوم بدون ما حدا يعرف بموتي .. وهلق انا مو وحيدة .. هلق انت موجود .. وانا متأكدة اذا متت هلق راح تاخدني بحضنك وتبكي عليي وقلبك موجوع عليي ..
انصدم كريم من كلامها وما كان عارف شو بتقصد .. بس سرعان ما فهم الموضوع لما شافها طلعت المسدس وسلطتو على راسها
رجف قلبو بخوف .. حس للحظة انه الدنيا بتفتل فيه ..: شو بتعملي يا مجنونة
روما بحزن ..: انت غدرتني مرة .. والدنيا دوارة .. يوم الك ويوم عليك .. وانا هاي فرصتي لاغدر فيك .. انت وجعتلي قلبي باخر مرة شفتك فيها .. انا عارفة انك بتحبني ورح اوجع قلبك عليي .. انت تركتني اتألم لحالي وما طبطبت عليي بالوقت اللي كنت بحاجة الك.. وانا كمان رح اعمل فيك نفس اللي عملتو فيي وما رح طبطب عليك
نزلت دمعة من عينو ..: لا تعملي شي .. نزلي المسدس ورح ساعدك ..
ضحكت بكل صوتها ..: وانت مفكر اني رح صدقك كمان مرة .. اساساً انت ما فيك تضرب عليي نار .. انت اجبن من انك تقتلني
رجعت مسمار الامان لورا ..: بدي تعرف شغلة وحدة بس .. انا ما حبيت غيرك .. من اول يوم دخلت فيه للميتم .. حبيتك غصب عني ..
خارت قوة كريم وما عاد فيه يوقف على رجليه .. رمى المسدس من ايدو ونزل على ركبو ..: ملاك مشان الله لا .. ملاك مشي معي نهرب برا البلد .. ملاك مشان الله ما تحرميني منك .. مـــــلاك
روما بقلب بارد ..: كل شي انبنى على غلط رح بخلص على غلط .. ما في مجال لتصحيح شي .. انا قتلت كتير بإيدي هدول .. ولازم موت بنفس الطريقة ..
كريم بقهر ..: مـــلاك
روما بحزن ..: تعا قرب مني شوي
للحظة حس انها رح تغير رأيها وتتراجع عن قرارها .. وقف على رجليه وقرب منها بسرعة
رفعت عيونها والتقت بعيونو ..: انا ما صدقت اي كلمة قلتها باخر لقاء النا .. وكان عندي امل ترجع .. بس انت خذلتني للمرة المليون ..
كريم بقهر..: غصب عني .. صدقيني غصب عني .. انا بحبك ملاك .. اعطيني المسدس ومشي معي .. انا بحبك وما فيي بدونك .. بحبك صدقيني. . انا ..
قاطعتو بسرعة ..: هشششش .. خلص لا تكمل .. هاي اخر كلمة كنت بدي اسمعها من تمك .. كنت بدي اسمعها وعيوني بعيونك هيك .. وانا بحبك يا احلى شي بحياتي ..
على اخر لحظة رفع كريم المسدس لفوق وانطلقت الرصاصة لفوق
اطلع بعيونها وشاف الدموع متجمعة بعيونها وعم تكابر ما ينزلو
روما بحزن..: ليش؟
سحب المسدس من ايدها ..: بدك تروحي وتتركيني اتعذب بعدك .. لا تكوني انانية .. انا ما صدقت لقيتك .. مفكرة رح اتنازل عنك بسهولة
نزلو دموعها غصب عنها ..: انت قلت ما عاد بدك كون معك
حاوط وجهها بإيده ..: انا كذاب .. ما بدي غيرك بحياتي وبدي كفي حياتي معك
روما بقهر ..: رح تتنازل عن حياتك مشاني
قرب وجهو من وجهها ..: رح اتنازل عن كل شي .. شغلي وحياتي ومستقبلي مشانك .. رح اتنازل عن كل شي مشان كون جنبك .. حطي ايدك بإيدي وخلينا نهرب سوا ..
مسكها من ايدها وسحبها وراه وهي مخدرة بين ايديه
وقفوا بعد ما سمع صوت اطلاق نار جنبهن
..: كأنو لسا بكير .. ما خلص حسابنا مع بعض حضرة المقدم كريم !! بتعرف كان احلى خبر وصلني لما سمعت برجعتك للفرع .. كان نفسي كون معك وبإستقبالك .. بس ظروف
التفت كريم للصوت وشاف حدا واقف جنب الشجرة
ركز كريم نظرو وشد على قبضة ايدو ..: سهر
توسعت عيون روما بس سمعت بإسمها بس انرسمت ابتسامة على وجنهها ..: لسا ما تغيرتي .. لساتني عاملتلك عقدة بحياتك
قربت منن سهر والغضب بطاير من عيونها ..: اخرسي ما بدي اسمع صوتك .. حضرة المقدم .. تعا نعقد صفقة انا وانت ..
كريم بإستهزاء..: انا وانت بنفس الجملة .. كيف زبطت معك
تجاهلت سهر كلامو ..: سلمني الكلبة اللي معك ورح اتستر عليي كنت رح تعملو
ضحك كريم بصوت عالي ..: والله صفقة بتجنن .. بس من وين جبتي هالثقة هاي .. انت متخيلة اوافق مثلاً !!
سهر بغضب ..: لا تجبرني اعمل شي ما بدي ياه .. سلمني ياها ورح اتركك تعيش
رفعت المسدس على كريم ..: شو يا حلوة .. بتحبي اقتلو قدامك ولا تيجي معي
مسكت روما بإيد كريم ..: لحظة .. بس ما تكوني عم تهدديني !!
قوصت سهر جنب رجل كريم
كانت روما رح تتحرك بس كريم شدها لعندو
كريم : اعملي اللي بدك ياه
لفها وكان رح يمشي .. بس صدح صوت اطلاق نار .. اطلع على ملامح روما اللي تغيرت .. حط ايده على ظهرها وشاف دم على ايده ..
سهر بغل وحقد كبير ..: انت اللي اخترت النهاية انا حاولت انصحك
وقعت روما بحضنو
شد عليها بقهر كبير ..: ملاك .. ملاك خليكي معي .. ملاك لا تتركيني.. خليكي قوية .. لا تغمضي عيونك .. ملاك
اطلعت عليه بوجع ..: خلص كريم .. لسا ما فهمت .. نحنا مو لبعض .. لسا ما فهمت انو نحنا مو مكتوب علينا نكون سوا .. لي ما فيك تستوعب
كريم بقهر..: لا تقولي هيك .. نحنا لبعض .. انت خليكي معي لا تغمضي عيونك .. عيونك عشقي .. لا تروحي وتتركيني .. رح اطلب مساعدة .. خليكي قوية متل دايماً
اخدت نفسها بصعوبة ..: كريم انا مبسوطة .. اخيراً رح اتخلص من الكابوس اللي مرافقني كل عمري.. رح موت بين ايديك مو لحالي .. ضمني لصدرك بدي حس بالدفى ..
ضمها لصدرو والدموع على خدودو ..: ملاك مشان الله لا تعملي فيي هيك .. خليكي معي لسا ما شبعت منك يا عمري
بسرعة خطر ببالو ماجد .. طلع التلفون من جيبتو ودقلو ..: ماجد .. تعال بسرعة ملاك تقوصت .. اطلب الاسعاف وتعال .. مو وقتو ماجد.. مبين معك موقعي .. تعال لا تتأخر رح تروح من بين ايدي..
رفع راسها من حضنو وشافها بتاخد نفس بصعوبة ومغمضة عيونها ..: قتللك ما تغمضي عيونك .. خليكي معي طلبت المساعدة ..
حملها بين ايدي ومشى بإتجاه المستودعات
اطلعت عليه سهر ..: انا بعتذر منك بس ما رح اسمحلك تنقذها
ضربت نار على رجلو .. وقع عالارض هو وروما
صرخ بكل صوتو ..: رح تندمي عاللي عملتي ..
سهر بقرف ..: عن اذنك .. انا صار لازم روح .. مع انو كنت بحب شوف المشهد الحزين بس ما عندي وقت .. بس اكيد النا لقاء تاني حضرة المقدم ..
هربت بسرعة من المكان
تحمل وجعو وكان رح يحملها ويقوم
شدت روما على البدلة العسكرية ..: خلص كريم .. لا تحاول .. هاي النهاية .. خلص دفيني بحضنك .. حاسة حالي بردانة كتير
شلح الجاكيت ولفها فيها واخدها بحضنو ..: تحملي بس شوي الاسعاف على وصول
اطلعت عليه بعيون دبلانة ..: انا بحبك كريم
طبع بوسة على راسها ..: وانا بحبك يا عيون كريم
بلشت ترتخي ملامحها وايدها وغمضت عيونها
شد راسها لحضنو وصرخ بكل صوتو بقهر ..: مــــــــلاك ...
#النهاية..
(كل شي بلش بالغلط رح يتنهي بنفس الطريقة اللي بلش فيها)...
