"ليلة سقوط روما"_ الجزء ٦
*«لـيـلـة سـقـوطـ رومـا».*
*الـجـزء الـسـادس.*
بعد ساعة
فتحت عيونها شوي شوي ولاقت حالها بحضنو .. رفعت راسها واطلعت عليه ..: الضابط كريم بعرف اني من طرفك .. وبدو مني اشتغل لصالحو ضدك ..
استغرب دون من كلامها ..: يعني انت ..
روما: ولا مرة فكرت اني خونك .. مستعدة موّت حالي قدام عيونك ولا اني خونك .. الضابط طلب مني كمل معو بالتمثيلية اللي كنت بدي اعملها عليه واعطي معلومات عنك
ضحك دون بصوت عالي ..: حلو كتير ..
روما: شو بدك تعمل ؟
دون : متل ما بدو .. رح نلعب شوي
روما: انت وجودك هون خطر .. لازم تطلع من البلد .. مو مستعدة اخسرك
دون: مو دون اللي بهرب
روما: لكن ..
دون: رح اعطيكي معلومات هو بدو ياها بس مو عني .. عن ناس طلعت جديد بوجهي من بعد ما دخلت السجن .. رح نسلمو ياهن واحد واحد وبعدين بفضالو
رفعت حالها من حضنو ..: انا ما بدي اعرف شي عن شغلك هالفترة .. ورح ابقى بعيدة ..
دون: هدا اللي بدي ياه .. بس لا تأمني للضابط
روما: مستحيل
طبع بوسة على جبينها وابتسم ..: وكيف عرفتي المكان
ابتسمت نص ابتسامة ..: اسمحلي يا مـــــودير بس انت مشغل معك حمير
دون: فؤاد ؟
روما : في غيرو يعني !
فـــــــلاش بــــــــاك
طلعت من الفيلا ووجهها بنقط سم اخدت سيارتها وانطلقت
دخلت لاول دخلة صادفتها بالطريق وركنت سيارتها بعيد عن العين .. طفت اضوية السيارة واستنت لحتى يطلع فؤاد من الفيلا ..
بعد ساعات انتظار
طلع فؤاد من البيت عالموعد اللي اتفق عيله مع دون
وقبل ليوصل للنقطة اللي راكنة روما سيارتها فيها
فجأة طلع قدامو تنين ماشيين بالشارع واضح عليهن انن مسطولين
صدح صوت فرامل قوي من سيارة فؤاد كأنها اشارة لروما لحتى تنفذ خطتها
نزلت من السيارة بالخفى وتخبت ورا السور لحتى تراقب الوضع
شافت فؤاد نازل من السيارة لحتى يطمن عالشباب انهن بخير
استغلت الشوشرة اللي صارت وركضت لعند شنطة السيارة فتحتها ودخلت فيها وسكرت كأنو ما صار شي ..
اطمن فؤاد عالشباب انهن ما نأذو وكمل طريقو
بـــــــــاك
ضحك دون بصوت عالي ..: انت الكنز الوحيد اللي عندي
____
قاعد بغرفة القعدة على الكنبة وحاط اللابتوب على رجليه وعم يكتب شي
دخلت روما لغرفة القعدة ..: شو عم تعمل ؟
اطلع عليها وشافها حاملة صنية وعليها فنجانين قهوة ..: اووو اجى بوقتو
قربت منو واعطتو فنجان ..: تفضل .. ما قلتلي شو بتعمل ؟
اخد منها الفنجان ..: ما شي مهم .. براجع بشوية شغل
قعدت مقابلو ..: شو مشاريعك اليوم
رفع عيونو عن اللابتوب واطلع فيها ..: عندي شغل بالفرع ..
رفعت رجليها لعند صدرها وضمتن..: لي إجيت لكن؟
كريم وعيونو باللابتوب ..: جيت شوفك
روما: وكيف طالعة حلوة باللابتوب ؟
اطلع عيلها ..: شو بدك ؟
روما: ما بدي شي .. بدي نقعد ونحكي متل زمان
كريم : احكي مين ماسكك ..
قامت من مكانها ..: رايحة ادوش .. خلص شغلك انت
توجهت لغرفتها تحت انظار كريم
تسطحت عالتخت وصفنت بسقف الغرفة وحكت بقلبها ..( اففف شو بارد .. وانا لي هيك بتخربط بس شوفو )
حطتت ايدها على قلبها ( لي قلبي هيك بدق بسرعة .. معقول .. )
سكتت وما كملت جملتها ..( لالالالالا .. لا مو معقول .. انا ما عندي قلب ليحب .. انا عندي قلب بس ليضخ الدم .. افففف ياه .. شو دخلك على حياتي .. كلو بسبب الكلب دون .. هو عايش حياتو ومبسوط وانا رماني بالنار هون ..)
قامت بسرعة عن التخت وتوجهت لغرفة التدريب .. لبست القفزات .. توجهت لشوال البوكس اللي معلقة عليه صورة فؤاد وبلشت تضرب فيه.. كانت الطريقة الوحيدة اللي بتنفس فيها عن غضبها
بعد نص ساعة تدريب .. طلعت من الغرفة وشافت كريم لسا قاعد بشتغل عاللابتوب
قربت منو ..: لساتك هون ؟
بدون ما يطلع عليها ..: كلو هدا حمام !!
سكتت وما ردت ..
اطلع عليها من فوق لتحت وشافها عم تلهث والعرق مغرق جسمها ..: شو هدا .. ماخدة دوش بتيابك
شدت القفزات على ايدها ..: شايف !!
انتبه للحركة اللي بتعملها وكأنها دعوة غير مباشرة للقتال ..: شو بدي تتقاتلي معي ؟
روما بمسخرة ..: ما تعودت اتقاتل مع حدا
سكر اللابتوب وعلى وجههو ابتسامة صفرا ..: تعودي بالاول ما تحكمي عللي قبالك بدون ما تجربي مهاراتو
روما بتكبر ..: اللي بفهمو انك عم تتحداني !!
قام من مكانو ورفع اكمام قميصو ..: ممكن
سبقها لغرفة التدريب ووقف بنص الغرفة .. فك اول زرين من قميصو ..: تعالي
اطلعت عليه من فوق لتحت ونغرمت بشكلو .. بس بسرعة نفضت هاي الافكار من راسها وكزت على اسنانها ..: حفرت قبرك بإيدك ..
بسرعة تقدمت منو وباغتتو ببوكس على وجههو
حط ايدو على وجههو مكان اللكمة .. وردها الضربة بس اتخطتها بمهارة
ضربتو لكمة على بطنو والابتسامة على وجهها
حط ايدو على بطنو ..: واضح انك ماخدة الموضوع بجدية زيادة عن اللزوم
وقفت بعيد عنو شوي ورفعت ايديها قدام وجهها ..: انت اللي مو حاسب حساب لقوة خصمك
باغتها بلكمات متتالية .. بس كانت اسرع منو وكانت تصد كل اللكمات بإيديها وترجع تردلو اللكمات
بلش التعب يظهر على وجهه كريم .. مسح العرق عن وجههو وإحمرت عيونو
اطلع عليها وشافها عم تلهث وبلشت تتعب
بحركة سريعة ومفاجئة .. مسكها من خصرها وشدها عليه
اتفاجئت منو ..
وقبل ما تعطي اي ردة فعل .. كان رافعها بالهوا ومنزلها عالارض على ظهرها وهو جنبها .. حاولت تقوم .. بس كان اسرع منها ولف رجليه حول رقبتها
شد برجليه على رقبتها لدرجة بلشت تختنق ..: شو !!
حست حالها بلشت تختنق ..: بستسلم
بصعوبة طلعت منها هالكلمة ..
فك رجليه عن رقبتها .. لف حالو لجهتها .. حط ايده عالارض جنب راسها ووجهو مقابل وجهها ..: شايف انك استسلمتي بسرعة !
غمضت عيونها بتعب ..: انت غدرتني
اطلع على وجهها وملامحها التعبانة ..: افتحي عيونك
فتحت عيونها والتقو العيون ببعض ..
عيونو بعيونها ..: ولا مرة تغمضي عيونك بوجهي .. وانت عارفة انو عيونك عشقي
تسارعت دقات قلبها من كلامو وقربو منها وبلشت تتوتر ..: بعّد عني
كريم بخباثة..: واذا ما بعدت !!!
غمضت عيونها وكزت على اسنانها ..: لا تخليني اعمل شي يأذيك
حط ايده على دقنها ..: قلتلك لا تبعدي عيونك عني .. فتحي عيونك بسرعة
توسعت عيونو بعد ما حس برجلها اخترقت امعائوا .. بعّد عنها وقلب على ظهرو وايدو على بطنو ..: يخرب بيتك
قلبت حالها فوقو وابتسمت بخباثة ..: المرة الجاي عاهة مستديمة
كريم بتعب ..: ما وصلتك معلومات لسا ؟
روما : وصلت .. قوم معي
قامت ومدت ايدها الو
مسك ايدها وقام ..
___
عشط البحر وبواحدة من القرى السياحية الكبيرة الموجودة بالبلد وبالتحديد عالشط التابع لاكبر فندق فيها ، اقيمت فيه حفلة لكل رجال الاعمال واصحاب المناصب بالبلد
اضواء منورة السماء ومجموعة من البنات بلبس سباحة بترقص على الستيج على صوت الاغاني العالية
وعوحدة من الطاولات كان واقف دون مع رجال اعمال ومشغولين باحاديث متنوعة
قرب شب من دون وهمس بادنو
هز دون راسه
قرب دون من واحد من الرجال وهمس..: لازم نتحرك حالاً
سكر جاكيتو ..: بالاذن
توجهو للقارب اللي كان ناطرهن عند المينا .. طلع دون ومعو فؤاد وتنين من رجالو ومعن واحد من اكبر رجال الاعمال بالبلد
انطلق القارب بسرعة عالية
بعد خمس دقايق هدّى القارب سرعتو بعد ما وصلو ليخت كبير بنص البحر
طلع دون واللي معو لليخت
قرب فؤاد من صندوق كبير موجود على ظهر اليخت وفتحو
دون: هاي البضاعة وصلتلك ياها بامان سيد مِعن .. لازم تنقلها من هون .. وانا مو مسؤول عن اي ضرر بصير بما انك قررت تنقلها بمعرفتك
قرب مِعن من البضاعة وصار يفحص فيها .. طلع كيس وفتح فتحة صغيرة وطلع شوية بودرة على اصبعو وحطو بتمو ..: بضاعة الف ..
دون بغرور ..: شكلك نسيت مع مين بتتعامل .. بس انا ولا مرة دخلت عالبلد هالكمية القليلة .. بس مشانك ومشان ما تلفت نظر علينا
مِعن : انا عارف .. ورح نرجع نتعاون مع بعض متل قبل
دون : اكيد ..
قرب فؤاد من دون ..: معلم وصلوا الجماعة
طلعوا اربع شباب لليخت .. حملوا الصندوق ونزلوه على قارب تاني .. نزل مِعن للقارب وانطلقوا
ابتسم دون بسخرية ..: اول حجر وقع
__
وصل مِعن مع رجالو لليخت الخاص فيه .. طلعوا الشباب الصندوق عاليخت وطلع وراهن مِعن
..: ارفعوا ايديكم وسلمو حالكم
مِعن: شو عم يصير ؟؟
طلع كريم ووراه ماجد من الجهة الامامية لليخت
حاوطت الشرطة مِعن ورجالوا وكلبشو كل الموجودين
قرب كريم من الصندوق ..: شو جايب بضاعة جديدة ؟؟
مِعن بصراخ..: هاي مو الي .. هاي بضاعة دون
التفت كريم حولو ..: وين دون مو شايفو .. ليكون مأمنك عليها .. حرزو البضاعة .. بسرعة
___
بالجهة التانية واقف دون مع فؤاد على ظهر اليخت
دون : كان منيح مِعن .. بس غدار .. وانا ما بحب الغدارين ..
فؤاد: لازم نتحرك حالاً .. وجودك هون خطر
دون: تحرك
تحرك اليخت
وصلوا الشط .. توجهوا للسيارة وانطلقوا بسرعة عالية
__
بعد مرور شهرين
دخل كريم على مكتبو والشرر بطاير من عيونو
دخل ماجد وراه ..: ما رحت عندها عالبيت ؟
كريم: كم مرة بدي فهمك انها سلمتو من اسبوع
ماجد: يعني طلعت بتلعب عليك .. وهربت مع دون
كريم: كيف لساتك مو واثق فيها .. سلمتنا اكتر من عشر تجار مخدرات وممنوعات
ماجد: لا تكون عاطفي .. شو بتفسر اختفائها الغير مبرر .. صحيح تعاونت معنا .. بس انا شاكك انو هدا ملعوب منها ومن دون .. خلانا نقبض على منافسيه بالسوق لحتى تفضى الساحة الو ولعصابتو
رمى كريم كل شي موجود عالمكتب ..: تركني لحالي
طلع ماجد من المكتب
قعد كريم عالكرسي وحط ايده على راسو ..: لي عملتي هيك
فجأة وصلتو رسالة على تلفونو من رقم مجهول
فتح الرسالة وشاف حدا باعتلو لوكيشن
ابتسم بخباثة ..: والله وعملتيها
بسرعة طلع من المكتب وصرخ ..: ماجد .. سهر .. القوات تجهز
خلال دقايق كانت سيارات الشرطة متحركة من قدام الفرع للموقع
وصلوا خلال ربع ساعة للمكان .. كان كافيه قريب عالمينا
جمع كريم القوات ..: دون رح يهرب من المينا .. وحيد انت ومجموعتك حاوطوا المينا من الجهة الغربية .. راسي انت ومجموعتك من الجهة الغربية .. سهر وماجد معي .. ما بدي تلفتوا النظر .. المجموعة الثالثة حاوطوا الكافي .. ما بتتصرفوا شي بدو اوامري .. هدفنا دون وشريكو فؤاد وبس
اطلع على ماجد كأنو بوصي ما يقرب على روما
الجميع ..: حاضر سيدي
تحركوا المجموعات على مواقعهن
كريم وماجد وسهر تخبوا ورا السيارات بالموقف
رفع كريم راسو وشاف روما قاعدة مع دون وفؤاد جوا الكافيه .. زادت دقات قلبو لما شافها وحس بالخطر عليها .. بس ما في اي وسيلة اتصال يقدر يتواصل معها
مرقت دقايق وبعدهن ما تحركوا
قرب كريم على ماجد وطلب من سهر تقرب ..: سهر هدفك فؤاد .. ماجد هدفك دون
سهر بخباثة ..: وانت ؟
كريم: البنت اللي معن
سهر: حاضر سيدي
قرب ماجد من كريم وهمس جنب ادنو..: اكيد ما رح تهربها
زورو كريم مشان يسكت
فجأة قام دون وروما وفؤاد وطلعوا من الكافية
كريم: جاهزين ؟
ماجد وسهر ..: جاهزين
كريم : تحركوا
تحركوا ماجد وسهر شوي شوي ورا دون .. لحتى دخلوا لجوا المينا ووصلوا لنقطة فاضية من الناس
وقفت روما وعيونها بنقو سم ..: دون .. في حساب قديم لازم نصفيه قبل ما نهرب
اطلع عليها دون بإستغراب …: حساب شو ؟
بحركة سريعة طلعت روما مسدسها وقوصت على راس فؤاد
وقع فؤاد جثة هامدة قدام عيون دون
توسعت عيون دون وصرخ بكل صوتو ..: شو عملتي
رفعت روما ايديها وابتسمتلو بخباثة ..: انت اللي بدأت الخيانة بالاول
..: دون سلم حالك .. المكان كلو محاصر
التفت دون للصوت وشاف قوات الشرطة محاصرة المكان
بحركة سريعة سحب روما ومسكها من رقبتها
ابتسمت روما ..: غبي.. مفكر انك تاخدني رهينة .. يا غبي رح يقتلونا انا وانت بدون ما يسألو
صرخ دون ..: حضرة المقدم كريم .. خلي القوات تفتلحلي طريق .. بلا ما خليك تتحصر على حُبك القديم
انصدم ماجد من كلام دون واطلع على كريم
كريم: تركها وسلم حالك .. ما تجبرني اعمل شي مو حابب اعملو
حط المسدس براس روما ..: افتحلي الطريق عم قلك
كريم بصراخ..: القوات تنسحب .. انسحاب
اطلع عليه ماجد بصدمة ..: شو عم تخبص ..
كريم بصراخ ..: انسحـــــاب
بلشت القوات تتراجع وما بقي غير كريم وماجد وسهر
بلش دون يرجع لورا وحكى بمسخرة ..: بس انتبه اليوم خانتني بكرا رح تخونك .. انا مربيها على ايدي وعارفها منيح
قرب من القارب اللي كان مخطط يهرب فيه .. طلع شوي شوي وطلعت معو روما
فجأة صدح صوت اطلاق نار
اطلع كريم على روما اللي ملامح وجهها تغيرت فجأة .. نزل نظرو لتحت وشاف دم نازل من بطنها
التفت على سهر وشافها مصوبة مسدسها عليها والدخان طالع من فوهتو ..
تفاجئ دون من اللي صار وتأكد من كلام روما ( غبي.. مفكر انك تاخدني رهينة .. يا غبي رح يقتلونا انا وانت بدون ما يسألو )
بحركة سريعة رماها بالبحر وصرخ …: امشي
فجأة صدح صوت اطلاق نار تاني بس هالمرة كان القواص على دون .. رصاصة اصابت رجلو اليمين خلتو يوقع عالارض .. ورصاصة تانية بظهر سائق القارب
اخدت الشرطة دون للفرع والاسعاف اخد فؤاد للمشرحة
قرب كريم بصدمة واطلع عالمكان اللي دون رمى روما فيه بس ما كان الها اثر
قرب ماجد منو ..: وين راحت
صحي كريم من صدمتو ومسك ماجد من رقبتو وصرخ فيه …: قلتلك لا تأذيها .. شو اللي عملتوا
ماجد: انت كنت رح تهربها مع انو كان لازم تتحاكم
رفع كريم نظرو وشاف سهر واقفة وابتسامة خبيثة على وجهها .. كان رح يهجم عليها بس ماجد مسكو ووقفو
ماجد بصراخ ..: خاص اهدى
وقفت سهر ونظرها مسلط على كريم ..: انت فعلاً كنت على علاقة بشريكة دون
نزل كريم على ركبو وعيونو مليانة دموع .. صرخ بكل صوتو …: اخـــــــــخ
____
بعد يومين بالفرع
دخلت سهر لمكتب اللواء ساهر ومعها تقرير المهمة
اعطت التحية وقدمت التقرير للواء
اللواء : تفضلي
قربت سهر من الباب وبعدها التفتت لعند اللواء
اللواء: خير حضرة الرائد سهر
سهر: في شي ما بعرف اذا لازم قولو ولا لا
اللواء: قولي
سهر بتوتر…: المقدم كريم لازم يتحول للتحقيق
اطلع عليها باستغراب
سهر: المقدم كريم كان على علاقة بشريكة دون وعالاغلب هو اللي هربها
وقف اللواء ..: من وين جبتي هالمعلومات
سهر: بعد ما انهينا المهمة سمعت الرائد ماجد والمقدم كريم بتخانقو بعد ما ضربت نار على شريكة دون والمقدم كريم اعترف بمل شي
اللواء بغضب ..: ابعتيلي كريم بسرعة
سهر : حاضر سيدي
_____
قاعد بمكتبو وغصة قوية بقلبو .. افكار مخربطة براسو .. كان ناوي يهربها فعلاً .. ما كان مفكر انها تنأذى او يصرلها شي ابداً .. بس كل شي تخربط .. هلق هو مو عارف اذا هي عايشة او ميتة .. فتشو عليها كتير بس ما الها اثر ابداً
شد على راسو بقوة
..: حضرة المقدم كريم تفضل معي لعند اللواء ساهر
رفع راسو بتعب وشاف العسكري قدامو ..: حالاً
قام بتعب وتوجه لمكتب اللواء
دخل ..: احترامي سيدي
كان رح يقعد عالكرسي بس كلام اللواء منعو
اللواء: ما طلبت منك تقعد
وقف قدامو ..: بعتذر سيدي
خبط اللواء عالطاولة بقوة ..: حضرة المقدم .. شو عقاب التستر على مجرم هربان من العدالة
كريم: السجن سيدي
اللواء بعصبية ..: واذا كان اللي متستر على المجرم مقدم متلك
اطلع كريم على اللواء بإستغراب
اللواء: حضرة المقدم كريم انت موقوف عن العمل ومتحول للتحقيق
كريم : حاضر سيدي .. بس بفضل اعرف شو التهمة اللي موجه لالي !!
ضرب اللواء عالطاولة ..: حضرتك على علاقة بالمجرمة ملاك وانت السبب بهروبها ..
قرب كريم لعند طاولة اللواء ..:حاضر سيدي رح اتحول للتحقيق ..
اللواء: تفضل
طلع كريم من مكتب اللواء وشاف سهر وعلى وجهها ابتسامة صفرا
غمزها بخباثة وكمل طريقو لمكتبو
__
دخل لمكتبو وملامح وجهو باردة
دخل وراه ماجد ..: شو صار .. شو كان بدو اللواء
كريم ببرود ..: اتحولت للتحقيق واوقفني عن العمل
ماجد: ليش؟
كريم: لانك غبي .. ما عرفت تمسك لسانك قدام الحية سهر .. ما بعرف شو وصلت للواء ساهر .. بس عرف اني كنت بعرف ملاك من الاول
ماجد بغضب..: بنت ال *^^*
حمل كريم اغراضو وتوجه للباب …: خبرني بس يطلبوني
ماجد: وين رايح .. خلص هيك .. طيب ما حكيت للواء شو القصة بالزبط !!
كريم: لا .. ما رح احكي وخليه يعمل معي تحقيق .. ما عادت تفرق … ورح قدم استقالتي .. بس وصل رسالة لسهر .. حسابها معي كبر كتير .. سلام
طلع من المكتب ومن الفرع كلو
ركب سيارتو وتوجه للمكان اللي صار فيه الاشتباك مع دون
نزل من السيارة ووقف قدام المكان اللي وقعت فيه روما
اطلع حولو وهمس ..: عندي احساس انك لسا عايشة
بقي على حالو ساعة
__
نايمة على التخت بغرفة غريبة .. بلشت تفتح عيونها بتعب وحاسة بوجع قوي بالجنب الايمن من البطن
حطت ايدها على مكان الرصاصة .. اطلعت حولها وشافت حالها بغرفة بس ما كانت غرفتها
اطلعت على جسمها كانت بالملابس الداخلية من فوق .. انتبهت لمكان الرصاصة كان ملفوف بشاش ابيض ونظيف من الدم
نزلت رجليها عالارض بتعب لفت الغطا على حالها وتوجهت لعند الباب .. فتحت الباب بهدوء ومدت راسها
..: كيف صرتي ؟
ارتعبت من الصوت .. اطلعت عالجهة اليمين شافت شب صغير باول العشرينات ..: مين انت وشو جابني لهون
الشب : الليلة الماضية لقيناكي قريب من البيت وابي جابك لهون
اطلعت عمكان الرصاصة
الشب : ابي جراح وهو ساعدك .. جوعانة ؟
روما: لا شكراً .. انا لازم روح
الشب : لا شو تروحي .. ابي قلي ما خليكي تتحركي .. لو سمحتي ارجعي وانا رح جبلك الاكل .. بالمناسبة انا اسمي رازي .. شو اسمك لانو من مبارح ونحنا نقول عنك البنت
روما: اسمي روما .. لا ملاك
ابتسملها رازاي..: خلص ارتاحي .. ما في داعي تخبريني باسمك
روما: ملاك اسمي الحقيقي
دخلت لجوا
دق رازي الباب .. :في تياب عندك عالرف ابي حطهن لالك .. كبار شوي بس بمشي حالن
اخدت روما التياب عن الرف ولبست بس البلوزة .. قعدت عالتخت وصارت تتذكر اللي صار من يومين ..
فــــــــلاش بــــــاك
من بعد ما ضربت سهر عليها نار استقرت الرصاصة ببطنها وقعت بالمي بعد ما تركها دون .. حاولت تستغل الشوشرة اللي صارت وغاصت لجوا المي .. بعدت عن مكان الاشتباك وطلعت من المي .. بقيت تسبح بكل قوتها لحتى تبعد عن الانظار .. وصلت اخيراً لمكان ما فيه حدا .. طلعت من المي وصارت تركض بكل عزمها
ماشية بطريق مقطوع من الناس والسيارات .. ما في اضواء غير ضو القمر .. حاطة ايدها على بطنها مكان الرصاصة
وقعت عالارض من التعب والبرد
قعدت عالارض بعد ما خارت قوتها وما عاد فيها تكمل .. النزيف ما قطع
اطلعت عالسما وتمتمت ..: شكلها هاي هي النهاية .. النهاية اللي كنتي دايماً تخافي منها .. رح تموتي وانت وحيدة بردانة .. ما في حدا يطبطب على جرحك ..
استسلمت بشكل نهائي وغمضت عيونها بتعب
بــــــــــــاك
تسطحت عالتخت وركزت عيونها بالسقف ..: شو رح اعمل هلق .. ما رح اعرف اهرب برا البلد بالجواز اللي معي .. اكيد عممو اسمي بكل المطارات والحدود .. لازم اطلع جواز جديد .. افف من وين بدي جيب رقمو لابو مجاهد افف يااه .. سكرت من كل الجهات
المسا
كانت متسطحة عالتخت وشاردة بالعدم .. كل تفكيرها مصبوب على الهروب
اندق الباب ..: ملاك تعي تعشي .. ابي رجع من المشفى
طلعت من الغرفة وتوجهت لغرفة القعدة
كان رازي وابوه قاعدين حول طاولة السفرة
روما: مسا الخير دكتور
ابو رازي: تعالي يا بنتي
قعدت روما عالكرسي بكل هدوء ..: شكراً الك على مساعدتي
ابو رازي: هدا واجبي واي حدا كان بمكاني لازم يعمل هيك
هزت راسها بدون ما تحكي
رازي: ابي .. طلع اسمها ملاك
ابو رازي: كل حدا الو نصيب باسمو . وانت ملاك متل اسمك
غصت بالاكل بعد ما سمعت كلام ابو رازي وقالت بحالها ( لو تعرف هالملاك قدي ايدها ملطخة بالدم كنت تراجعت عن كلامك)
خلصو اكل وساعدت روما بترتيب السفرة وعملت ابريق شاي
ابو رازي: ما قلتيلي يا بنتي .. مين عمل فيكي هيك
ركزت روما قعدتها ..: عمو انت ساعدتني وانا ما رح كذب عليك.. وما رح اطلب منك شي غير تتركني روح من هون بهدوء
ابو رازي: احكي .. واذا فيني ساعدك رح ساعدك
استجمعت روما قوتها ..: انا هربانة من الشرطة .. ما فيني احكي اكتر من هيك ..
اطلع رازي على ابوه ..: يعني الشرطة اللي عملت فيكي هيك ..
هزت راسها بدون ما تجاوب
سكت ابو رازي وما حكى
روما: بعرف اللي قلتو خطير .. بس انا لازم روح من هون بسرعة .. ما بدي دخل حدا ما الو ذنب بمشاكلي ..
وقفت وتوجهت لعند الباب ..: شكراً الكن
طلعت من البيت بسرعة وبلشت تركض بلا وجهة
__
بعد ساعتين من المشي وصلت للمكان اللي كانت قاصدتو
وقفت تاخد نفس وبسرعة رفشت الباب برجلها ودخلت
وقف الرِجال الي كان بالغرفة وعلامات الخوف على وجههو
اخد نفس بعد ما شافها ..: روما انت ايمتى بدك تبطلي عادتك الوسخة هاي
روما : ابو مجاهد .. بدي تطلعي جواز سفر باسرع وقت
ابو مجاهد : لي شو صار من شهرين طلعتلك واحد
روما : دون نمسك
ابو مجاهد: لا .. لا تقوليها
روما : قلتها وخلصت .. انا لازم اطلع من البلد اليوم قبل بكرا وما بقدر اطلع بالجواز القديم .. اسمي وجوازي اكيد صارو علحدود والمطارات قبلي
ابو مجاهد: على راسي
روما: ايمتى بكون جاهز
ابو مجاهد: تعالي عندي كمان يومين بكون جاهز
روما بغضب ..: ابو مجاهد .. شو تعالي عندي كمان يومين .. بقلك الشرطة ملاحقتني .. ولا ليكون مفكرني نازلة بفندق وبستجم عالبحر.. خلال ساعتين بدي ياه .. بدي كون برا البلد قبل ما يطلع النهار .. تصرف
ابو مجاهد : تعالي معي
دخلت معو للغرفة
ابو مجاهد: يلا شوفي شو بناسبك وانا رح شوف شو في عندي شي جاهز
بدلت تيابها بسرعة .. طالعت باروكة باللون الخمري قصيرة وبعدها طلعت عدسات باللون الاسود .. عملت شوية مكياج وتوجهت لعند ابو مجاهد
روما: جاهزة
اشرلها بإيده للكرسي مقابل الكاميرا
قعدت عالكرسي واخدلها ابو مجاهد صور
بعد ساعتين كان الجواز المزور جاهز
ابو مجاهد: هدا جواز جاهز .. رح تطلعي فيه من المطار عادي
روما: مو خطر اطلع من المطار
ابو مجاهد: لا .. الشرطة رح تركز اكتر عالطريق البحرية .. اسمعي مني انا بعرف شو بقلك .. وهاي التكت لليونان .. اليونان ما فيها تسليم مطلوبين
روما: الله يخليلي ياك .. وهدا حقك
ابو مجاهد : من وين حبتي المصاري ؟
روما بخباثة ..: بيت السبع ما بخلى من العظام
ابو مجاهد : الله معك .. انتبهي عحالك
روما : بخاطرك
طلعت من عندو اخدت تاكسي وتوجهت للمطار
_____
بعد يومين
دخل كريم للفرع بكل هيبتو .. توجه لغرفة التحقيق وكان ناطرو المحقق
دخل وقعد عالكرسي
بلش المحقق يسألو..: كريم الراوي انت متهم بالتستر على المجرمة الهاربة ملاك ..
كريم: اي تستر .. انا لو اعرف وين هي رح جيبها وسلمها
المحقق : وكنت على علاقة فيها
كريم: شو دليلك على اني كنت على علاقة فيها .. ما في دليل وكلو كلام منقول عن لسان الرائد سهر .. ما في شي ملموس .. دون اللي رماها لعندي بعد ما خطط لقتلي .. بس اكتشفت اللعبة كلها وقررت تتعاون معي وتسلمني دون قبل ما يهرب .. وكل تجار المخدرات اللي انمسكو خلال اخر شهرين هي اللي سلمتنا ياهن واحد واحد
المحقق: وشو كان المقابل
كريم: المقابل انها تكون شاهد ملك بالقضية
المحقق: ودليلك!!
كريم : الرائد ماجد بعرف بكل الخطة من اول يوم .. بس الرائد سهر تسرعت وقوصت عليها وهربت
كمل المحقق تحقيق مع كريم وبعدها مع ماجد لشهادتو وطلع من الغرفة اجتمع المحقق مع اللواء والضباط وقررو اسقاط كل التهم عن كريم
بعد ساعة
دخل كريم لغرفة اللواء ساهر اعطى التحية وحط ورقة على مكتب اللواء
مسك اللواء الورقة ..: شو هدا
كريم : استقالتي سيدي .. انا كنت واضح وصريح من الاول
اللواء: بس الموضوع تسكر
كريم : انا موجود هون بالفرع من اكتر من ١٥ سنة واعتقد من العار اتهامي بهيك تهمة خسيسة بعد سنوات العمل هاي .. وتهم بدون دليل .. مجرد كلام منقول بدون فهم .. ارجوك وافق على الاستقالة سيدي
اللواء: الداخلية وفرع مكافحة المخدرات ما بستغنوا عن مقدم متلك .. ورح يتم ترفيعك
كريم: سيدي الداخلية والفرع ما احترمو سنوات عملي هون من الاساس .. ارجوك سيدي
بقي كريم مُصر على موقفو رغم الحاح اللواء على التراجع عن قرارو
وقع اللواء الاستقالة واعطاها لكريم ..: بس اذا بتسمح نحنا حابين نكرمك
اخد كريم الورقة ..: شكراً سيدي بس ما بشوف انو في داعي
ضرب التحية الاخيرة وطلع من المكتب
توجه لمكتبو واخد كل اغراضو وطلع من الفرع..
#يتبع
