"ليلة سقوط روما"_ الجزء الثاني
*«لـيـلـة سـقـوطـ رومـا».*
*الـجـزء الـثـانـي.*
وصلت السيارة الموجود فيها دون لمنطقة بعيدة عن المدينة
نزل منها دون ورجالو وقامو بعملية تفتيش دقيقة لدون لحتى ما يكون اي جاهز تتبع وشلح كل تيابو ولبس تياب جديدة
وصلت سيارة تانية
ركب فيها دون واعطى اشارة لرجالو بتفجير السيارة وانطلق
_____
وصل للفيلا
نزل بكل ثقة وكان بإستقبالو فؤاد وتنين من رجالو
فتح فؤاد ايده وحضن دون ..: والله طولت الغيبة يا دون
دون : يلا اجمعلي كل الرجال بسرعة
فؤاد : بإنتظار وصولك
نزل دون لغرفة الاجتماعات وكان الفريق كامل بإنتظارو
حرك حجر عينو وكأنو بفتش على حدا
قرب فؤاد منو ..: بعدها ما وصلت
دون : وينها ؟؟
فؤاد : على وصول
وقف دون عراس الطاولة اخد نفس عميق ..: احلى ما فالحياة هي الحياة .. والحياة يعني حرية .. والحرية يعني دون .. وبما انو دون طلع معناه رجعت الحرية ورجعت الحياة.. يا رجال رح نبلش شغل عالثقيل وما رح نرحم حدا .. واول واحد رح نفتتح فيه المسيرة هو المقدم كريم الراوي ..
فؤاد: هدا حصتي
دون : لااا هدا من نصيبي انا .. انا وبس
فؤاد: حلال عليك
..: نورت يا مـــــــــوير
التفت دون للصوت كانت روما واقفة وراكية حالها عالباب
دون: فؤاد خد الشباب وانصرفو
صرخ فؤاد..: يلا شباب انصراااااف
قرب فؤاد على دون وهمسلو ..: من شاف حبابو نسي اصحابو
طلع فؤاد والشباب من المكان
دون: اميرتي الصغيرة
ركضت بكل سرعتها ونطت لحضنو وتعلقت برقبتو
بادلها دون الحضن بكل اشتياق ..:اشتقتلك
ضلت متعلقة برقبتو وبتشم بعطرو ..: يااااه قدي كان نفسي بهالحضن
دون: وانا كمان
فلتت رقبتو ووقفت قدامو
حط ايده على وجهها وركز بعيونها ..: روما.. ما غلطتت لما سميتك روما .. عيونك فيهن سحر روما وجمال روما
فــــــــلاش بــــــاك
قدام ميتم كبير بالبلد وقفت سيارة سودة فخمة .. نزل منها السائق وتوجه للباب الخلفي من السيارة
فتح الباب ..: تفضل آسر بيك ..
دخل اسر من باب الميتم بكل هيبة .. توجه لمكتب المديرة
قامت نعمة من مكانها ..: اهلا اهلا آسر بيك
آسر: وين ملاك ؟
نعمة: يلا جاهزة رح ناديها
طلعت نعمة لعند ملاك ..: يلا حبيبتي وصل آسر بيك .. متل ما وصيتك ، اذا حسيتي بالخطر بتهربي فوراً
ملاك : لا تخافي عليي
نزلت لعندو بقلب جامد
ملاك: انا جاهزة
قرب منها بهدوء..: بتعجبني البنت الفهمانة
ملاك ببرود ..: لا تفكر انك ماسكني من ايدي اللي بتوجعني .. وقت الجد ما بهمني حدا .. بس انا تعودت ما احكم عشي قبل ما افهم
آسر: يلا نمشي
حمل الشنطة وطلع من المكتب .. وطلعت ورا بالخفى متل ما وصاها
طلب من السائق يروح لانو رح يرحع لحالو
ركبو السيارة وانطلقو
كان الصمت سيد الموقف
بس كسر هالصمت سؤال آسر ..: شو بتتوقعي بدي منك
ملاك بكل هدوء ..: واضح انو شغلك مو نظيف
آسر: اعجابي بزيد فيكي اكثر
ملاك: بس بحب اعرف شو نوع شغلك بالزبط
آسر: بدنا ساعتين لنوصل .. بس نوصل بفهمك
وصلو لمكان مهجور ما في اي حدا
نزلت ملاك من السيارة واخدت نظرة سريعة
التفتت لآسر ..: ما لقيت مكان انظف من هيك
سحبها من ايدها ودخل لجوا مبنى قديم ومهتري .. كان في بس كرسيين
قعدها على كرسي وقعد مقابلها
زبط قعدتو وصرخ بكل صوتو ..: فؤااااد
طلع شب من جوا المبنى ..: امرك معلم
آسر: هاي البنت يلي خبرتك عنها .. بدي خلال شهر تكون متدربة منيح ..
فؤاد: عُلم وينفذ
آسر : انا رح روح موعدنا بعد شهر
طلع آسر من المبنى
قرب فؤاد عليها وحط ايده على وجهها ..: ناعمة وطرية
بحركة سريعة كانت ملاك ماسكة ايده ولاففتها ورا ظهرو
همست جنب ادنو ..: شكلك مستغني عن عمرك
فؤاد : يخرب بيتك ما عملت شي
ملاك: ولا تفكر تعمل شي بحياتك كلها .. يلا دربني اشوف
فؤاد: تركيني
دفشتو لقدام خلتو يوقع عالارض
فؤاد: الله يسامحك يا آسر على هالاستفقادة
ملاك : بتقول شي ، ما سمعتك منيح
فؤاد: لا ما قلت تفضلي يا ستي
فاتو لجوا المبنى وكان مكان للتدريب
بلش فؤاد معها بالتدريبات البدنية وبعدها بالتدريب على القواص
خلال شهر كانت تقريباً جاهزة .. وبخلال هدا الشهر خلصو فؤاد من ايدها اكتر من عشر مرات وكل مرة كانت تصل لموتو بس يخلصو من بين ايديها على اخر لحظة..
وبيوم من وجه الصبح دخل عليها فؤاد وهي بتتدرب عكيس البوكس
فؤاد : انت ما بتتعبي ؟
ملاك: نفسي اعلقك مكانو للكيس
فؤاد: الله يريحني منك على اهون سبب .. يلا تفضلي معي آسر ناطرك
ملاك: يلا امشي
طلعوا بالسيارة وانطلقوا لمكان ببعد عن المبنى شي ساعة
كان مستودع بنص الغابة
نزل فؤاد وملاك من السيارة
قرب فؤاد عليها ..: المعلم ناطرك جوا
ملاك: ما رح تفوت معي
فؤاد : لا طالبك لحالك
قربت ملاك من باب المستودع ونفتح لحالو
فاتت عالمستودع شافت آسر قاعد عالكرسي بنص المستودع
آسر: كلو لبرا
طلعو كل الرجال من المستودع وبقي آسر وملاك لحالن
قام آسر وقرب من ملاك ..: انت اليوم جاهزة لتكوني معي
ملاك: انا نطرت شهر .. ومن حقي افهم لوين بدك تاخدني
آسر: حقك
ملاك: تفضل
حط عيونو بعيونها..: بس اول شي اسمك من اليوم هو روما
ملاك : روما .. لي يعني
آسر: عيونك فيها سحر روما .. غريبات وغامضات وبنفس الوقت فيهن جمال
ملاك: ..
آسر : وانا اسمي دون
ملاك: دوون!!!
آسر: انا تاجر مخدرات
ملاك بإستغراب..: يااااااه .. بهالسهولة
آسر: وبدي تكوني معي .. اول يوم شفتك فيه كنت ١٣ سنة .. طفلة صغيرة ما بتعرف الخوف .. بتضرب بالوجه وما بتخلي دليل واحد عحالها .. وهدا يلي بدي ياه
ملاك: وشو يلي بأكدلك اني رح وافق كون معك
آسر: نظرة عيونك .. عدم خوفك مني وانا يلي رجال بشنبات بترجف بس تسمع اسمي ..< فتح ايده >.. دوووون
ملاك: وانا معك .. انا ما عندي شي اخسرو
سحبها من ايدها وطلع من المستودع وتوجه للغابة .. كان في طاولة صغيرة وعليها سلاحين
مسك واحد واعطاها التاني .. ومقابيل الطاولة ببعد ٣ امتار كان في قناني قزاز على طاولة تانية
آسر : يلا جاهزة
ملاك: بس الهدف بعيد كتير
رفع آسر المسدس وركز عالهدف وضرب ..اجت الرصاصة بنص القنينة
آسر: يلا
زبطتت وقفتها وركزت عالهدف وضربت .. بس ما صابت
آسر : بدك تدريب كتير .. مع اني فهمت الحمار فؤاد يدربك على القواص
اطلعت بعيونو ..: انا ما بستهوي القواص .. انت قلتها من شوي .. انا لما بضرب ما بترك شي وراي والقواص رح يخلف وراي دليل عليي
آسر: دايماً اختياراتي بمحلها ما بتخيب ابداً ..
ملاك: انا لهلق ما فهمت .. شو رح يكون شغلي معك .. اللي لاحظتو انو عندك كتير رجال ..
آسر: هدا الشي رح تعرفيه مع المدة .. حالياً بدي تكوني معي وبس ..
ملاك: بتعجبني صراحتك كتير ..
آسر: بدي تكوني احسن قناص بين الرجال .. بدي تخلي هدا الشي حالياً هدفك
ملاك: حاضر
بــــــــــــاك
رجع ضمها لصدرو وكأنو بدو يدخلها لجوات قلبو
روما: استفقدتك كتير
بعدت عنو وسحبتو من ايده ..: تعال
توجهو لغرفة ضرب النار .. راحت للطاولة يلي موجود عليها مسدس مفكك .. خلال ثواني كانت مركبة جميع اجزائو وصوبت عالهدف بكل حرفية وجابت الطلقة بنص الهدف
كبست على زر وبعدت الهدف ورجعت صوبت وجابت الطلقة بنص الهدف
كررت هالحركة اكثر من عشر مرات لحتى صار الهدف بابعد نقطة بالغرفة
قرب منها دون بعد ما كان مراقب كل حركاتها وفاهم كل خطوة بتعملها
دون : هاي النقطة الي
نزلت ايده عنها ورجعت ركزت وقفتها وصوبت عالهدف واجت الطلقة بنص الهدف
صرخ دون ..: برافو
هجمت عليه وحضنتو ..: عملتها عملتها الي اكتر من خمس اشهر بتدرب عليها
سحبها دون من ايدها وقعدها على الكرسي
طلع من جيبتو صورة وحطها عالطاولة قدامها
وقف وراها وحط ايده على اكتافها ...: شايفة هدا يلي بالصورة
روما: مممم ..
دون : هدفنا الجديد
روما: عُلم وينفذ
دون: لا هالمرة غير كل المرات .. ما بدي موت سريع .. هدا مطلوب منك فقرة الموت البطيئ .. بدي يتعذب بالاول
روما: قلي الخطة وانا جاهزة للتنفيذ
بحركة سريعة لفها مع الكرسي عليه واطلع بعيونها ..: بدي تأسري بعيونك هدول .. بدي تسحري .. بدي تخلي ما يعود يستعمل عقلو .. بدي تخلي يوقع بغرامك ويبطل بفكر ابداً
روما : وبعدين ؟؟
مسك ايدها وقربهن من شفايفه وطبع بوسة ناعمة ..: يموت على ايديكي الحلوات هدول
روما: لي ما بخلص عليه على طول؟
دون : بدي يتعذب .. واكبر عذاب لالو يموت على ايدين الانثى يلي بعشقها
روما: صرت متأكد رح يعشقني
مشى ايده على جسمها ..: يلي بشوف هالجسم والقوام هدا مستحيل ما يعشقو .. وبكفي يشوف عيونك ..
تنهد بصوت عالي ..: عيونك يلي اسروني من وانت صغيرة
هزت روما راسها وهي مخدرة بين ايده
قرب منها وهمس جنب ادنها ..: بس بدي توعديني وعد
روما: شو؟؟
دون: قلبك.. قلبك الي وبس
لفت ايدها على رقبتو ..: الك وبس
____
بقاعة كبيرة صوت الاغاني الاجنبية عالي .. بنات بكل زواية من زوايا القاعة بترقص على انغام الموسيقى بكل انسيابية واحتراف
دخل دون وجنبو روما ومعو اربعة من رجالو
قرب منو فؤاد وفتح ايده وصرخ بكل صوتو ..: وصل الزعيييييم
توجه دون وروما لوحدة من الطاولات
قعدت روما جنب دون وشدها عليه
قربت من ادنو ..: ايمتى رح نبلش بالعملية
دون: اليوم انسي كل شي بدي تكوني بس معي وراسك فاضي ما في شي .. بدي اشبع منك الاول وبعدها رح نبلش بالخطة
قرب فؤاد من طاولة دون وبإيده قنينة شمبانيا ..: تفضل يا زعيم
قام دون واخد القنينة منو .. خضها بسرعة ورشقها عكل الموجودين حوليه والكل يزقف ويصفر
مسك روما من ايدها واخدها لساحة الرقص وصاروا يتمايلو على انغام الموسيقى
قرب دون من روما وهمس بإدنها ..: اشتقتلك كتير يا بنت .. ما بدك ترضي عني ؟؟
روما: لا خليك هيك لاعرف قدي بتحبني
دون: لك والله بموت فيكي
روما: قلتلك شرطي
دون: خلص قربت كتير .. نخلص من هدا الحيوان وبعدها نشوف حالنا ورح نسافر ونشوف شغلنا برا
روما: نسافر؟
دون: ايه نسافر .. خلص ما في النا عيش هون
روما: انا معك وين ما تروح
شدها لحضنو ورجع يرقص
_____
بالفرع
كان كريم وماجد وسهر مجتمعين مع الضباط
اللواء مجدي: بدي تفسير واضح لايلي صار حضرة المقدم
سهر : انا كنت ضد اللي عملو .. تسليم اخطر مجرم للعصابة كان خطأ كبير .. بس هو نفذ اللي براسو
ضرب كريم عالطاولة بكل غضب ..: شو كان المفروض اعملو
مجدي: شو استفدت !!! اللواء نزار بعدو موجدد عندن ودون حُر طليق .. وانت بتعرف قدي اخد منا مجهود لحتى قبضنا عليه
كريم: فهمني شو كان مفروض اعمل .. بعتولي فيديو والمسدس براس اللواء نزار وبقلي معك ساعة تسلمني دون .. بدك اعمل اجتماع لحتى يروح اللواء .. انت لو محلي شو كان عملت ..
مجدي:...
كريم: ايوا بالزبط هيك .. كان عملت متل ما انا عملت
مجدي: وين اللواء .. بعدو موجود عندن .. شو الحل
فجأة رن موبايل كريم برقم مجهول
كريم : ايوا .. مين
فؤاد: المقدم كريم .. حامي الوطن !
كريم: مين معي ؟
فؤاد: نسيت صوتي يعني .. على كل حال الك امانة عنا .. ونحنا حافظنا عليها واجى موعد تسليمها .. كيف بتحب تستلمها .. او اقلك .. اطلع برا بتلاقي اللواء جنب الباب الخلفي .. انشالله كنا خفيفين عليك .. يلا استر ما شفت منا
توجه كريم بسرعة للباب الخلفي وشاف اللواء مغمى عليه جنب السور
بسرعة امر كريم بطلب الاسعاف لنقل اللواء للمشفى حالاً
____
تاني يوم
بالفيلا عند فؤاد كان مجتمعين العصابة كاملة
وصل خير بعد ربع ساعة وخبر دون وفؤاد انو اللواء انتقل للمشفى
دون: فؤاد حطلي تنين مراقبة بالمشفى .. واول ما يطلع اللواء بتنفذ على طول
فؤاد: كنت بدي احكي بموضوع بس ما بعرف اذا وقتو
دون: قول
فؤاد: وجودك هون خطر عليك .. لازم تختفي فترة منيحة .. شو رايك تروح مع روما
دون: روما لا .. روما عندها مهمة وما لازم تكون موجودة بينا هالفترة ابداً
فؤاد: بعدك حاط هالمقدم براسك ؟
دون: بدي جيبو راكع عند رجلي ، وبعدها امعسو بنفس الرجل
فؤاد: بس كمان وجودك هون خطر عليك
دون: قبل ما يكون خطر عليي هو خطر عليكن انتو كمان .. انا بعرف وين اروح .. هدا اخر يوم الي هون ومن بعدها رح يكون الاتصال بينا عبر التلفون
فؤاد: بكون احسن .. روما كمان رح تكون بعيدة عنا؟
دون : ايه .. بس لتخلص مهمتها ..
فؤاد: يلا انشالله تخلص عخير وتروحو من البلد .. ما رح اتحمل خسارتك وخسارتها
دون: لا تقلق روما قدها لهالمهمة
طلع دون تلفون من جيبتو ..: هدا التلفون بخط جديد .. اذا في شي مهم بتحاكيني
طلع من الفيلا .. اخد وحدة من السيارات وانطلق
_____
بعد اسبوع
فاتت روما مثل عالاعصار على الصالة بفيلا فؤاد
وقفت بنص الصالة ومعالمها ما بتبشر بالخير ابداً ..: من ايمتى بتخططوا للعملية بدوني
وقعت القهوة من ايد فؤاد بعد ما نقز من صراخها ..: شبك ، شبك .. بسم الله
روما: لا تلف ولا دور .. انا عرفت كل شي
قام فؤاد من مكانو وراح لعندها يحاول يهديها
نفضت ايده عنها بغضب ..: وين دون؟
فؤاد: ما بعرف
دفشتو بكل قوتها...: فؤاد عم تصيع عليي
فؤاد ؛ خلص اهدي حبيبتي
روما بصراخ ..: لا تقلي حبيبتي .. ويييين دون عم اسألك !!!
فؤاد: والله ما بعرف .. قلي من اسبوع انو لازم يبعد عن الفيلا .. وانت كمان لازم تبعدي شوي لحتى تنهي مهمتك
روما: كيف بتحكي معو تلفونو على طول مقفول !
فؤاد: ما بقدر ، اعذريني
دفشتو بكل قوتها ..: ماشي يا فؤاد .. وصل لدون هالكلمتين .. اذا ما بحاكيني من هلق للصبح ينسى وحدة اسما روما
لفت حالها وطلعت من الصالة ومن البيت كلو
حط فؤاد ايده على صدرو ..: يخرب بيتك يا روما ولا الك علاقة بالانوثة
طلع لغرفتو بسرعة وطلع التلفون من الخزانة ودق لدون
فؤاد: وينك يا عم ..انت روحت وريحت راسك وتركتلي قنبلة موقوتة بوجهي
دون: شبها روما ؟
فؤاد: شبها يعني .. ما بعرف اي كلب خبرها بالعملية الجديدة .. وبتحاول تتواصل معك وانت تلفونك مقفول
دون: هديها بمعرفتك
فؤاد: حملتني رسالة اوصلك ياها .. انسها اذا ما دقتلها من هلق للصبح
دون: خلص خلص انا بتصرف .. يلا سلام
____
ببيت روما
نايمة عالتخت مغمضة عيونها وحاطة سماعات بإدنها ومشغلة اغنية اجنبية
حست على نسمة هوا باردة لفحت وجهها
شالت السماعات.. فتحت عيونها بسرعة ونقزت
..: ازعجتك ؟؟
كان شخص ملثم ومو باين منو غير عيونو
اطلعت بعيونو..: دون
كشف عن وجهو ..: اشتقتلك
قامت عن التخت ودفشتو ..: وين كنت ؟
دون: انا هون جنبك .. مستحيل ابعد عنك ابداً .. بس انت داخلة على مهمة صعبة وما بدي تنأذي بسببي ..
روما: هدا حكي فاضي .. انت بتعرف مين انا
دون : لاني بعرف مين انت بدي ابعد عنك .. انت لازم تبقي نظيفة .. يلي جاي مو سهل ابداً وهدا مقدم مو اي بني ادم عادي .. وما بدي احط ولا ذرة شك بقلبو ناحيتك .. فهمتي عليي
تجاهلت كل كلامو وهجمت عليه ودفنت حالها بصدرو ..: خليك جنبي الليلة
دون : لازم روح .. جيتي لهون كانت صعبة ..بس كل شي مشانك بهون .. وبدي منك كمان شغلة
روما: شو ؟
دون : لا عاد تروحي عالفيلا عند فؤاد
روما: الحيوان ما رضي يعطيني رقم تلفونك الجديد
دون: هاي تعليماتي انا
روما : واذا احتجتك؟
دون : رح كون جنبك لا تخافي ..
طبع بوسة عجبينها ..: لازم ارجع ، انتبهي عحالك .. وانا رح ابعتلك اشارة اول ما مهمتك تبدأ .. وكمان شغلة
روما:..
دون: رح ابعتلك واحد من رجالي بس ما بتعرفي .. رح يعطيكي كل التعليمات الجديدة .. بدي تبقي بالبيت وما تطلعي إلا للضرورة القسوى
روما: حاضر
دون: بشوفك
طلع من الغرفة متل ما فات بعد ما غطى وجهو
____
بعد يومين
وصل كريم وماجد للمشفى .. توجوا لغرفة اللواء نزار
كريم: لااا اليوم الحمدلله احسن .. شوف يا ماجد وجه اللواء كيف منور
ماجد: خلص لكن لازم نجوزو .. رجع عريس
اللواء بغضب متصنع ..: ثابت حضرة المقدم
كريم: حاضر سيدي ... يلا سيدي الدكتور كتبلك على خروج
قرب ماجد من اللواء ومسك ايده ..: يلا سيدي تفضل السيارة ناطرتنا برا
نفض اللواء ايده ..: ايدك عني.. انا شباب اكتر منك ومنو
كريم: الشباب منك وورا حضرة اللواء
طلعو من الغرفة وتوجهو للباب الخلفي التابع للمشفى
كانت سيارة سودا واقفة قدام الباب
اللواء نزار : يلا روحو انتو .. انا رايح عالبيت بالاول وبعدها عنا اجتماع بالفرع
كريم : خلينا معك نأمن عليك وبعدها بنروح مع بعض
نزار: نفذ بدون اعتراض
ضرب كريم وماجد التحية ..: حاضر سيدي
توجه كريم وماجد للسيارة التانية
فتح اللواء باب السيارة ..وفجأة طلعت رصاصة من بارودة قنص واستقرت بقلب اللواء ووقع عالارض
نزل كريم وماجد من السيارة وركضوا لعند اللواء
حط ماجد ايده على رقبة اللواء وصرخ بكل صوتو ..: دكتوووور بسرعة دكتووووور
وقف كريم بسرعة وصار يتلفت حولو .. لحد ما لمح حدا واقف على سطح مبنى كبير قريب من المشفى
التفت لماجد ..: اهتم انت باللواء انا رايح
ماجد: ويين ؟
ركض بسرعة وما اعطى اهتمام لاسئلة ماجد وتوجه للمبنى
_____
بالمقابل بالمبنى القريب من المشفى كانت روما واقفة وعينها بالمنظار .. بعدت عن السطح بعد ما شافت كريم كشفها
ضبت البارودة ونزلت عن السطح بسرعة عن طريق المصعد ووقفت بالطابق ال٢٣ وكبست على ازرار المصعد كلها لحتى توه كريم يلي شافتو متوجه لعندها ... طلعت بسرعة من المصعد ودخلت .. وحدة من غرف العاملين .. حطت شنطة الجيتارة بالفتحة المخصصة لرمي النفايات وبسرعة خلعت البدلة الجلد والطاقية ولبست قميص ابيض وبنطلون جينز وحطت باروكة قصيرة باللون الاحمر .. وبعدها حطتت عدسات باللون البني .. اخدت كل تيابها وحطتن بكيس اسود ورمتو بنفس الفتحة .. اخدت نفس وفتحت الباب وطلعت بكل هدوء .. وقفت قدام مصعد تاني وكبست الزر بكل برود .. وصل المصعد ونزلت للطابق الارضي عند موقف السيارات .. توجهت للمكان يلي بتجمع في النفايات وطلعت الشنطة والكيس .. حططتن بشنطة السيارة وانطلقت
_____
وصل كريم للمبنى وتوجه بسرعة للمصعد واطلع عالشاشة فوق المصعد لحتى يعرف المصعد بأي طابق وقف .. بس عبث المصعد كان يوقف بكل طابق .. توجه بسرعة لدرج الطوارئ وطلع للسطح .. بس وصل متأخر وما كان في حدا عالسطح .. حمل جهازو اللاسلكي واعطى خبر للفرع وطلب دعم فوراً
نزل للريسبشن وأمر باغلاق جميع المداخل والمخارج التابعة للمبنى
بس كان فات الاوان وروما هربت من المبنى ..
______
وصلت للفيلا
فاتت بكل برود وابتسامة صفرا عوجهها ..: ما في مبروك
التفت فؤاد بإستغراب ..: شو جابك لهون !! دون قال ممنوع تيجي هالفترة
روما ببرود ..: انسى .. ما رح تهنيني على انتهاء المهمة ؟؟
فؤاد : اي مهمة؟؟
روما : اللواء نزار صار بتعداد الموتى
فؤاد: شوووووو؟؟
مسك تلفونو واتصل على خير ..: خيييييير بسرعة انسحااااب .. شووو عن يصير عندك .. الووو .. خيييير !!!
قطع الخط
روما: شو صاير
فؤاد بغضب ..: روحي على بيتك ولا تطلعي لحتى حاكيكي انا او دون
روما: فهمني شو صاير !!
فؤاد: اغلب الظن خير انمسك .. لازم نخلي الفيلا بسرعة .. وين البارودة ؟؟
اخدها منها بسرعة وسحبها من ايدها وطلع من الفيلا
فؤاد : روحي عبيتك بكل هدوء وبدون شوشرة
روما: بستنى اتصالك
تمتم فؤاد بصوت مو مسموع ..: اذا ضليتي عايشة
ركبت روما سيارتها وانطلقت بسرعة
_____
عند خير
كان خير واقف ورا الزاوية عسطح واحد من المباني المقابلة لمدخل المشفى الرئيسي ومعا كمان تنين من رجالو
وصلت اشارة عن طريق السماعة يلي بادنو ..
التفت لرجالو ..: خليكن جاهزين .. الهدف تحرك .. ما بدي ولا غلطة
مرق خمس دقايق ما طلع حدا من المشفى
حس خير انو في شي غلط عم يصير ومع هيك كانت الاوامر انهن ما يتحركو من اماكنن
بعد نص ساعة رن تلفونو خير …: فؤاد شو نعمل .. انسحاب شو ..
..: الشرطة محاصرة المكان .. سلموا انفسكم ..
اطلع خير على شاشة التلفون ورجعوا على ادنو ..: فؤاد هكر التلفون من عندك .. ولا تقلق ما رح يمسكونا عايشين ..
قفل التلفون وصرخ برجالو ..: جاهزين ..
صدح صوت اطلاق نار عالي بالمكان ..
قربوا رجال الشرطة من خير ورجالو ولقوهن مرمين على الارض بعد ما قوصوا حالن ..
__
بعد ساعتين
وصلت بيتها وهي طايرة من الفرح .. فاتت من باب البيت وتوجهت للمطبخ .. عملت فنجان قهوة
طلعت من المطبخ حاملة فنجان القهوة وبتصفر ..
فجأة قبضة ايد انلفت على رقبتها بكل قوة
شهقت ..: ددددوون !
دفشها عالحيط وقبضة ايده شادة على رقبتها ..
قرب تمو على ادنها وحكى بصوت مبحوح ..: شووو هدا يلي عملتي !!!
روما بصعوبة وتأتأة ..: ششو .. ششوو عععمملت ؟
سحبها من رقبتها ورماها عالارض بكل وحشية وصرخ بكل قوتو ..: كيف بتتخطي اوامري وتنفذي العملية من راسك .. جاااااوبي .. كيييف ؟؟
رفعت ظهرها عن الارض وصارت تزحف بصعوبة لورا..: اللواء ممات
دون بغضب شديد..: ليييييي تكسري كلامي ؟؟؟ فهميني
روما بخوف..: قلي بشو غلطت .. المهمة خلصت على خير ويلي كان رح يعملو خير عملتو انا ..
دون: وخير واللي معو انمسكوا وما بنعرف اذا عايشين ولا ميتين .. يعني كلنا بخطر
روما : بس اللواء طلع من الباب الخلفي وانا كنت موجودة ونهيت المهمة .. لو ما كنت موجودة كان فشلت المهمة
دون: مو شغلك .. لا تجننيني روما .. رح حاسبك .. وحساب عسير جداً
اطلع عليها نظرة ما قدرت تفسرها .. وطلع من الشباك متل ما دخل
_____
بعد مرور شهر عالحادثة
بقيت روما محبوسة ببيتها ودون مانعها تطلع منو نهائي
دون بقي بعيد عن البلد وكان تواصلو مع فؤاد بالتلفون وبس
فؤاد نقل لبيت بعيد عن الفيلا
كريم وفريقو اتكتموا على خبر موت خير ورجالو لحتى يشوفو رد فعل دون واللي معو
_____
صحيت من النوم وكان الوقت متأخر بسبب حبوب المنوم اللي صارت وسيلتها الوحيدة للنوم .. اطلعت عالساعة جنبها وكانت ٢:٠٠ بعد نص الليل .. توجهت للمطبخ لحتى تعمل قهوة
اخدت فتحان القهوة وقعدت بالصالة
طلعت باكيت الدخان واخدت سيجارة وشعلتها بعد ما صارت مدمنة عليه بفترة حبسها بالبيت
حست بنسمة هوا باردة لفحت وجهها معلنة عن وصول دون
اطلعت بطرف عينها ..: شو جابك
دون: اشتقتلك
روما: قلتلك ما في داعي كل يوم والتاني تيجي لهون .. خطر عليك
دون: مشانك مستعد ارمي حالي بالنار
اطلعت عليه وما ردت
دون: لسا ما عن تاكلي منيح .. شوفي كبف قالبة على نصك .. انا رح حضر شوية اكل .. لازم تكوني قوية .. مهمتك رح تبدأ بكرا
توجه للمطبخ يحضر شوية ساندويشات خفيفة .. جابن وحطن قدام روما
.. حاسة برعشة قوية بجسمها ..
قرب منها بكل برود عكس البركان الشاعل بقلبو ..: رح تعاندي متل كل يوم .. حبيبتي ملاك .. يلا كلي
اطلعت عليه بنظرات مو مفهومة ..: آسر .. انت لسا بتحبني ؟
دون: آسر!! من زمان ما سمعت اسمي .. بس لسا اسمي بطلع حلو من تمك انت وبس
روما: وانت زمان ما ندهتلي بإسمي .. ملاك
دون: اسم ملاك ما اخترتلك ياه .. بس روما هو الاسم اللي كان نفسي اندهلك فيه من اول يوم شفتك فيه ..
روما: ما جاوبتني! لسا بتحبني !
انحنى لعندها .. لف ايده على رقبتها وحط دقنو على كتفها ..: كل يوم حبي بزيد اضعاف
روما : بس مو واضح ابداً .. انت حابسني هون ومانعني اطلع من البيت .. وبنفس الوقت عم تجهزني للمهمة الجديدة .. ومو حاسة انك خايف عليي من انو فوت على عِش الدبابير .. شو هالتناقض بمشاعرك
دون: بس هاي المهمة متلها متل اي مهمة نفذتيها من قبل ..
قامت ايده عن رقبتها .. والتفتت عليه ..: مو متل اي مهمة .. كل العمليات اللي عملتها كان من بعيد.. كنت اقتل الضحية واهرب .. صح كنت اضرب بوجهو بس بحياتي كلها ما دخلت لحياة حدا وتلاعبت بمشاعرو ..
احمرت عيون دون ..: قوليها .. خايفة على مشاعرو
قامت بسرعة عن الكرسي ووقفت ..: مشاعر مين اللي بدي اخاف عليها هو انا بعرفو من الاساس .. لا تبلش تخبص .. عم حاكيك افهم عليي .. كنت اضرب واهرب .. انت بهاي المهمة عم تزرعني بين افراد الشرطة .. لو كان حدا عادي ما بهتم .. بس كيف بدك مني اخدع مقدم بالامن .. مستحيل .. من اول كلمة بقفشني ..
قرب منها بهدوء وعيونو بعيونها .. حط ايده على خدودها ..: متل ما جننتي اكبر رئيس مافيا بالبلد .. واسرتي بعيونك ..
اطلعت بعيونو .. ولاول مرة ما بتشوف نظرة الخوف اللي كان يخصها فيها .. تأكدت بهاي اللحظة انو نهايتها قربت .. اذا ما كانت نهايتها على ايد المقدم كريم .. فأكيد رح تكون نهايتها على ايد دون ..
بعدت عنو وتوجهت لعند الشباك .. مدت نظرها لبعيد ..اخدت نفس عميق وزفرتو بهدوء ..: خلص متل ما بدك .. ولا تخاف اذا انكمشت رح خلّص على حالي نهائي
قرب منها وحضنها ..: انت قدها
ملاك: ايمتى التنفيذ ؟
دون: بكرا..
#يتبع
