"ليلة سقوط روما"_ الجزء ٥

*«لـيـلـة سـقـوطـ رومـا».*

*الـجـزء الـخـامـس.*

وقف سيارتو تحت بيتها 
التفت عليها ..: فكري بالموضوع منيح .. ما بدي منك جواب هلق .. رح استنى منك بكرا ادقيلي بهدا الموعد .. ورح اعرف انك وافقتي .. بس اذا ما وافقتي لا عاد تخليني المحك كل حياتي .. لانو اذا بلمحك كمان مرة ما رح اعطيكي متل هاي الفرصة 
هزت راسها ونزلت 
مشى بسيارتو بدون ما يطلع عليها 
توجهت للمكان اللي بتفضلو .. المكان اللي بترمي فيه همومها 
وصلت للبحر .. اطلعت عالسما كان لونها رمادي معلن عن بداية فصل الشتاء .. نزلت للبحر ودخلت لجوا .. غططت المي كل جسمها .. دخلت راسها جوا المي على امل المي الباردة تطفي النار اللي شاعلة بصدرها .. بعد عشر دقايق طلعت من المي .. ركبت الماتور وانطلقت للشارع السريع .. 
ماشية بسرعة جنونية كأنها بدها تقتل حالها 
كل ما تتذكر دون واللي عملو تزيد سرعتها اكتر .. 
وصلت اخيراً لقرارها .. 
رجعت عالبيت دخلت للحمام اخدت دش دافي  .. 
طلعت من الحمام ولبست تيابها .. تسطحت عالتخت اخدت تلفونها ودقت لفؤاد 
رن كتير وما في رد .. ما يأست ورجعت ودقتلو مرة وتنين وتلات بس ابداً ما في رد 
رمت التلفون من ايدها ..: واحد حيوان .. انت اللي جبتو لحالك .. اخرتك على ايدي 
رجعت اخدت التلفون  ودقت لكريم ..: ما رح انطر لبكرا .. انا موافقة
كريم: ممتاز 
روما: عندي شرط 
كريم: شو هو 
روما: رح تسلمني الكلب اللي بشتغل تحت ايد دون لالي
كريم: مين ؟ 
روما: فؤاد الكلب 
ضحك كريم..: لوقتها فرج .. بكرا رح اجي لعندك ونتفق 
روما: شو حضرتك استحليت الجية لعندي .. لا تحلم … بنلتقي بشي مكان 
كريم: ماشي .. عالستة رح انطرك تحت البيت
____ 
تاني يوم 
صحيت من عالساعة وحدة بعد الظهر لانو كانت قبل بليلة ماخدة حبة منوم ليساعدها عالنوم 
وجع راس رهيب مسيطر عليها من الليلة الماضية 
دخلت للحمام غسلت وجهها لحتى تصحصح 
مسكت راسها وشدت عليه واطلع عحالها بالمراي ..: لي بصير فيي هيك .. من مستنقع لمستنقع .. كلو من الكلب فؤاد .. 
توجهت لغرفتها واخدت حبتين دوا لوجع الراس .. بعدها عملت قهوة وتوجهت للبلكون 
__ 
عالجهة التانية 
كان كريم بمكتبو عم براجع شوية اوراق .. رمى الاوراق من ايده بغضب بعد ما اجت براسو صورة ملاك 
ضرب بقهر عالطاولة 
..: اول مرة بشوفك معصب هيك .. شبك 
اطلع كريم لجهة الباب ..: ماجد .. تعال حاسس حالي رح اختنق 
قرب منو ماجد ..: شبك .. شو صاير 
اخد نفس عميق ..: ما بعرف شو بدي قلك .. بس الكلام اللي رح تسمعو ما بدي حدا يعرف فيه 
ماجد: والله شغلتلي بالي 
حمل اغراضو ووقف..: ما بنفع هون .. قوم نروح لشي محل بعيد 
ماجد بإستغراب ..: لهالدرجة؟ 
كريم : مشي يلا قبل ما انفجر 
طلعوا من الفرع .. ركب كريم وجنبو ماجد وانطلق 
بعد نص ساعة مشي بالسيارة 
بلش ماجد يضوج ..: وبعدين .. 
وقف السيارة جنب الطريق بمكان مقطوع نسبياً ..: انزل 
نزلوا من السيارة وبعدو عنها شوي 
وقف كريم وعيونو مسلطة بالعدم 
ماجد بنفاذ صبر ..: بدك تحكي ولا شو ؟ 
كريم بغصة ..: مسكت اللي قتل اللواء نزار .. واللواء خالد .. واللي انقتلو قبلن 
ماجد بصدمة … :شووووو .. ولسا ساكت .. وينو .. مسكتو مسكتو ولا بس عرفتو 
كريم : عرفتو ومسكتو 
ماجد: يعني مسكت دون ؟ 
كريم: لا 
ماجد بغضب ..: كريم لا تجنني .. عم تقطر عليي المعلومات .. احكي جملة مفيدة 
كريم: البنت اللي خبرت عن صبري ال*** .. متل ما توقعت طلعت من طرف دون .. وهي اللي كانت ورا جرايم الاغتيال  اللي صارت .. 
توسعت عيون ماجد من الصدمة .. هجم على كريم ومسكو من ياقة القميص ..: ولسا ساكت !!! انت ما عندك دم .. القاتلة حرة طليقة وانت عامل فيها مخنوق .. لك يا بني ادم شو ناطر .. لي ما رميتها بالسجن 
نزل كريم ايدين ماجد  ببرود ..: هي بتنفذ الاوامر .. انا بدي الراس الكبيرة 
ماجد بغضب ..: وانت متخيل انها رح تسلمك دون ببساطة؟ 
كريم: ايه رح تسلمني ياه 
ماجد: لحظة لحظة.. انت حكيت معها يعني .. الله لا يوفقك .. اكيد بتكون هربت 
كريم: لا ما هربت 
ماجد بغضب..: شو هالبرود اللي انت فيه 
كريم: انا حكتلك مشان تكون معي بالعملية .. 
مسك ماجد راسو وشد عليه وصار يروح ويجي حول حالو ..: يا ربي .. يا ربي .. ما عم فيي اتخيل وصدق اللي بتحكيه .. لا انت مجنون رسمي .. وحدة قاتلة .. حشرة .. مربية على ايدين دون بدو ياها تتعاون معو .. لك ومقتنع .. 
إطلع ماجد  عليه وصرخ ..: يا غبي .. اكيد هاي مؤامرة عليك .. لك انت في بعقلك شي 
تخلى كريم عن برودو وهدوئو وصرخ فيه ..: بدك تساعدني ولا لا 
اطلع ماجد عليه وشاف ملامحو الجدية..: انت بعقلك .. متأكد ما ضربتك هالحشرة على راسك.؟؟
تجاهل كريم كلامو وراح للسيارة .. شغلها وانطلق تارك وراه ماجد مصدوم 
اطلع ماجد على الفراغ والغبرة اللي تركها وراه ..: يخرب بيتك .. < صرخ بكل صوتو>.. لك وين تاركني بهالمنطقة المقطوعة يا مجنون 
ركض  ماجد ورا السيارة بكل قوتو على امل يلحقو وعم يشتم كريم بكل صوتو 
وقف كريم السيارة بعد ما شاف ماجد بركض وراه 
وصل للسيارة ..: يخرب بيتك .. هيك بتتركني 
كريم : بدك تكون معي 
ماجد : مستحيل ..
بسرعة دعس كريم  عالبنزين
ماجد بصوت عالي..: خلص خلص معك .. روح يا شيخ الله يفرجيني فيك  يوم 
وقف كريم السيارة ..: اركب 
ركب ماجد بالسيارة وانطلقوا 
____
واقف قدام  المراي بكامل اناقتو ..  اطلع على انعكاس صورتو وابتسم 
صوت من داخلو ( كأنك  رايح عموعد غرامي .. اصحى يا أهبل .. اللي رايح تشوفها هي نفسها البنت اللي قتلت اللواء نزار وكانت مسؤولة عن كل الاغتيالات اللي صارت  .. على شو عم تتبسم لحالك .. هاي مجرد قاتلة .. ايديها ملطخة بالدم .. ملطخة بدم اعز الناس على قلبك .. انهي هالمهمة وارميها بالسجن لتنال جزاتها ) 
صوت اخر ( بس انت وعدتها تحميها ) 
( بدك تحمي مجرمة ) 
( بس هاي كانت حب حياتك لا حتى بعدها حب حياتك لليوم ناسي قدي حلمت ترجع تشوفها ) 
( واذا خلصت المهمة وبعدها خلّصت عليك ) 
( ما رح تعملها .. انت شفت بعيونها الحب ) 
( وشو الضمانات ) 
( ..)
( حلو.. سكتت يعني ما في ضمانات .. لهيك ركز بمهمتك وامشي  وراي وتأكد انك رح تكون ماشي بالطريق الصح ) 
( لا .. لاتسمع كلامو .. ناسي لما عرفت انها انتحرت شو صار فيك .. ذكرو باللي صار .. لا تسمع كلامو .. انت كنت رح اطير من الفرحة لما عرفت انها عايشة .. لا تخليه يكسر  فرحتك ) 
( هاي مجرمة ) 
كريم بصراخ..:  خلااااااص 
نفض راسو من كل هالافكار .. سكر زر الجاكيت وطلع من الغرفة 
اطلع عالساعة وكانت لسا خمسة .. اخد مفاتيحو والتلفون وطلع من البيت

وصل لقدام بيتها .. بقي شوي بالسيارة بعد ما اطلع عالساعة وكانت بعدها خمسة ونص 
قرر بالاخر يطلع لعندها عالبيت 
نزل من السيارة ودخل للبناية وتوجه للبيت 
دق الجرس ونطر 
فتحت روما الباب وكان شعرها منكوش وبعدها تقريباً ببيجامة النوم 
اطلع عليها من فوق لتحت وابتسامة صفرا على وجههو ..: هيك بتستقبلي ضيوفك ؟ بهالمنطر ؟؟
اطلعت على حالها وبعدها اطلع عالساعة المعلقة جنب الباب ..: انت حكيت عالستة ولسا ما صارت ستة .. يلا افرقنا بريحة طيبة 
سكرت الباب بوجهو بس كان اسرع منها وحط ايده ورجلو ومنعها تسكرو ..: ليكون لساتك متخيلة اني الولد البريء اللي كنت بالميتم 
دفش الباب بقوة لخلاها توقع عالارض ..: ابعدي من طريقي 
دخل وفقل الباب وراه بالمفتاح وحطو بجيبتو ..
اطلع عليها بطرف عينو وشافها مكومة عالارض ..: قهوتي سادة بوجه 
ابتسم وكمل طريقو لغرفة القعدة 
اطلعت عليه بغيض وكان نفسها تخنقو وتعلقو بالسقف
بس فجأة تغيرت ملامحها للبراءة وقالت بداخلها ( طلب قهوة بوجه مع سكر صح !!) 
حكت راسها بقوة وقامت عالمطبخ .. عملت قهوة وتوجهت لعندو .. 
اخد منها الفنجان ورشف رشفة .. فورا طلّع  القهوة من تمو ..: انت ما بتفهمي .. قلتلك سادة .. سادة يعني بلا سكر 
روما: ما قلت سادة .. قلت بوجه 
كريم  : اعملي غيرها
روما بغيظ ..: حاضر 
كريم: بلا سكر  
بعد دقيقتين رجعت ومعها القهوة .. 
اخدها منها ورشف ..: الله .. ايه هيك بتتسمى قهوة
اطلعت عليه بغيظ ..: انت جاي تجرب قهوتي !! 
كريم: هدا البيت مين اللي اجرو؟ 
روما: انا مين بدو يستأجرو يعني 
كريم : مـــلاك !! 
عصبت منو كتير ..: اولاً انا استأجرتو .. وتانياً لا تخاف ما فيه اجهزة تنصت او كاميرات مخفية .. وثالثاً وهدا الاهم .. اسمي روما .. لا عاد تناديني بملاك .. بكرهو لهالاسم 
اطلع عليها بخباثة ..: ملاك .. يعني انجيل .. حرف الا A اللي كنتي تكتبي على جسم الضحية بعد ما تقتليه.. 
روما: مراجع منيح 
كريم: وشو قصة روما كمان .. هدا الاسم الحركي لالك ؟ 
حبت تغيظو شوي وتقهرو ..: روما .. عيوني فيهن سحر وجمال روما .. لهيك دون اعطاني اسم روما 
طلع الدم لراسو بعد ما ذكرت اسم دون .. قام لعندها ومسكها من وجهها وشد عليه ..: لا تتباردي عليي .. انا فاهم شو عم تحاولي تعملي .. ما تخليني اقتلك بارضك ملاك 
اطلعت بعيونو وشافت الشرر بطاير منن ..: لي شو اللي مزعجك .. انت موجود هون لحتى تمسك دون 
دفش وجهها لورا ..: لا تعملي معي هالحركات 
رجع لمكانو ..: قومي بدلي تيابك ومشطي شعرك .. مبسوطة بحالك هيك ؟؟ 
روما بإستفزاز ..: انا مبسوطة .. اذا انت مزعوج فيك تمشي 
كريم : خلينا بموضوعنا  .. انت بتعرفي دون وين موجود هلق ؟
زبطت روما قعدتها ..: لا ما بعرف .. من بعد اخر عملية اختفى ومحدا بعرف وين هو غير كلب الشوارع فؤاد 
كريم : وفؤاد بتعرفي وين هو 
روما: ايه بعرف .. واذا غيّر مكانو بعرف جيبو 
كريم : حلو كتير .. لكن اسمعي شو بدي منك تعملي 
______ 
خلصوا الحديث اللي كان كريم جاي مشانو وتفقوا على كل شي 
تسطحت روما عالكنبة ورفعت رجليها 
اطلع عليها كريم بطرف عينو ..: اقعدي منيح ولي 
لفت على جنبها واطلعت عليه ..: انت خلصت شغلك .. لايمتى بدك تبقى هون 
حط اجر على اجر ..: للصبح عندك مانع .. 
نفخت روما بضجر ..: متل ما بدك .. صحيح ما قلتلي .. شو قصة انتحاري ؟؟ 
ابتسملها كريم ..  
     فـــــــلاش بـــــــاك 
وقفت سيارة من النوع الغالي قدام الميتم 
شافتها وحدة من المربيات وركضت لعند المديرة .. وخبرتها باللي شافتو 
طلعت المديرة ووراها المربية للباحة ..
وقفت فجأة بعد ما شافت شاب طويل داخل من بوابة الميتم .. بس صدمتها كانت لما شافتو بلباس الشرطة 
قربت من المربية وهمست  ..: لك شوفيلي اذا حدا عامل شي .. من خمس سنين ما دخل  لهون شرطي 
قرب منن بكل احترام ..: مسا الخير مدام نعمة 
نعمة : اهلاً .. اهلاً حضرة الشرطي 
الشاب: بدي احكي معك كلمتين 
ارتاحت نعمة لنبرة صوتو الهادية واطمنت نوعاً ما 
نعمة: تفضل لمكتبي حضرتك 
دخلو للمكتب .. ودخلت الاذنة وراهن بالقهوة 
زبط قعدتو واخد القهوة ..: مدام نعمة واضح انك مو متذكرتيني 
اطلعت عليه نعمة وركزت بملامحو وبعدها ابتسمت ..: هدا انت .. كريم 
قامت من مكانها بسرعة وتوجت لعندو .. اخدتو بحضنها وبوستو بحب ..: يا حبيب قلبي .. كبرت وصرت شب طول بعرض .. الله يحميك على هالشبوبية 
كريم: والله اشتقتلك مدام 
نعمة : وانا اكتر .. شو دخلت كلية الشرطة .. مو كنت ناوي تصير محامي 
ابتسىملها..: غيرت رائي على اخر لحظة 
نعمة: الله يحميك 
قعد كريم عالكرسي ..: صراحة .. انا جاي اطمن عليكن وشوف اذا محتاجين شي .. انا جاهز
نعمة: الله يخليلي ياك يا رب .. كلنا بخير حمدلله 
قعدوا شوي وحكوا بكتير شغلات 
كريم: مدام نعمة بدي اسألك عن شغلة وخجلان منك
نعمة: لا تخجل قول 
كريم: ملاك .. لساها هون ولا طلعت 
تغيرت معالم وجهها بعد ما ذكر اسم ملاك وما عرفت ترد 
استشعر القلق من ملامحها ..: خير مدام .. صاير شي لملاك .. بس ما تكون عملتها وهربت 
استجمعت نعمة قوتها ونطقت ..: ملاك انتحرت من سنتين 
نزلوا هالكلمتين عليه متل الصاعقة..: شو .. انتحرت !! 
توجهت لورا مكتبها بثقل وطلعت ملف من الخزانة اللي وراها وسلمتو ياه ..: لقيناها شانقة حالها بالحمام 
اخد منها الملف ووجهو ما بتفسر .. قلب بالاوراق وكانت محضر للقضية وتقرير الطبيب الشرعي وشهادة وفاة لملاك وشوية اوراق من دكتور نفسي 
نعمة: كانت نفسيتها محطمة باخر سنة واكتر من مرة حاولت الانتحار بس كنا نلحقها على اخر لحظة .. عرضناها على طبيب نفسي وحسيتها بلشت تتحسن .. بس بعد فترة لقيناها شانقة حالها بالحمام وما لحقناها يومها .. الله يرحمها .. ما بتجوز عليها غير الرحمة
نزلت دمعة من عيون كريم حرقت خدو ..: لي محدا خبرني 
نعمة : ما كنت بعرف انو الموضوع بهمك صراحة
خبط بإيدو عالطاولة ..: كيف ما بهمني .. انت بعقلك 
نعمة: فات الاوان على هالكلام يا ابني .. اطلبلها الرحمة
وقف بثقل وبإيدو الملف ..: وين دفنتوها 
نعمة بتوتر ..: بالمقبرة العامة 
طلع من مكتب نعمة ومن الميتم كلو 
ركب  سيارتو ووجع قوي بصدرو .. حاسس جبال وقاعدة على صدرو .. حاول ياخد نفس ويستعيد وعييو .. شغل السيارة وانطلق بسرعة جنونية 
خلال عشر دقايق كان عند المقبرة .. نزل من السيارة وتوجه لقبرها 
شاف اسمها مكتوب عالشاهدة .. نزل على ركبو وعيونو مليانة دموع 
شهق بحرقة ..: لي عملتي هيك .. لي تروحي وتتركيني .. وعدتك  ارجع ورجعت .. لي ما نطرتيني .. رجعت لنحقق احلامنا سوا .. لي تعذبيني وتعذبي حالك .. شو رح اعمل هلق وكل احلامي معك تبخرت بسبب انانيتك .. لي يا ملااك ليييش .. كل عمرك انانية وما بتفكري غير بحالك .. انا ما رح كون اناني متلك .. رح ابقى مخلص لالك لاخر يوم بعمري 
قام عن الارض وتوجه للسيارة وانطلق بسرعة جنونية
     بــــــــــاك 
زبطت روما قعدتها وابتسمت بخباثة ..: يعني زعلت عليي 
اطلع فيها بطرف عينو ..: لا 
روما : لا لا امانة .. زعلت عليي 
كريم: شو رأيك 
روما: شكلك كنت رح تموت وراي .. هلق صحيح بدي اسألك سؤال 
كريم : تفضلي 
وقفت ..: قبل السؤال .. انا جوعانة .. رايحة اعمل اندومي بدك ؟ 
اطلع عليها من فوق لتحت ..: اندومي؟؟
روما بتكبر..: لي شايفني فاضية اتعلم طبخ .. اليوم ملاقية وقت اعمل اندومي .. ايام تانية بنام بالجوع .. بدك ولا لا
وقف كريم وتوجه للمطبخ ..: انا بعملك اكل .. شو في عندك 
قرب من الثلاجة وفتحها .. كانت فاضية تماماً وما في شي غير قنينة مي 
اطلع عليها كريم ..: شو هدا؟ 
رفعت روما حواجبها بمعني ما بعرف .. 
فتح الخزاين وكانت كلها فاضية ما في شي 
اخر خزانة فتحها كان فيها علبة اندومي وحدة .. حملها واطلع على روما ..: هاي اللي عزمتيني عليها 
شقلبت عيونها ..: ما انا عارفة انك ما رح تقبل 
طلع من المطبخ واخد مفاتيحو ..: ما بطول .. راجع حالاً 
طلع من البيت .. 
بعد نص  ساعة .. 
رن الجرس 
فتحت روما الباب وشافت كريم حامل اكياس ..: شو هدا 
دفشها عن الباب ودخل ..: بدي اعملك عشا ما تنسيه ابداً 
دخل للمطبخ ودخلت وراه روما 
روما ..: انا ما رح اعمل شي .. ما بعرف 
قرب منها .. مسكها من اكتافها وقعدها عالكرسي ..: ما بدي منك شي .. بس اقعدي هون ولا تكتري حكي 
روما : هلق ما عاد يعجبك حكيي .. طب احكي انت .. شو عملت بس طلعت من الميتم 
كريم: ما بحب احكي بالماضي 
روما بغيظ..: زمان كنت تحكيلي كتير عن الماضي 
بلش يفتح بالاكياس ويطلع الاغراض ..: تغيرت 
روما: طيب دخلت كلية الشرطة هون ولا باميركا 
صار يقطع بالخضرة وتجاهل اسألتها 
ضمت رجليها لصدرها ..: انت ما بدك تجاوب لانك مفكر اني باخد معلومات منك 
كريم: شو رأيك تسكتي 
روما : بلاش عمرك ما تجاوب 
سكتت شوي وما عاد تتحمل..: تجوزت 
كريم: لا 
روما: خلفت ولاد 
اطلع عليها بطرف عينو ..: ايه خلفت كتير ولاد 
حكت روما راسها ببلاهة ..: كيف خلفت وانت مو متجوز 
اطلعت عليه بغضب ..: عم تستهبل ؟ 
كريم: واااو طلعتي نبيهة كيف  بقولو عنك غبية   
عصبت منو  وطلعت من المطبخ ..: واحد مستفز 
رجعت بعد ثواني ..: صحيح كنت بدي اسألك .. انت فعلاً كنت تحبني ؟ 
ترك السكين من ايدو ورفع راسو .. اطلع عليها بنظرات استغراب ورجع كمل تقطيع 
اتنرفزت منو ومن برودو ..: افف .. دمك ثقيل متل زمان 
رجعت لغرفة القعدة 
بس ما تحملت وراحت للمطبخ ..: طيب اساعدك ؟ 
ضرب السكين بقوة ..: وبعدين معك .. ما بتعرفي تقعدي دقيقة بلا حكي !! 
ابتسمت ..: بالعكس .. انا اكتر حدا بيضل ساكت بالدنيا .. لانو ما عندي حدا احكي معو .. خلص بعتذر منك 
رجعت لغرفة القعدة وتسطحت عالكنبة وعيونها مركزة بالسقف .. 
بعد وقت .. طلع كريم من المبطخ .. وين بتحبي تتعشي هون ولا بالمطبخ 
روما : مو جوعانة 
كريم: عراحتك 
توسعت عيونها وحطت ايدها عبطنها …: شو عراحتي .. شد عليي شوي 
قامت بسرعة عن الكنبة وركضت المطبخ شافت كريم حاط الاكل عالطاولة 
اطلع عليها: هون ولا هناك ؟ 
حكت راسها ..: هناك .. 
كريم: يلا جيبي الصحون وانا بجيب الباقي 
حطو الاكل عالطاولة بغرفة القعدة وبلشوا اكل 
حطت روما اول لقمة من الباستا بتمها …: اوووووو.. يا ربي لك شو هدا .. 
اطلع عليها كريم..: ما تحكي وانت بتمك اكل .. ومسحي تمك كمان 
مسحت روما تمها بكم البجاما ..: سوري !! 
قلب كريم عيونو من تصرفاتها 
بقيوا ساكتين لخلصوا العشا .. 
روما: انا سكتت عالعشا مشانك .. بس هلق بدك تحكي 
كريم: شو بدك تعرفي ؟ 
روما: كلشي .. تجوزت عند ولاد وين كنت عايش وهيك ؟
زبط كريم قعدتو ..: ما تجوزت واكيد ما عندي اولاد .. عشت فترة باميركا وبعدها رجعت لهون التحقت بكلية الشرطة وانا هلق قدامك متل ما شايفة 
رفعت روما رجليها لفوق ..: ولي ما تزوجت لهلق ؟ 
رفع كريم ايده ورا راسو ..: ظروف 
اطلعت عليه بطرف عينها ..: بس ما يكون مشاني .. 
حمل كريم مفتاح سيارتو وتلفونو وتوجه لعندها .. قرب وجههو من وجهها بشكل كبير وهمس ..: ممكن !! 
انصدمت من جوابو وتسارعت دقات قلبها 
طلع من البيت تاركها بصدمتها 
_____ 
بعد اسبوع 
صحيت من النوم وشافت ١٠ مكالمات فائتة من كريم 
دقتلو واستنت الرد ..: خير شبك من الصبح ١٠ مكالمات لشو كل هدا .. جوزي انت .. صاحبي.. ابي.. اخي .. عمي .. شو بدك 
كريم : هوب هوب هوب .. شبك فتحتي وما عدتي سكرتي .. جاهزة .. اليوم التنفيذ انا جهزت  كلشي  
روما: ١٠ مكالمات مشان تقلي هالجملة .. بتحب اشتمك ؟ 
كريم: لكن مفكرة داقلك مشان صبح عليكي  واطمن  عنك مثلاً !!! 
روما بغيظ ..: عمرك ما تطمن .. عد معي ..١..٢..٣ 
قفلت الخط بوجهو 
قامت عن التخت اخد دوش .. وبعدها عملت قهوة وقعدت  بالصالة تنطر ليصير الوقت 
_____ 
المسا .. 
طلعت من البيت بكامل اناقتها على غير العادة 
ركبت سيارتها وانطلق وعلى وجهها ابتسامة صفرا 
وصلت للمكان اللي قاصدتو .. وقفت سيارتها ونزلت 
وقفها الحارس ..: روما .. ارجعي من وين اجيتي ..
روما: وليش بقى؟ 
الحارس: هيك الاوامر 
وقفت وحطت ايها عخصرها  ..: ومين اعطى هالاوامر الصارمة ؟
الحارس: المعلم فؤاد 
روما بإستفزاز ..: يقبرني المعلم واوامرو 
الحارس: روما .. روحي من هون ما تعملي مشاكل 
روما بعصبية..: انت لسا شفت مشاكل 
مسكتو من ياقة البدلة وشدتو عليها …: انت بتعرف اذا روما قررت تدخل جوا ما في مخلوق بقدر يمنعها .. صح ؟
الحارس بخوف ..: روما مشان الله 
روما بصراخ ..: افتح البوابة بسرعة
قرب منها الحارس وهمس جنب ادنها ..: روحي من الجهة الخلفية .. انا تارك الباب مفتوح 
روما بصراخ ..: انا بفوت من الباب الرئيسي .. ما بنط من البواب الخلفية 
دفشتو لورا وصارت تصرخ بأسم فؤاد 
طلع فؤاد على صوتها ..: شو عم بصير هون ؟ 
تراجع لورا بعد ما شافها وافقة قدام الحراس ومو ناوية على خير ..: دخلها يا ابني 
فتح الحارس البوابة ..: تفضلي 
ضربتو على اجرو ..: من الاول .. لازم تخليني اطلع عن شعوري 
تراجع فؤاد لورا بس شافها دخلت للفيلا وهرب لجوا 
روما بمسخرة ..: وين هربت يا كتكوت 
دخلت للفيلا وصرخت بكل  صوتها ..: ما بدي شوف حدا هون .. كلو لبرا 
طلعوا الخادمين لبرا الفيلا على حسب اوامرها ..
حركت حجر عينها بكل ارجاء الصالة ..: وينك يا حُب  .. هيك بتتخبى مني .. اطلع نراجع حساباتنا 
دخلت بسرعة لغرفة المكتب وقفلت الباب وراها بالمفتاح 
توجهت للطاولة وضربت عليها ..: اطلع اشوفك .. صاير تصدر اوامر من وراي 
طلع فؤاد من تحت الطاولة ..: انت بتعرفي اني ما اللي علاقة .. هاي اوامر دون 
روما: وين دون 
فؤاد: روما لا تحرجيني .. انت عارفة انو دون مانعني خبرك عن مكانو 
روما: احكيلو اني بدي شوفو ضروري 
فؤاد: صعب .. دون مسافر 
صدح صوت ضحتكها بكل المكتب ..: لا اقتنعت 
لفت لورا المكتب ومسكتو من رقبتو ..: اذا بموتك هلق بروح فيها اعدام ولا باخد جائزة على انجازي القيّم؟ 
فؤاد بقلبو ( الله يلعنك يا دون على هالعلقة انت مرتاح من وجهها وتاركلي ياها هون تتمقطع فيي) 
روما بصراخ ..: جاوب !! وين دون 
فك حالو من بين ايديها وضرب عالطاولة ..: ما بنفع 
هديت ملامح روما فجأة .. طلعت المسدس من تيابها وحطتو عالطاولة ..: انا برا هاللعبة .. وصل رسالتي لدون وقت ما تحب .. < تركتو وتوجهت للباب>.. وقلو ما رح يعرف يجيبني .. بس رح ابقى متل عملو الاسود مطاردتو وين ما راح .. سلام 
طلعت من المكتب ومن الفيلا كلها 
قعد فؤاد عالكرسي ومسح العرق اللي تجمع على جبينو .. ودق لدون ..: معلم روما كانت هون .. بدها تحكي معك ضروري 
دون:  عالساعة وحدة بعد نص الليل بتكون عندي .. تعال متل ما بتيجي دايماً .. بس انتبه انها تكون مراقبتك 
فؤاد: حصل يا معلم .. بدك احط عليها مراقبة 
دون: لا .. ما بدي فضايح .. اعمل متل ما قلتلك 
__ 
بعد نص الليل وقف سيارتو قدام فيلا كبيرة عليها حرس من كل  جهة .. نزل من السيارة ودخل للفيلا 
توجه للصالة ..: يا مساء السعادة .. يا صباح الفل على احلى زعيم فيكي يا بلد .. دون .. 
اطلع عليه دون بطرف عينه ..: بتعرف شغلة .. صرت اتمنى تيجي لعندي مرة لحالك .. بدون ما يكون في وراك مصيبة 
صب فؤاد كاس مشروب وقعد عالكنبة مقابل دون ..: ايواا.. بدك مني انا اخد هالمصيبة عحالي وبدون ما شاركك ..
دون: انتبهت من الطريق منيح ؟ 
فؤاد: باطل .. 
دون: اذا روما بتصل لهون روحك ما رح تكفيني 
فؤاد: صحيح انا الحيطة المايلة بينك وبينها.. انت بتهدد تاخد روحي وهي بدون ما تهدد بتهجم على طول .. الله يتوب عليي من هالقرف 
دون: شو بدها ما قلتلي 
زبط فؤاد قعدتو ..: طلبت مني وصلك رسالة 
دون : رسالة شو ؟ 
فؤاد بجدية ..: الرسالة هيك ( انا برا هاللعبة ..وقلو ما رح يعرف يجيبني .. بس رح ابقى متل عملو الاسود مطاردتو وين ما راح ..) هيك قالت بالحرف 
صدح صوت ضحكة دون بكل ارجاء الفيلا  ..: وينها هلق 
فؤاد: ما بعرف .. بعتت تنين يشوفوها ببيتها الجديد بس مو موجودة 
دون: والقديم 
فؤاد: لا 
وقف دون على رجليه ..: بس ما تكون هون 
فؤاد: يا معلم قلتلك انا انتبهت منيح 
دون بغضب ..: هاي تربيتي وانا عارفها منيح 
طلع من الصالة بسرعة وتوجه لبرا الفيلا بالتحديد لسيارة فؤاد .. وفتح شنطة السيارة  
اطلع بداخل الشنطة ما كان في حدا 
نزل حالو لتحت السيارة وما كان في حدا 
فؤاد: قلتلك .. انا كنت منتبه منيح 
دون: خلص روح انت 
فؤاد: وروما شو اعمل معها 
دون: انا بعرف شغلي معها .. لازم عيد تربايتها من جديد 
فؤاد: شو رح تعمل 
دون: رح كمل السهرة.. روح انت  
____ 
بعد ساعتين 
طلعت من ورا الشجرة .. اخدت نطرة سريعة ولفت من الجهة التانية .. اطلعت منيح وتوجهت للنقطة اللي ما فيها كاميرات .. تسلقت السور بمهارة .. نطت على الشجرة اللي جنب السور .. كانت شجرة عالية وقريبة من البلكون .. نطت من الشجرة عالبلكون ودخلت للغرفة بسهولة .. كانت غرفة المكتب .. طلعت منها وتوجهت لغرفة تانية .. فتحت الباب بهدوء ومدت راسها .. ابتسمت ابتسامة جانبية ..
دخلت بهدوء  وقفلت الباب وراها 
قربت من التخت بهدوء شوي شوي .. 
بحركة سريعة كانت قاعدة فوقو وحاطة السكينة على رقبتو 
فتح عيونو بخوف وشافها قاعدة على صدرو والسكين على رقبتو ..: روما .. شو عم تعملي .. نزلي السكين 
ابتسمت بخباثة ..: ما توقعتها يا موودير مو هيك .. بس شو رأيك .. دون اكبر رئيس عصابة قاعد تحت رحمة البنت اللي لمها من الميتم وبترجاها 
دون بتوتر ..: روما لا تجني .. نزلي السكين وخلينا نتفاهم 
توسعت ابتسامتها اكتر ..: لحظة لا تكمل ..
تطلع تلفونها وفتحت عالكاميرا ..: يلا ارجع اترجاني 
دون: روما قلتلك لا تجني .. خلص بنحكي برواق 
روما بغضب ..: بدك تسلمني للشرطة .. وانت ناسي انك ربيت حية عندك .. تعلمت منك كل الوساخة .. لا شكلو هاي ما عملت حسابها .. بس رح تشوف وساختك كلها على الاصول بعد ما ادبحك .. وبعدها  رح خلّلص على ايدك اليمين  
حط ايده على ايدها ..: انا رح خلّص عليه بإيدي .. بس نزلي السكين 
صرخت فيه ..: لي شايفني هبلة .. ولا صار الغدر عندك عادي
دون: يا هبلة انا بحبك 
روما بغضب..: بتحبني .. كيف بتحبني وبترميني للشرطة .. وانا اقول لي عم تبعدني انت والكلب عن الشغل  .. بس انت حدا غبي .. 
سكتت فجأة بعد ما رفع حالو وبحركة سريعة كانت هي تحت وهو فوقها 
دون بمكر ..: دون مو صعب يموت .. دون مستحيل يموت .. 
سحب من ايدها السكين ورماها عالارض ..: ما بلبقلك غير القناصة .. السكاكين لعب ولاد صغار .. 
كزت على اسنانها ..: اخرتك رح تكون على ايدي 
قام عنها وتوجه لعند الشباك ..: رح تكون احلى لحظة .. 
قامت وراه  اخدت السكينة عالارض ووقفت جنبو ..: لما وافقت كمل معك حياتي اول مرة شفتك كنت حاسة بالخوف لشو مخبى .. بس نظرة عيونك كانت كفيلة انها تخليني حس بالامان .. بكل مرة كنت تبعتني على مهمة اخطر من اللي قبلها كنت تتراجع على اخر لحظة وتطلب مني ما كمل .. كلماتك الاخيرة كانت تدخل لقلبي وتحسسني بالامان وحس انو لازم انهي المهمة وارجع لانو في حدا ناطرني ارجع .. بس اخر مرة بعتني بهاي المهمة ما كانت هالنظرة ولا الكلمات .. حسيت حالي غبية اني عم صدقك وحاولت خليك تتراجع بس انت كنت مصمم تتخلص مني .. رحت وانا متأكدة من نواياك .. 
اطلع عليها بإستغراب .. 
روما: لا تطلع عليي هيك .. انا مو غبية .. انا ربيت على ايدك وتشبعت بكل صفاتك 
بعدت عنو شوي وحطت السكين على رقبتها .. ولاول مرة بحياتها بتنزل دمعة قهر من عينها ..: خلص ما في داعي للمؤامرات .. انا رح خلصك مني وبدون ما توسخ ايد حدا فيي .. لاني اوسخ من انو حدا يوسخ ايده فيي ..
اطلع عليها بصدمة وهو بشوف الدم بنزل من رقبتها 
سحب من ايدها السكين واخدها بحضنو  وشد عليها 
طلع صوت شهقاتها 
دون: خلص اهدي .. ما رح اتحمل خسارتك 
روما من بين شهقاتها ..: لي تعمل فيي هيك .. لي ترميني بالنار بإيديك .. كنت دايماً اماني وحمايتي .. كنت دايماً اتحامى فيك اذا حدا بقرب عليي 
مسح بإيدو على شعرها ..: هــــــش .. خلص اهدي .. 
انهارت بين ايده .. لاول مرة بتكون ضعيفة هيك قدامو 
حس بوجع بقلبو عليها وندم على اللحظة اللي فكر فيها انو يتخلص منها …

#يتبع