🐢 توتة السلحفاة و العصفور زوزو 🐦
كان يا مكان، كان فيه سلحفاة صغيرة اسمها توتة، كانت دايمًا بتمشي بشويش، وكل حاجة بتاخد معاها وقت طويل. توتة كانت بتحب الهدوء وبتحب تقعد تحت الشجر في الضل.
وفي يوم من الأيام، وهي ماشية على مهلها، شافها زوزو العصفور بيطير بسرعة فوق الشجرة. نزل وقالها:
– ياااه يا توتة! ده انتي بطيئة اوي يا توتة ! أنا لو كنت مكانك، كان زماني خلصت من بدري.
ردّت توتة وقالت: – كل واحد ليه طريقته يا زوزو، أهم حاجة نوصل في الآخر.
ضحك زوزو وقالها: – طب إيه رأيك نتسابق؟ أنا أخلص المشوار وأرجع قبل ما تكمّلي نصه!
ضحكت توتة وقالت: – ماشي، يلا هنجرب و نشوف يا زوزو.
ابتدى السباق، وزوزو طار بسرعة فوق الشجر، أما توتة فابتدت تمشي على مهلها زي العادة.
لكن زوزو وهو طاير، اتلهى بلعبه مع باقي العصافير، ونسي السباق خالص!
أما توتة، فضلت ماشية وما وقفتش، لحد ما وصلت لنهاية الطريق.
رجع زوزو متأخر، ولما شاف توتة وصلت قبله، اتفاجئ وقالها: – إزاي دا حصل؟!
ضحكت توتة وقالت: – علشان اللي ماشي بخطوة ثابتة، يوصل حتى لو ببطء. 😊
ومن ساعتها، زوزو اتعلّم إن السرعة مش كل حاجة، وإن المهم يكون عندنا صبر ونكمّل اللي بدأناه.
زوزو وقف ساكت شوية، وبص لتوتة وقالها:
– بصراحة يا توتة، إنتي علمتيني درس مهم جدًا.
أنا كنت فاكر إن السرعة هي اللي بتكسب، لكن طلع الإصرار أهم!
ضحكت توتة وقالت:
– أهم حاجة إننا نكمّل الطريق وما نكسلش، حتى لو ببطء.
زوزو ابتسم وقالها:
– من النهاردة، هكون زيك، أركز وأخلّص اللي أبدأه.
إيه رأيك نبقى أصدقاء ونساعد بعض؟ 🐦🐢
توتة فرحت وقالت:
– أكيد! الصحاب الحلوين دايمًا بيشجعوا بعض ❤️
ومن ساعتها، بقوا توتة وزوزو أعزّ أصحاب، وكل يوم يتقابلوا، يتكلموا، ويتعلموا من بعض حاجة جديدة.
النهاية السعيدة 🐢✨🐦
ياريت كلنا نبقا زي زوزو و نعرف أن السرعة مش أهم من المثابرة و الصبر و المحاولة و لما نعمل حاجة بشكل مستمر بس بكمية صغيرة احسن من إننا نعمل الحاجة دي بكمية كبيرة بس بشكل متقطع 😊
