حياة توماس اديسون
إديسون.. الراجل اللي مش عرف يعني اية كلمة "فشل"
عارف توماس إديسون؟ الراجل اللي اخترع المصباح الكهربائي؟
أيوه، اللي عايشين في النور بسببة لحد النهاردة ده.
بس اللي ناس كتير مش عارفاه، إن قصة نجاحه دي وراها ألف قصة فشل، حرفيًا.
من طفل “غبي” إلى عبقري
توماس إديسون وهو صغير كانوا دايما بيقولوا عليه “غبي”!
المدرسة طردته لأنه ماكنش بيفهم بالطريقة التقليدية اللي شغالين بيها ، وكان دايمًا سرحان وبيسأل أسئلة كتير.
بس أمه رفضت تستسلم وتصدق كلام الناس علي ابنها ، وقالت: “أنا اللي هعلمه بنفسي”، وفعلاً بدأت تعلّمه في البيت وتهتم بية.
وهنا بدأت الحكاية…
الولد اللي اتقال عليه ما ينفعش يتعلم، بدأ يقرأ ويجرب ويعمل اختراعات بسيطة. كان عنده فضول غريب، وبيحب يفكك كل حاجة ويعرف بتشتغل إزاي.
ألف محاولة.. ونور العالم
أشهر حاجة عملها إديسون هي المصباح الكهربائي، بس الطريق للمصباح ده كان مظلم فعلاً.
فشل في اختراعه أكتر من 1000 مرة!
كل تجربة كانت بتفشل، بس هو مكانش بيقول على نفسه فاشل. بالعكس، لما الصحفيين سألوه عن إحساسه بعد كل الفشل ده، قال:
“أنا ما فشلتش، أنا بس اكتشفت 1000 طريقة ما بتنفعش.”
الراجل حرفيًا كان شايف الفشل كجزء من اللعبة، مش نهايتها.
وفي الآخر، بعد تعب وتجارب، قدر يخلينا نقول “نور يا لمبة” بدل ما نقعد جنب شمعة في الظلمة.
مش بس مخترع.. ده كمان رجل أعمال
الناس غالبًا بتفتكره عالم أو مخترع وبس، لكن إديسون كان دماغ بزنس كمان.
أنشأ شركات كتير، من ضمنها شركة Edison Electric اللي اندمجت بعد كده وبقت جزء من شركة General Electric – واحدة من أكبر الشركات في العالم.
كان فاهم إن الفكرة الحلوة مش كفاية، لازم تتحول لمنتج يخدم الناس ويكسب كمان.
كان بيقول:
“العبقرية 1% إلهام، و99% عرق وشُغل.”
طب إحنا لينا إيه بالكلام ده؟
قصة إديسون مش بس حكاية تاريخية، دي درس عملي لينا كلنا.
سواء بتبدأ مشروع، أو بتحاول تتعلم مهارة جديدة، أو حتى بتمر بأزمة، دايمًا فيه أمل لما تكمل.
اللي اخترع النور، فشل 1000 مرة، ولسه الناس بتحكي قصته بعد 100 سنة.
مفيش حد بينجح من أول مرة، بس فيه ناس بترفض تيأس من أول مرة.
ودي هي الناس اللي بتكمل، وتنجح، وتغيّر.
خد من إديسون 3 حاجات:
ما تستسلمش… حتى لو العالم كله شايف إنك مش هتنفع.
فشلك مش دليل ضعفك… ده دليل إنك بتحاول.
أي فكرة ممكن تنجح… لو اشتغلت عليها بجد وصدقت فيها.
قولنا إيه أكتر تجربة فشلت فيها وتعلمت منها؟
شارك القصة مع حد ممكن يكون محتاج دفعة، ولو بتفكر تبدأ حاجة جديدة وخايف من الفشل…
افتكر دايمًا إن النور اللي منوّر حياتك دلوقتي، وراه ألف محاولة مطفية.
