انتقام القط الأسود

انتقام القط الأسود

أنا مش عارف أقولكم أيه غير إني خايف، خايف أيه دا أنا مرعوب وأنا شايفه كل شويه بيقرب عليا، لحظه خروجه من الحمام خلت جسمي يتكهرب، مش قادر أحدد دا شيطان ولا جن ولا أيه بالظبط كان طوله ميتعداش المتر، مليان شعر مغطي جسمه ووشه كله، مفيش غير عينيه اللي بتلمع زيي عيون القطط هيا اللي ظاهره، فضل يقرب يقرب وأنا أرجع لحد ماضهري بقا في الحيطه أزح مرا واحده عليا وغرس سنانه في بطني ..

 

---

صحيت من النوم من شدة الألم وأنا ماسك بطني اللي لقيت عليها آثار عضه ومكان الجرح بينزل دـ،م، قومت وأنا حاطت أيدي علي الجرح، جبت حتّتّ قماشه عشان أمنع نزول الدم ،

وبعدين روحت عند  الحمَّام، أول لما فتحت الباب أتخشبت في مكاني من اللي لقيته قاعد لي في زاويه من زوايا الحمام، نفس الكيان اللي شوفته في حلمي، بس الغريبه إنه كان مش بيتحرك هوا باصصلي وبس،

وبعد كام ثانيه أتكلم بطريقه مش مفهومه زيي الهمهمه قال كلام كتير وأنا واقف مرعوب جسمي متكتف مش قادر أجري، كل اللي ميزته من كلامه لما قالي

“إنت قتلت أبني وأنا هقتلك”

ونزل بلاعه الحمام، قفلت باب الحمام وطلعت جري علي أوضتي وقفلت الباب عليا من جوا واليوم عدى علي خير بس مبطلتش تفكير في اللي حصل حاولت إني أنسي الموضوع وحضرت فطار وقعدت أكل، حسيت إن في حاجه بتتحرك قدامي ببص للطبق لقيته مليان دود وحشرات شكلها غريب، قومت جري علي الحمام وفضلت أرجع كنت شايف الدود وهوا بينزل من بوقي وبيقع علي الارض والغربيه إنه كان بيختفي …

خلصت وطلعت، فضلت أشرب مياه كتير وروحت ناحيه أوضه الأنتريه وقعدت، دماغي كانت  بتوديني وتجبني وفجأة سمعت صوت قطه قومت وأنا ماشي بخطوات هاديه أدور عليها قلبت البيت كله مفيش ليها أي أثر لحد ماشوفت قطه سودا حجمها كبير وسنانها بارزه لبرا كانت خارجه من  الحمام القطه بصتلي ووقفت علي رجليها الخلفيه وفضلت تقرب مني ووشها كان ظاهر عليه اكتر ابتسامه مرعبه شوفتها في حياتي،

ومره واحده أزحت مسكتني من رقبتي وغرزت أنيابها المدببه في لحمي الدـ،م نزل علي جسمي كله  لحد مافقدت الوعي، صحيت لقيت الشقه كلها ضلمه واتأكدت إن الليل دخل لما لقيت نور القمر الخافت ظاهر من ورا الستاره قومت وبدأت أستجمع قوتي وأنا بتألم من تأثير العضه، وروحت عشان أفتح اي لمبه تنور الشقه بس الغريبه اللمبه منورتش

فضلت أضغط علي الكُبس مره واتنين وتلاته مفيش فايده،روحت عشان أنور غيرها وبردو فضلت أحاول مفيش فايده ومره واحده لقيت نور الشقه كله نور ورجع طفي تاني ولما نور مره كمان كل لمبات البيت فرقعت

الأزاز اتنطورت في كل حته ولولا ستر ربنا كان زماني الوقتي مرمي في المستشفي، بس الحمدلله محصليش أي حاجه فضلت أتحرك علي نور القمر لحد موصلت للشمع وولعت واحده فيهم وخدتها وروحت ناحية أوضه النوم ..

قعدت علي السرير وبدأت أفكر في كل اللي بيحصلي دا لحد مسمعت صوت خرابيش خرجني برا حبال أفكاري، صوت الخرابيش كان مع الوقت بيزيد الصوت كان مزعج لدرجه إني مسكت المخده حطيتها علي دماغي لحد ما الصوت سكت

الوقت فضل يعدي والشمعه كانت قربت تخلص شغلت قرآن ونمت عليه والحمدلله الليله عدت علي خير ومحصليش أي حاجه اه ماهوا طول منا عايش وفيا الروح أنا مبسوط ،

صحيت من نور الشمس وبدأت أفتح عيني وأفوق كنت حاسس بتقل البطانيه علي جسمي وشوفت قطه سودا نايمه عليها فضلت افتح عيني واقفلها وفركتها كام مرا عشان أتأكد اني مش بحلم وفعلًا مطلعتش بحلم، ومره واحده القطه قامت ومشيت وخرجت من الأوضه قومت خرجت وراها وأنا ماشي بحذر لقيتها دخلت الحمام جريت عشان أشوفها بس ملقتش ليها أثر،

وبعدين سمعت صوت جرس الشقه روحت عشان أشوف مين لقيته "أدم" صحبي سلمت عليه ودخل فطرنا سوا وقومت عملت شاي كنت واقف في المطبخ لقيت أدم بيصرخ طلعت جري عشان أشوفه لقيت قطه سودا ماسكه أدم من دراعه جريت عليه وفلتها منه وخدته ونزلنا علي القهوه وقبل ما يقول أي كلمه قولتله ..

-أنا عارف إن دماغك بتوديك وتجيبك بس أنا هحكيلك كل حاجه لأن الموضوع مش طبيعي وأنا في دوامه بقالي كام يوم

أنت عارف إني بكره القطط، من أسبوع بالظبط لقيت قطه دخلت الشقه معرفش دخلت منين وأزاي وكل لما أخرجها كانت بتدخل تاني معرفش إزاي، وفي مرا من المرات لقيتها في المطبخ بتاكل من الأكل بتاعي ومبهدله الدنيا جريت عليها مسكتها كانت هاديه أوي ورحت مسكت سكـ،ينه ودبحـتها ورميتها في الزباله ومن يومها وأنا بيحصلي حاجات غريبه وبشوف كل يوم كوابيس لقطط سودا بتهجم عليا،

غير البلاوي الزرقا اللي بقيت بشوفها وأنا صاحي ..

-ينهارك أسود إزاي تعمل كدا، إنت وقّعت نفسك في ورطه أنت مش قدها كل كلامك دا ملوش غير تفسير واحد وهوا أنك أذيت حد من الجن وهما الوقتي بيسعوا للأنتقام

-طب الحل أيه الوقتي

-أنت لسا بتسأل علي حل أنت تلم هدومك وتمشي من الشقه دي في أسرع وقت  لحد ما نشوف صرفه

-تمام ماشي أنا هطلع حالًا ألم حاجتي

 

---

-أتاخر دا ليه هوا كمان أما اطلع أشوفه

فضلت أخبط كتير على الباب مردش لحد ماكسرت الباب شوفت أكتر منظر مرعب في حياتي كلها،

لقيته مرمي علي الأرض وغرقان في دـ،مه ورقبته كانت مد،ـبوحه وعيونه خارجه من مكانها وواقف حواليه مجموعة قطط سودا عيونهم بتلمع كانو بيبصوا عليا بنظره كلها شر، طلعت جري من البيت وعرفت الناس كلها بكل حاجه ولما دخلوا البيت ملقوش أثر للقطط دي ..

الأتهامات كلها أتسلطت عليا لأني أخر شخص كنت معاه، وافتكروني بكذب وألفت عليهم حوار

بس الحمد لله لما محدش لقى دليل ضدي خرجت منها، عاوز أقولكم أوعوا تأذو أي مخلوق لأي سبب، لأن أكتر الأوقات بيكون  طفل من أطفال الجن متجسد في المخلوق دا ومع أذيتك أو قـتلك ليه، عشيرتة بتنتقم أشد إنتقام ولكم في قصه صديقي عبره