صدفه (الحياة حلوة) القلب و الروح
صدفه
اسكربت 1
اذيك يا كيان عامله اي كل سنه وانتى طيبه
مسكت الفون حوالي الساعه ٣ الفجر كدا لقيت المسدج دى من عبد الله انسان جميل كنت اتعرفت عليه صدفه عن طريق الفيسبوك مش عادتى اصلا انى بتكلم مع اي حد علي الفيسبوك نظرا للاكونتات الفيك الكتير الموجودة عليه فكنت يادوب افتح اشوف البوستات المتشيرة وخلاص انما كلام وصداقات مكنش ليا حتى مع بنات المهم ان عبد الله كان في مرة بعتلي علي مسنچر طبعا كلنا عارفينه ... كنت مترددة انى ارد عليه خصوصا انه شاب ودا مينفعش ودا مش معناه انى مش بختلط بشباب لا بحكم الدراسه فليا زمايل الدراسة مش اكتر طبعا كنت هادي لعبد الله البلوك الجميل ولكن شدنى جدا انه كاتب اسمه بالعربي مش انجليش زي ما كلنا بنعمل هو علي الرغم انه لفت انتباهي بس خلانى اتأكد انه شكي في محله وان الاكونت فيك بس بدل ما ايدى تروح علي البلوك لقيتها راحت علي البيدج بتاعته وبعد ما اخدت البيدج كلها ذهابا وايابا اكتشفت انه في كليه علوم الكليه اللي كنت بتمنى ادخلها ولكن ربنا مآردش وانه بيدرس في الأزهر الشريف وانه من اسكندريه اكتر بلد عزيزة علي قلبي لا وكمان بيحب الشعر لانه مشير شعر جاهلي كتير وانا نقطه ضعفي الشعر فهو تقرييا حد قاله انى فياضه المشاعر وبحب الشعر وان اي حد من اسكندريه بياخد قلبي لا وكمان في علوم انا عشقت الواد دا خلاص وبدل ما كنت هعمل بلوك دخلت رديت عليه
_ مين
= السلام عليكم انا عبد الله
_ اهلا .. ايوا طبعا اهلا ما لازم ابان راسيه وتقيله ويعرف ان اصلا برد عليه وانا مغصوبه ومغلوبه علي امري
= انا اسف ان ببعت بس كنت فاكرك حد يعرفنى لانك بعتيلي أد
_ أد .. لا والله مش عارفه بس انا مبعتش ولو بعت فممكن يكون غصب عني بقا
= تمام ولا يهمك انا عبد الله من اسكندريه رابعه علوم 👈 واستوب هنا بقا .. هو قالي رابعه علوم وانا مقدرتش امسك نفسي ايوة اعذروني دا في علوم واخر سنه وكمان اسكندراني وغير كدا شكله وسيم هو اينعم مش ملك جمال لكنه وسيم لا دا عريس لقطه ميتسبش بس بردو لازم اتقل يا جماعه ماهو مش كدا 👇
_ تعرف ان بحب كليه العلوم اوووي طب خد دى بقا يسطا انا رديت اصلا عشان خاطر علوم واسكندريه دي اه اصلنا مردتش الا لما اخدت الاكونت بتاعك كله ذهابا وايابا بوص يسطا انت خدت قلبي خلاص .... 👈 مش قولتلكوا هتقل جامد ... يقول اي عليا هو دلوقتي 🤦🏼♀️
= انا كدا حبيت الكليه اللي خليتك تردي عليا وعشقت اسكندريه اللي خليتك تدينى قلبك
👈 اي دا بقا الواد القليل الادب دا ابو كلام حلو وعيون حلوين دا يخربيتك اي الكلام الجامد دا بس ولو.. لازم انت اللي تجري ورايا بردو رديت 👇
_ ميرسي
ومن هنا بدأ صداقه بيني وبين عبد الله اتكلمنا حوالي اسبوع علي المسنچر ارتحاتله جدا بس كان بالنسبالي صديق مش اللي هو عايزة اشقطه ووقعه والكلام دا لكن بردو ميمنعش ان كنت احيانا بحس ان جوايا مشاعر ناحيته لكن كنت بكدبني لحد ما كلمنى عبد الله في مرة وقالي
= ما تيجي نتكلم واتساب
👈 اي دا وانا اللي قولت ازهر ومحترم ومتربي طلع سافل اهو وعايز الواتساب
= لو مترددة خلاص
👈 اي الواد دا مترددة اي استنى يسطا خده اهو
_ هو بس انا مش بدي ارقامي لحد ومينفعش ما خلينا هنا
= متقلقيش بس يعني عشان الواتساب اسهل
_ طب تمام اوكي انا بردو بحب الواتساب هديك الرقم ٠١١---------
وهوب عبد الله مستناش بعتلي مسدج علي الواتساب ما الواد واقع اهو امال فيه اي بقا وطبعا سيڤت رقمه عندى قام ظهرله صورتي
= طلعتي جميله ماشاء الله
ابتسمت ورديت
_ دا بس من ذوقك
= لا بجد طلعتي وتكه زي ما بيقولوا
_ دا كله عرفته من الصورة
= اه طبعا باين انك قمر
_ اه بيقولوا وكمان عندي غمازات
= مش شايفها
_ استني هوريك 👈 وهنا قررت ابعت صورة مش عارفه ليه كنت عايزة اوريله اد اي انا حلوة لدرجه ان كنت هبعتها بشعري لان معظم صوري بشعري اصلا لكن قولت لا انا هبعت بالطرحه وخلاص وبعت صورة مش احلي حاجه لكن انا حلوة اصلا ودا مش غرور بس ثقه وكمان من الناس الكتير اللي بتكون معجبه بيا وبيقولولي ان قمر والكلام الحلو اللي احنا عارفينه دا
= اه شوفت الغمازات مش قولتلك ماشاء الله عليكي زي القمر
بعتله ريكورد قولتله
_ ميرسي مش عارفه اقولك اي والله علي الكلام الحلو دا
= انتى صوتك طلع حلو اوووي كمان
_ ميرسي ... انت بتحب الشعر صح الجاهلي بس ولا ليك ف الجديد
= يا ارض عرفتها فاجئه
ودنيا لممستها بشويش يا اطهر من رقم فلكي في عداد اسمه اكل العيش
بتحكمي ليه علي غيابي
وفي وجودي بتنسيني
رفضتي ان انت تتسابي
وفجأة انتي اللي سيبتينى
وحششيني
👈 وهنا انا قلبي دق منكرش ان نقطه ضعفي عمرو حسن .. بعتله 👇
_ دا عمرو حسن بحبه اوووي وبعدين ملكش دعوة بيه دا الكراش بتاعي .. علي فكرة بعرف اكتب شعر
= طب سمعيني
_ ثواني حاضر وبعتله
بشتقلك ..
بشتقلك وبموت في عيوني
اما بتكتب من شوقي قصيدة
يتغازل فيها كل العشاق....
= لسه عند رايي ان صوتك حلو جدا يا بخته بيكي
اتكسفت وخدودي احمرت
_ هو مين ؟
= اللي هتكوني من نصيبه
ومن هنا بدأنا نتكلم اكتر وعرفت انه بيشتغل في مكتب تحفيظ قرءان وانه ماشاء الله عليه خاتم المصحف كله وان بليل بيشتغل في معمل وعرفت حاجات عن مامته وانها من نفس بلدي وعرفت انه كان بيحب بنت قبل كدا بس مكانوش بيتكلموا كتير ولا بيتقبلوا كان بس بيشوفها لما تيجي دروس القرءان ولكنها دلوقتي متزوجه وعرفت اد اي هو شخص محترم وعارف ربنا كنت فاكرة ان الناس بتوع الازهر دول معقدين لكن لا هو فرفوش وبيحب الهزار وحياته بسيطه لكن بيصلي وحافظ القرءان ماشاءالله وبيجاهد انه ميغضبش ربنا لحد ما انا جالي عريس وكان ظابط شرطه فكلمته اخد رايه كنت عايزة اشوف هيزعل هيقولي اي يعنى زي ما بيقولوا اجس نبضه انا كدا كدا مكنتش هوافق علي العريس بس قولتله اشوف هيقولي اي بعتله
_ عبد الله انا في عريس ظابط جايلي ومحتارة بصراحه مش عارفه اقعد معاه ولا لا
رده ساعتها اكدلي ان انا مش في دماغه اصلا لما قالي مبرووك وظابط يبقا اكيد موافقه فطبعا عشان كرامتى رديت
_ اه طبعا هقعد معاه واشوف
ومن هنا كلامنا قل بعد ما كان مبينمش الا بعد ما يطلب منى فويس اقوله فيه تصبح على خير وبنتكلم كتير وكنت بستناه.. كلامنا قل ومرة واحدة الكلام اتقطع خلاص وطبعا انا سيبته براحته خصوصا ان زعلت فقومت مسحت الرقم عشان مضعفش واكلمه وقضيت فترة ٤ شهور من غير ما نتكلم وربما اكتر كمان مش هنكر انه انشغلت ونسيت ولكنه من قريب اووى جه علي بالي وكنت اتمنى يبقا معايا الرقم عشان ابعتله بس تقريبا كدا ربنا اراد يحققلي امنيتي وبعد اسبوع الاقيه هو اللي باعت ... فوقت من شرودى علي صوت آيه اللي اول ما لقيت مسدج من عبد الله جريت عليها احكيلها لانها مكنتش تعرف هو مين ودا لان انا مليش غير آيه احكيلها واخد رايها وافضفض معاها اينعم بنختلف كتير ونتخانق اكتر لكن في الاخر ملناش الا بعض هي الامان ليا وانا الاطمئنان ليها حكيتلها وسالتها اعمل ايه فطبعا آيه سالتنى انت عايزة تردي قولتلها انا بس مستغربه انه قعد كل دا من غير ما يكلمنى قالتلي يعنى عايزة تردي .. ردي وشوفيه عادى مش هتخسري .. يلا هقفل انا عشان تردي عليه الا هو كان باعت اي ؟
رديت قولتلها كان بيقولي عامله اي وكل سنه وانتى طيبه. فردت عليا وقالتلي طب ردي عليه وقفلت .... 👈 طبعا صاحبتي حبيبتشي قالتلي ردي لازم اسمع كلامها فقومت رديت
_ الحمد لله انا تمام انت اخبارك ايه... ياااه انت فينك يا ابني
وطبعا الوقت كان صلاه فجر واحنا في رمضان فقفلت عشان اروح اصلي بعد ما خلصت فتحت لقيته باعت
= انتي لسه فاكراني .. انا قولت مش هتفتكريني
_ فاكراك ومخمصاك 👈 بتدلع بقا
= ليه بس
_ تقعد كل دا متكلمنيش ومتسألش عليا
= بصراحه قولت خلاص انك هتتخطبي ومش هينفع كلامنا تاني عشان الظبوطه
👈 شوفتوا البارد اهو انا كدا مش عارفه راسي من رجلي طب الاربع شهور اللي فاته كان فاكرني وسأل عليا اهو ... هل كدا في حاجه جواه ناحيتي طب لو فيه ليه بيستظرف ويحسسني ان مفيش رديت
_ انا قولتلك ان هتخطب اكيد لو هتخطب مكنتش كلمتك انا من نفسي وبعدين لما فكرت كدا اشمعنا كلمتنى دلوقتي ؟!
= مقولتيش اه ... بس انا لماح اما اشمعنا دلوقتي فانت علطول ادامي علي التيليجرام بس قولت بلاش اسببلها مشاكل
_ لا مفيش خطوبه ولا حاجه
= يلا علي خيرة الله كله بييجي في الوقت المثالي المهم انتي دنيتك اخبارها اي
_ الحمد لله وانت
= تمام علي حطه ايدك
_ طب ما تيجي تيليجرام
= ليه حبتيه ولا اي
👈 دا لسه فاكر ان مش بحب التيليجرام اهو في امل 👏😍
_ لا بس الشاتات كتير هنا تعالي هناك
ع التيليجرام اتكلمنا شويه وبعدين قالي يلا هناك بقا عشان اصحي بدري احضر الخطبه تصبحي علي خير
قفلت الفون وقبل ما انام فضلت افكر هو ممكن ربنا يجمعني بيه ؟ اينعم كنت بحلم ان اتجوز في نفس بلدي ويكون طويل وعبد الله مش طويل اوي يعنى ١٧٣ سم بس مناسب خصوصا اننا ١٥٧ سم بس فضلت افكر في صورة فتي احلامى اللي رسمتها واللي مش موجوده في عبد الله اصلا بس اكتشفت انه هيحضر خطبه يعنى امام مسجد وكليه علوم وحافظ كتاب الله ولين في الكلام ورومانسي واكتر حاجه انه بيخاف ربنا وانا عايزة شخص ياخد بايدى للجنه خصوصا اني بلبس بناطيل وبكلم ولاد وبعمل حاجات كتير تغضب ربنا بس طمعانه في توبته وهدايته وخصوصا اننا في شهر رمضان والشياطين بتكون متسلسله وكل عمل غلط بتعمله هو من قرارة نفسك واللي هي اصعب عدو للانسان النفس امارة بالسوء اقوي حتى من وساوس الشياطين واصعب جهاد هو جهاد النفس وعبد الله انسان جميل هيساعدنى واساعده اننا ناخد بايد بعض للجنه بس هل هو ممكن يحبني هل ممكن نجتمع في بيت واحد عرفته صدفه وفضلنا ٤ شهور منتكلمش وانشغلت بمشاغلي ومكنتش بفكر فيه الا مرة واحده بس حالا حاسه ان في حاجه جوايا بتشدنى ليه حاسه بحاجه غريبه وفضلت في شرودي وافكاري لحد ما غلبني النوم
تاني يوم الصبح بعتله مسدج
_ صباح الخير
= صباح الورد يا ورد كل دا نوم انا صاحي من ٩
_ عشان بتحضر خطبه
= طب وانتى معندكيش فطار تحضريه
_ معزومين برة
= انا كمان هفطر برة
_ انا بساعد ماما في ترتيب البيت هخلص واكلمك
= ربنا معاكى انا مبعملش حاجة في البيت نهائي لدرجه ان مش بقفل غطا علبه الكريم ورايا ولا بعلق هدومي يعنى اللي هاخدها امها داعيه عليها
👈 ياعم عاجبني انا قولت لا بس بوص حواليك رديت عليه 👇
_ الخطبه كانت بتتكلم عن اي
= كانت بتتكلم عن فضل الصيام والتقوي والاخلاص وانه يكون العمل دا خالصا لوجه لله مش المنظرة بيه بس ادام الناس
وهنا اتفقنا اننا نتكلم بعد الفطار
بعد الفطار بعت لعبد الله عايزة اسألك سؤال
رد عليا الساعه ١٠ ونص بليل
= اسألي
_ صليت العشا والتراويح الاول
= صليت العشا اه
_ والتراويح ؟!
= هي فرض؟
وهنا كانت صدمه عليا معقول يكون منافق يعنى حافظ القرءان وخطبه وبتاع ومصلاش التراويح اتخدعت فيه ولكن تبا للتسرع
_ لا مش فرض لكن بنقعد طول السنه مش بنصليها غير في الشهر دا
= اتكلمي عن نفسك بعد اذنك
شوفت المسدج دى زعلت تبا للتسرع مرة تانيه
_ انت عايز تفهمنى انك بتصلي طول السنه كل يوم ١١ ركعه ؟! عموما لو مضايقك كلامى ممكن تمسح رقمي
= مالك علي فكرة بهزر اكيد صليت التروايح انا امام المسجد يا بنتى
مش قولت تبا للتسرع
_ ما تقول من الاول الله لازم تعصبنى
= ما انتى عارفه ان انا الامام قولتلك هحضر الخطبه
_ لا معرفش فاكرة انك بتقول الخطبه بس
👈 بستعبط طبعا
= لا يا ستي انا امام المسجد شغال في كله يعنى خطبه الجمعه التروايح صلاه العصر كله شغال ثابت نفسي انا هنا
_ بس الساعه دلوقتي ١٠ ونص انا التروايح عندى بتخلص ٩ انت كنت فين كل دا ؟
= بيقولوا ان البنات بتروح تصلي التراويح عشان تشقط عرسان
_ لا طبعا مفيش الكلام دا والدليل ان بنكون لابسين الاسدال وواسع ومش بنحط ميكاب كمان
= والعبايات عارفه انتى العبايات دى بتكون هايله
_ انت قليل الادب وبتبص علي العبايات ليه وانت مالك هايله ولا لا
بعت صورة ليه
= اي رايك ؟
_ خلي بتوع العبايات الهايله يقولوا هما رايهم المهم هتشوف الماتش ولا ملكش في الكورة
= علي فكرة انا زعلان وبعدين عشت لحد ماشوفتك انتى بتسألي ليا في الكورة ولا لا يا بتاعت شنو انتى
_ ايوا بحبه عشان طويل وانا فتي احلامى طويل او تقدر تقول كدا فتى احلامى اللاعب رقم 1 في الاهلي
= ما خلاص هي سيرة وبعدين عشان انت قصيرة بس مع ان مش باين عليكى
_ عشان كيرفي بس
= استغفر الله العظيم هنرجع تانى للعبايات وانا بضعف
_ علي فكرة انا كمان بحب النكد مووت وبضعف عند النكد
= اها اخدت بالي
_ عبد الله عايزة منك طلب صغنن اد كدا
= تؤمري يا ألبي
_ اسمها قلبي بالقاف وانا مش قلب حد يا المش محترم انت
= بتحبي اللغه العربيه اوي انتي
_ الطلب عايزاك تقولي قرءان بصوتك
= مش في المود دلوقتي
_ هخامصك
= طب قاعد مع اهلي هخلص معاهم واجيلك
_ اشطات
طبعا قفلت الفون ونمت مش عارفه نمت ازاي وطبعا بعد ما فضلت افكر في الاستاذ عبد الله غلبنى النوم صحيت تانى يوم الصبح وطبعا لاننا في رمضان مش بنزل الكليه ولا بقابل اصحابي ولا اي حاجه من دى فيومى صلاه وقرءان وتفكير في عبد الله بستناه لحد ما نتكلم ولان النهار صيام وعبادة فبنتكلم بليل وبكون مستنيه اووي الليل ييجي عشان نتكلم اصله بيوحشنى اوي
بليل
لقيته باعت
= هبعتلك حاجه كنتى عايزاها
_ بجد .. علي فكرة انت اجمل عبد الله في الدنيا وعلي فكرة الصورة جامدة اقولك انت قمر خالص
= ومثكر كمان
_ يا مغرووور
_ دى ثقه .. بعت الريكوردات
سمعته لقيته بيصلي بالناس صوته مش احسن حاجه لكنه فيه خشوع ومريح ساعتها اتمنيت اوي ان نكون في بيت واحد ويسمعنى قرءان بصوته قبل ما ننام ويصلي بيا انا وابني او بنتى وللحظه كدا سرحت في انى عايزة ارابيهم تربيه كويسه عشان يفيدوا المجتمع .. ازرع فيهم من صغرهم القيم والمبادئ اعلمهم ان رضا ربنا اهم شئ في الكون واهم شئ في الوجود احنا اتخلقنا اصلا عشان نعبد ربنا بنضعف وبنعصي اه لكن المهم اننا نتوب قبل فوات الاوان وهو التواب وهو كمان الغفور وهو الرحيم رحيم بعباده اللي من صنع ايديه فأكيد هو احن علينا من كل البشر فوقت من شرودى ورديت 👇
_ حلو اوي ماشاء الله ما صوتك حلو اهو ...
عبد الله عايزة اسألك سؤال
= اسألي
_ ليه بطلت تكلمنى وبععدين رجعت دلوقتي تكلمنى ؟! انا حتي قولت نسيتنى
منكرش ان لما سألت السؤال دا كنت عايزاه يقولى انه كان بيفكر فيا وانه حتي في اعجاب او استلطاف لكنه رده كان غير متوقع بالمرة
