بالعامية _ فشة خلق مع فشة قهر
ليش يا دنية تخلي النجس يتحكم فينا...
ليش يا دنية تخلي الرخيص يشوف حالو علينا...
والله عيب عليكي تخلي احقر الناس يدوسوا فينا
وين راحت العدالة
ليش على طول حكم القوي عالضعيف
ليش دائماً الغني بيدعس عالفقير
بتعرفي يا دنية...
انا مستغرب فيكي كيف رضيانة وساكتة
والله صرتي تمشي مع الظالم وتكبي المظلوم
على فكرة نحنا بشر متلنا متل اي حدا في عنا قلب وبنحس وبنقهر وكلشي
انتي ما كنتي هيك من قبل،لك كنتي اذا شفتي الفقير تعطيه لك كنتي اذا شفتي النايم نغطيه لك كنتي اذا شفتي الجوعان تطعميه...
شو يلي صار عليكي شو يلي غيرك كرمال الله فهميني شو يلي صاااار مابعرف....؟؟
بس بتعرفي شو يمكن معك حق...!!!
يمكن لان صرنا بزمن المصاري..
يمكن لو كنا منحب بعضنا ما صار هيك..
وصلنا لزمن كنا نسمع فيه مجرد سمع يلي هو...
( معك ليرة بتسوى ليرة مامعك شي انت ولا شي)
وانا هلق بعتذر منك وبقلك انا اسف لان حطيت الحق عليكي...
العطل مو فيكي العطل منا نحنا...
بجد انا بعتذر واسف كتير
لان قبل ما نصلح الدنية خلينا نصلح اخطائنا يلي راكبتنا من فوق لتحت..
خلينا نحب بعضنا يلي ماعاد حبينا لخير لحالنا..
لك صرنا عم نكره حالنا....
صرنا اذا ما لقينا حدا نحكي عليه ونشتمو نروح نوقف عالمراية ونحكي على حالنا ونشتم حالنا...
عنجد بنستاهل الشي يلي نحنا فيه....
بس شو الواحد بدو يحكي ههه
حكينا كتيييير وعملنا كتيييير وصح متل قالوا..
نادي لمن كان به حياة فلا حياة لمن تنادي...؟؟
الله كريم والله يحببنا بحالنا قبل ما نحب بعضنا..
عنجد مابعرف شو احكي...
ليكنا تغربنا وسافرنا وكل واحد كان حلمو يسافر وليكنا سافرنا وياريت ما سافرنا وتغربنا يا حيف بس....
وعلى فكرا انا يلي عم اكتب متغرب ويمكن هاد الكلام يلي عم اكتبو مو بس قاهرني من جواتي يمكن قاهر كتير بشر متلي لهاد السبب انا عم اكتب يلي بقلبي احسن من اني احكي لحدا لان ماحدا رح يسمع كل مين ملتهي بحالو....
وكل مين داير ولا نفسو حتى يلبي رغباتو على حساب غيرو وبالاخير بقولوا عنا انو نحنا ماعنا كرامة والحمد الله نحنا عالعادة عم نضل عم ننهش بلحم بعض كرمال كرسي او كرمال قلم او كرمال مصاري وعلى فكرة كلو مكشوف وكلو مبين بس بالنهاية شو بدو يحكي الواحد بضل حكم القوي على الضعيف ومو رايحة غير على الضعيف يلي بيرضى بالقليل وبقول الحمد الله , هاد الانسان يلي عم تقولوا عليه انو ضعيف هاد اكتر انسان قوي واكتر انسان شبعان واكتر انسان عندو كرامة والاهم من هاد كلو انو ما بيقتل لحتى يعيش وبظن الرواية وصلت والرسالة نفهمت صح…..!!
وعلى كل حال رح تضل لقمتنا مغمسة بالدم حتى نموت او يمكن حتى نشلح توب الشرف يلي غيرنا شالحو من زمان .
وبالمناسبة لما بشوف عليك شي مو منيح وبضل ساكت لا تفكر هاد خوف لاااا ابدا مو خوف بالعكس هاد رجولة مني مو ضعف لان ربك امرنا بالسترة .
ايامنا الجاية قليلة وكلشي محسوب علينا لهيك خلص بكفي تجريح وبكفي كره خلونا نحب بعض لك خلونا نتمنى الخير لبعض على الاقل حاجة لسى كل مين فينا مستني التاني على اصغر غلط حتى يذلو فيه وبظن بكفي كتابة لهووووون لان بكفي والله بكفي...؟؟
ملاحظة : ماحدا مقصود بالكلام بس مجرد فشة خلق وكل الاحترام والتقدير للجميع .
