قصه في المترو
_ لو سمحت ، ممكن من فضلك حضرتك تقوم وتقعدني مكانك ؟
= ممكن جدا اديني بسرعه ، إيدك على 10 جنيه
_ ليه ان شاء الله ؟
= خلو رجـ ـل ، مش انا هتنازلك ابدا جدا عن مكاني
_ هو انا جاية أأجر منك شقة ، يا جدع خلي عندك نخوة المترو زحمة وانا بنـ ـت
= لو سمحتي بلاش تتسـ ـولي عليا بأنـ وثـتك هنا في المترو وتطلعي تقرفـ ـينا على الفيس وانا إندبندنت وانا بتاع ، خلي عندك وش واحد زي القهوة
_ هو إيه اللي حصل للرجـ ـالة انا مش فاهمة ، هو التيستوستيرون شاحح في السوق وللا إيه
= بصي يا آنسة ، آفة الإنسان في كل العصور انه دايما بيبص تحت رجليه ، مبيبصش قدامه
_ يعني إيه
= يعني يخترع أجهزة تكييف عشان يقضي على الحر ، أجهزة التكييف دي تنشر غاز الفريون ، فغاز الفريون دا مع الوقت يعمل تآكل في طبقة الأوزون ينتج عنها تسرب أشعة ضـ ـارة للأرض تتسبب بدورها في إييييه ؟
_ في إيه ؟
= إحتباس حراري متنفعش معاه كل أجهزة التكييف اللي اخترعها الإنسان
_ يا سلام ؟
= اهو شوفتي انتي مستغربة ازاي ، الإنسان كائن غشـ ـيم وإبراهيم ميخافش الا من الغشـ ـيم
_ إبراهيم مين ؟
= أنا
_ أنا عايزة افهم ايه علاقة اللي انت بتقوله دا بموضوعنا
= تعرفي المتنبي ؟
_ خدته في الثانوي اه
= المتنبي مرة طلع عليه قطـ ـاع طرق كانوا عايزين يثـ ـبتوه وياخدوا منه الحصان والموبايل
_ وبعدين
= عرف يهرب منهم وخدها جري ، وهو بيجري قابله واحد قاله مش انت المتنبي بتاع الخيل والليل والبيداء تعرفني ، قاله اه ، قاله يا خيـ ـبتك التقيلة وبتجري من شوية قطاع طرق
_ وبعدين ؟
= عمنا المتنبي سـ ـخن ، لف ورجعلهم ، راحوا مريحينه ، هل المتنبي وهو بيكتب بيت الشعر دا كان عارف انه هيتسبب في مـ ـوته ؟
_ أكيد لأ
= عبد الحكيم عامر ، قائد الجيش المصري في اكبر هزي ـمة في تاريخه الحديث
_ ماله ؟
= كان مقدم ورقه في كلية الزراعة اصلا ، بس لما عرف ان صاحبه جمال عبد الناصر دخل حربية نقل ورقه وقال ابقى معاه وخلاص
_ يااااه !
= اه والله ، حدث اهبـ ـل ، وعلاقة صداقة بين اتنين مراهقين تسببت فيما بعد في هزيـ ـمة عسكرية ساحـ ـقة
_ حاجة غريبة فعلا
= معظم الأحداث المحورية في حياتنا لو مكانتش كلها .. بتتبني على صدف عبيـ ـطة وأشخاص عابرين في حياتنا
_ دا صحيح ، بس ايه علاقته بإنك عايز تأجرلي كرسيك في المترو
= الحكاية مش بالسطحية دي يا حمـ ـارة ، الحكاية أعمق من كدا
_ اشرحلي
= تعرفي انا لو قمت من على الكرسي بتاعي وقعدتك ايه اللي هيحصل ؟
_ إيه
= هتبدأ مشاعر المسؤولية ناحيتك تتسربلي
_ يا سلااااام
= مش مستوعبة عشان جاهـ ـلة ، فيه دراسة نفسية شهيرة أثبتت اننا بنقع في حب الناس اللي بنساعدهم
_ إزاي
= أول غريزة عاطفية عرفها الإنسان البدائي هي غريزة الأبوه والأمومة ، دي الترجمة الحرفية لفكرة العطاء بلا مقابل
_ صح
= واستمر الشعور دا في التنقل مع الچين البشري خلال آلاف العصور ، اي حد بنقدمله مساعدة من غير مقابل بنحس ناحيته بتعاطف ومسؤولية
_ دا حقيقي
= ودا اللي بيفسر غرام بعض الناس بتربية الحيـ ـوانات الأليفة في بيوتهم
_ ايوه كلامك مظبوط والله
= يعني انا إيه اللي يخليني اربي قطة في بيتي واأكلها واشربها وتقطـ ـعلي الشواحن والسماعات بتاعتي وفي الآخر مش هستفيد منها بحاجة ، لا هي بتتـ ـاكل ولا بتتحلب ولا بتبيض
_ شيء غريب فعلا
= انا لو قمت وقعدتك ، هحس بعد دقيقة واحدة اني مسؤول عنك ، فهفضل واقف جنبك
_ ليه
= عشان محدش يد9س على رجلك وهو معدي في الطرقة
_ إلهي ربنا يسترك
= وانا واقف قصادك هبص في وشك كتير فملامحك هتبقى مألوفة بالنسبالي
_ ملامحي هتبقى حلـ ـوفة بالنسبالك
= هحس اني اعرفك من زمان ، دا وهم الديچاڤو مش اكتر
_ أيوه
= وارد اني اشوف حد في المترو بيبصلك بصة كدا وللا كدا
_ هتعمل ايه يعني ؟
= هخـ ـزأ عينه طبعا ، ازاي يبصلك وانا واقف ، قفص برتقان انا ؟
_ لا انت سيد الرجـ ـالة
= وبعدين ما انتي اللي نازلالي من البيت حاطة فول ميكاب انتي بتشتغلي ايه ؟
_ كول سنتر
= مش رقـ ـاصة يعني ، يبقى تهتمي بصوتك اكتر من وشك ، وشك دا محدش هيشوفه
_ حاضر
= المنظر دا ميتكررش تاني
_ أوامرك يا تاج راسي
= هتنزلي من المترو ، قلبي هياكلني عليكي ، همشي وراكي عشان اتأكد انك عديتي الشارع
_ منحرمش العمر من عطفك عليا
= هتعدي الشارع وتروحي شغلك وانا هفضل قلـ ـقان عليكي طب وبعدين
_ ما تاخد رقمي يا لـ ـوح
= بالظبط ، واكلمك كل يوم بالليل بعد ما أهلك يناموا
_ ونتقابل كل جمعة في حديقة الأزهر
= ونحب بعض ونتعلق ببعض وتبقى علاقة عاطفية مفيهاش بربع جنيه عقل
_ وننفصل ونتـ ـعقد ؟
= بالظبط كدا ، طب وليه نجيب لنفسنا وجـ ـع قلب احنا في غنى عنه
_ ايه الحل
= تدفعيلي تمن جدعنتي ، فاحس اني بقدملك خدمة بمقابل
_ ودا هيخليك متحبنيش ؟
= بالتأكيد ، وإلا كان زمان كل بتوع البقالة اللي اتعاملتي معاهم بيجروا وراكي ، خدمة قصادها فلوس ، مفيش مكان للتعاطف
_ بس فيه حاجة مهمة انت مش واخد بالك منها
= ايه هي ؟
_ انا متجوزة اصلا ، وعايزاك تقعدني عشان حامل
= يا نهار اسـ ـود ، أنيـ ل ، يعني هندخل في حدوتة خيـ ـانة زوجية وجوزك يعرف العلاقة اللي بيننا ويطـ ـلقك وياخد منك البـ ـنت
_ لا ولد انا عملت سونار وطلع ولد
= طيب ، دي تربية الولاد صعبة اوي ، انتي كدا تدفعيلي 20 جنيه مش 10
_ اتفضل ، ومش عايزة اشوف وشك في المترو تاني ، روح اقف بعيد
= لا انا نازل اصلا ، محطتي الجاية ، اتفضلي ارتاحي 🤨😁