رواية شغالة ونص دستة رجالة للكاتب عادل عبد الله
رواية شغالة ونص دستة رجالة للكاتب عادل عبد الله
الحلقة الاولي
البداية
بلاغ الي الشرطة بالعثور علي جثة خادمة في حالة تعفن داخل احدي الشقق السكنية في احد الاحياء الراقية !!!!!
انتقلت قوة من الشرطة والطب الشرعي الي مكان الحادث .
عندما وصل رجال الشرطة الي مكان الحادث وجدوا دكتور عاصم صاحب الشقة وزوجته دكتورة زينة علي سلم العمارة امام الشقة المذكورة في حالة فزع وخوف شديد !!!
وبسؤالهم تبين اكتشافهم لجثة خادمتهم داخل شقتهم عقب عودتهم من اسبوع المصيف في حالة تعفن شديد !!!
دخلت قوة الشرطة الي الشقة ولم يستطيعوا تحمل رائحة التعفن الشديد حتي ارتدوا الكمامات الطبية ومعهم افراد الطب الشرعي الذين وجدوا جثة الخادمة فتحفظوا عليها وتم نقلها الي المشرحة لمعرفة سبب الوفاة واكتشاف بعض التفاصيل التي تقود لكشف ملابسات الحادث . وبدأوا في عمل الاجراءات اللازمة ورفع البصمات ووصف مكان ووضعية الجثة حين اكتشافها .
عادت قوة الشرطة الي القسم باصطحاب دكتور عاصم وزوجته لأخذ اقوالهم ومعرفة كيفية اكتشافهم للحادث .
بدأ الضابط بأخذ اقوال الزوج .....
: اسمك وسنك وعنوانك وعملك ؟
: اسمي عاصم ٤٩ سنة طبيب اسنان عنواني هو نفس عنوان الشقة محل الحادث .
: اتفضل قول ايه اللي حصل بالظبط ؟
: انا كنت مع مراتي وولادي في المصيف من حوالي اسبوع ولما رجعنا النهاردة اول لما دخلنا الشقة مقدرناش نستحمل الريحة .ريحة تعفن شديدة جدا .دخلت انا ومراتي نشوف في ايه في الشقة شفنا شمس الشغالة اللي عندنا ميتة بالمنظر اللي سيادتك شفته ده . اتصلت وبلغت حضراتكم علطول .
: هي كانت عندها كام سنة و بتشتغل عندكم من امتي ؟
: هي بتشتغل عندنا من سنتين وتلت شهور بالظبط . وانا معايا صورة بطاقتها هتلاقي فيها تاريخ ميلادها ، اتفضل يا فندم .
: دي عندها ٢٤ سنة ومش متجوزة . بس غريبة انك فاكر تاريخ شغلها عندكم بالظبط .
: لا يا فندم اصل هي اشتغلت عندنا بعد عيد جوازنا بحوالي اسبوع . كانت زينة مراتي استغلت مناسبة عيد جوازنا و طلبت مني اجيب حد يساعدها في البيت .علشان كده فاكر التاريخ كويس .
: تعتقد مين اللي قتلها ؟
: وانا هعرف ازاي يا فندم !! احنا كنا مش موجودين .
: لكن الحادثة حصلت في بيتك ، والمفروض انك تعرف مين بيدخل بيتك في غيابك !! خصوصا ان مفيش حاجة اتسرقت من الشقة يعني الحادثة مش بغرض السرقة .
: يجوز انها استغلت انها لوحدها في الشقة وجابت راجل في الشقة .
: ياااه ، هي كان سلولكها سيئ للدرجادي ؟
: الفترة الاخيرة لاحظت عليها انها تعرف رجالة .
: عرفت ازاي ان سلوكها كده ؟
: لاحظت انها بتتكلم رجالة في التليفون كتير بالليل في المطبخ ، وفي مرة شوفتها في الاسانسير مع شاب شغال في شركة في العمارة كانوا في وضع غلط .
: مين الشاب ده ؟
: اسمه خالد شغال في شركة مقاولات في نفس العمارة .
: تمام . و ازاي تشغل واحدة زي دي في بيتك ؟!
: في البداية كانت كويسة جدا لكن بقول لحضرتك في الفترة الاخيرة بس اللي لاحظت عليها كده .
: والمدام عندك تعرف كده ؟
: ايوه طبعا .
: وليه مش مشيتها من عندك لما عرفت ان سلوكها اتغير بالشكل ده ؟
: اتفقت انا والمدام اننا هنمشيها لما نلاقي واحدة تانية كويسة .
: حضرتك ممكن تتفضل تستريح بره شوية و دخل المدام اخد اقوالها .
: ينفع اكون موجود وسيادتك بتاخد اقوالها ؟
: اسف يا ريت حضرتك تنتظرها بره .
: حاضر يا فندم .
خرج دكتور عاصم من حجرة التحقيق ودخلت زوجته زينة .....
: اسمك وسنك وعنوانك وعملك ؟
: زينة ٤١ سنة نفس العنوان طبيبة اسنان .
: مين اللي قتل شمس الشغالة اللي عندكم ؟
: معرفش يا فندم انا كنت في المصيف انا وجوزي والولاد .
: عندك ولا قد ايه ؟
: عندي بنت وولد .
: عندهم كام سنة ؟
: منال عندها ١٦ سنة ومروان عنده ١٩ سنة .
: مدام زينة ، ايه رأيك في القتيلة ؟
: الله يرحمها في البداية كنا بنثق فيها وكنا فاكرنها محترمة لكن من فترة عرفنا انها بتعرف شباب وسلوكها مش تمام .
: عرفتي منين ان سلوكها مش تمام زي ما بتقولي ؟
: كنت بسمعها تتكلم بطريقة مش كويسة في التليفون وخصوصا بالليل غير ان جوزي شافها في وضع مخل مع واحد في الاسانسير .
: وليه سبتوها تستمر بعد ما عرفتوا كده ؟
: سبناها مؤقتا بس وكنا بندور علي واحدة تانية تشتغل مكانها .
: مخوفتيش علي جوزك وابنك منها ؟
: جوزي رجل محترم وابني لسه صغير .
: لكن ١٩ سنة مش صغير ده بقه شاب وفي سن خطر كمان .
: ايوه بس ابني متربي كويس وعمره ما يبص لوحده زي دي .وكمان احنا كنا قررنا اننا هنمشيها ونجيب واحدة غيرها علشان نبعد عن الشبهات .
: تفتكري مين دخل بيتك وانتو مش موجودين وقتلها ؟
: معرفش لكن انا شوفت جثتها مربوطه بحبل من رقبتها يعني احتمال تكون انتحرت .
وهنا دق الباب ودخل احد الضباط ومعه رسالة وجدت في ملابس الجثة اثناء فحصها .
فتح الضابط الرسالة ووجد المكتوب بها كالأتي ( قررت التخلص من حياتي بعد أن يئست من كل شيئ ) .
ضحك الضابط بصوت عالي وقال لزينة : واضح انك مكشوف عنك الحجاب يا دكتورة .
: ليه حضرتك بتقول كده ؟
: لقينا رسالة في ملابسها بتعترف فيها انها انتحرت .
: الله يرحمها ويسامحها .
: حضرتك تقدري تتفضلي دلوقتي لكن ابعتي مروان ابنك ناخد اقواله .
: ليه يا فندم مش خلاص عرفتوا انها انتحرت ؟
: وانتي قلقانه ليه كده ؟ ده مجرد اجراء شكلي مش اكتر .
: اصل ابني لسه صغير وعمره ما دخل قسم شرطة .
: ما انا قولتلك ابنك مش صغير وقولتلك متقلقيش يا دكتورة اتفضلي ابعتيه واطمني .
بمجرد ان خرجت دكتورة زينة لاحظ زوجها عاصم الارتباك الشديد عليها فسألها : مالك يا زينة ؟ في اي ؟
: طلب ابني مروان ياخد اقواله !!!
: ازاي ؟ ده انا عرفت من الضابط اللي دخل له من شوية انهم لقوا رسالة معها بتقول انها انتحرت يبقي عاوز مروان ليه ؟
: بيقولي اجراء شكلي مش اكتر .
: طيب اتفضلي يا هانم اتصلي بابنك خليه ييجي بسرعه .
اتصلت دكتورة زينة بمروان وبعد نص ساعة جاء مروان وكان واضح عليه التوتر والارتباك الشديد .
: في اي يا ماما ؟ هما عاوزني ليه ؟
: متخافش يا حبيبي هياخد اقوالك زي انا وبابا متخافش مفيش حاجة .
دخل مروان وبدأ الضابط النظر له بتمعن وتدقيق شديد مما زاد من توتره وارتباكه بشدة .
فسأله الضابط : مالك يا مروان اهدي شوية انت مرتبك كده ليه ؟
: اول مرة ادخل مكان زي ده .
: طيب عادي في ايه اهدي كده انت بقيت رجل دلوقتي والمفروض تكون اعصابك اقوي من كده علشان تقدر تتحمل مسئوليات الحياة اللي هتواجهك بعد كده .
: حاضر . حاضر يا فندم .
: ايه رأيك في شمس ؟
: رأيي من ناحية ايه ؟
: من ناحية كل حاجة .
: مش فاهم السؤال .
: يعني عاوز اعرف منك انت شايف شمس دي ازاي ؟
: شايفها ازاي يعني ايه ؟
: انت بتستهبل يلا .قولي رأيك في شمس ايه ؟
الحلقة ٢
: ايه رأيك في شمس ؟
: رأيي من ناحية ايه ؟
: من ناحية كل حاجة .
: مش فاهم السؤال .
: يعني عاوز اعرف منك انت شايف شمس دي ازاي ؟
: شايفها ازاي يعني ايه ؟
: انت بتستهبل يلا .قولي رأيك في شمس ايه ؟
: انا مش بركز معها اوي لكن اللي اعرفه ان ماما كانت بتعتمد عليها في كل حاجة في شغل البيت .
: تمام كده ، وايه كمان ؟
: كانت بتعمل الاكل حلو .
: وايه تاني يا مروان ؟
: بس كده .
: هو ده كل اللي تعرفه عنها يا مروان ؟
: ايوه ، دي خدامة المفروض اعرف عنها ايه تاني ؟
: يعني مثلا كان حلوة ولا لأ ؟ لطيفة معاك ولا لأ ؟
: اه هي كانت حلوه اوي وكل الناس كانوا عارفين انها اجمل واحده في العمارة والعمارات اللي جنبنا كمان .
: وواحده حلوه زي كده اكيد كان نفسك تقرب منها شوية .
: أأقرب منها ازاي يعني ؟
: زي اي شاب لما يحب يقرب من بنت حلوة ، مالك يا مروان ؟ انت عبيط بقي ولا بتستعبط ؟
: لا يا فندم . بس دي شغالة يعني معقول هبص لها !!
: طبعا معقول تبصلها ، ولازم تبص لها كمان !! هي بنت حلوة وانت شاب يبقي طبيعي انك هتبصلها .
: لكن انا مش بصيت لها ، في غلط في كده يعني ؟؟
: ماهو مش معقول يا مروان تبقي انت في سن المراهقة ومعاك خدامة جميلة بالشكل ده في البيت ومتبصلهاش !! ده حتي يبقي عيب في حقك ؟
: ااأاااأ
: اتكلم مالك يا مروان متخافش . اتكلم براحتك انا مش ابوك هعاقبك ، والقضية خلاص خلصت وعرفنا انها انتحرت . احنا دلوقتي اتنين شباب بيدردشوا شوية مع بعض ، قول من غير كسوف بصيت لشمس وكانت عجباك ؟؟ صح ؟؟
: انا بصراحة عمري ما بصيت لها ، هي صحيح جميلة بس مش استايل البنات اللي بيعجبني .
وهنا رن التليفون ، رد الضابط علي التليفون ثم تغيرت ملامحه فجأة وقال : معقول !!!!! تبقي مش انتحرت . بالشكل ده تبقي شمس اتقتلت مش انتحرت !!
شرد ذهن الضابط بعد مكالمة التليفون وظل يفكر وينظر لمروان وقاله : يعني شمس مش لفتت نظرك ابدا لانها مش الاستيل اللي بتحبه في البنات ؟؟؟
: ايوه حضرتك .
: طيب هي كان سلوكها كويس ولا كانت بتعرف شباب ؟
: معرفش .
: ازاي متعرفش وهي شغالة عندكم ؟ تعرف يا مروان ان اثناء فحص الجثة ظهر انها حامل ؟
زاد ارتباك وتوتر مروان وظل صامت في ذهول ولم يستطع النطق بكلمة .
نظر الضابط لمروان وقاله : هتفضل ساكت كتير ؟
: مش عارف اقول ايه ؟ معنديش حاجة اقولها لأني معرفش حاجة .
: طيب يا مروان اتفضل روح دلوقتي ونادي والدك من بره أسأله عن حاجة .
خرج مروان ودخل دكتور عاصم سريعا وقال : خير يا فندم ؟ مش حضرتك اخدت اقوالنا خلاص !!
: اه فعلا بس كنت عاوز اعرف اسم الشاب اللي شوفت شمس معاه في الاسانسير ؟
: اسمه عمرو شغال في شركة المقاولات اللي موجودة في نفس العمارة في الدور الثالث.
: شكرا يا دكتور عاصم ، تقدروا تتفضلوا دلوقتي .
: شكرا يا فندم ، انا شايف حضرتك بتكمل تحقيق رغم ان حضرتك بتقول انكم عرفتوا انها انتحرت !!!
: شمس كانت حامل معني كده انها اتقتلت والرسالة اللي كانت في ملابسها دي حطها القاتل علشان يضلل العدالة . اتفضلوا انتوا دلوقتي و لو احتاجتلكم هتصل بكم .
ذهبت قوة من الشرطة لمقر شركة المقاولات التي يعمل بها المدعو عمرو وتبين أن عمرو يعمل مهندس بالشركة و انه في اجازة مصيف منذ ثلاثة ايام !!
وتبين من التحريات بأن المهندس عمرو غير متزوج وهو متعدد العلاقات النسائية .
عاد عمرو سريعا من اجازته بمجرد علمه من احد اصدقاؤه بسؤال الشرطة عنه بسبب الحادث .
دخل عمرو الي ضابط التحقيق والذي بدأ بسؤاله ...
: اسمك وسنك وعنوانك وعملك ؟
: اسمي عمرو ٣٢ سنة مهندس مدني بشركة مقاولات .
: تعرف ايه عن شمس اللي بتشتغل عند دكتور عاصم ؟
: اعرف انها بتشتغل عند دكتور عاصم من اكتر من سنتين وانها بنت جميلة ودمها خفيف وكانت بتضحك وتهزر مع كل الناس .
: هل كنت مرتبط بها ارتباط عاطفي او ما شابه ؟
: لا طبعا انا وضعي الاجتماعي كمهندس مختلف عنها كتير ومش معقول لو فكرت في الارتباط اني افكر فيها .
: لكن دكتور عاصم قال انه شافكم في وضع مخل في الاسانسير !!
: وضع مخل !!!! لا لا مفيش الكلام ده ، انا كنت بتكلم معها عادي لأني كنت شايف انها بنت غلبانه وبصراحة بقه عرفت منها ان دكتور عاصم ده نفسه كان بيعاكسها كتير واتهجم عليها قبل كده .
: شمس قالتلك انه عمل كده امتي ؟
: ايوه يا فندم ، الكلام ده بعد لما اشتغلت عنده بشهرين .
: وتعرف هي ليه كملت شغل عنده لما شافته بيعاكسها وبيتهجم عليها .
: لأنها كانت بتاخد مرتب كويس عنده بتجهز به نفسها علشان تتجوز عاطف اللي كانت مرتبطة به بقصة حب من فترة طويلة .
: ومين عاطف ده كمان ؟
: معرفش عنه الا ان اسمه عاطف وانه تقريبا ابن خالها او ابن خالتها وشغال حداد وتقريبا اكبر منها ب ٣ او ٤ سنين . بس كده لكن عمري ما شوفته .
: اتضح ان شمس كانت حامل . تعرف كانت حامل من مين ؟
تغيرت ملامح المهندس عمرو وظهر عليه الارتباك والتوتر الشديد وقال : حامل !!! حامل ازاي ؟ لأ ، اول مرة اسمع الكلام ده من حضرتك .
: هل شمس كانت تربطها علاقات مشبوهة بأحد او بعض الرجال ؟
: لأ معتقدش انها تعمل كده . هي صحيح كانت بتتكلم مع اي حد لكن كلام عادي بعيد عن اي حاجة غلط .
: احب اعرفك يا بشمهندس عمرو لو ظهر انك بتكدب في اقوالك هيكون موقفك وحش اوي و دليل انك
الحلقة ٣
المهندس عمرو : لأ معتقدش انها تعمل كده ، هي صحيح كانت بتتكلم مع اي حد لكن كلام عادي بعيد عن اي حاجة غلط .
الضابط : احب اعرفك يا بشمهندس عمرو لو ظهر انك بتكدب في اقوالك هيكون موقفك وحش اوي و دليل انك لك يد في الجريمة !! لأخر مرة بسألك هل كان لك علاقة عاطفية او علاقة مشبوهة بشمس ؟؟
: لا يا فندم علاقتي بشمس مش تزيد عن الهزار والضحك وكانت احيانا بتحكيلي بعض مشاكلها وظروفها فكنت بساعدها مساعدات بسيطة علي قد امكانياتي . اكتر من كده مفيش .
: لكن معروف عنك يا بشمهندس انك متعدد العلاقات النسائية ، معقول مع جمالها المثير المعروف عنها وانك كمان كنت بتساعدها مفكرتش تتشاقي معها ؟؟!!
: يا فندم ده كلام واشاعات مش اكتر ، انا بحب الضحك والهزار مع الكل صحيح بهزر واضحك اكتر مع البنات والستات لكن ده مش معناه اني اوصل لعمل علاقات مشبوهة . ثم اني مش بفكر في النواحي العاطفية لحد لما احقق حلمي اني اعمل شركة مقاولات صغيرة كده ابدأ بها حياتي . يعني المواضيع دي مش في دماغي اصلا دلوقتي .
: تقدر تتفضل دلوقتي يا بشمهندس لكن هنحتاجك تاني في التحقيقات .
: تحت امرك يا فندم في اي وقت .
انصرف المهندس عمرو ثم قام فريق من الشرطة بعمل تحريات عن المدعو عاطف الذي ذكره المهندس عمرو بأنه مرتبط بالمجني عليها .
وبعد تحريات طويلة ظهرت مفاجأة غير متوقعة نهائيا !!
قادت التحريات بأن المجني عليها شمس كانت مرتبطة بابن خالتها عاطف منذ سنين طويلة وانه مات في حادث منذ اكثر من اربع سنوات !!! اي قبل عملها عند دكتور عاصم بحوالي سنتين .
كما تبين بأن شمس انهارت نفسيا بعد موت حبيبها واصيبت بمرض نفسي رفضت معه الاعتراف بموت حبيبها وكانت تتعايش وكأن حبيبها ما زال حي لفترة طويلة !!
حتي تم علاجها نفسيا وعادت للواقع ، ولكنها كانت ترفض الارتباط بأي شخص يتقدم لخطبتها !!!
حين علم الضابط بمرض القتيلة النفسي سابقا تجدد لديه احتمالية انتحارها مرة اخري .
ولكن فجأة دق الباب و دخل معاونه الضابط سليم قائلا : في بنت بره بتقول انها عارفة مين اللي قتل شمس .
رد رؤوف بك : خليها تدخل بسرعة .
دخلت بنت في بداية العشرينات واجلسها ثم سائلها ..
: اسمك وعمرك وعملك ؟
: اسمي نادية عندي ٢١ سنة وشغالة في نفس العمارة اللي كانت بتشتغل فيها شمس الله يرحمها .
: عندك معلومات عن الحادث ؟
: ايوه يا فندم ، اللي قتل شمس الواد مسعد الكهربائي .
: مين مسعد الكهربائي وعرفتي ازاي ان مسعد هو اللي قتل شمس ؟
: مسعد الكهربائي ده شغال في محل ادوات كهربائية جنب العمارة وكان بيعاكس شمس في الرايحة والجاية وهي كانت مش بتعبره ، وقبل اكتشاف جثة شمس بيوم اختفي مسعد ولما سألت عليه في المحل قالولي انه سافر عند اهله في البلد .
: وانتي تعرفي منين انه كان بيعاكسها وانها كانت مش متجاوبة معاه ؟
: شمس الله يرحمها كانت صحبتي ومش بتخبي عليا حاجة .
: حلو اوي ، انا هبعت اجيب مسعد الكهربائي ده حالا بس عاوزك تحكيلي كل حاجة عن المرحومة .
: حاضر يا فندم .
: اول حاجة عايز اعرف علاقتها بالناس اللي كانت بتشتغل عندهم ؟
: في الاول علاقتها بيهم كانت كويسة لكن بعد كده دكتور عاصم كان بيبصلها وفي مرة اتهجم عليها لكن هي كانت بنت بميت رجل وعرفت تصده وتوقفه عند حده ، لكن الهانم بقي في الاول كانت بتعطف عليها لكنها بعد كده كانت بتعاملها وحش لما حسيت ان جوزها بيبصلها وعينه منها ، حتي الواد ابنهم اللي اسمه مروان كان عينه منها وبيعاكسها اصلها الله يرحمها كانت حلوة اوي وكل اللي يشوفها بيكون عينه منها ، لكن هي كانت جدعة ومش بتعبر حد .
: وهي مش مشيت من عندهم ليه لما الدكتور وابنه كانوا عينهم منها والدكتورة كمان كانت بتعاملها وحش ؟ الطبيعي انها كانت تدور علي شغل عند ناس تانيين وتسيبهم وتمشي !!!
: هي كانت فعلا بتدور علي شغل تاني في الفترة الاخيرة لما زهقت من معاملة الدكتور واسرته لها .
: مين تاني كان بيعاكسها او عينه منها غير مسعد الكهربائي وغير دكتور عاصم وابنه مروان ؟
: بشمهندس عمرو اللي في الشركة بردو كان بيعاكسها ؟
: المهندس عمرو ده اللي معروف عنه انه بتاع بنات ، صح ؟؟
: ايوه هو ده يا بيه .
: وليه قولتي ان مسعد الكهربائي هو اللي قتلها ؟ ما يمكن مهندس عمرو هو اللي قتلها ولا دكتور عاصم ولا حد من عيلته !!
: لأ البشمهندس عمرو صحيح عينه زايغة وبتاع بنات وكان بيعاكسها لكنه مش ممكن يعمل كده ، انما مسعد ده منه لله هو اللي قتلها .
: وانتي متأكد ليه كده ان مسعد هو اللي قتلها ؟
: لأنه غدار والغدر في دمه .
: عرفتي ازاي انه غدار والغدر في دمه ؟
: علشان كنت بحبه وسبني و بص لشمس .
: لا استنيني بقي . يعني انتي بتحبي مسعد وهو سابك وراح بص لشمس ؟
: ايوه .
: طيب ما يمكن انتي اللي قتلتيها بدافع الغيرة وجاية تعملي بلاغ وتتهميه علشان تبعدي الجريمة عن نفسك ؟ ويمكن بتتهمي مسعد بدافع الانتقام منه علشان سابك ؟
الحلقة ٤
: لا استنيني بقي . يعني انتي بتحبي مسعد وهو سابك وراح بص لشمس ؟
: ايوه يا بيه .
: طيب ما يمكن انتي اللي قتلتيها بدافع الغيرة وجاية تعملي بلاغ وتتهميه علشان تبعدي الجريمة عن نفسك ؟ اويمكن بتتهمي مسعد بدافع الانتقام منه علشان سابك ؟
: انا اغير من شمس مستحيل دي شمس دي كانت اختي واقرب حد ليا . وبعدين هغير منها ليه وهي كانت مش بتعبره ولا بتديله وش . لا يا فندم . مسعد هو اللي قتلها ، انا متأكدة .
: طيب اذا كانت شمس كانت مش بتعبر مسعد ولا متجاوبه مع المهندس عمرو ولا دكتور عاصم ولا ابنه مروان ، كانت بتحب مين ؟
: من ساعة لما عاطف خطيبها مات محبتش حد بعده ، هو كان اول واخر حب في حياتها .
: اومال هي كانت حامل من مين ؟
: حامل !! لا لا قطع لسان اللي يقول عليها كده ، شمس كانت شريفة وعمرها ما تعمل كده ابدا .
: هي دي الحقيقة ،الطب الشرعي اثبت انها كانت حامل في اربع شهور وقت وفاتها .
: هي فعلا كانت بتشتكي من تعب في بطنها الفترة الاخيرة لكن لا لا لا مستحيل شمس تعمل كده .
: تفتكري شمس تكون انتحرت ؟
: لا يا بيه مستحيل ، شمس عمرها ما فكرت في الانتحار ولا ممكن تفكر في الانتحار ، انا بقولك اللي قتلها الواد مسعد الكهربائي .
: بصي انتي تقدري تتفضلي تمشي دلوقتي لكن اعملي حسابك هنبعتلك تاني علشان نكمل التحقيق .
: حاضر يا فندم .
جلس رؤوف بك في حيرة يفكر في هذه القضية الغامضة المعقدة ثم قرر ان يستعين بمعاونه الضابط سليم وقال له ......
: انا عاوزك معايا يا سليم في قضية البنت شمس الشغالة دي .
: انا معاك يا فندم في اي حاجة ، هي قضية البنت دي معقدة للدرجادي ؟
: القضية فيها ملابسات كتير ومش واضح اذا كانت ماتت منتحرة ولا اتقتلت ده غير ان واضح ان البنت كانت لها علاقات كتير ومتشابكة وده مخلي القضية معقدة .
: حضرتك قدها يا فندم ياما كان في قضايا اصعب من كده بكتير وحضرتك قدرت توصل للجاني بكل سهولة .
: لكن انا بردو محتاجلك معايا في القضية دي .
: انا تحت امرك يا فندم .
: اول حاجة يا سليم عاوزك تجيب مسعد الكهربائي علشان نشوف موضوعه ايه ده كمان وبعدين تقعد معايا نراجع اقوالهم كلهم .
: تمام يا فندم و اكيد عايزين التقرير النهائي للطب الشرعي .
وبعد عودة مسعد الكهربائي من قريته تم احضاره الي القسم لأخذ اقواله ....
: اسمك وعمرك وعملك ؟
: اسمي مسعد ٢٩ سنة شغال في محل ادوات كهربائية .
: تعرف ايه عن شمس الشغالة اللي عند دكتور عاصم ؟
: اعرف انها بنت حلال وغلبانه .
: مين اللي قتلها ؟
: معرفش ، انا معرفتش انها اتقتلت الا لما رجعت من البلد .
: سافرت بلدك ليه في التوقيت ده تحديدا ؟
: انا متعود كل شهر اسافر البلد اشوف اهلي واقعد معاهم كام يوم وارجع .
: علاقتك ايه بشمس ؟
: مفيش اكتر من صباح الخير صباح النور واحيانا كنت بطلع عندهم لما يكون عندهم شغل في الكهربا .
: كنت بتعاكسها ليه باستمرار ؟
: مش معاكسة انا كنت عاوز اتجوزها وعرضت عليها الجواز اكتر من مرة .
: وهي كانت بترفض ؟
: ايوه .
: وطلعت عندهم الاسبوع اللي فات تعمل شغل ودكتور عاصم وعيلته في المصيف ؟
ارتبك مسعد وقال : لا لا مطلعتش .
: تعرف نادية الشغالة في نفس العمارة ؟
: ايوه اعرفها .
: تعرف ايه عنها ؟
: عيلة غلبانه بس مجنونه ودماغها ضاربة شوية .
: مجنونة ازاي يا مسعد ؟
: كل اللي في دماغها الجواز ، ومفيش قدامها غيري ، كل شوية تقولي اتجوزني اتجوزني .
: وهي كده تبقي مجنونة !! يمكن بتقولك كده علشان بتحبك .
: انا قولتلها كتير اني بحب شمس ومش بحبها .
: تفتكر تكون هي اللي قتلت شمس بدافع الغيرة منها عليك ؟
: معرفش يابيه ، لكن معتقدش انها تعمل كده دي بت غلبانه وكانت بتحب شمس اوي وكانوا قريبين من بعض اوي زي الاخوات .
: ولما شمس رفضتك اكتر من مرة مفكرتش تنتقم منها ؟
: انا انتقم منها !! ازاي وانا بحبها ، اللي يحب يا فندم عمره ما يكره ولا يفكر في الانتقام .
: اخر مرة طلعت تعمل شغل في شقة دكتور عاصم كان امتي ؟
: من فترة طويلة يمكن اكتر من ٦ شهور وزيادة .
: شمس كانت بترفض الجواز منك ليه يا مسعد ؟
: كانت بتقولي انها مخطوبة لعاطف ابن خالتها ، بس انا كنت سامع ان ابن خالتها ده مات من فترة طويلة ، بصراحة معرفش عاطف ابن خالتها ده عايش ولا مات .
: هل شمس كان لها علاقات مشبوهة بأحد او بعض الرجال ؟
: لا لا البت دي كانت شريفة ومحترمة ، وانا لما شوفتها محترمة واخلاقها كويسة فكرت اتجوزها .
: اومال هي كانت حامل من مين ؟
: حامل !!! لا لا مستحيل !!!
: هي دي الحقيقة شمس كانت حامل قبل ما تتقتل .
: لا انا مش ممكن اصدق .
: تقرير الطبيب الشرعي اثبت انها كانت حامل يا مسعد في اربع شهور .
: انا اول مرة اعرف كده وبصراحة مش مصدق انها ممكن تعمل كده .شمس تعمل كده !! لا مستحيل .
: تقدر تمشي دلوقتي يا مسعد وبلاش تسافر بلدك دلوقتي علشان هنحتاج نستكمل اقوالك تاني .
: حاضر يا فندم .
جلس الضابط رؤوف مع معاونه سليم و قاما باعادة قراءة اقوالهم جميعا ثم اخذ رؤوف نفس عميق و قال : ايه رأيك يا سليم ؟ تفتكر مين القاتل ؟ ولا البنت تكون انتحرت ؟
: بصراحة يا فندم لحد دلوقتي مش واضح ، قضية غريبة فعلا لكن الاغرب ان مفيش حد من اهل البنت ظهر لحد دلوقتي ولا حتي علشان يستلم الجثة ويدفنها .
: البنت ملهاش حد امها ماتت وهي صغيرة و ابوها مات من خمس سنين وملهاش اخوات مفيش الا مرات ابوها ولما روحنا العنوان اللي موجود في بطاقة القتيلة عرفنا انها مشيت من فترة طويلة ومحدش يعرف طريقها .
: وبعدين يا فندم ؟ احنا لازم نوصل لحد من اهلها اكيد اقوال اي حد مزهم ممكن تفيدنا في القضية .
: هات صاحبتها نادية تاني ممكن تكون تعرف مكان حد من اهلها .
جاءت نادية والحزن والألم واضحان عليها بشدة ثم جلست ....
: انتي قولتي يا نادية ان شمس كانت صحبتك واكتر من اختك صح ؟
: ايوه .
: تعرفي حد من قرايبها ؟
: شمس كانت مقطوعة من شجرة وملهاش حد وده كان مطمع الناس فيها بس هي كانت جدعة وبمليون رجل ومش ممكن تكون حامل ابدا .
: يعني مفيش حد كان بيسأل عليها ولا هي كانت بتزور حد من قرايبها ؟
: بقول لحضرتك كانت مقطوعة من شجرة ، مفيش الا مرات ابوها اللي جتلها مرتين تزورها علشان كانت عاوزة تجوزها لأخوها .
الحلقة ٥
جاءت نادية والحزن والألم واضحان عليها بشدة ثم جلست ....
: انتي قولتي يا نادية ان شمس كانت صحبتك واكتر من اختك صح ؟
: ايوه .
: تعرفي حد من قرايبها ؟
: شمس كانت مقطوعة من شجرة وملهاش حد وده كان مطمع الناس فيها بس هي كانت جدعة وبمليون رجل ومش ممكن تكون حامل ابدا .
: يعني مفيش حد كان بيسأل عليها ولا هي كانت بتزور حد من قرايبها ؟
: بقول لحضرتك كانت مقطوعة من شجرة ، مفيش الا مرات ابوها اللي جتلها مرتين تزورها علشان كانت عاوزة تجوزها لأخوها شعبان .
: اخوها ده كان معاها ؟
: ايوه في المرتين ، لما شافها اول مرة كان هيموت عليها وحبها اوي لكن هي رفضته لأنها كانت مش بتحب مرات ابوها .
: كان امتي لما مرات ابوها واخوها كانوا عندها ؟
: الكلام ده من ٣ او ٤ شهور تقريبا .
: تعرفي عنوان مرات ابوها ؟
: ايوه ، هي اعطتني عنوانها قبل ما تمشي اخر مرة وقالتلي لو قدرتي تقنعيها انها تتجوز اخوها هتديني فلوس كتير .
: تفتكري ممكن يكون لمرات ابوها او اخوها يد في قتلها ؟
: لا . مسعد الكهربائي هو اللي قتلها .
ضحك الضابط وقال : ولو مش مسعد اللي قتلها ممكن مرات ابوها او شعبان اخوها لهم يد في قتلها ؟
: اه ممكن دول ناس كلهم شر وياما عذبوا المرحومة .
: قولي لي عنوان مرات ابوها بسرعة .
اخذ الضابط سليم العنوان و جاء بعد ساعة واحدة ومعه مرات ابو شمس واخيها شعبان .
بدأ التحقيق مع شعبان الذي وضح عليه معالم الاجرام .
: اسمك وعمرك وعملك ؟
: اسمي شعبان عندي ٣٤ سنة علي باب الله .
: يعني ايه علي باب الله ؟ شغال ايه ؟
: علي باب الله مليش شغل .
: انت ليك سوابق ؟
: ايوه يا بيه لسه خارج من عشر سنين سجن .
: كنت مسجون في ايه ؟
: مخدرات .
: والمرة دي هتدخل السجن في قتل .
: قتل ايه يا بيه انا برئ والله ما قتلت حد .
: انت اللي قتتلها اعترف بالذوق كده علشان مش عايز استخدم معاك اسلوب تاني مش هيعجبك .
: قتلت مين يا بيه انا والله ما اعرف انتوا جايبني هنا ليه .
: قتلت شمس بنت جوز اختك .
: هي شمس ماتت !!! يا وقعة سودة يا ولاد !! بقي البت اللي زي الملاك دي تتقتل !!
: انت هتمثل يلا وهتعمل الشويتين دول علينا ؟
: والله يا بيه ما اعرف حاجة عن الموضوع ده الا من سيادتك دلوقتي .
: يعني مش انت اللي قتلتها ؟
: يا بيه انا كنت محبوس في خناقة بقالي اكتر من اسبوعين ولسه خارج اول امبارح معرفش حاجة .
: انت بتحور عليا يا شعبان ؟؟؟
: يا بيه حضرتك ممكن تسأل زمايلك اللي في القسم عندنا وتتأكد بنفسك .
: هنأكد يا شعبان بس لو طلعت بتكدب فيها اعدام يا شعبان .
: حاضر يا بيه ، لو كنت بكدب اشنقوني .
ثم بدأ التحقيق مع زوجة الاب .....
: اسمك وعمرك وعملك ؟
: اسمي نعيمة عندي ٥٨ سنة مبشتغلش يا بيه .
: تعرفي ايه عن القتيلة ؟
: قتيلة مين يا بيه ؟
: شمس بنت جوزك .
: شمس ماتت !! يا ضنايا يا بنتي .
: يعني زعلانة علي موتها يا نعيمة ؟
: ايوة يا بيه طبعا دا انا اللي مربياها .
: ومنين الحنية دي يا نعيمة ؟ ده اللي اعرفه انك كنتي معذباها ؟
: يابيه العشرة متهونش الا علي ولاد الحرام . صحيح يمكن اكون قسيت عليها شوية زي اي ام مع ولادها ، لكن انا اللي مربياها و في عشرة بينا .
: كونتي عاوزة تجوزيها لأخوكي شعبان ليه يا نعيمة ؟
: زي اي حد لما يتجوز يا بيه . البت كانت حلوة وكنت عاوزة اخدها لاخويا .
: ولما رفضت قتلتيها صح ؟
: لا والله يا بيه ما اعرف حاجة عن الموضوع ده الا من سيادتك دلوقتي .
: يعني مش انتي اللي قتليتيها ؟
: يا بيه انا مش اقدر ادبح فرخة هقتل انسانة وكمان انا اللي مربياها !!
: لو طلعتي بتكدبي يا نعمة هتتشنقي .
: يا بيه لو بكدب اشنقوني . وانا هقتلها علشان رفضت اخويا !! ما ترفض ولا تتجوز انا هستفاد ايه من جوازهم !! انا عرضت عليها الجواز لاخويا زي اي حد رفضت او قبلت بقي مش يستدعي اني اقتلها .
: ماشي يا نعيمه هنشوف اذا كنتي بتكدبي ولا لأ ، تقدري تمشي تروحي دلوقتي .
وبعد انصراف زوجة الاب نظر رؤوف لسليم وضحك وقاله : ايه رأيك يا حضرة الضابط ؟ تفتكر البنت انتحرت ولا اتقتلت ؟ ومين اللي قتلها ؟ عندك ٦ رجالة ( دكتور عاصم وابنه مروان والمهندس عمرو ومسعد الكهربائي وعاطف ابن خالتها وشعبان اخو مرات ابوها ) .
: ايوه وفي معاهم ٣ ستات ( الدكتورة زينة ونادية صحبتها ونعيمة مرات ابوها ) بس انا مندهش ان سيادتك مش اتحفظت ولا علي اي حد منهم علي ذمة التحقيق ؟
: مفيش حد عليه دليل علشان اتحفظ عليه واحبسه .
: وبعدين يا فندم حضرتك شايف ايه ؟
: انت شاكك في مين يكون القاتل ؟
: بصراحة شاكك فيهم كلهم لكن نسبة الشك عندي اكبر في تلاته .
: مين هما ؟
: عاصم اللي بتشتغل عنده ونادية صحبتها ومسعد الكهربائي .
: انا بردو تقريبا نفس رأيك بس بضيف لهم زينة مرات عاصم .
: وهنعمل ايه دلوقتي ؟
: عايزين تقرير الطب الشرعي ونركز التحريات حول الاربعة ونعيد سؤالهم مرة تانية .
: تمام يا فندم . وانا هحاول اجيب تقرير الطب الشرعي النهاردة .
وبعد عدة ساعات جاء الضابط سليم ومعه تقرير الطب الشرعي .
: عملت ايه يا سليم ؟ جبت التقرير ؟
: ايوه يا فندم . التقرير بيقول ان شمس ماتت بالخنق من الخلف وانها تعرضت لمحاولة اجهاض قبل الوفاة مباشرة .
: كده يا سلبم اتأكدنا ان البنت دي اتقتلت وان اللي قتلها كان بيحاول يجهضها قبل قتلها علشان يتهرب من مسئولية حملها . يبقي هنستبعد الشك في زينة مرات الدكتور ونادية صحبتها ونركز اكتر مع دكتور عاصم ومسعد الكهربائي .
: تمام يا فندم لكن احنا هنستبعدهم مؤقتا بس الي ان يجد جديد .
: صح يا سليم انت كده فهمتني كويس .
: وهنبدأ مع مين يا فندم دكتور عاصم ولا مسعد الكهربائي .
: الاتنين ، ابعت هاتلي الاتنين حالا .
وبعد اقل من ساعتين وصل دكتور عاصم ومعه زوجته دكتورة زينة ، وعندما دخلا الي الضابط رؤوف قال لهم .....
: ايه اللي جاب المدام يا دكتور انا طلبتك انت بس ؟
: زينة مراتي قلقت لما حضرتك طلبتني علشان كده جات معايا .
: طيب اتفضلي يا مدام انتظريه بره .
خرجت مدام زينة بعد ان سألت الضابط : هي مش القضية اتقفلت والبنت طلعت انها انتحرت !! ايه لزمتها بقي انكم تقلقونا ؟ كفاية تعب الاعصاب اللي احنا فيه وشقتنا اللي خايفين نعيش فيها بعد الحادثة !!
: انا مقدر طبعا كلامك لكن شمس اتأكدنا انها اتقتلت مش انتحرت علشان كده هنكمل شغلنا .
خرجت مدام زينة ثم وجهه رؤوف كلامه الي عاصم .....
: انا خرجت المدام بره علشان الكلام اللي هقوله مش هينفع اقوله قدامها ؟
: كلام ايه حضرتك ؟
: واضح يا دكتور انك شقي اوي .
: نعم !!! حضرتك بتقول ايه ؟
: بقول ان انا عرفت انك كنت بتعاكس شمس كتير وانك اتهجمت عليها اكتر من مرة .
: لا الكلام ده كدب ، مين اللي قال لحضرتك كده ؟
: لأ الكلام مش كدب الكلام ده حصل فعلا
الحلقة ٦
خرجت مدام زينة ثم وجهه رؤوف كلامه الي عاصم .....
: انا خرجت المدام بره علشان الكلام اللي هقوله مش هينفع اقوله قدامها ؟
: كلام ايه حضرتك ؟
: واضح يا دكتور انك شقي اوي .
: نعم !!! حضرتك بتقول ايه ؟
: بقول ان انا عرفت انك كنت بتعاكس شمس كتير وانك اتهجمت عليها اكتر من مرة .
: لا الكلام ده كدب ، مين اللي قال لحضرتك كده ؟
: لأ الكلام مش كدب الكلام ده حصل فعلا ، عاوز اعرف بقي شقاوتك معاها وصلت لحد فين يا دكتور ؟
: لا يا فندم الكلام ده محصلش .
: بقولك حصل وانا متأكد ، انكارك ده مش هيكون في مصلحتك ابدا بالعكس ده هيثبت انك عاوز تداري علي حاجة كبيرة .
سكت عاصم لفترة قصيرة ثم قال : زي اي رجل لما بيشوف بنت حلوة ويعجب بها مش اكتر وانا فعلا عاكستها اول ما جت تشتغل عندنا لكن لما لقيتها شريفة وكويسة بعدت عنها ومفكرتش فيها تاني .
: اومال ليه تسوء سمعتها وتقول انها كانت بتعرف رجالة ؟
: لا يا فندم حضرتك فاهم غلط ، معاكستي لها كانت في البداية وكانت هي فعلا وقتها كويسة لكن في الفترة الاخيرة عرفت انها بتكلم رجالة فعلا .
: واكيد طبعا حاولت معاها تاني صح ؟؟
: لأ . كان اعجابي بيها انتهي وكنت خلاص اخدت علي وجودها في البيت علشان كده مفكرتش فيها تاني ، لكن فكرت امشيها علشان سمعتنا .
: انت قولت انك شوفت شمس مع المهندس عمرو في وضع مخل في الاسانسير ؟
: ايوه يا فندم الكلام ده حصل فعلا لكن هما مش شافوني وقتها ولما قولت للمدام قررنا اننا نشوف شغالة تانية غيرها .
: خطك حلو يا دكتور ؟
: ايه السؤال الغريب ده ؟
: عاوزك تكتبلي الجملة دي في ورقة .
: جملة ايه ؟
: الجملة اللي كانت في الرسالة اللي لقيناها في ملابس القتيلة .
: حاضر يا فندم هات قلم وورقة .
: اتفضل ، يا ريت بعد ما تكتب دخل المدام هسألها عن حاجة .
خرج عاصم ووضح عليه التوتر وكان بالخارج مدام زينة في انتظاره وعلي الجانب الاخر وقف مسعد الكهربائي في الانتظار .
وقبل دخول مدام زينة جاء الضابط سليم وقال للضابط رؤوف ...
: علفكرة يا فندم عاطف ابن خالة شمس مات فعلا من ٤ سنين .
: انا كنت متوقع كده لكن كان لازم نتأكد .
دخلت مدام زينة للضابط رؤوف وطلب منها كتابة نفس الجملة . فقالت له : حضرتك شايف ايدي مربوطة يا فندم .
: سلامتك يا دكتورة ، ايدك مالها ؟
: وقعت عليها واحنا في المصيف .
: الف سلامة عليكي ، معلش حاولي تكتبي الجملة براحتك .
وبعد ان كتبتها قالت للضابط : علفكرة انا كنت نسيت اقول لحضرتك حاجة حصلت .
: خير يا دكتورة ، اتفضلي انا سامعك .
: بعد ما روحنا المصيف بيومين شمس اتصلت عليا وقالتلي ان الكهربا في المطبخ مش شغالة و استأذنتني انها تطلع مسعد الكهربائي اللي واقف بره علشان يصلحها .
: وانتي وافقتي ؟
: ايوه .
: ومخوفتيش من دخول رجل غريب بيتك وانتوا مش موجودين !! خصوصا انك مش بتثقي في سلوك شمس ؟
: انا وافقت بحسن نية . ومش في دماغي ان يكون بينها وبينه حاجة .
: طيب تقدري تتفضلي دلوقتي .
خرجت مدام زينة وانصرفت مع زوجها عاصم بينما دخل مسعد الكهربائي الي غرفة الضابط .
: اقعد يا مسعد .
: شكرا يا فندم .
: مش قولتلك يا مسعد لو بتكدب عليا يبقي لك يد في الجريمة ؟
: وانا مش كدبت ابدا في كلامي مع سعادتك .
: لأ ، كدبت يا مسعد ، لما سألتك اخر مرة طلعت تعمل شغل كهربا في شقة دكتور عاصم امتي رديت وقولت من اكتر من ست شهور .
: ايوه يا فندم ويمكن اكتر من كده كمان .
: لا يا مسعد انت طلعت تعمل شغل عند الدكتور بعد ما راح مع اسرته المصيف بيومين وده تقريبا توقيت تنفيذ الجريمة وتاني يوم علطول انت سافرت بلدك .
: لا يا فندم محصلش اني طلعت الشقة دي خالص الفترة دي .
: بلاش انكار ، الانكار مش هيفيدك ، كده التهمة ثابتة عليك ، قول كل اللي حصل بالظبط وانا اوعدك هساعدك واخلي موقفك كويس في القضية وتاخد اقل حكم .
: يا فندم والله ما حصل .
: بردو مصمم علي الانكار ، بعندك ده هتودي نفسك في داهية وهتاخد اعدام ، قول الحقيقة كلها لمصلحتك .
: يا فندم محصلش ولا طلعت الشقة دي ابدا من اكتر من ست شهور .
: في شهود انك طلعت الشقة في الوقت ده وسفرك تاني يوم بيثبت عليك الجريمة .
: والله ما حصل ، لو حصل هقول بعد ما وعدتني تساعدني ، لكن اقسم بالله ما حصل .
: كان في علاقة بينك وبينها ولما حصل حمل خوفت ان سركم يتعرف فقتلتها ، صح ؟ اعترف احسن لك .
: اعمل ايه يا فندم علشان تصدق اني برئ ؟
: طيب يا مسعد انت محبوس معانا هنا علي ذمة التحقيق ، فكر كويس واوعدك لو اعترفت بكل اللي حصل هساعدك زي ما قولتلك انما لو عاندت هيكون موقفك سيئ جدا واكيد هيكون مصيرك الاعدام .
وفي اليوم التالي وبعد السؤال عن مسعد في محل عمله أتي الضابط رؤوف بمسعد من محبسه وقال له : تحرياتنا اثبتت انك في يوم الخادث اخدت شنطة العدة بتاعتك اللي بتستخدمها في شغلك ومشيت بدري من المحل وبعدها اختفيت وفي اليوم التاني سافرت بلدك ومش رجعت الا لما عرفت اننا سألنا عنك ، لسه مصمم تودي نفسك في داهية وتنكر ولا هتعترف علشان نساعدك وتحسن موقفك في القضية ؟
: يا بيه انا مشيت بدري في اليوم ده علشان اشتري شوية طلبات لأهلي في البلد كانوا موصيني عليها المرة اللي فاتت ، واخدت شنطة العدة معايا علشان لما بسيبها في المحل واسافر برجع الاقيها ناقصة وبيتسرق منها حاجات من اللي بشتغل بيها .
: يعني مصمم علي الانكار يا مسعد ومش عاوزنا نساعدك ؟
: يا بيه هي دي الحقيقة .
: للاسف يا مسعد كنت عاوز اساعدك والادلة كلها ضدك انا مضطر احولك علي النيابة واعتقد كده القضية ثبتت عليك .
تم تحويل مسعد للنيابة التي واصلت معه التحقيق وكانت كل الأدلة ضده ، ورغم انكار مسعد المستمر ارتكابه الجريمة الا انه لم يستطع اثبات كلامه فتم تحويل القضية الي المحكمة .
انتشر خبر ثبوت جريمة قتل مسعد لشمس في الحي وتعجب الجميع من قتل مسعد لها رغم حبه لها الذي كان يعلمه الكثيرين .
وعلم الجميع بحمل شمس قبل قتلها مما جعل كل المختلطين بها محل شبهة اخلاقية .
حتي ان اصحاب المنزل التي تعمل به نادية صديقتها المقربة قرروا طرد نادية من العمل لديهم .
وعندما حاولت نادية الدفاع عن نفسها اتهمها اصحاب المنزل بأن اخلاقها وسلوكها محل شبهة بسبب صداقتها لشمس .
خرجت نادية بعد ان جمعت كل ملابسها ومقتنياتها ودموعها تسيل علي وجهها من شدة ما تعاني .
صدمات مجتمعة من صديقتها التي قتلت وساءت سمعتها بعد موتها ولعنة صداقتها لها والتي اصابتها وجعلتها تفقد مصدر عيشها وايضا حبيبها الذي ينتظر تنفيذ حكم الاعدام .
شعرت بأن الدنيا معتمة شديدة السواد امامها ولم تستطيع ايقاف دموعهاحتي وصلت الي باب العمارة حتي رأها عبده ابن همام البواب .
تعجب عبده من بكاء نادية فسألها عن السبب ....
: بتعيطي ليه يا نادية مالك في حد مزعلك ؟
: اصحاب الشقة طردوني وانا خلاص ماشية ومش عارفة هعمل ايه .
: اللي قطع رزقك من هنا هيوصل رزقك في حته تانية .
: ونعم بالله ، بس انا يا عبده الدنيا كلها ضلمت في وشي مرة واحدة ، اطردت من شغلي و صحبتي ماتت حتي مسعد اللي بحبه هيتعدم .
ضحك عبده وقالها : خلاص حبيني انا وخلاص .
ابتسمت نادية رغم دموعها وقالت : انت لسه صغير يا عبده .
: لأ انا مش صغير انا عندي ١٥ سنة .
: بكره هتكبر وتلاقي عروسة زي الفل انما انا سبني في حالي ، مش عارفه اعمل ايه دلوقتي ، لو كانت شمس الله يرحمها عايشة يمكن كانت وقفت جنبي .
:كلمي الدكتورة زينة اللي كانت بتشتغل عندها شمس يمكن تشغلك مكانها . دول من ساعة موت شمس مفيش ولا واحدة راضية تشتغل عندهم .
: مش هينفع يا عبده .
: كلميها بس انا عارف هي اكيد عاوزة حد يشتغل عندها مكان شمس اصلها مشغوله علطول ، ده حتي لما راحت مع جوزها وولادها المصيف رجعت بعدها بيومين بالليل وطلعت الشقة اخدت حاجات ونزلت سافرت تاني بالليل علطول .
: رجعت بالليل ؟ !!
الحلق ٧ ( الأخيرة )
: رجعت بالليل ؟ !!
: ايوه تقريبا كانت ناسية حاجات علشان علطول مشغولة رجعت اخدتها وسافرت تاني .
: وكانت لوحدها يا عبده ؟
: لأ ، كان معاها دكتور عاصم .
: وطلع ونزل معاها ؟
: ايوه يا نادية طلعوا مع بعض ونزلوا مع بعض ومشيوا مع بعض .
: ومقولتش ليه يا عبده كل ده ؟!! سايب المسكين في السجن بقاله ٥ شهور وخلاص قرب يتعدم .
: اقول ايه انا مش فاهم حاجة .
: انت تيجي معايا دلوقتي حالا .
: هنروح قين ؟
: تعالي بس وكل الكلام اللي قولته ده تقوله للظابط . انت ربنا جعلك سبب ننقذ بيه مسعد .
اخدت نادية عبده وذهبت لقسم الشرطة و حكي عبده كل ما رأه للضابط .
رد الضابط منفعلا : وساكتين كل ده !!! ده مسعد اتعدم النهارده .
صرخت نادية واجهشت بالكاء والعويل .
رفع الضابط رؤوف التليفون واتصل بالسجن ليستعلم عن تنفيذ حكم الاعدام في مسعد . ثم قال : الحمد لله . اوقفوا تنفيذ الحكم حالا . في مستجدات في القضية .
ابتسمت نادية ثم ظلت تردد) الحمد لله ) .
قال الضابط : انتوا لازم تيجوا معايا حالا النيابة علشان تشهد يا عبده باللي انت شوفته وبعدين نكمل اجراءات وقف تنفيذ حكم الاعدام وفتح التحقيق في القضية مرة تانية .
وفي النيابة تم ايقاف تنفيذ الحكم و اعادة مسعد الي محبسه مؤقتا وفتح التحقيق في القضية من جديد واصدار ضبط واحضار للدكتور عاصم وزوجته زينة .
وفي قسم الشرطة وبعد مواجهة زينة بشهادة عبده ابن البواب عليها وعلي زوجها بدأت زينة في سرد ما حدث بالتفصيل .......
: انا هتكلم واقول لحضرتك علي كل حاجة بالتفصيل .....
انا اتجوزت عاصم عن حب من ٢١ سنة ومن وقتها وهو عمره ما بص لواحده غيري لحد ما هي جت تشتغل عندنا . كانت اول مرة اجيب شغالة لما حسيت اني تعبت من شغل البيت مع شغلي في العيادة والمستشفي ده غير ان ظروفنا المادية اتحسنت كتير .
اول ما عاصم شافها شفت في عينيه نظرة اعجاب شديد لها وبقيت عينيه عليها طول الوقت .
ورغم اني نبهته اكتر من مرة الا انه كان بيحاول يداري اعجابه بيها قدامي لكن عينيه كانت بتفضحه . لحد ما زهقت وقولتله اننا لازم نمشيها .
عاصم رفض يمشيها وقالي لو مشيت مش هيجيب واحدة غيرها ووعدني انه مش هيبصلها تاني .
وفعلا من ساعتها لاحظت ان اهتمامه بيها انتهي . وانا اطمنت ومشيت الحياة طبيعية لفترة طويلة وبعدين من فترة رجعت من الشغل بدري لقيت مروان ابني واقف معاها في المطبخ وبيعاكسها وهي بتصده وبتمنعه .
اخدت مروان في اوضته وضربته وهددته اني هقول لباباه ، لكن هو وعدني انه مش هيعمل كده تاني وفعلا داريت عليه ومش قولت لعاصم .
بعدها دخلت المطبخ وضربت شمس بالقلم وقولتلها تلم حاجتها وتمشي . قعدت تبكي و قالتلي ان مروان هو اللي كان بيعاكسها وهي بتمنعه وده حصل اكتر من مرة وكانت مش بتتكلم علشان مش تسبب مشكلة ويتقطع عيشها .
بكت كتير واترجتني اني اسيبها تشتغل ومش امشيها لأن ملهاش مكان تروح فيه .
صعبت عليا وحسيت انها ملهاش ذنب وسيبتها تشتغل .
بعدها كانت كل شوية ايام تستأذن مني بحجة انها هتروح تزور حد من قرايبها ، في الاول مش اهتميت لكن لما الموضوع ده اتكرر كتير شكيت فيها وقررت اراقبها .
ولما راقبتها كانت الصدمة لما شوفتها بتقابل عاصم وبيطلعوا عمارة مع بعض ، كنت هموت من الغيرة وطلعت علشان اواجههم لكن مقدرتش ونزلت تاني وروحت البيت وفضلت افكر اتصرف ازاي بعد ما عرفت خيانته ليا ومع مين ؟ مع الشغالة بتاعتي !! كان في حرب جوايا بين كرامتي اللي انجرحت وبين حبي لعاصم وفي النهاية طلبت من عاصم الطلاق ......
: عاصم .
: نعم يا حبيبتي .
: طلقني .
: بتقولي ايه ؟
: بقولك طلقني حالا .
: انتي اتجننتي ؟!!!
: طلقني علشان متجننش بجد .
: مالك يا حبيبتي في ايه ؟
: مفيش ، عايزة اتطلق .
: لأ مش هطلقك .
: لأ هطلقني ودلوقتي حالا .
: انتي اكيد اتجننتي ، طيب قوليلي عايزة تطلقي ليه وانا اطلقك .
: علشان شوفتك وانت بتخوني مع الخدامة . صحيح هو ده مستواك .
ارتبك عاصم وقالها : انتي بتقولي ايه ؟ جبتي الكلام ده منين ؟
: بلاش تستعبط لأني شوفتكم وانتوا طالعين العمارة مع بعض . طلقني بقي في هدوء وروح اشبع بيها .
: طيب اهدي وانا هفهمك كل حاجة .
: هتفهمني ايه !! روح اشبع بيها بس خلي بالك زي ما عملت معاك هتعمل مع غيرك ، صحيح اشكال قذرة .
: لو سمحتي كفاية كده ، اللي انتي بتتكلمي عليها دي مراتي .
: مراتك !! انت. بتقول ايه ؟؟ ده انت وقعتك سودا !! تتجوز الخدامة !! لأ بقي ، يبقي انت لازم تطلقها هي حالا . انا كنت فاكراك بتخوني معاها طلعت متجوزها كمان !! وانا مش هسيب واحدة زي دي تنتصر عليا وتعمل راسها براسي ، طلقها حالا .
: مش هقدر اطلقها علشان حامل .
: حامل !! حامل ايه يخربيتك !!
: بصي بالراحه عليا بس وانا هفهمك كل حاجة وهعمل اي حاجة تطلبيها مني .
: استني بس يا دكتور يا محترم ، قولي صحيح هي حامل منك ولا من مروان ابنك ؟
: بتقولي ايه ؟؟؟
: بقولك اني شوفت ابنك مروان معاها قبل كده ، تبقي حامل منك ولا من ابنك يا دكتور يا محترم ؟؟
: انتي بتكدبي علشان تكرهيني فيها ، صح ؟
: لا يا حبيبي مش بكدب وانا كنت همشيها من البيت بس هي قعدت تبكي وتترجاني وانا زي المغفلة سامحتها وداريت علي الموضوع علشان ابني .
وهنا قاطعها الضابط وسألها : وهي كانت حامل من ابنك فعلا ؟ يعني حصل حاجة بينها وبين ابنك ؟
: بصراحة لا محصلش اكتر من انه كان بيعاكسها بس .
: يعني سوأتي سمعة البنت وهي مظلومة ؟؟
: لأ . مش مظلومة ، اللي تخطف جوزي مني وبعد السنين دي كلها حب وجواز متبقاش مظلومة .
: طيب كملي ايه اللي حصل بعد ما قولتي لعاصم كده ؟
: قدرت اقنعه ان حصلت حاجة بين شمس وبين مروان ابننا ، بعدها باس ايدي وراسي واترجاني اسامحه ووعدني انه يطلقها بعد ما يجهضها .واتفقنا اننا مش هنقولها ان انا عرفت لحد ما اللي في بطنها ينزل وبعدين يطلقها ونطردها .
حاولنا بعدها بأكتر من طريقة اننا نجهضها لكن دايما كنا بنفشل .
لما بقيت حامل في ٤ شهور عاصم قالي ان لو حاولنا نجهضها تاني ممكن تموت .
سافرنا المصيف واحنا هناك قولتله نرجع بالليل نجهضها ولو حصلها حاجة هنبقي احنا بعيد عن الشبهة لأننا مسافرين .
وفعلا رجعنا بالليل وطلعنا بدون ما حد يشوفنا واثناء محاولتنا اجهاضها كانت بتقاومنا بكل قوة وانا من غيظي منها خنقتها لحد لما ماتت ، كنت لازم انهي حياتها زي ما دمرت حياتي ، مش هنكر اني ندمانه لكن رغبة الانتقام لكرامتي وحبي كانت اقوي من اي حاجة تانية .
: وعلشان كده هتدفعي تمنها حياتك ، هي مش دمرت حياتك ابدا هي انسانة ومن حقها تعيش مع اللي بيحبها لكن انتي اللي دمرتي حياتك وحياتها وحياة جوزك وابنك .
خرج مسعد من السجن بعد الحكم ببرائته وحكم علي زينة بالاعدام شنقا بينما حكم علي عاصم بالسجن ١٥ سنة ...
انتهت
تحياتي
عادل عبد الله
