رواية متعة الحياة
متعة الحياة
الحلقة الاولي
رجعت من الشغل وانا متضايق ومش عاوز ادخل البيت .
قعدت علي القهوة وطلبت شاي وطلعت سيجارة انفخ مع دخانها الهم والضيق اللي انا حاسس به .
شوية ولقيت ايوب صاحبي ماشي وبيسلم عليا .
ناديت عليه يقعد معايا افضفض معاه شوية يمكن اخفف من الهم اللي علي قلبي .
اول ما ايوب قعد قالي : مالك يا طارق شكلك مخنوق و متضايق اوي ؟
: اعمل ايه طيب يا ايوب !! مش عارف الواحد حظه كده ليه في الدنيا ؟!!
: يا عم طارق قول الحمد لله انت احسن من غيرك كتير .
: يا صحبي احسن من غيري في ايه بس انا مش عارف !! متجوز ومعايا زوجة ما يعلم بيها الا ربنا كل يوم خناق ومشاكل ومش بتبطل نكد ، كل ما تشوفني هات فلوس ..هات فلوس ، بقيت بهرب منها ومش عاوز اشوفها ولا اشوف البيت .
: معلش يا طارق كفاية اولادك ربنا يخلهوملك ، الضحكة من العيل في وشك بالدنيا كلها .
: عيال ايه يا عم ايوب !! العيال اللي مش عارف اصرف عليهم ولا اعلمهم كويس زي الناس ومطلعهم في عيشة كلها فقر !! بكره لما يكبروا هيلعنوني ويلعنوا اليوم اللي نزلوا فيه الدنيا .
: مالك يا طارق مسودها اوي كده ليه ؟ !! عيالك ما شاء الله متفوقين في دراستهم وابنك الكبير اهو في ثانوية عامة ومن الاوائل وبكره يبقي دكتور ولا مهندس ويفرح قلبك و البنت والولد الصغير في اعدادي ومتفوقين وبكره يحصلوا اخوهم وتشوفهم حاجة تفرح و تنسي كل تعب السنين .
: انت يا أيوب مش عارف اي حاجة !! ابني اللي في ثانوية عامة ده انا مش عارف ادخله دروس زي زمايله علشان يجيب مجموع كويس هيدخل طب ولا هندسة ازاي ؟!! وحتي لو جاب مجموع الكلية هصرف عليه في الكلية منين ؟! والاتنين اللي بعده مش عارف اجيب للعيل فيهم كتاب ولا ادفعله فلوس الدروس !!
: يعني انت كل مشاكلك في الفلوس وبس يا طارق ؟
: طبعا كل مشاكلي في الفلوس ، وهو في مشاكل تانية غير الفلوس ؟!!
: مش يمكن قلة الفلوس معاك نعمة انت مش حاسس بيها ؟
: انت مجنون يا ايوب. !! قلة الفلوس تبقي نعمة ازاي ؟؟ دي الفلوس اكبر نعمة في الدنيا !!
: يا صحبي الفلوس ممكن تبقي نعمة علي ناس وتبقي قلتها اكبر نعمة علي ناس تانية ، عموما ربنا يرزقك يا طارق ويوسع رزقك ويبقي معاك فلوس كتير زي ما انت عايز .
: وهتجيلي الفلوس الكتير منين بقي يا صاحبي ؟
: ربك لما يريد يا طرووق . يمكن تتنقل لشغل تاني بمرتب كبير او تورث ورث كبير .كل شيئ جايز .
: انا هلاقي شغل بمرتب كبير ازاي في السن ده !! انا عمري عدا الاربعين سنة ؟!! ولا هورث من مين يا حسرة ؟ ابويا مات وكان فقير ومفيش اخوات الا اختي اللي ماتت من سنتين وكانت فقيرة ومفيش اعمام ولا عمات لأن ابويا كان وحيد حتي جدي كمان كان فقير ومش لاقي ياكل بعد ما اخوه الوحيد نصب عليه وخد ورثهم كله لوحده . عيلة وارثة الفقر ابا عن جد !!!!!
: ياااه ده انت شايل اوي في قلبك يا جدع !! احمد ربك ، دا في ناس كتير بتحسدك علي حياتك اللي مش عجباك دي .
: هيحسدوني انا ؟؟ علي ايه ؟!! علي الفقر وقلة الحيلة ولا علي عيالي اللي مش عارف اصرف عليهم ولا مراتي اللي انا مش مكفي طلباتها و بتنكد عليا ليل ونهار !!
: لا يا طارق بيحسدوك علي استقرار حياتك مع زوجة محترمة وبنت ناس وكمان ربنا رزقك من الولاد والبنات ومتفوقين وعندك صحة ماشاء الله وفوق كل ده انت انسان محترم واخلاقك كويسة والناس كلها بتحترمك وبتقدرك ، مش باقي لك الا انك ترضي باللي ربنا قسمه لك وتجتهد علي قد ما تقدر .
: ده كلام قصص وافلام يا ايوب انا بكلمك وافضفض معاك علشان اخفف الحمل عن نفسي شوية ، بلاش بقي تضحك عليا بكلام ميأكلش عيش في الزمن ده علشان تصبرني .
: طيب قولي يا طارق لو معاك فلوس كتير هتعمل ايه ؟
: ياااه ، اول حاجة هجيب شقة حلوة بدل الشقة الصغيرة اللي قاعد فيها وبعدين اطلع احج او اعمل عمرة علشان أبدأ حياة جديدة علي نضافة ، واعمل لمراتي مصروف كبير للبيت واجيب لعيالي كل اللي نفسهم فيه و اجيبلهم مدرسين خصوصي في البيت لكل المواد واكمل تعليمهم لحد ما يبقوا دكاترة ومهندسين .
: بس كده يا طارق ؟
: لو فلوس كتير اوي بقي هبني جامع واشتري عربية غالية واعمل مشروع يكون بيكسب كويس اعيش منه بدل مصنع البلاستيك اللي انا شغال فيه ، وكل سنة اخد مراتي والعيال واسافر شهر نغير جو ونشوف الدنيا .
: ربنا يرزقك وتحقق احلامك يا صحبي .
: بص انا قايم اروح اكل وانام يمكن ارتاح من الهم اللي انا فيه .
قومنا من علي القهوة وسيبته وروحت البيت ، اول لما دخلت شوفت منظر مراتي والكأبة علي وشها استغفرت ربنا وقولتلها هاتيلي اتغدا في اوضتي علشان عاوز اكل وانام .
راحت من غير ولا كلمة وبوزها شبرين جابت صنية الاكل عليها رغيفين عيش وشوية بطاطس محمرة .
قولتلها : هو فين الغدا ؟
قالتلي : ما هو قدامك اهو .
: هتغدا بطاطس محمرة بس ؟
: ابعت اجيبلك فول ؟
: لا خلاص . انا زهقت من الفول .
: طيب تحب ابعت اجيبلك كباب وكفتة ولا جمبري وسبيط ؟
بصيت لها وانا عارف انها بتتريق و قولتلها : طيب اعمليلي كوباية شاي .
وقعدت أكل وانا مخنوق ، شوية ودخل زياد ابني الصغير يوريني درجته في الامتحان ، كان جايب الدرجة النهائية ! قولتله ماشاء الله يا زيزو شاطر يا حبيبي انت كمان عاوز تدخل كلية طب وتبقي دكتور ؟؟ قالي : لا يا بابا انا عاوز ابقي مهندس ، هادي اخويا اللي عاوز يبقي دكتور .
ضحكت وقولتله مش هتفرق كتير دي عاوزة فلوس كتير والتانية زيها بالظبط . روح يا حبيبي ربنا يوفقكم .
بعد الاكل وانا بشرب الشاي دخلت ميادة بنتي الوسطانية بتوريني درجتها في الامتحان ، ماشاء الله بردو جايبة الدرجة النهائية قولتلها شاطرة يا ميودة يا حبيبتي ربنا يوفقك .
قالتلي هات يابابا فلوس الدرس علشان المستر قالي لو مش اخد فلوس الدرس الحصة الجاية مش هيخليني احضر الدرس !!
قولتلها حاضر الصبح ان شاء الله هسيب فلوس الدرس مع ماما قبل ما اروح الشغل .
خرجت البنت وبصيت في جيبي لقيت الفلوس اللي معايا يدوب علي قد الدرس .
نمت وانا متضايق وانا بدعي من جوايا ان ربنا يفرجها عليا لأني بجد تعبت .
صحيت الصبح واعطيت مراتي فلوس درس ميادة ونزلت روحت الشغل وانا بفكر ازاي اطلب سلفة من مديري في الشغل علشان اقدر اكمل الشهر .
الحلقة ٢
صحيت الصبح واعطيت مراتي فلوس درس ميادة ونزلت روحت الشغل وانا بفكر ازاي هطلب سلفة من مديري في الشغل علشان اقدر اكمل مصاريف الشهر .
روحت الشغل وانا مهموم مش عارف هطلب السلفة ازاي من مديري خصوصا اني كنت واخد سلفة قبل كدة ؟
طلبت السلفة من المدير وبعد ما سمعت منه كلام جارح وافق علي اعطائي السلفة ولكن بقبمة اقل من اللي طلبته !!
رجعت وانا بفكر هكمل مصاريف الشهر ازاي. بعد ما السلفة تخلص ؟
بدأت افكر اني اشوف شغل اضافي جنب شغلي .
وبعد ما لفيت علي شغل ساعات كتير كانت رجليا تعبت ، قعدت علي القهوة وانا بفكر ومتضايق وحاسس بالعجز في مواجهة ظروفي .
وفجأة تليفوني رن ، كان رقم غريب !! وانا طول عمري بخاف من الارقام الغريبة .
فتحت المكالمة ....
: الو . مين ؟
: استاذ طارق معايا ؟
: ايوه انا طارق مين حضرتك ؟
: انا عامر .
: عامر مين ؟
: انا عامر قريبك من البلد .
: طيب انت تقرب لي ايه و اسف يعني حضرتك عاوزني في ايه ؟ انا معرفش حد من العيلة في البلد .
: انا قريبك من بعيد اوي تقدر تقول من العيلة وخلاص لأن درجة القرابة بعيدة .
: طيب خير يا عامر يا قريبي اؤمرني ؟ خير ؟
: خير ان شاء الله ، تعرف جدك سالم ؟
: لا والله معرفوش .
: جدك سالم اخو جدك صادق ابو ابوك .
: ايوه ايوه افتكرت ، ده اللي سرق ميراث جدي صادق وخلاه عاش طول عمره في الفقر لحد لما مات .
: الله يرحم الجميع بقي يا اخ طارق ، انا عاوزك في موضوع مهم بخصوص جدك سالم .
: مش عاوز اعرف حاجة عنه .
: استني بس اسمع الكلام للاخر ، جدك سالم مات من اسبوعين وملوش ورثة غيرك !!!!
: نعم ياخويا !!! انت طلعت لي من الفانوس بقه ولا طلعت من فيلم عربي قديم ؟؟!!!!
: اسمع. بس يا اخ طارق انا عارف انك ممكن متصدقنيش بسرعة ، جدك سالم مات من اسبوعين وكان عمره عدا التسعين سنة وعياله ماتوا كلهم قبل ما يتجوزوا ويخلفوا وملوش ورثة غيرك !!!!
: ازاي ملوش ورثة غيري ؟!! اومال باقي العيلة فين ؟ وانت مش من العيلة بردو !! مش هتورث ليه ؟ بطل هزار يا استاذ واقفل انا مش رايق للهزار السخيف ده !!
: يا استاذ طارق افهم انا مش بهزر ، انت الوحيد اللي تورثه علشان انت الوحيد اللي قريبه من العصب .
: طيب هتقفل ولا اقفل السكة في وشك ؟
: وانا هكدب عليك ليه ؟؟ تعالي بكره وانت هتعرف بنفسك ، وتستلم الورث بتاعك .
حسيت من نبرة صوته انه بيتكلم بجد مش بيهزر ، وافقته لكن قولتله اني هسافر بعد يومين علشان اجازة الشغل .
طول اليومين وانا بفكر في كلام الرجل اللي اسمه عامر وانا مش عارف اصدقه ولا لأ . لو صدقته وطلع كلامه صح يبقي مشاكلي كلها هتنحل وهفوق من الفقر ده ، وفي نفس الوقت مش عاوز اصدقه يطلع بيكدب ويجيلي احباط اكتر من اللي انا فيه !!!
يوم الجمعة نزلت الصبح بدري سافرت البلد علشان اقابل عامر وانا حاطت في دماغي انه لو طلع كداب هعمل معاه مصيبة !!
سافرت البلد وقابلت عامر اللي عرفت انه من العيلة وشغال محامي ، ولقيت معاه اوراق الارض كلها و اوراق الفلوس اللي في البنك .
عرفت ان الارض حوالي ١٥ فدان منهم فدان ارض مباني يعني (حوالي ٤٢٠٠ متر سعر المتر هناك حوالي ١٠٠٠٠ج ) يعني فدان المباني لوحده سعره حوالي ٤٢ مليون جنية !!!!!!! ده غير باقي الارض. والفلوس اللي في البنوك !!!!!! يعني ثروة هتزيد عن ٥٠ مليون جنية !!!!
قلبي كان بينبض بسرعة وقرب يقف ومش قادر اصدق !! قولت لعامر : انت متأكد ان انا الوريث للرجل ده ؟
رد وقالي : ايوه انت وريثه الوحيد .
: وانا هقدر استلم الميراث امتي ؟
: دلوقتي حالا .
: طيب هات الاوراق .
: لأ استني يا استاذ طارق .
: فيه ايه ؟ مش قولت هستلم الميراث دلوقتي ؟!
: ايوه بس انت ناسي حاجة مهمة .
: ناسي ايه مش فاهم ؟؟
: حلاوتي يا كبير ، ولا ناوي تاكل عليا الحلاوة ؟!!
: يا عم خضتني !! حاضر يا عامر من عنيا ، اللي تؤمر به .
استلمت الاوراق كلها وقولت لعامر انا عاوز ابيع الارض كلها .
: حرام عليك تبيع ارض اجدادك !! والارض سعرها بيزيد مش بيقل !! غير الخير اللي بييجي منها ، انت هيبقي معاك اكتر من ستة مليون سيولة اللي في البنوك .
: لأ انا عاوز ابيع كله . عاوز الميراث كله يبقي سيولة .
: طيب فكر الاول قبل ما تقرر .
: لأ انا فكرت وقررت خلاص .
: طيب انا همشي في اجراءات البيع بس خلي بالك هيكون ليا سمسرة اوعي تنساها ؟
: حاضر من عينيا ، حقك محفوظ .
رجعت البيت ومعايا الاوراق وانا لسه مش مستوعب اني بقيت غني !!!! معقول بقيت غني بعد الفقر والحرمان اللي عيشت فيهم طول عمري !! معقولة هرتاح اخيرا من التعب والذل واعيش حياتي واستمتع بها ؟؟؟
كل ده وكنت لسه مش قولت لحد علي موضوع الورث ده .
دخلت اوضتي وقفلت الباب عليا وبدأت اقرا الاوراق وانا طاير من السعادة ، وقررت ان تاني يوم الصبح اروح البنك اصرف مبلغ من الفلوس علشان ابدأ اشبرق علي نفسي وعلي مراتي وعيالي .
ولسه بفكر ازاي هسعد مراتي وعيالي لقيتها فتحت الباب وبتقولي : انت قافل علي نفسك كده ليه ؟
قولتلها : مفيش حاجة عندي صداع وهنام .
: مش هتتعشي يعني ؟
: في عشا ايه ؟
: تحب اطلبلك ماكدونالذ ولا كنتاكي ؟
بصيت لها وضحكت : انتي بتتريقي كالعادة ؟؟ هاتي من الموجود .
دخلت جابت جبنة قديمة وعيش .
قولت في بالي : يعني انتي مش هتبطلي تريقة علي ظروفي !!! ده انا كنت لسه بفكر ازاي اسعدك انتي وعيالك !! حااااااضر !!!! صبرك عليا بس ...
نزلت تاني يوم الصبح وروحت البنك وانا بفكر اخد كام من الفلوس ؟؟
وقفت قدام صراف البنك بيسألني : حضرتك عاوز كام ؟
قولتله : عاوز ٥٠ الف ، وبعدين قولتله : لا لا عاوز ١٠٠ الف جنية .
اخدت الفلوس وخرجت من البنك وانا فرحان اوي اول مرة امسك ١٠٠ الف جنية !!
كان نفسي في حاجات كتير اوي لكن مش عارف ابدأ بأيه !!
قولت لازم اروح البيت واعرفها اني بقيت غني علشان تبطل تتريق علي فقري .
اول لما دخلت البيت مراتي قالتلي : ايه اللي رجعك بدري من الشغل ؟
قولتلها : انا خلاص مش رايح الشغل ده تاني .
قالت : هار اسود سبت الشغل ليه ؟ وهنعيش ازاي ؟ ده احنا وانت شغال وكنا مش عارفين نعيش دلوقتي هنعمل ايه ؟
روحت مطلع روزمة فلوس عشرين الف ورميتها قدامها وقولتلها : خدي الفلوس دي و هاتي اللي انتي عاوزاه .
مسكت الفلوس في ايديها وهي مش مصدقة !!! وقالتلي : جبت الفلوس دي منين ؟ اوعي تكون سرقت ؟ مديت ايدك للحرام يا طارق ؟!!! لا يا طارق ميلزمناش الحرام . الله الغني عن الحرام . روح رجع الفلوس دي لأصحابها ونعيش بالحلال لو حتي هناكل عيش حاف .
قولتلها : حرام ايه بس اللي بتقولي عليه ؟ دي فلوسنا احنا . فلوس حلال .
: وجتلك منين الفلوس الحلال دي يا طارق ؟
: ورثت .
: ورثت مين يا حسرة ؟!! هو انت ليك اهل ؟!! ده حتي اهلك كلهم كانوا فقرا .
: دي حاجة ولا في الافلام . استني انا هحكيلك الحكاية من اولها .
حكيتلها الحكاية كلها وعرفتها ورثت مين وكام ، وهي مذهولة مش قادرة تصدق .
وطلعت باقي الفلوس التمانين الف اللي كانوا معايا .
قعدت تبوس فيا وتحمد ربنا وبعدين جريت علي العيال وقالتلهم ابوكم ورث يا ولاد ، شافوا الفلوس وكانوا فرحانين اوي .
وبعدين قالتلي :
الحلقة ٣
لازم اول حاجة تعمل حاجة لله علشان ربنا يباركلنا في الفلوس دي وبعدين نشوف هنعمل ايه .
قولتلها : هعمل حاجة لله ، بس عاوزك الاول تطلبنا اكل من كنتاكي .
بصتلي ومش قادرة تتكلم . قولتلها : مش كنتي بتتريقي علي فقري بالكلام ده .
قالتلي : معلش يا طارق من ضيقي وضيق ظروفنا . معلش سامحني .
: طيب وحرقة دمي السنين اللي فاتت دي مين يدفع تمنها ؟ مين يعوضني عنها ؟!!!
: اهو ربنا عوضك اهو الحمد لله ، ننسي االي فات ونعيش حياتنا بقي زي ما الناس عايشة .
: لو عاوزة تنسي اللي فات انسيه براحتك ، لكن انا مش هنسي .
بصيت للعيال وقولتلهم : كل واحد يقولي بقي نفسه في ايه ؟
هادي ابني الكبير : نفسي في موبايل يكون احدث حاجة علشان زمايلي كانوا بيتريقوا عليا علشان مش معايا تليفون .
قولتله : حاضر يا عم هادي هنزل اجيبلك التليفون النهاردة .
زياد وميادة كمان طلبوا الاتنين تليفونات حديثة .
قولتلهم خلاص احنا ننزل اخر النهار نشتري ٥ تليفونات لينا كلنا .
مش هقدر اوصف الفرحة اللي كانت في عينيهم وهما فرحانين وبيضحكوا .
جينا وقت الغدا ومراتي بتقولي : هنتغدا ايه ؟
قولتلها هنزل اجيب اكل من اي مطعم .
نزلت جيبتلهم اكل غالي وقعدنا كلنا واحنا مبسوطين .
نزلنا اخر النهار واخدت معايا ٣٠ الف علشان اجيب ٥ موبايلات .
هادي اخدنا وروحنا توكيل اكبر شركة موبايلات ، لما دخلنا قعدنا نتفرج علي الموبايلات لحد ما هادي قالي : هو ده يابابا الموبايل اللي انا عاوزه .
بصيت لقيت الموبايل ب ٣٢ الف جنية !!!!
كنت في حالة ذهول !!! معقول ده سعر الموبايل اللي ابني عايوزه ؟!! يعني ال ٥ موبايلات ب ١٦٠ الف جنية !!!
بعدين افتكرت ان الفلوس كتير اوي هتعدي ال ٥٠ مليون جنية .
قولتلهم : الفلوس اللي معايا مش هتكمل دلوقتي ، احنا نيجي بكره احسن علشان نجيب ال ٥ موبايلات .
سمعنا موظف الفرع قالي : حضرتك ممكن تجيب الفيزا كارت وتاخد االي حضرتك عاوزه .
اتكسفت اقوله اني مش معايا فيزا ، ضحكت وقولتله معلش اصل انا نسيت الفيزا بتاعتي في البيت .
قالي : ممكن بفيزا المدام .
قولتله : للاسف المبلغ اللي فيها مش هيكمل ، هنيجي بكره احسن .
قالي : اللي زي ما تحب يا فندم .
مشيت وانا مبسوط اول مرة رجل بالشياكة دي يحترمني الاحترام ده كله !!
قررت اني لازم اعمل فيزا كارت .
تاني يوم عملت فيزا كارت وحطيت فيها مليون جنية .
وروحت الشركة اللي كنت فيها البارح واشتريت ال ٥ موبايلات بالفيزا وانا فرحان اوي !!!
وبعد عشر دقايق جالي اتصال من زميلي في الشغل سألني عن سبب اني مش روحت يومين ورا بعض ؟ قولتله اني مش هروح الشغل تاني . حاول يقنعني ان ده رزقي ورزق عيالي وحرام عليا اقطع عيشي بايدي والكلام ده .
قولت في بالي لازم اروح اقابل مديري في الشغل اللي كان بيهزأني كل شوية .
وفعلا روحت عديت علي الشغل وطلبت المدير .
خرج المدير يقابلني وسألني بعصبية : انت ليه غايب عن الشغل بقالك يومين ؟ وقبل ما ارد قالي : عندك يومين خصم .
ضحكت اوي وقولتله : لأ ، اخصم كل اللي ليا عندكم انا خلاص مش جاي تاني وهعمل شركة اكبر من شركتكم وهوقف حالكم وهجيبك تشتغل عندي .
المدير كان مذهول من كلامي وقبل ما يرد عليا قولتله : بص شوف ، دول ٥ موبايلات ليا ولعيالي تمنهم بمرتب ٥ سنين عندكم .
كان مذهول وبعدين قرب مني و قالي بصوت منخفض : اوعي تكون سرقت يا طارق يا بني !!
قولتله : ابنك ؟؟!!! لأ مش سرقت ، انا ورثت . والفلوس اللي ورثتها تعمل ١٠ شركات زي الشركة دي . وسبت الرجل مذهول ومشيت وانا بضحك وفرحان اوي اني خدت حقي منه بعد ذل ومهانة سنين طويلة .
رجعت البيت واديت لكل واحد تليفونه وقولتلهم يحافظوا عليهم .
اخدت تليفوني ونزلت قعدت علي القهوة و حطيت الموبايل قدامي علي الترابيزة .
بعد شوية لقيت ايوب صاحبي ماشي ، ناديت عليه واول لما اقعد جنبي سألني : تليفون مين ده يا طارق اللي قدامك ؟
ضحكت وقولتله : تليفوني .
: انت مجنون يا طارق ؟
هي حصلت انك تمد ايدك وتسرق ؟!!
: اسرق ايه بس ، ده تليفوني انا اشتريته .
: هو انت ناقص ضغوط عليك علشان تشتري بالقسط موبايل تتمنظر به !!! انت شكل الضغوط اللي عليك تعبت دماغك .
: انا اشتريته كاش واشتريت ٤ كمان غيره للعيال .
: انت فيك ايه يا طارق انت اتجننت ولا سرقت سريقة ولا عملت ايه ؟
: مفيش حاجة من اللي بتقوله ده ، انا هفهمك كل حاجة .
وحكيت لأيوب علي كل اللي حصل معايا من اول اتصال عامر لحد ما استلمت الميراث .
ايوب بعد ما سمع اللي حصل وشاف صور الاوراق اللي كنت شايلها في جيبي ضحك وقام واخدني بالحضن وهنأني وقعد يكرر ماشاء الله لاقوة الا بالله لا قوة الا بالله ربنا يباركلك يا طارق انت ابن حلال وتستاهل كل خير .
ايوب كان واضح عليه انه فرحان من قلبه ، اصل قلبه طيب اوي وبيحب الخير للناس كلها وخصوصا انا .
ايوب قالي : لازم تعمل لله بقي . وكمان اوعي تنسي انت لسه من كام يوم كنت بتقول هتحج او هتعمل عمرة وهتبني جامع .
قولتله : ايوه ان شاء الله .
: طيب اول حاجة بقي تعمل عمرة علشان تبدأ حياة جديدة علي نضافة زي ما كنت بتقول .
: لا ، بدل ما اعمل عمرة دلوقتي انا هستني الحج كمان ٥ شهور احسن .
: بلاش تأجل يا طروق ، خصوصا الخير بلاش تأجله .
: وهو في حج دلوقتي ؟؟ مادام ربنا رزقني من وسع بدل العمرة اعمل حج بعد ٥ شهور احسن ما اعمل عمرة دلوقتي .
: طيب ربنا يباركلك يا طارق ، خلي بالك من نفسك ومن عيالك كويس .
: انت رايح فين ؟
: هطلع اريح شوية علشان راجع من الشغل تعبان .
: لو احتجت اي حاجة يا ايوب ابقي قولي احنا اخوات .
ضحك ايوب وقالي : اكيد يا صحبي .
بدأت اسأل سمسار علي شقة تكون كبيرة علشان ننقل فيها .
لقيت الشقق سعرها غالي من ٣٥٠ الف ل ٤٠٠ الف ، قولت لأ انا اللي يخليني ادفع المبلغ ده في الحي الشعبي ده انا اروح احسن اشتري شقة في حي راقي علشان نعيش زي الناس الاغنيا .
لقيت اسعار الشقق في حي من الاحياء الراقية من مليون لمليون ونص .
اخترت شقة كبيرة ومكانها حلو وروحت البنك سحبت المليون ونص واشتريت الشقة .
وفي ايام كنت نقلت انا ومراتي واولادي في الحي الراقي .
كان لازم اشتري عربية حديثة وهدوم غالية لينا كلنا علشان نعيش وسط جيرانا الجداد بنفس مستواهم .
ونزلت اشتريت عفش واجهزة جديدة للشقة الجديدة .
ببص في كشف حساب البنك لقيت نفسي صرفت اكتر من نص الرصيد !!!
اتصلت علي عامر وقولتله : عملت ايه يا قريبي في بيع الارض ؟
قالي : لسه السعر اللي احنا عاوزينه مجاش .
قولتله : السعر اللي اتعرض عليك كام ؟
قالي : ٧ الاف جنية المتر في ارض المباني !!!
: لأ مينفعش ، السعر ده بعيد اوي ، حاول تبيع ب ١٠ الاف بسرعة علشان محتاج الفلوس .وبيع الارض الزراعة بأي سعر .
الحلقة ٤
قفلت الاتصال مع عامر وروحت قعدت في البيت بفكر ازاي اعمل مشروع كبير يدخل ليا ربح كبير علشان الفلوس تزيد بدل ما تخلص وارجع للفقر تاني .
كانوا كلهم في البيت ماسكين موبايلاتهم بيلعبوا فيها .
جيت جنب مراتي وقولتلها : ايه رأيك في الموبايل ؟
قالتلي : حلو اوي يا حبيبي .
ضحكت وقولتلها : اظن مفيش حد من اهلك مسك تليفون زي ده ؟!!!
حاولت تتظاهر انها مش اتضايقت من كلامي وقالتلي : تعيش وتجيبلنا .
انا كنت قاصد اني اهينها علشان ارد لها اهاناتها ليا وتريقتها علي فقري قبل كده .
شوية ولقيت واحد صحبي بيتصل بيا ، اول ما شوفت اسمه افتكرت ازاي كان بتاع مصلحته وميعرفش الواحد الا لمصلحة وبعد ما تخلص يبعد .
كنسلت عليه وعملتله حظر علي الاتصال ورحت ماسك الموبايل عامل حظر لكل اصحاب زمان ماعدا ايوب لأنه احسن واحد عرفته في حياتي ، كنت بعتبره اخويا مش صحبي .
قعدت اتغدا مع مراتي والولاد وكنا مبسوطين جدا وبعدين قولتلهم : ايه رأيكم نروح مصيف ؟ رد هادي وقالي : مصيف ايه يابابا احنا في شهر ١٢ والدنيا تلج .
ضحكت وقولتله : خلاص نروح مشتي . نروح اسوان ؟
مراتي قالتلي : هنعمل ايه في اسوان ؟ هنتفرج علي المعابد والفراعنة ؟!!
قولتلهم : اخر كلام نروح الغردقة جوها في الشتا جميل .
اخدتهم في العربية وسافرنا الغردقة ، كنا ماشيين بالعربية وانا حاسس اني اسعد واحد في الدنيا وكأني ملكت الدنيا كلها ، كان في ذهني ان كل اسباب السعادة في ايدي ، واخيرا قدرت اعوضهم عن سنين الفقر والحرمان .
وفي اليوم التاني من الرحلة اتصل بيا عامر علشان يبلغني ان اعلي سعر للارض ٨٠٠٠ للمتر .
رفضت في الاول لكن لما قالي ان صعب الارض تجيب سعر اكبر من كده في الوقت الحالي خصوصا ان ازا مستعجل علي البيع و الدفع كاش وافقت واستعوضت ربنا في فرق السعر !!!!
فرق السعر كان كبير اكتر من ٨ مليون جنية !!!!!
الرقم كبير جدا لكن لأن الثروة كبيرة وانا كنت محتاج الفلوس بأي طريقة علشان أبدأ اشتغل واعمل مشروع وافقت في النهاية .
واستاذ عامر قريبي اخد مليون جنية سمسرة مني .
كان المشروع اللي نفسي اعمله شركة تصنيع بلاستيك زي اللي كنت شغال فيها وكان نفسي تكون اكبر منها .
اول مشكلة واجهتني اني مش كملت تعليمي ودي كانت عقدة حياتي !!
كلمت ايوب صحبي وقولتله : انا عاوز افتح شركة تصنيع بلاستيك .
قالي : صح كده انت لازم تبدأ تشتغل ولازم تشتغل في حاجة بتفهم فيها .
: انا عاوزك معايا يا ايوب في المشروع ده .
: عاوز تشغلني عندك يا صحبي ؟
: لأ يا ايوب انت عارف انت اخويا ، اسمها تشتغل معايا . وبعدين انت كملت تعليمك عني وبتفهم اكتر مني يعني انا كده كده محتاجك معايا .
: يا طارق انا مش بفهم في البلاستيك والحاجات دي ، وبعدين انت محتاج في مشروعك ٣ اشخاص اساسيين واحد مدير انتاج يكون بيفهم كويس في المشروع ده وواحد مدير مالي يمسك لك فلوس الشركة وواحد مدير مبيعات يكون مسئول عن بيع منتجاتك وانا مش بفهم في اي حاجة من دي .
: تبقي انت المدير عليهم يا ايوب علشان مفيش حد يلعب بيا ويسرقني . قولت ايه يا صحبي ؟
: لا يا طارق خلينا اصحاب بعيد عن الشغل احسن وانت بنفسك هتبقي مدير عليهم وتتابع شغلك بنفسك احسن من اي حد غيرك .
: انت شايف كده يا صحبي ؟
: ايوه طبعا يا طارق ، قولي بقي صحيح مش كنت بتقول لو بقيت غني انك هتبني جامع ؟
: ايوه ان شاء الله هبني جامع ، اول لما اظبط المشروع وشغلي يستقر ودماغي تروق هبنيه علطول .
بعد ما خلصت الاوراق الخاصة بالمشروع عملت اعلان عن طلب سكرتيرة علشان تبدأ الشغل معايا وترتبلي شغلي ومقابلات الناس ولازم طبعا تكون جميلة و انيقة علشان تعمل برستيج للشركة .
اخدت اول ٢٠ اتصال تليفوني وحددت معاهم مواعيد للمقابلة .
اول واحدة قابلتها كانت جميلة جدا وشياكة مفيش بعد كده وثقافة ممتازة ، قابلت التانية كانت اجمل واشيك منها !!
وكل ما اقابل واحدة تطلع اجمل من التانية لحد ما دخلت عليا يارا !!!!
اول ما شوفها قولت بصوت عالي سبحان الله عمري ما شوفت جمال بالشكل ده !!! مفيهاش غلطة !!!
يارا اتفجأت بكلامي واتكسفت جدا !!
قعدت يارا وبدأت اتكلم معاها وانا حاسس اني مسحور لدرجة اني مش عارف كنا بنتكلم في ايه !!!
وبعد حوالي ربع ساعة كلام قولتلها مباشرة ..... تتجوزيني ؟؟؟
الحلقة ٥
يارا اتفجأت بكلامي واتكسفت جدا !!
قعدت يارا وبدأت اتكلم معاها وانا حاسس اني مسحور لدرجة اني مش عارف كنا بنتكلم في ايه !!!
وبعد حوالي ربع ساعة كلام قولتلها مباشرة ..... تتجوزيني ؟؟؟
يارا اتخضت ووقفت مكانها ومش عارفة تتكلم .
قولتلها اتفضلي اقعدي . انا بتكلم جد . تتجوزيني ؟؟
قالتلي : انت حضرتك بتهزر ؟؟
قولتلها : انا مش بهزر انا بتكلم جد جدا .
: هو حضرتك تعرفني ؟؟
: ايوه اعرفك ، انا كنت بدور عليكي من زمان .
: يا فندم انا مش مستوعبة كلام حضرتك ، ده اغرب موقف حصلي في حياتي !!!
: مفيش حاجة غريبة ابدا ، انا عاوز اتجوزك وفورا !!!!!
: يعني ايه فورا ؟؟
: يعني هنتجوز النهاردة .
: لا حضرتك كده بتهزر ، انا مضطرة امشي .
: استني طيب اسمعي كلامي للاخر .
: اسمع ايه حضرتك ؟؟
: مفيش خاتم او دبلة في ايديكي الاتنين ، يعني انتي مش مرتبطة . انا مستعد ادفعلك المهر والشبكة اللي انتي تقولي عليها ونتجوز ، قولتي ايه ؟؟
: انا مش قادرة استوعب كلام حضرتك .
طلعت دفتر الشيكات وكان اول شيك امضيه في حياتي ومضيت شيك علي بياض وادتهولها في ايدها وقولتلها اكتبي هنا مهرك وتعالي دلوقتي ننزل تشتري الشبكة اللي انتي تشاوري عليها .
: يا فندم حضرتك متعرفنيش ولا انا اعرفك هنتجوز بالسرعة دي ازاي ؟؟ واهلي هقولهم ايه ؟
: بالنسبالي انا مش عاوز اعرف عنك اي حاجة اكتر من اللي عرفتها واضح عليكي انك الانسانة اللي كنت بدور عليها وبالنسبالك اعتقد ان اهم حاجة اني اامن لك مستقبلك كويس وده هيحصل طبعا ، وبالنسبة لأهلك اتصلي حالا بوالدك وأقابله حالا وهطلب ايدك منه .
: مش بقولك انت متعرفش عني حاجة ، اول حاجة انا والدي متوفي .
: اخوكي ، عمك ، خالك ، اي حد في مكانة ولي امرك .
: اخويا الكبير وماما .
: كلميهم ونقابلهم فورا .
وبعد نص ساعة كنت قاعد مع رشدي اخوها الكبير ووالدتها وبنتفق وهما في قمة الذهول !!!
وبعد ساعة بالظبط كنا عند الجواهرجي بنشتري الشبكة اللي تمنها كان حوالي ٦٠٠ الف جنية وكتبنا شيك المهر ب ٢ مليون جنية وكتبنا ٥ مليون جنية مؤخر !!!!
وبعد اقل من ٤ ساعات كنا عند المأذون بنكتب الكتاب !!!!!
الموضوع كله كان كأنه حلم بالنسبالنا كلنا ، انا بتجوز اجمل واحدة شافتها عينيا ومكنتش احلم اتجوز زيها في يوم من الايام ، ويارا واهلها عمرهم ما كانوا يحلموا ان في عريس ييجي ويتقدم ويتجوز في اقل من ٦ ساعات ده غير ان عمرهم ما كانوا يفكروا ان هيجيلهم عريس غني جدا بالشكل ده .
وبعد كتب الكتاب حجزنا جناح في فندق في شرم الشيخ .
اتصلت بمراتي ام هادي وقولتلها اني مسافر في شغل وهقعد اسبوع .
ركبت عربيتي وجنبي عروستي يارا اللي كانت بتضحك وبتقولي : انا حاسة اني بحلم !! معقول قبل الضهر اكون مش مخطوبة ولا بفكر في الجواز و المغرب اكون متجوزة ؟!!!! انا مش مصدقة اللي بيحصل ده ، علفكرة يا طارق هقولك حاجة ومتزعلش انت مجنون رسمي .
: وهي دي احلي حاجة فيا ، هو في احلي من الجنان !!! صبرك عليا بس هو انتي لسه شوفتي حاجة من جناني .
وقعدنا نضحك ومسافة الطريق كنا اخدنا علي بعض بسرعة وبنضحك وبنهزر كأننا نعرف بعض من فترة طويلة .
وبعد ما قضينا اسبوع عسل خيالي رجعنا القاهرة ولما سألتني فين شقتنا اللي هنعيش فيها ؟
قولتها : طبعا في شقتي .
قالتلي : فين شقتك ؟
قولتلها : نفس الشقة اللي انا عايش فيها دلوقتي .
الحلقة ٦
وبعد ما قضينا اسبوع عسل خيالي رجعنا القاهرة ولما سألتني فين شقتنا اللي هنعيش فيها ؟
قولتها : طبعا في شقتي .
قالتلي : فين شقتك ؟
قولتلها : نفس الشقة اللي انا عايش فيها دلوقتي .
: ومراتك واولادك هترميهم في الشارع ؟؟
: لأ طبعا .
: اومال هيروحوا فين ؟
: هنعيش كلنا مع بعض .
: انت بتهزر ولا بتتكلم جد ؟؟
: بتكلم جد طبعا ، الشقة كبيرة مساحتها حوالي ٣٠٠ متر . هنعيش كلنا مع بعض وانا متأكد انك هتكوني سعيدة جدا معايا .
: انت بتتكلم ازاي ؟ ومين قالك اني هقبل بالوضع ده ؟
: هتقبلي خصوصا لما تعرفي اننا هنعيش فيها لأيام قليلة علي ما اشتري فيلا نعيش فيها .
: وقعت قلبي يا حبيبي ، افتكرت هتخليني اعيش مع مراتك وعيالك علطول ، قصدك يعني نقعد معاهم كام يوم علي ما تشتري فيلا اعيش فيها انا وانت ؟؟
: مش بالظبط ، انا فعلا هشتري فيلا خلال ايام لكن هننقل فيها كلنا انا وانتي وولادي وامهم .
: انت بتهزر ، انا مش هعيش معاهم .
: وانا مش هقدر ابعد عن ولادي مهما حصل ، هنعيش كلنا في مكان واحد لكن هتاخدي راحتك كأنك عايشة لوحدك وصدقيني هتعيشي معايا ملكة تحلمي وانا احققلك احلامك .
: انا مش متخيلة الوضع ده !!! لا لا صعب !! مستحيل .
: انا مش هينفع ابعد عن ولادي ولو جبتلك شقة لوحدك هكون معاكي يوم ولا اتنين في الاسبوع وباقي الاسبوع لازم اكون معاهم ، وانا بصراحة حبيتك و مش هقدر ابعد عن القمر ده لحظة واحدة .
: انا كمان حبيتك بس عمري ما تخيلت اني اكون في الوضع ده ، لا لا صعب ، مش هقدر .
: بصي يا قلبي وافقي انتي بس وهتشوفي انه مش صعب ولا حاجة ، جربي انتي و صدقيني مش هتندمي .
: وافرض ان انا وافقت هي هتقبل وجودي ؟؟؟
: هتقبل غصب عنها ووعد مني انها مش هتضايقك او تتعرضلك ابدا .
: لما اشوف يا طارق ، لكن اعمل حسابك لو حصل حاجة تضايقني مش هقعد معاك دقيقة واحدة وهنطلق ، وخلي بالك لو كنت انت مجنون انا مجنونة اكتر منك .
ضحكت وقولتلها : بموت انا في الجنان .
اخدت يارا وروحنا البيت و ركنت العربية وطلعنا وهي مترددة وخايفة لحد ما وصلنا باب الشقة وفتحت ودخلت .
اول ما دخلت الشقة جري الولاد عليا يبوسوني وياخدوني بالاحضان بعد غيابي عنهم اسبوع كامل ، بعد ما بوستهم وحضنتهم قولتلها ادخلي يا يارا !!
وقفت يارا وخايفة تدخل من الباب ، والولاد اول لما شافوها سألوني مين دي يا بابا ؟؟؟
جت سهام ( مراتي ام هادي ) و في عينيها نظرة تعجب وقالتلي : حمد لله علي سلامتك يا طارق ، مين الاستاذة دي ؟؟
: دي يارا مراتي .
: هارك اسود !!! انت اتجوزت عليا يا ......
قطعتها بسرعة وقولتلها : من غير طولة لسان اهدي واسمعي الكلمتين دول ... دي مراتي وزيها زيك بالظبط لو طولتي لسانك او غلطتي فيا او فيها او عملتي اي حاجة تضايقنا هتبقي طالق وهترجعي لأهلك الجعانين تاني انما لو تقبلتي الوضع هتعيشي ملكة و هنعيش كلنا مع بعض اسرة واحدة هنا وبعد كده هشتري فيلا كبيرة نعيش فيها كلنا ، قبل ما تنطقي بكلمة فكري كويس علشان ولادك يتربوا في حضنك وفي نفس الوقت هتعيشي ملكة زيك زيها بالظبط .
سهام دموعها كانت علي خدودها وهي ساكتة وجريت دخلت اوضتها ودخل وراها الولاد علطول .
اخدت يارا من ايديها ودخلتها وقفلت الباب وبوست راسها وقولتلها نورتي بيتك يا قلبي .
دخلت انا ويارا اوضة نوم تانية كبيرة وكانت لسه قلقانة قعدت معها وطمنتها وقضينا اول ليلة و سهام والاولاد كأنهم مش موجودين !!
تاني يوم الصبح قولت ليارا تعالي نفطر معاهم بره لكنها رفضت ، جبت الفطار وقعدت فطرت معاها .
سهام والاولاد كان باين عليهم انهم زعلانين اوي .
فضل الحال كده ٣ ايام و كان اغلب قعدتي مع يارا في اوضتنا او انزل اخرج معاها .
وفي اليوم الرابع قولتلها انا هنزل اروح مشوار ساعتين وارجع ، حاولت تنزل معايا لكن انا قولتلها مش هينفع علشان هقابل واحد صحبي .
كانت خايفة تقعد معاهم لوحدها لكن انا طمنتها وقولتلها مفيش حد هيقدر يضايقك لحد ما ارجع .
نزلت اشتريت ساعة حريمي من النوع الغالي جدا واسورة دهب قيمة جدا .
ولما رجعت البيت قعدت مع يارا لبعد العشا وبعدين قولتلها : اظن النهاردة المفروض انام عندها ؟
قالتلي : نعم ؟؟؟ بتقول ايه ؟؟ مش سامعه كويس !!
: المفروض انام عندهااا.
: لا يا حبيبي ، احنا مش اتفقنا علي كده !!!
: وهي دي محتاجة اتفاق يا قلبي !! ده واجب عليا ، متنسيش انها بردو مراتي ولها حقوق عليا .
: وانت كنت ناسي حقوقها دي لما جيت تتجوزني ؟
: يا حبيبتي هي مراتي ام ولادي واجب ومفروض عليا انما انتي حاجة تانية انتي مراتي وحبيبتي انتي اللي في القلب .
: خلي بالك هتروح تنام عندها هتصحي الصبح مش هتلاقيني .
روحت مطلع الساعة اللي اشتريتها وقولتلها : امسكي الساعة دي وقبل ما تبقي الساعة ٨ الصبح هتلاقيني صاحي وجاي افطر معاكي .
: الله دي حلوة اوي !!
: مش احلي منك يا قلبي .
: انت عاوز تضحك عليا بالساعة دي ؟؟
: لا طبعا معقول اضحك علي قلبي وروحي ، انا لما شوفتها قولت دي مش تتلبس الا في اجمل ايد في الدنيا ايد يارا حبيبتي .
: بردو مش هتضحك عليا ، بصراحة انا بغير عليك . مش هينفع االي انت بتقوله ده .
: طيب ولو قولتلك علشان خاطري ؟؟
: خاطرك غالي ، لكن ....
: من غير لكن ، علشان خاطري هنعتبرها ضريبة سعادتنا مع بعض .
سكتت وانا بوستها وقولتلها الساعة ١٠ الصبح هتلاقيني جاي افطر معاكي .
: مش كنت بتقول الساعة ٨ الصبح ؟!!!
: خليها الساعة ١٠ علشان مش عاوز اصحيكي بدري .
: انا مش عارفة هنام ازاي وانا عارفة انك في حضن واحدة تانية .
: هكون هناك لكن قلبي وعقلي هيكونوا معاكي .
خرجت من الاوضة وفتحت اوضة سهام ودخلت .
اتعدلت سهام وقعدت بعد ما كانت نايمة وقالتلي : انت ايه اللي جابك هنا ؟
: انتي لسه زعلانة مني ؟
: مش زعلانة ، اتفضل روح عند عروستك .
: انتي عروستي وحبيبتي وحب عمري .
: انت فاكرني هبلة هتضحك عليا بكلمتين !! اتفضل اخرج بدل ما اصرخ واصحي العيال واعملك فضيحة .
: انا مش خارج من الاوضة دي الليلادي .
: يبقي انا اللي هخرج انام بره .
: يا بنت الحلال بلاش فضايح اسمعيني الاول .
: من غير ما اسمعك هتخرج بره الاوضة ولا اخرج انا ؟
: عليا الطلاق لنبات احنا الاتنين هنا في الاوضة الليلادي .
: انت بتمسكني من ايدي اللي بتوجعني باليمين بتاعك ؟؟؟
: لا يا قلبي اسمعيني بس .
: من غير ما اسمعك ، مادام حلفت بالطلاق هتنام في الارض ومش هتنام جنبي علي السرير علشان بس اليمين بتاعك .
: يعني ابقي متجوز اتنين وعايش في شقة زي دي وانام علي الارض !!!! اهون عليكي ؟
: مادام هونت عليك وهانت عليك العشرة بينا يبقي عادي هتهون عليا .
: يا حبيبتي انتي عمرك ما هونتي عليا انتي بس اللي حبيتك طول عمري .
: انت جاي تضحك عليا ؟؟؟!!!
: وحياتك عندي بكلمك من قلبي ، انتي حبيبتي وعمري ما حبيت غيرك . شوفي حتي جبتلك الهدية دي علشان تعرفي غلاوتك عندي . وروحت مطلع الاسورة واديتهالها .
: بصت للاسورة بأنبهار وقالتلي : هي حلوة اوي بس بردو مش هتضحك عليا ، كفاية انك كسرت قلبي خلاص كل اللي بينا انتهي .
: يا حبيبتي ما عاش اللي يكسر قلبك ، ده انتي قلبي وروحي وعمري .
: انت هتجنني !!! اومال اتجوزت عليا ليه ؟؟ علشان تفرحني مثلا ؟؟
: ايوه بالظبط كده .
: انت رايق وجاي تتريق عليا شوية وتهزر شوية وانا مش فايقة .
: انا بتكلم جد ، انا اتجوزتها علشان اسعدك انتي والولاد .
: تسعدني !!! انت عبيط بقي !!!
: من غير لسانك الطويل ده هفهمك كل حاجة ، البنت دي عمها رجل عنده معارف كتير وهيساعدني في شغلي ، وفلوسي لوحدها متنفعش . يعني فلوسي دي محتاجة حد زي عم يارا علشان اقدر اكمل وازودها ، ولما ابقي جوز بنت اخوه هيساعدني والخير اللي هيعم هيكون لينا كلنا انا وانتي والولاد ، فهمتي ؟؟
: انت جاي تضحك عليا ؟؟ دي عشرة سنين يا طارق ، انا فهماك اكتر من نفسك ، مش هتعرف تضحك عليا .
: صدقيني وحياة حبي ليكي ما بكدب عليكي .
: طيب خلاص انا مصدقاك ، اتفضل بقي روحلها وانا مش زعلانة .
: اروح لمين ؟؟ انتي بتهزري ؟؟ حد يسيب القمر ويروح للنجوم !!!!
: اه خلي النجوم تنفعك .
: ورحمة ابويا ما هسيبك الليلة ........
الحلقة ٧
صحيت الصبح حوالي الساعة ٩ وصحيت سهام من النوم وقولتلها : صباحية مباركة يا حبيبتي .
: صباحية اية يا مجنون دا احنا متجوزين من عشرين سنة .
: لكن انتي في عينيا كأنك عروسة جديدة لسه متجوزين البارح .
: صحيح كويس انك جبت سيرة العروسة الجديدة يلا اتفضل روح افطر معاها زي ما بتعمل كل يوم .
: لا يا قلبي هنفطر كلنا مع بعض .
: نعم ياخويا !!! مين دي اللي هنفطر معاها ؟؟
: هنفطر كلنا انا وانتي ويارا والولاد .
: لا طبعا مش هقعد معاها علي سفرة واحدة ابدا .
: ما انا فهمتك بقي اللي فيها وان جوازي منها مصلحة مش اكتر .
: لا يا طارق مش هقدر .
: ولو قولتلك علشان خاطري ؟
: انا عاوزة اعرف لما جوازك منها مصلحة ليه مش اخدتلها شقة بعيد عني وعن عيالي ولا انت عاوز تذلني ؟؟!!!
: قعدتها هنا معاكي علشان مقدرش ابعد عنك يا قلبي .
: نفسي اصدقك بس انا متأكدة انك بتضحك عليا .
: صدقيني لا ، انتي الوحيدة اللي بكلمك من قلبي .
خرجت وجهزت فطور لينا كلنا ودخلت صحيت يارا من النوم وقولتلها هنفطر علي السفرة بره . قالتلي : ازاي مش هينفع . قولتلها : هينفع انا اتكلمت مع سهام وخلاص تقبلت الوضع الجديد ، واخدت يارا من ايديها وخرجنا نفطر بره .
وناديت علي سهام والولاد وقعدنا كلنا نفطر وسط اندهاشهم كلهم . وبعدين قولتلهم : النهاردة انا جهزت الفطور بنفسي لينا كلنا بعد كده كل واحدة هتجهز الفطور والغدا والعشا يوم والتانية اليوم اللي بعده لحد لما ننقل الفيلا واجيب شغالة تقوم بشغل البيت .
رد هادي وقالي : يا بابا بعد بكره اول رمضان يعني هنفطر ونتسحر بس .
قولتلهم : كل سنة وانتم طيبين فرصة في ايام الخير دي اننا نقرب كلنا من بعض ونبقي اسرة واحدة .
ردت سهام وهي بتضحك : خليك فاكر يا طارق احنا معزومين عند بابا اول يوم رمضان زي كل سنة .
قولتلها : ايوه طبعا .
يارا ( بعصبية ) : وانا كمان متعودة افطر مع ماما واخواتي ولازم افطر معاهم اول يوم رمضان .
قولتلها : هنرتب مع بعض ان شاء الله .
وبعد ساعتين اتصلت بيا مامت يارا وعزمتني علي الفطار اول يوم رمضان !!!!!
كنت مش عارف اعمل ايه !! أهل سهام وأهل يارا عزموني في نفس اليوم وفي نفس الوقت !!! وعلشان اخرج من الموقف ده عزمتهم كلهم عندي اول يوم رمضان !!!!!
كان الموقف غريب اوي انا قاعد في النص وسهام واهلها والولاد علي جانب وعلي الجانب التاني يارا واهلها !! وعملتلهم عزومة ملوكي فيها من خيرات ربنا كتير وجهزت لهم كلهم هدايا علشان اسيطر علي الموقف من غير ما يحصل اي موقف مش حلو من اي حد من الطرفين .
بعد ما مشيوا اتصل بيا ايوب صحبي وهناني برمضان ووعدته اننا نتقابل ونسهر مع بعض سهرة من بتوع زمان لحد السحور .
لكن كنت كل يوم بعد الفطار كانت يارا تاخدني ونخرج نتفسح . يارا كانت بتحب ليالي رمضان وكانت بتاخدني ونروح القاهرة القديمة شارع المعز او الحسين والاماكن دي . ولما نرجع تقعد معايا في اوضتنا لحد السحور ، وسهام كانت بتغير فكانت بتعمل نفس اللي بتعمله يارا في ايام تانية .
بدأت في رمضان ارتب شغلي وشركتي الجديدة وعينت سكرتيرة ومدير انتاج ومدير مالي ومدير مبيعات وبعدها اشتريت الماكينات اللازمة للشغل و عينت مجموعة كبيرة من العمال .
كل ده حصل في وقت قياسي علشان الشركة والمصنع يشتغلوا بعد العيد مباشرة .
عدا رمضان من غير ما اتقابل مع ايوب !!!!
اخر يوم في رمضان اتصل بيا ايوب وقالي : كل سنة وانت طيب يا صحبي ، بقيت تنساني !! معلش انا مقدر مشغولياتك !!
قولتله : لا يا ايوب متقولش كده ، مقدرش انشغل عنك ده انت اقرب حد ليا ، دا انت صحبي واخويا بالمناسبة بقي انا نسيت اقولك اني اتجوزت .
ايوب : يا راجل اتجوزت علي ام هادي ؟ ولا طلقتها ؟
: لا لسه مراتي زي ماهي .
: يا رجل تتجوز علي ام عيالك ؟؟ دي استحملتك وانت فقير !!!
: لا يا ايوب محصلش ، قصدك ذلتني وانا فقير وكانت بتعايرني بفقري . واللي خلاها تكمل معايا علشان ابوها كمان فقير فقعدت علشان تربي الاولاد .
: انت ادري يا صحبي انت اللي عايش معاها وتعرفها كويس .
: عارف يا ايوب لو كانت وقفت جنبي في فقري كانت هتبقي عندي في مكانة تانية خالص وعمري ما كنت قدرت ازعلها ولا اتجوز عليها .
: المهم يا طارق العروسة الجديدة مرتاح معاها ؟
: مرتاح اوي معاها يا ايوب .
وام هادي عرفت انك اتجوزت عليها ؟
: ايوه عرفت طبعا ، اصل انا جبت العروسة الجديدة معانا في نفس الشقة .
ايوب ( بتعجب ممزوج بضحك ) : يخربينك !! ده انت فاجر !!
: لا يا صحبي مش فاجر ، بس الفلوس بتعمل اي حاجة .
: لا يا طارق بيتهيألك ، في حاجات الفلوس بتعجز قدامها .
: لا مفيش .
: مسير الايام هتثبتلك ، المهم بقي عملت حاجة لله في رمضان ؟
: يااااه ، نسيت .
: بقيت تنسي كتير يا طارق !! ربنا يصلح حالك .
: هو انا ممكن ألحق اعمل حاجة لله قبل العيد ؟؟
: عمل الخير في اي وقت يا طارق بس في رمضان بيكون ثوابه اكبر . تتعوض ان شاء الله .
: هنتقابل امتي يا ايوب ؟
: لما تبقي فاضي يا صحبي اتصل بيا هتلاقيني جنبك علطول .
وبعد ما فطرنا اخر يوم في رمضان يارا قالتلي : جهز نفسك علشان هنقضي سهرة ليلة العيد برة .
قولتلها : برة فين ؟
: في سهرات وحفلات بتبقي حلوة اوي .
: لا يا حبيبتي حفلتنا هنقضيها هنا .
: طيب نخرج نسهر بره ونرجع نكمل سهرتنا انا و انت يا حبيبي .
سهام كانت بتسمعنا دخلت وقاطعت كلامنا و قالت : طارق انا لسه منزلة الولاد عند ماما علشان تسهر معايا زي كل سنة وجهزت اللب والسوداني والفاكهة والعصاير زي كل سنة .
قولتلها : ماشي احنا نقسم السهرة بينكم انتو الاتنين . هسهر مع سهام لحد نص الليلة وبعدين اكمل الليلة وانام عند يارا !!!
سهام ويارا في نفس واحد : لا ، هتسهر وتنام معايا انا .
بصيت عليهم هما الاتنين وضحكت وقولتلهم : خلاص نسهر كلنا مع بعض .
سهام : اسهر زي ما تحب المهم هتنام عندي الليلادي .
قولتلها : حاضر .
يارا قالت ( بعصبية ) : يعني اول ليلة عيد يا حبيبي واحنا متجوزين هتسيبني انام لوحدي وتنام بعيد عني ؟!!
قولتلها : لأ طبعا .
سهام : يعني ايه ؟
قولتلهم : يعني السرير كبير هنام احنا التلاتة مع بعض !!!!!
الحلقة ٨
سهام : اسهر زي ما تحب المهم هتنام عندي الليلادي .
قولتلها : حاضر .
يارا قالت ( بعصبية ) : يعني اول ليلة عيد يا حبيبي واحنا متجوزين هتسيبني انام لوحدي وتنام بعيد عني ؟!!
قولتلها : لأ طبعا .
سهام : يعني ايه ؟
قولتلهم : يعني السرير كبير هنام احنا التلاتة مع بعض !!!!!
الاتنين سكتوا وكانوا مصدومين من المفاجأة !!!
سهام : ازاي !!!! انت بتستهبل ؟؟؟
: وفيها ايه مش انتو الاتنين مرتاتي ؟؟
ردت يارا : بس مينفعش اللي انت بتقوله ده !!!
سهام : ايوه مينفعش طبعا ده حرام !!
: ليه حرام مش انتي حلالي وانتي كمان حلالي !!! ليه حرام بقي ؟
سهام : ايوه حرام طبعا ولا انت اتجننت ؟!! مش دي عورات !!!
قولتلهم بضحك : لا لا عادي ، دي ليلة عيد وعايزين نفرفرش ، يلا واحدة تلبس احمر والتانية تلبس اسود ونفرفش كلنا .
سهام : اسود !!! دا انت ليلتك سودا ، يلا روح يا حبيبي نام في حضنها انا متنازلة عن حقي النهاردة علشان مش اغضب ربنا .
قولتلها : ده اخر كلام ؟
: ايوه اخر كلام انا مش هغضب ربنا .
: متنسيش ان العيال مش هنا وهتقعدي لوحدك لحد صلاة العيد ؟؟
: عادي مش مهم .
: انا عارفك عندية ولسانك طويل . ماشي يا سهام عاوزة حاجة احنا داخلين اوضتنا ؟
: ايه ده !! من دلوقتي ؟
: ايوه .
: طيب ما نفتح التليفزيون نقعد نتفرج علي اي حاجة شوية وبعدين ادخلوا اتخمدوا جوه .
يارا ( بعصبية ) : شايف يا طارق هي بتتكلم ازاي ؟!!
غمزتلها وقولت : معلش يا حبيبتي هي لسانها طويل بس طيبة اوي .
يارا : طيب يلا بينا يا حبيبي ندخل اوضتنا .
قولتلهم : بصوا انا عندي فكرة حلوة اوي هتعجبكوا انتوا الاتنين .
سهام ( بلهفة ) : ايه هي ؟
: هنشغل قناة التت وانتوا الاتنين تقوموا ترقصوا واللي رقصها هيعجبني اكتر هديها عدية اكتر من التانية . اظن ده بقي مش حرام ؟؟
سهام ( سكتت ثواني بتفكر ) وقالت : ايوه مش حرام ، ماشي انا موافقة بس بشرط اللي رقصها هيعجبك اكتر غير العيدية هتنام كمان في اوضتها . قولت ايه ؟
يارا : لا يا حبيبتي ، موضوع النوم ده انتي خلاص اتنازلتي عنه ، خلينا بس في العيدية .
سهام ( بضحك ) : تبقي خايفة اغلبك !!!
يارا : تغلبي مين يا حبيبتي !!! دا مفيش واحدة تغلبني في الرقص .
قولتلهم : طيب كفاية كلام بقي وروني شطارتكم .
دخلت كل واحدة فيهم اوضتها وغيرت هدومها ، وشغلتلهم قناة التت وقعدوا الاتنين يرقصوا اكتر من ساعتين ،وانا قاعد حاسس اني هارون الرشيد .
وبعد ما تعبوا الاتنين قالولي الاتنين في نفس واحد : ها مين فينا اللي كسبت ؟
: بصراحة انتوا الاتنين تجننوا ، انتوا الاتنين تعادل .
سهام : يعني بعد كل التعب ده تقولي تعادل ؟
: المهم اننا انسبطنا يا حبيبتي .
يارا مسكت ايدي وقومتني وقالتلي : يلا يا حبيبي نكمل سهرتنا جوه .
بصيت لسهام وقولتلها : ها ؟ قولتي ايه ؟ راجعي نفسك ؟
سهام سابتنا وجريت دخلت اوضتها .
دخلت مع يارا اوضتنا وقعدنا نضحك ونهزر وانا متأكد ان سهام بتتصنت عليا بره .
وبعدين روحت ماسك يارا وقرصتها راحت صرخت وقالتلي : بتعمل ايه يا مجنون ؟
سهام خبطت الباب وقالتلي : لم نفسك شوية يا قليل الادب .
سهام سابتنا وجريت دخلت اوضتها .
دخلت مع يارا اوضتنا وقعدنا نضحك ونهزر وانا متأكد ان سهام بتتصنت علينا بره .
وبعدين روحت ماسك يارا وقرصتها راحت صرخت وقالتلي : بتعمل ايه يا مجنون ؟
سهام خبطت الباب وقالتلي : لم نفسك شوية يا قليل الادب .
وقفت ورا الباب وقولتلها : وهو مش حرام يا حجة سهام لما تتصنتي علي واحد ومراته في اوضة النوم ؟؟؟ يلا روحي نامي في اوضتك .
سهام : طلقني يا طارق .
: حاضر يا حبيبتي هطلقك بعد العيد .
: لا طلقني دلوقتي .
: لا والله دلوقتي مش فاضي .
: طيب هتطلقني الصبح .
: الماذون بيبقي قافل في العيد .
: انت بتهزر !!!
: ايوه .
: لو مش طلقتني دلوقتي هصوت والم عليك الناس .
: بطلي يا مجنونة انا خارج .
خرجت من الاوضة وقولتلها : انتي عاوزة ايه دلوقتي ؟
: تطلقني .
: ما انا قولتلك بعد العيد .
: انا مش بهزر انا بتكلم جد .
خرجت يارا وبدأت تعلي صوتها وكانوا خلاص قربوا يضربوا بعض الاتنين !!!
قولتلهم : بس خلاااص ، لو مش سكتوا هطلقكم انتوا الاتنين ، انا هنام هنا علي كنبة الصالون !!!!! يلا بقي كل واحدة تروح تنام في اوضتها .
وبعد ما قضيت نص الليلة هارون الرشيد قضيت نصها التاني الزوج العازب !!!
صحيت الصبح لقيت نفسي نايم في الصالون افتكرت اللي حصل بالليل .
ولقيت صلاة العيد راحت عليا وكان هادي واخواته رجعوا من عند جدهم ، فطرنا كلنا و قولتلهم هنخرج كلنا نتفسح ولو عملتوا مشكلة مع بعض هسيبكم انتوا الاتنين في الشارع وهكمل الفسحة من العيال ، قولتوا ايه ؟
يارا قالت : انا عندي فكرة ايه رايك تخرج انت مع سهام والاولاد طول النهار وبعدين نخرج انا وانت بالليل ، اظن كده قسمة العدل ؟
وفعلا هو ده اللي حصل ، تاني يوم اتصلت بأيوب واتقابلنا وقعدت مع ايوب طول النهار .
حاولت اعطي ايوب فلوس ولكنه رفض !!
خلص العيد وبدأ المصنع يشتغل .كنت عامل شرط ان العمال يكونوا متعلمين . وكنت عاملهم مرتبات عالية عن المصانع والشركات المماثلة .
كنت بدخل مكتبي واشغل المكيف واقعد قدام الكاميرات واراقب شغلهم وقدامي قهوتي وحاطط رجل علي رجل .
كنت بكون سعيد اوي لما الاقي حد من العمال يعمل حاجة غلط واوقفه قدامي واهزئه وهو غصب عنه بيسكت علشان اكل عيش اولاده !!!
ياما حصل معايا نفس الشيئ زمان وكنت بسكت علشان اكل عيش عيالي ، حسيت اني باخد حقي بعد ذل وعذاب سنين كتير !!!
بعد شهرين من شغل المصنع كان كل العمال بيخافوا مني و بيسموني المرعب .
اكيد كانوا بيشتموني من ورا ضهري لكن مش مهم ، المهم انهم قدامي بيترعبوا مني كبيرهم وصغيرهم .
كان احساس جميل جدا لما تشوف راجل كبير واقف قدامك مرعوب !!!
مر شهرين علي الشغل والمصنع بيعمل انتاج لكن مفيش بيع !!!
وقبل عيد الاضحي بيوم اتصل عليا ايوب صحبي واول لما رديت عليه ضحك اوي وقالي : كنت عارف اني هلاقيك هنا ومش سافرت .
قولتله : اسافر فين ؟ هو انا قولتلك اني هسافر ؟
: كان في واحد صحبي كان بيقولي لو بقيت غني هروح احج !! و الحج اهو بكره بس يا خسارة نسي .
: لا يا ايوب انا مش نسيت بس الايام دي الشغل لسه ملخبط والمصنع بيعمل انتاج ومش بيبيع !!! قولت أأجل الحج للسنة الجاية تكون اوضاعي كلها استقرت .
: ايوه يا صحبي انا عارف !! ربنا يصلح حالك .
: صوتك باين عليه انك زعلان . انت زعلان مني ؟
: لا يا طارق انا زعلان عليك .
: زعلان عليا ؟؟؟ غريبة اوي !! زعلان عليا ليه ؟؟ ده انا في نعمة مكنتش احلم بيها .
: ربنا يزيدك من نعيمه بس يا رب تصونها .
: طيب قولي زعلان عليا ليه ؟؟!!
: هبقي اقولك بعدين .
: المهم عاوزين نتقابل يا ايوب .
: انت عارف يا طارق وقت ما تحتاجني اتصل عليا هتلاقيني جنبك .
بعد العيد مباشرة نقلنا للفيلا الجديدة . كانت فيلا صغيرة دورين بجنية مش كبيرة و بدون حمام سباحة .
كان نفسي الفيلا يكون فيها حمام سباحة زي اللي بشوفهم في التليفزيون !! قولت لنفسي معلش الفيلا دي مؤقتة ، لما الشركة والمصنع يشتغلوا كويس اشتري وقتها الفيلا اللي في خيالي .
بعدها باسبوع يارا قالتلي : علفكرة انا حامل يا حبيبي .....
الحلقة ٩
بعدها باسبوع يارا قالتلي : علفكرة انا حامل يا حبيبي ، فرحت اوي كأني اول مرة اخلف .
قالتلي : بصراحة يا طارق انا خايفة اوي .
قولتلها : معقول تخافي وانا موجود !!! خايفة من ايه يا قلبي ؟
: خايفة لما مراتك تعرف تعمل فيا حاجة ، اصلها دي جامدة ومفترية .
: لا ابدا دي طيبة بتطلع وتنزل علي مفيش متاخديش منها الا لسانها الطويل وبس .
: لا يا طارق ، انا بخاف منها اوي واحيانا بحس منها انها هي صاحبة البيت وانا ضيفة عندها .
: لا يا حبيبتي انتي زيك زيها واكتر كمان . عارفة ليه ؟
: ليه ؟
: علشان انتي حبيبتي اللي في قلبي .
: انت بتضحك عليا .
: لا وحياتك عندي ابدا ، دي الحقيقة عمري ما حبيت غيرك .
: بطل تضحك عليا وخلينا في المهم بقي .
: نعم يا قلبي .
: انت لازم تكتب الفيلا باسمي .
: نعم يا ختي !!! لا طبعا .
: شوفت بقي انك بتضحك عليا علشان عارف اني بحبك وبصدقك .
: انا بحبك اه ، انما اكتب الفيلا باسمك لا مينفعش .
: ليه بقي مينفعش ؟
: هو كده ، مش هينفع .
: يعني عاوزني انا وابنك نفضل حاسين اننا اغراب في بيتنا !!
: ما انا قولتلك انتي زيك زيها بالظبط ، لزمتها ايه بقي اكتب الفيلا باسمك ؟؟!!
: طيب خلاص انا اسفة ، انا غلطانة وعمري ما هطلب منك حاجة تاني .
: يا حبيبتي اطلبي زي ما انتي عايزة بس ......
: خلاص خلاص ، مش عايزة حاجة ، اتفضل بقي علشان الحمل تاعبني وعاوزة انام .
وفضلت يارا زعلانة مني اكتر من اسبوع لحد ما في الاخر كتبتلها الفيلا باسمها بشرط انها مش تعرف سهام والاولاد .
بدأت عجلة الشغل تدور وبدأت الشركة تبيع جزء من منتجاتها وبدأت انشغل مع مدير المبيعات في اكتساب المزيد من العملاء .
وفي يوم سهام اتصلت بيا و قالتلي : انا عاوزاك في موضوع مهم اوي .
: خير ؟
: ابنك هادي ؟
: ماله ؟
: مش بيذاكر .
: لكن انا كل ما اشوفه بلاقيه بيذاكر !!
: احيانا بيذاكر واحيانا بيمثل قدامنا انه بيذاكر .
: وليه بيمثل انه بيذاكر ؟؟ هينشغل بأيه غير المذاكرة !! ده امتحانات الثانوية العامة باقي عليها اقل من شهر !!!!!
: انا مش عارفة مشغول بايه ، مش بيسيب الموبايل من ايده .
: واخواته اخبار مذاكرتهم ايه ؟
: بيذاكروا يا طارق بس مش زي الاول . العيال مشغولين علطول بالانترنت والموبايلات .
: لا الكلام ده مينفعش ، اول لما ارجع البيت هتكلم معاهم .
وبعد حوالي ساعة اتصلت بيا يارا وقالتلي : الحقني يا طارق
اتصلت بيا يارا وقالتلي : الحقني يا طارق ؟
: مالك في ايه ؟
: انا تعبانة اوي وعندي نزيف حاسة ان البيبي هينزل .
: انا هطلب الدكتور وجايلك حالا .
اتصلت بالدكتور و نزلت جري من الشركة و اخدت الدكتور وروحنا البيت بسرعة .
لكن للاسف الحمل كان نزل وحالة يارا كانت صعبة اضطرينا ننقلها للمستشفي ، وفضلت جنبها كام يوم لحد ما خرجت من المستشفي .
اتصلت بأيوب علشان اعصابي كانت تعبانة وحزين جدا لأني كان نفسي اخلف من يارا و كمان كان نفسي يبقي عندي عيال كتير مادام خير ربنا كتير .
اتصلت بأيوب وقولتله : انا محتاجلك اوي يا ايوب .
ايوب : حاضر نتقايل يا طارق حتي تبقي فرصة علشان اودعك !!!
: تودعني !!! ليه ؟
: جالي عقد عمل بره بمرتب كويس ، قولت اسافر سنتين تلاته اعمل حاجة للعيال .
: انت فرحتي وفي نفس الوقت زعلتني ، هلاقي مين جنبي بعد كده ؟؟ ده انت اقرب حد ليا .
: معلش مش هغيب عليك وخلال ال ٣ سنين هرجع اجازة كل سنة نبقي نتقابل . وبعدين يا طارق هنتكلم فيديو علي الانترنت في اي وقت .
: ربنا يوفقك يا صحبي ، طيب ما تشتغل معايا بنفس المرتب اللي هتاخده هناك وتبقي جنب ولادك احسن من الغربة ؟؟
: لا يا طارق سامحني مش هينفع . سيبني علي راحتي وانا لو احتاجتلك في اي وقت هقولك بنفسي .
: تفكيرك غريب يا ايوب !! عموما ربنا معاك ويوفقك دايما .
بدأت اهتم اكتر بالشغل لأني كنت خايف من الفشل والرجوع للفقر تاني لدرجة ان الشغل كان بياخد كل وقتي .
مرت الايام والاولاد امتحنوا وظهرت النتيجة وكانت اول صدمة ان درجات ميادة وزياد كانت ضعيفة
جدا عن السنين اللي فاتت ، اما الصدمة الاكبر فكانت في نتيجة هادي في الثانوية العامة لأني كنت متوقع انه يجيب درجات تدخله كلية طب حسب مستواه لكن اللي حصل ان درجاته لحق بيها كلية تجارة بالعافية !!!!!!!
سادت حالة من الحزن في البيت كله خصوصا امه سهام لأن كلنا كان املنا كبير ان هادي يكون دكتور .
رغم حزني لكني حاولت اخفف الصدمة عنهم وقولتلهم انه لما يتخرج من كلية تجارة هيقدر يساعدني في شغلي علشان يمسك الشغل من بعدي .
هادي دخل كلية التجارة وعدت سنة والتانية وكان بييجي المصنع والشركة لكن علي فترات بعيدة ، واخواته زياد ومياده دخلوا ثانوي .
وحبي ليارا زاد كل يوم اكتر من اللي قبله رغم انها مش حملت تاني لكن حبها في قلبي زاد بدرجة كبيرة .
لدرجة ان سهام عرفت واتأكدت من ان حبي ليارا اكبر منها بكتير .
لكن سهام كانت بتحب الفلوس اكتر من اي حاجة تانية علشان كدة استمرت معايا خصوصا بعد ما شغلي وشركني بدأوا ينجحوا وبدأت الفلوس معايا تزيد .
وعلشان كنت انا دايما مشغول يارا كانت بتقضي وقت طويل مع اصحابها في النادي !!!
ورغم حبي الكبير ليارا لكن كنت بغير عليها جدا .وبدأت اشك فيها بسبب انشغالها علطول مع اصحابها !!!
كنت احيانا بروح النادي علي فجأة علشان اعرف بتقعد مع مين وبتكلم مين !!! وكنت احيانا بعمل اكونتات مش حقيقية علي الفيس واعاكسها علشان اشوف رد فعلها .
وفي يوم روحت النادي كانت يارا قاعدة مع صاحبتها هدير وجوزها امجد ، اتعرفنا علي بعض بسرعة خصوصا لما عرفت ان امجد بيشتغل في مجال قريب جدا من نفس مجال شغلي !!!
وفي يوم تليفوني رن برقم غريب و
انا طول عمري مش بحب ارد علي الارقام الغريبة ، لكن العجيب ان اللي كان بيتصل بيا هي هدير صاحبة يارا الانتيم والاعجب الموضوع اللي كلمتني فيه .......
الحلقة ١٠
وفي يوم تليفوني رن برقم غريب و
انا طول عمري مش بحب ارد علي الارقام الغريبة ، لكن العجيب ان اللي كان بيتصل بيا هي هدير صاحبة يارا الانتيم والاعجب الموضوع اللي كلمتني فيه !!!!!
هدير : مساء الخير يا طارق .
: مساء النور ، مين معايا ؟
: انا هدير صحبة يارا مراتك .
: ايوه ، اهلا مدام هدير ، اخبارك ايه ؟
: انا محتاجة اتكلم معاك ضروري .
: خير !! اتفضلي .
: لا مش هينفع في التليفون لازم اشوفك .
: طيب تمام . شوفي نتقابل امتي .
: ممكن كمان ساعة ؟
: تمام ، نتقابل في النادي ؟
: لا بلاش النادي علشان مش عاوزة يارا او امجد يشوفونا .
: انتي كده قلقتيني . طيب ممكن تديني فكرة عن الموضوع .
: لما نتقابل احسن ، ممكن نتقابل في الشركة عندك ؟ ولا فيها مشكلة ؟؟
: تمام انا في انتظارك .
: بعد ساعة بالظبط هدير كانت عندي في المكتب ، وكان واضح عليها التوتر والعصبية بشكل كبير .
اول ما قعدت قالتلي : امجد جوزي بيخوني !!!
انا اندهشت انها جاية تكلمني في حاجة زي كده !!! قولتلها : طيب ارتاحي الاول واهدي وبعدين نتكلم .
وبعد ما بدأت تهدا قولتلها : مش ممكن تكوني فاهمة غلط ؟؟
قالتلي : لا انا متأكدة .
: طيب انا ازاي ممكن اساعدك ؟
: لو عرفت بيخوني مع مين هتتجنن !!
: مع مين ؟
: مع يارا !!!!!
: انتي اتجننتي ؟؟ ايه االي بتقوليه ده !!!!!!
: هي دي الحقيقة ، انا اتأكدت بنفسي .
: لا ، انتي كدابة ، يارا عمرها ما تعمل كده . مستحيل .
: بقولك انا اتأكدت بنفسي ، وعموما لو مش عاوز تصدق براحتك خليك كده نايم علي ودانك .
: انتي اتأكدتي ازاي ؟
: انا بدأت اشك من حوالي اسبوعين لما رجعت البيت لقيتها موجودة عندي وامجد في البيت علي غير عادته ، واول لما دخلت كان باين عليهم الارتباك ، ويارا قالتلي انها كانت عاوزاني وحاولت تتصل بيا وموبايلي كان مقفول ، وامجد قالي انه رجع البيت لأنه كان تعبان .
: ممكن تكون صدفة ، انتي ليه فهمتي الموقف ان كان في حاجة غلط ؟
: دي كانت بداية شكي فيهم بس ، لكن بعد كده لما بدأت اراقب امجد عرفت انه بيكلمها كتير من ورايا !! لحد ما في يوم عملت نفسي نايمة وسمعته بيكلمها كلام حب وكان فاكرني نايمه .
: انتي متأكدة ؟؟
: ايوه زي ما انا متأكدة من اسمي .
: وواجهتيه ولا لأ ؟
: لأ .
: بصي يا مدام هدير الصراحة انا مستحيل اصدق ان يارا تعمل كده .
: طيب انا اسفة اني حبيت اعرفك اللي مراتك بتعمله من وراك . انت حر لو قابل كده او لو مش مصدق وتفضل كده نايم علي ودانك ، استأذن انا ماشية .
: لأ استني الاول ، بفرض ان انا صدقتك عارفة ده معناه ايه ؟
: ايوه عارفة .
: معناه اني هقتلهم هما الاتنين !!! انتي جاية تقوليلي كده علشان اقتلهم انا وتبقي انتي في نفس الوقت انتقمتي لنفسك من جوزك وصحبتك اللي خانوكي ؟
: لا لا لا ، وليه تضيع نفسك وتضيع مستقبلك ؟
: اومال هعمل ايه ؟ اديهم مكافأة مثلا ولا اعملهم جايزة ؟؟؟
: لأ . هتعمل حاجة تانية خالص .
: اعمل ايه ؟
: انا وانت هنعمل نفس اللي هما عملوه .
: نعم !!! انتي عارفة معني اللي انتي بتقولي ايه ؟
: ايوه طبعا . وهنبدأ دلوقتي حالا ...
: اومال هعمل ايه ؟ اديهم مكافأة مثلا ولا اعملهم جايزة ؟؟؟
: لأ . هتعمل حاجة تانية خالص .
: اعمل ايه ؟
: انا وانت هنعمل نفس اللي هما عملوه .
: نعم !!! انتي عارفة معني اللي انتي بتقولي ايه ؟
: ايوه طبعا . وهنبدأ دلوقتي حالا ...
: هنبدأ ايه ؟؟ انتي مجنونة !!
: ايوه ، زي ما هما خانونا هنخونهم ، هتيجي معايا دلوقتي ؟؟ ولا هترضي تكون مغفل ؟؟؟!!
معرفش اقنعتني ازاي ونزلت معاها وروحنا بيتها و قضينا وقت في بيتها كأننا متجوزين !!!!!
وبعدها قالتلي : زي ما هما استغفلونا استغفلناهم وكده نبقي خالصين .
قولتلها : انا مش عارف طاوعتك ازاي !! ده انا متجوز اتنين اجمل من بعض !! ازاي عملت كده ؟؟!!
: يعني اجمل مني يا حبيبي ؟؟
: انتي ضميرك مش تاعبك ؟؟؟
: خلاص يا طارق متفكرش كتير ، احنا مش بدأنا بالغلط احنا كنا بناخد حقنا منهم بس . احنا مش فعل ، احنا رد فعل .
: انتي انسانة غريبة !! ومبدئك غريب اوي !! كلامك كله غلط في غلط .
نزلت من عندها وضميري بيأنبني ، لكن في نفس الوقت كنت بفكر ازاي يارا تخوني ؟ وبفكر هعمل معاها ايه ؟
قعدت علي كافية لوحدي بفكر هل اطلقها ولا اموتها مش عارف اعمل ايه ؟ خصوصا اني كاتب الفيلا باسمها غير ه مليون جنية مؤخر !!
ساعتها افتكرت ايوب صحبي . كان هو اقرب حد ليا . لو كان موجود دلوقتي كان هو الوحيد اللي كنت هقدر احكيله واخد رأيه اعمل ايه !!
وفي النهاية قولت لنفسي لازم اراقبها لحد ما اثبت خيانتها علشان اقدر اخد حقي منها .
روحت الفيلا وكانت سهام والولاد هناك وكمان يارا كانت هناك .
كان واضح عليا اني مهموم و سرحان وبفكر لدرجة ان كلهم سألوني عن السبب .
بعد ما طمنتهم ، يارا اقترحت عليا اننا نخرج نروح اي مكان .
انا وافقت وخرجت معاها وروحنا قعدنا في مكان هادي .
وبدأت امثل قدامها ان عندي مشكلة في الشغل .
وبعدين بدأت اكلمها عن الاصدقاء في حياتنا و ان اقرب صاحب ليا اسمه ايوب ومسافر دلوقتي وبعدين بدأت اسألها عن اصحابها .
لحد ما جت سيرة هدير وامجد . بدأت اسألها ....
: انتي تعرفي هدير من امتي يا يارا ؟
: من فترة قريبة حوالي شهرين او تلاتة .
: معقول ؟ دا من كلامك عنها كنت فاكر انك تعرفيها من سنين طويلة !!
: انا عرفتها من قريب لكن حبتها اوي كأني اعرفها من زمان .
: وامجد ؟
: ماله ؟
: تعرفيه من امتي ؟؟
ضحكت يارا وقالتلي : اكيد يعني من شهرين تلاتة زي هدير .
: اتعرفتي عليهم في يوم واحد ؟؟
: لا انا اتعرفت علي هدير وهي عرفتني علي جوزها بعدها بحوالي اسبوع .
: ومين معاكوا تاني في الشلة ؟
: لا ، هدير ليها شلة اصحاب بس انا مش برتاحلهم .
: برتاحي لهدير وجوزها بس ؟؟
: ايوه ، هدير ظريفة جدا ودمها خفيف ، انا صاحبتها رغم ان في ناس حذروني منها بس اكتشفت انهم كلهم كدابين .
: حذروكي منها !!!!! حذروكي منها ازاي ؟؟
: متشغلش بالك يا حبيبي ، سيبك بقي من سيرة هدير وقولي ..
: لا استني الاول قوليلي حذروكي منها قالولك ايه ؟؟؟
: علشان يعني في اشاعات ان هدير بتعرف رجالة وكدة ، فهمت ؟؟؟
: بتعرف رجالة !!!!
: دي اشاعات بس مش حقيقة .
: وانتي عرفتي ازاي انها اشاعات مش حقبقة ؟؟؟
: انا بعرفها اهو ومش لاحظت اي حاجة من اللي بيقولوها دي .
وفجأة جاتني رسالة علي الواتس من رقم غريب !!
فتحت الرسالة كانت عبارة عن فيديو ، ولما فتحت الفديو كان قلبي هيقف من الصدمة !!!!!
الحلقة ١١
فتحت الرسالة كانت عبارة عن فيديو ، ولما فتحت الفديو كان قلبي هيقف من الصدمة !!!!!
الفديو كنت ظاهر فيه اثناء علاقتي مع هدير !!!
اتصورنا ازاي ومين اللي صورنا ؟؟ ومين اللي اخد الفيديو ده وبعتهولي ؟؟
حاولت اتصل بالرقم لكن كان مغلق .
شكلي اتغير وبان عليا الارتباك ، ولما سألتني يارا قولتلها لازم نمشي دلوقتي .
اخدتها وروحتها الفيلا و خرجت لوحدي وحاولت طول الليل اني اتصل بالرقم لكن كان مغلق .
روحت البيت وكنت متوتر جدا وقعدت في اوضة لوحدي ومش عارف اعمل ايه وبفكر في كل حاجة ومش قادر اوصل لأي حاجة لحد الصبح .
اتصلت علي هدير علشان اقولها اننا اتصورنا ، لكنها كانت نايمة ومش بترد .
وبعد عذاب طويل الرقم اللي بعتلي الفديو انفتح .
اتصلت علي الرقم رد عليا صوت راجل !!
قولتله : انت مين ؟ وايه الفيديو االي بعتهولي ده ؟
قالي : ايه رأيك في الفيديو يا طارق ؟ ( وصوت ضحكة شيطانية ) بصراحة كنت رائع ، لو عاوز تذيع قول ذيع ؟
: انت مين ؟ وعاوز ايه ؟
: تخيل يا طارق لو رفعتلك الفيديو بتاعك ( صوت ضحكة شيطانية ) هتبقي ترند وتتشهر ، ايه رأيك نذيع ؟؟؟
: اخلص وقول انت مين وعاوز ايه ؟
: انا امجد !!!!!!
حسيت بذهول لدرجة اني مش قادر انطق ولا عارف هقول ايه !!!!
وبعدين قالي : مالك يا طارق اتلخبطت ليه ؟؟ مفيش حاجة خالص .انا مش زعلان .
كان عقلي هيطير من كلامه !!!!! قولتله : طيب انت عاوز ايه ؟؟
قالي : عاوز اقعد معاك نتفاهم !!
: نتفاهم في ايه ؟؟
: لما نقعد نتكلم هتفهم كل حاجة !!!
: لأ ، مش هقعد معاك . لو عاوز تتكلم اتكلم ولو مش هتتكلم اقفل .
: انا معنديش مشكلة ، هقفل معاك وبعد ساعة هتكون بقيت تريند يا طارق .
: من كلامك واضح انك عاوز فلوس .
: لا لا لا ، عاوزك في حاجة اهم من كده شوية .
: قول عاوز ايه واخلص .
ايه رايك انا اتجوز يارا وانت تتجوز هدير ؟
: بتقول ايه ؟؟؟ ولزمتها ايه اللفة دي كلها ؟؟!!!
: علشان تواقق يا طارق .
: انا مش موافق ومش هطلق يارا .
: ومين قالك تطلقها ؟
: يعني انت هتتجوزها وهي لسه مراتي ؟؟؟!!
: هجيبلك من الاخر يا طارق ، انت سمعت عن تبادل الزوجات ؟
: ااااااه ، انا فهمتك يا حقير يا سافل يا ابن ال ........
: من غير غلط يا طارق ، ده احنا هنبقي نسايب .
قفلت التليفون في وشه وانا في قمة الدهشة !!! انا سمعت عن القذارة دي قبل كده لكن مكنتش اتخيل انهم موجودين فعلا !!
اتصلت بهدير علشان اقولها علي اللي جوزها قاله ...
: شوفتي يا هدير ؟
: في ايه ؟ طيب قول صباح الخير الاول .
: في كاميرا في اوضة نومك وجوزك صورنا وعرف اني كنت معاكي البارح !!! وتخيلي السافل يطلب مني ايه ؟؟
: طلب ايه ؟
: بيقولي تبادل زوجات يعني انا معاكي وهو معاها !!!
: وفيها ايه يا حبيبي ؟
: يعني انتي بالنسبالك مش رافضة ؟؟؟
: اه عادي ، ما احنا بنعمل كده كتير . وبصراحة يارا جامدة و مكنتش هي هترضي ولا انت هترضي الا بالطريقة دي .
: يعني كنتوا بتورطوني في الاساس علشان يارا !!! واشمعني يارا يعني ؟؟
: علشان جامدة وهتجيب زباين كتير .
: اه يا ولاد ال .........
: بلاش غلط بقي ، ولا انت عاوز امجد ينشر الفيديو ؟؟
قفلت التليفون في وشها وانا حاسس اني بحلم !! مش مصدق اني اكون وقعت في ورطة بالشكل ده !!!مكنش قدامي الا حل واحد بس .....
الحلقة ١٢
روحت بسرعة علي قسم الشرطة وقعدت مع الظابط وهحكيت له كل اللي حصل مع هدير وجوزها . وطلبت منه انه يأمن ليا عدم نشر الفيديو .
الظابط قالي انه كان عارف بموضوع هدير وجوزها وبيراقبهم من فترة لكن كان مفيش دليل علشان يقبض عليهم متلبسين . وطلب مني اني اسايرهم واحاول اخد تسجيل صوتي منهم كدليل ضدهم .
وفعلا اتصلت بأمجد وبدأت استدرجه في الكلام وقدرت اخد منه تسجيل فيه اعتراف باللي بيعمله هو و هدير . وبعد ايام تم القبض عليهم .
يارا لما عرفت بالموضوع اتصدمت وكانت مش مصدقة لحد ما شافت خبر القبض عليهم وتفاصيل القضية في الصحف وعلي السوشيال ميديا .
بعدها قولت ليارا انها مش بتعرف تختار اصحابها وقولتلها مفيش خروج الا معايا !!!
يارا زعلت من كلامي ورفضت لكن مع تصميمي وافقت وهي متضايقة لانها كانت متعودة علي الخروج كتير لوحدها .
بدأت اخرج معاها في كل مكان واتعرفت علي اصحابها كلهم .
لدرجة اني كنت كتير بسيب الشغل لهادي ابني .
لما اتعرفت علي صحبات يارا واجوازهم عرفت انهم كلهم ( ولاد ناس ) ومحترمين لكن عيبهم انهم كانوا بيحبوا السهر والحفلات ، وسهراتهم كانت في الملاهي الليلية !!!
ورغم ان جو السهر والفرفشة ده كان جديد بالنسبالي لكن حبيته اوي لدرجة اني اتعودت عليه و كنت برجع البيت كل يوم الساعة ٦ او ٧ الصبح وبنام لبعد العصر !!!
وكنت بروح للشركة والمصنع اخر اليوم اقعد ساعة اتابع فيها الشغل وامشي . وكنت معتمد ان ابني هادي يتابع الشغل في غيابي .
شوفت في الايام دي حاجات في الدنيا عمري ما عرفتها قبل كده !!!
ورغم ان سهام كانت لسه مراتي لكن مع انشغالي الدايم بيارا و مع الوقت بدأت العلاقة بيني وبينها تقل لدرجة انها بقيت عايشة للاولاد بس وبطلت تسألني اتأخرت ليه ولا كنت فين ولا الكلام ده !! حتي بطلت تطلب مني اي حاجة .
صحيح كان من اسباب جوازي مرة تانية اني اذلها ذي ما ذلتني ايام فقري لكن كنت في بداية جوازي من يارا بحاول اعدل بين الاتنين لكن الظاهر ان مع الوقت مقدرتش احافظ علي العدل بينهم !!!
وفضل الحال بنفس الوضع لحد ما في يوم روحت الشركة اخر النهار اتابع الشغل لقيت (عبد الستار) عامل عندي بيطلب مقابلتي !!!
دخل عبد الستار وقولتله : خير يا حج كنت طالب تقابلني بخصوص ايه ؟
: يا طارق بيه كنت عاوز حضرتك بخصوص بنتي همس .
: مالها همس ؟؟ مش دي بنتك اللي شغالة معانا هنا في المصنع ؟؟
: ايوه .
: مالها همس ؟ المرتب مش عاجبها ؟
: لا حضرتك .
ووقف الرجل باصص في الارض و ساكت مش عارف يتكلم .
قولتله بصوت عالي : ما تقول يا عم في ايه ؟ هو انت سايب شغلك وجاي تضيع وقتي علشان تقف قدامي ساكت !!!!
قالي : ابنك هادي ضحك علي بنتي ......
الحلقة ١٣
قولتله بصوت عالي : ما تقول يا عم في ايه ؟ هو انت سايب شغلك وجاي تضيع وقتي علشان تقف قدامي ساكت !!!!
قالي : ابنك هادي ضحك علي بنتي !!!
قلبي انقبض بشكل اول مرة يحصل في حياتي ،
قولتله : ضحك عليها ازاي ؟
: زي اي شاب بيضحك علي بنت وبنتي حامل منه دلوقتي .
: انت بتستعبط يا راجل انت !! هادي ده عيل مكملش ١٩ سنة . روح شوف بنتك غلطت مع مين بعيد عن ابني ، واخرج خد حسابك انت وبنتك و مشوفش وشك هنا تاني .
: انا مش بكدب ولا بنتي بتكدب وابنك نفسه معترف باللي حصل .
: يبقي اكيد انت وبنتك ضحكتوا علي الواد .
: يا بيه حرام عليك كده ، اسأل ابنك الاول وبعدين قول اللي انت عاوزه .
: هات من الاخر وقول عاوز ايه ؟
: عاوز ابنك يصلح غلطته ويتجوز البنت .
: نعم !!! انت اتجننت يا راجل انت !!! ابني انا يتجوز بنتك انت يا راجل يا جعان ؟!!! امشي اطلع بره ومشوفش وشك هنا تاني .
: لا مش هطلع بره الا لما اخد حق بنتي .
طردت الرجل من مكتبي ورجعت الفيلا وسألت هادي عن الكلام اللي الراجل قاله ...
: انت تعرف البنت اللي اسمها همس اللي قي الشركة ؟
: ايوه يا بابا .
: ايه رايك فيها ؟
: كويسة .
: وانت عملت معاها ايه ؟
سكت هادي وارتبك شوية وبعدين قال : ولا حاجة يابابا ، هعمل معاها ايه ازاي يعني ؟
رده استفزني وعرفت ان كلام الرجل حقيقي فضربته وقولتله : انت هتستهبل عليا يا ابن ....
جري هادي و كان هيخرج بره الاوضة ، ،لحقته سهام وجت جري : في ايه ؟؟ في ايه يا طارق ؟؟
: ابنك يا هانم ضحك علي بنت في الشركة وودانا في داهية .
: لأ ابني ميعملش كده .
: اسأليه اهو قدامك . بعد ما كنت بقول ابني هيبقي دكتور ، ابنك اتغير ويادوب لحق كلية تجارة بالعافية قولت وماله اهو علشان يساعدني في شغلي انما ابنك انحرف ووصلت به للسفالة والانحراف ده ؟؟؟ !!!!
: خلاص يا بابا انا بحبها وهتجوزها .
: تتجوز مين يا حيوان ؟ انا يبقي نسيبي عبد الستار !!! الظاهر انت مش عارف انت ابن مين ؟؟!!
ردت سهام : لا يا طارق الظاهر انت اللي نسيت انت مين !!! والفلوس عميت عينيك وخلتلك تتجبر وتظلم كل الناس حتي اقرب الناس ليك . طايح في الدنيا ومفيش حد همك وكأن مفيش حد معاه فلوس غيرك !!! اللي عطاك الفلوس دي في لمح البصر قادر ياخدها منك بردو في لمح البصر .
: والنبي بطلي تتفلسفي ، انتي بقيتي تقري قصص كتير ولا بتتفرجي علي افلام ومسلسلات ؟؟ !!الواقع حاجة تانية خالص .
: عارف الواقع بيقول ايه !! الواقع بيقول انك من ٣ سنين بس كنت جعان و مش عارف تصرف علي عيالك ولا عارف تكفي بيتك لكن كنا عايشين وكان ولادنا بينضرب بيهم المثل في الاخلاق والتعليم ، لكن لما جتلك الفلوس صدقت نفسك و نسيت اصلك الجعان .
رديت عليها بكل صرامة وطلقتها !!
مشيت سهام واخدت العيال معاها وفضيت الفيلا عليا انا و يارا .
منعت هادي يروح الشركة وروحت انا من بدري علشان اتابع الشغل بنفسي لكن اللي حصل ان بعد ما طردت الرجل اللي اسمه عبد الستار بره مكتبي ، العمال والموظفين كلهم عرفوا اللي حصل .
وبدأوا يتكلموا علي اللي حصل و بعدها بدأ العمال والموظقين في تقديم استقالتهم من الشركة والمصنع لدرجة ان في خلال ايام المصنع وقف .
لكن روح التحدي عندي كانت اقوي من اي ظروف ، عملت اعلان تاني عن طلب عمال وموظفين ، لكن كل ما عمال او موظفين يدخلوا المصنع او الشركة كانوا بعد يومين تلاتة يسيبوا الشغل ويمشوا !!!!
لدرجة اني بدأت اشك ان في حد عمل سحر بوقف الحال للمصنع والشركة !!!!!!
وبدأت الشركة تتأخر في تنفيذ العقود مع العملاء بسبب وقف الانتاج !!! وبدأت في تأجيل التسليم لبعض العملاء والبعض الاخر طالب الشركة بدفع الشروط الجزائية .
وفي يوم اتفاجأت بطلب حضور للنيابة باسم هادي ابني !!!!!
طبعا كانت صدمة لكن عرفت ان همس قدمت بلاغ بتتهم ابني هادي بأنه استغل تواجدها في مكان عملها في شركة والده وقام باستدراجها وهتك عرضها واغتصابها ومواقعتها جنسيا دون ارادتها !!!!!
الحلقة ١٤
همس قدمت بلاغ بتتهم ابني هادي بأنه استغل تواجدها في مكان عملها في شركة والده وقام باستدراجها وهتك عرضها واغتصابها ومواقعتها جنسيا دون ارادتها !!!!!
حسيت ان ابني ضاع لأن همس بتتهمه باغتصابها والتهمة دي لو ثبتت عليه يبقي مستقبله ضاع !!!! ده ممكن كمان يتحكم عليه بالاعدام !!!!!
كان لازم هادي يروح النيابة علشان تحقق معاه ، وفعلا روحنا النيابة ومعانا اتنين من كبار المحاميين لكن
ولأول مرة ابني يتحبس علي ذمة القضية !!!!
مش مصدق اللي بيحصل !! ده شيئ مش ممكن كنت اتخيله ، هادي اللي كان نفسي انه يكون الدكتور هادي بقي مجرم واتحبس ومستقبله ضاع ؟؟!!!
كان الحل الوحيد اني اتفاوض مع همس وابوها علشان يتنازلوا .
ارسلت احد المحاميين للتفاوض وقولتله اني مستعد ادفع لحد مليون جنية .
لكن المحامي رجع وقالي : متحاولش يا طارق بيه ابو البنت رافض مبدأ التفاوض والصلح نهائي .
قولتله : اتفاوضت معاه لغاية المليون جنية ؟
قالي : ايوه يا طارق بيه والراجل رفض ، ولما حبيت اجيب اخره قولتله هنكتبلك شيك علي بياض حط فيه الرقم اللي انت عاوزه الراجل رفض بشكل قاطع ونهائي !!!
بقيت قاعد في مكتبي في الشركة مش عارف ليه المصايب بتنزل علي دماغي ورا بعضها ، الشركة وقفت وابني ضاع ومراتي وطلقتها ، مكنتش متخيل ابدا ان ممكن يحصلي كل ده !!!
مكنش قدامي الا اني اروح للراجل بنفسي علشان احل الموضوع .
ركبت عربيتي وروحت لعبد الستار بيته !!!
اول ما شافني علي الباب قالي : اتفضل يا طارق بيه معلش البيت مش قد المقام .
قولتله : انت مش عاوز تحل ليه يا راجل يا طيب ؟
: احل ازاي يا بيه ؟
: مش المحامي جالك وعرض عليك الفلوس اللي انت عاوزها ؟
: ايوه جي وعرض الفلوس .
: و مش اتفقت معاه ليه ؟
: اتفق علي ايه يا بيه ؟
: تاخد مبلغ محترم تأمن بيه مستقبلك ومستقبل اولادك وتعيش عيشة مرتاحة بدل التعب .
: لا مش هاخد فلوس .
: حد يرفض نعمة ربنا ؟؟؟!!!!
: اصلك انت مش فاهم يا طارق بيه ،
الناس اللي انت بتقول عليهم جعانين زي حالاتي فلوسك مش بتشبعهم .
: اومال ايه اللي يشبعك ؟
: الستر يا طارق بيه .
قولتله بعصبية : انت جايب الكلام ده من فيلم عربي قديم ؟؟!! ما تعيش معانا الحياة اللي احنا عايشنا . الحياة يعني فلوس ، سيبك من الكلام الفاضي اللي ميأكلش عيش ده دلوقتي .
ضحك عبد الستار : طيب يا طارق بيه خليني انا في كلامي الفاضي وخليك انت في فلوسك خليها تنفعك .
: طيب قولي انت عاوز ايه علشان تتنازل ؟؟
: انا مش هتنازل يا بيه وهاخد حقي وحق بنتي بالقانون .
: ده اخر كلام عندك .
: ايوه ، ومعلش بقي تقدر تتفضل دلوقتي مش عاوز اعطلك اكتر من كده .
: انت كمان بتطردني ؟؟!!
: لا يا بيه مقدرش طبعا .
نزلت من عند الراجل وانا مولع نار ، واتصلت بالاتنين المحاميين وطلبت اقابلهم مع بعض .
ولما قعدت معاهم قولتلهم : الراجل مش هيتنازل وانا عاوز اطلع ابني من القضية دي بأي طريقة اتصرفوا ، والفلوس اللي كان هياخدها حلال عليكم .
قالولي ان العلم اتقدم دلوقتي والطب الشرعي ممكن يثبت بسهولة اذا كان الجنين اللي همس حامل فيه ابن هادي ، لكن الجزئية اللي هنحاول ننفيها تهمة الاغتصاب !! وبالتالي هيكون الحكم اخف .
: يعني ابني هيتحبس ؟؟
: ده شيئ اكيد لو همس وابوها اصروا علي رفض التنازل .
: وطيب انا عاوز ابني يطلع من السجن !!
: يبقي مفيش الا انه يوافق واذا مش وافق ياخد فلوس ممكن تهدده علشان يتنازل .
الحلقة ١٥
: يعني ابني هيتحبس ؟؟
: ده شيئ اكيد لو همس وابوها اصروا علي رفض التنازل .
: وطيب انا عاوز ابني يطلع من السجن !!
: يبقي مفيش الا انه يوافق واذا مش وافق ياخد فلوس ممكن تهدده علشان يتنازل .
جربت مع ابو همس الفلوس تاني وعطيته شيك ب ٥ مليون لكنه رفض !!! هددته وقولتله ان لو هادي اتحبس هدمره هو وبنته ، لكن الرجل كان عنده ثبات غريب علي موقفه !!!
واستمر حبس هادي حوالي شهرين لغاية يوم المحاكمة !!!
في خلال الشهرين كانت الشركة وقفت نهائيا لكن اهتمامي كله كان بنجدة ابني من السجن !!
وبدأ بعض العملاء مطالبتنا بالشروط الجزائية ورفعوا دعاوي قضائية ضد الشركة !!!!!
وفي يوم الجلسة كانت اول مرة اشوف سهام بعد ما طلقتها .
كان حزنها علي ابنها غير شكلها وكبرت اكتر من عشرين سنة في خلال شهرين !!
وكمان ولادي ميادة وزياد كان اول مرة اشوفهم من يوم طلاق امهم وكان واضح عليهم الحزن الشديد .
وفي نفس القاعة عبد الستار وبنته همس قاعدين مع باقي اسرتهم .
كان قلبي مقبوض طول الجلسة وقلبي حاسس ان ابني هيتحبس وكان كل تفكيري اعمل ايه علشان اخرجه من المصيبة دي !!!
روحت لعبد الستار قبل بدء الجلسة وقولتله : اتنازل يا عبد الستار وهديلك نص فلوسي .
ضحك وقالي : بعد الكلام اللي قولتله عليا وعلي بنتي وطردك ليا وقطع عيشي يا طارق بيه هقولك نفس الرد تاني ، فلوسك مش هتملا عينيا ولا هتشبع الجعان اللي زي حالاتي .
بدأت المحاكمة اللي استمرت اكتر من ساعة وكانت كل دقيقة بتمر بتأكد اكتر ان مستقبل ابني ضاع وانه هيدخل السجن !!
لكن المصيبة ان تهمة الاغتصاب وهتك العرض ثبتت عليه والحكم كان بالاعدام !!!
مش ممكن الكلمات توصف شعور الصدمة عندي وعند سهام والولاد لدرجة انها فقدت الوعي وانتقلت للمستشفي ، وانا وقعت مكان ماكنت واقف !!!
ولما روحت المستشفي عرفت اني اصيبت بجلطة !!!
قعدت في المستشفي ايام وكانت يارا بتيجي تزورني كل يوم وتقعد معايا ساعة او اتنين وتمشي .
وفي اليوم الخامس خرجت من المستشفي وروحت لعبد الستار ابو همس و قولتله : يا عم عبد الستار انا هكتب المصنع والشركة باسمك واتنازل عن القضية ؟
قالي : لأ .
نزلت دموعي مني وقولتله : انت عاوز تضيع ابني ليه حرام عليك ؟
قالي : زي ما ضيع بنتي .
: لكن انت بنتك هتعيش وتتجوز وتعيش حياتها انما هادي هيموت .
: علشان تعرف بس يا طارق بيه ان الفلوس مش كل حاجة ، لسه مش مصدق وبتقول كلام قصص وافلام !!! انت حر لكن خلي فلوسك تنقذ ابنك !!!!!
قولتله بعصبية : هدفع ملايين واهربه .
قالي : لو لسه له عمر هيعيش انما لو عمره انتهي فلوسك كلها مش هتمنع عنه الموت .
: ارجوك ابوس ايدك اتنازل وانقذ ابني .
: عيب يا بيه !! تبوس ايد واحد جعان زي !!!
: طيب اعمل ايه علشان تنقذ ابني ؟؟؟
: الستر يا طارق بيه .
: انت غريب اوي !!! ده بكام الف جنية كنت ممكن تعمل لبنتك عمليه وترجع بنت تاني !!! ليه مصمم انه يتجوزها ؟؟؟ وطبعا مش طمع لأني عرضت عليك فلوسي كلها !!! ليه مصمم انه يتجوزها ؟؟؟
: علشان بنتي حرة ، ويبقي اللي لمسها في يوم من الايام اتجوزها .
: طيب يا عبد الستار انا موافق ، انا هجوز ابني لبنتك .
وعملنا زيارة لهادي في السجن وروحنا انا وعبد الستار وهمس ومعانا المأذون.
الحلقة ١٦
طيب يا عبد الستار انا موافق ، انا هجوز ابني لبنتك .
وعملنا زيارة لهادي في السجن وروحنا انا وعبد الستار وهمس ومعانا المأذون.
وبعد كتب الكتاب مباشرة وقفت همس وقالت لهادي بأعلي صوت : طلقني يا زبالة يا لمامة انت وابوك ، وبصتلي وقالتلي احنا اللي ميشرفناش نسبكم يا جرابيع وابويا ده اشرف واحسن منك انت وابنك !!!
من شدة الصدمة لساني اتشل ومش عارف انطق ، والمأذون ومأمور السجن قاعدين في قمة الذهول !!!!
ابو همس قام حضنها وقالها : تعيشي يا بنتي رفعتي راسي تاني بعد ما وطيت، واخدها ومشي .
ورغم ان الموقف كان زي مشهد من الافلام العربي القديمة الا ان من قوة الصدمة حسيت ان الجلطة رجعتلي تاني !!!
دخلت المستشفي تاني وكانت يارا هي الوحيدة اللي بتزوني وتسأل عليا ، لكن كان التعب المرة دي اشد من المرة الاولي خصوصا لما عرفت ان الشركات اللي عاملين معاها عقود حجزت علي الشركة والمصنع بسبب الشروط الجزائية !!!
عرفت واتأكدت ان الوقعة دي مفيش منها قومة !!!
خرجت من المستشفي بعد اكتر من اسبوعين وقررت اني ابيع الفيلا علشان اعمل مشروع صغير بدل اللي ضاع لكني انصدمت لما عرفت ان يارا رفعت دعوي خلع واطلقت واخدت الفيلا .
روحت ليارا بطالبها بالفيلا قالتلي ان الفيلا انا كاتبها لها بعقد مسجل ، وانها عملت حساب العشرة و مش طالبتني ب ٥ مليون المؤخر !!!
( للكاتب عادل عبد الله )
وفي لحظة كل اللي كان معايا راح ورجعت فقير من نقطة الصفر تاني !!!
لكن بعد ما بيتي اتهد وطلقت مراتي و هادي كان هيروح مني لولا ستر ربنا .
وكأن مليش نصيب ان اعيش سعيد الا فترة محدودة !!!
حتي لما الحظ ابتسملي كان مداري عني وشه الوحش اللي ظهر بعد كده فجأة !!!
وكأن كل اللي حوليا تأمروا عليا !!!
( للكاتب عادل عبد الله )
الوحيد اللي كنت ممكن الاقيه جنبي في الوقت ده هو ايوب صديق عمري ، لكن حتي ايوب مسافر من اكتر من ٤ سنين ومرجعش .
الشئ الوحيد اللي بقي معايا هي العربية ، اضطريت ابيعها علشان اشتري شقة اعيش فيها .
وبعد حوالي شهرين من حياة الضياع دي رجع ايوب من السفر ، حسيت ان ردت فيا الحياة تاني .
ولما قابلت ايوب اخدته بالحضن وقولتله : حمد لله علي السلامة يا صحبي .
: الله يسلمك يا طارق وحشتني ووحشتني قعدتي معاك .
: انت اكتر يا ايوب ، كنت محتاجلك اوي يا صحبي في غيابك .
: هنقعد مع بعض ونتكلم ونقول كل اللي نفسنا فيه ، ولا هعطلك عن مشاغلك يا طارق ؟؟؟؟؟
: مشاغل ايه يا ايوب !! ده انا كل اللي كان معايا راح وبقيت قاعد فاضي .
: بتقول ايه ؟؟!!!! ازاي ؟؟
: هو ده اللي حصل ، زي ما اغتنيت في غمضة عين افتقرت في غمضة عين .
: لأ بقي انت تقعد وتحكيلي اللي حصل .
( للكاتب عادل عبد الله )
قعدت وحكيت لأيوب كل اللي حصل بالتفصيل .
ايوب قالي : معلش يا طارق قول الحمد لله انك لسه بصحتك وهادي مضعش منك في المشكلة دي .
: الحمد لله لكن حتي صحتي يا ايوب تعبت من اللي حصل .
: قولي يا طارق انت ازاي تطلق ام هادي بالسهولة دي ؟؟!!
: غلطت فيا يا صحبي معرفتش امسك لساني .
: محاولتش ترجعلها علشان العشرة اللي بينكم والعيال يتربوا وسطكم .
: محاولتش يا ايوب ، عزة نفسي منعتني اني اروحلها خصوصا بعد ما فلوسي راحت ، هتفهم غلط اني مرجعتش الا لما الدنيا اضيقت في وشي تاني .
: لأ سيب عليا الموضوع ده وانا هروح اكلمها .
: بس قولي صحيح يا طارق الواد هادي ابنك طلع شقي زي ابوه .
( للكاتب عادل عبد الله )
وقعدنا نضحك ونهزر ولأول مرة من فترة طويلة اضحك من قلبي .
ايوب راح لسهام وكلمها علشان ترجعلي تاني .
رجع ايوب من عندها ومعاه مفاجأة مكنتش اتوقعها ابدا !!!
الحلقة ١٧
سهام وافقت ترجعلي لكن بشرط ان الفلوس اللي معايا اكتبها باسم العيال .
ضحكت اوي وقولت لأيوب : فلوس ايه اللي اكتبها باسم العيال !! انا خلاص مش معايا الا الشقة اللي اشتريتها بتمن العربية .
ايوب قالي : لأ انت لسه معاك فلوس .
( للكاتب عادل عبد الله )
: هتيجي منين الفلوس يا ايوب بقولك بقيت مش معايا حاجة .
قالي : ما هي دي المفاجأة ، قبل ما تبيع الارض سهام راحت وراك البلد واتكلمت مع المحامي قريبك واتفقت معاه انه مش يبيع ٣ فدانين من الارض الزراعية علي اساس تبقي حماية لو الفلوس راحت كأنها كانت حاسة ان الفلوس هتضيع !!!
فرحت اوي ووافقت ورجعت لسهام تاني و كتبت ال ٣ فدادين باسامي هادي وزياد وميادة .
لكن بالصدفة اثناء ما روحت البلد اشوف الارض علشان اكتبها باسم العيال اكتشفت ان قريبي المحامي كان بايع الارض بفارق سعر حوالي ٨ مليون جنية اخدهم في جيبه !!!
كنت عاوز اروحله اعمل معاه مشكلة علشان استرد فلوسي لكن ايوب قالي ان الاوراق كلها قانونية .
( للكاتب عادل عبد الله )
و فعلا روحت للمحامي وقولتله انه ضحك عليا في تمن الارض ، رد وقالي اني كنت مستعجل في بيعها وانه اخد الفلوس دي سمسرة وان لولاه مكنتش هورث اي حاجة !!! وقالي احمد ربنا اني سبتلك ٣ فدادين والا كانوا ضاعوا زي اللي ضاع .
رجعت انا وايوب وانا بتحسر علي اللي حصلي وقولتله : الظاهر يا ايوب انك كان عندك حق .
قالي : كان عندي حق في ايه مش فاهم قصدك ؟
: ان الفلوس فعلا مش نعمة وان قلتها هي اللي نعمة .
قالي : لا يا طارق تبقي انت مش فهمت كلامي ، انا قولتلك الفلوس ممكن تبقي نعمة لبعض الناس وممكن قلتها تبقي نعمة لناس تانية .
( للكاتب عادل عبد الله )
قولتله : ايوه صح انت قولت كده .
قالي : الفلوس زيها زي اي نعمة عبارة عن اختبار من اختبارات ربنا للناس ، في ناس ربنا بيختبرهم بكترة الفلوس وناس تانية ربنا بيختبرهم بقلتها وفي الاخر ربنا خلقنا درجات في كل حاجة علشان نحتاج كلنا لبعض وتستمر عجلة الحياة . وانت كانسان الواجب عليك انك ترضي بقسمة ربنا ليك وبرزقك اللي كتبه لك ، اذا كان كتير تحمد وتشكر وتعمل الخير ، واذا كان قليل ترضي وتصبر وبردو تعمل الخير .
: كلامك حلو يا ايوب ، لكن اعيش من غير ما يكون عندي طموح يعني ؟؟
: لا يا طارق مقولتش كده ، بالعكس لازم يكون عندك طموح وامل تعيش له لكن انت اتعب واجتهد وفي النهاية ارضي باللي قسمه ربنا ليك تعيش مرتاح .
: صح يا ايوب معاك حق .
( للكاتب عادل عبد الله )
: وكمان يا طارق انت غلطت في حاجة تانية .
: ايه هي ؟
: غلطت لما افتكرت ان بفلوسك هتخلي الناس كلها عبيد عندك وانك ممكن تشتري اي حاجة حتي الناس هتشتريهم بالفلوس .
: لكن الحقيقة يا ايوب ان في ناس كتير فعلا ممكن تشتريهم بالفلوس .
: ايوه يا طارق بس دول مش كل الناس ، الناس الرخيصة بس هي اللي ليها تمن وتشتريها بالفلوس .
: كلامك حكم يا صحبي .
: بتتريق علي كلامي يا طارق ؟؟!! ولا هتقولي كلام قصص وافلام قديمة زي ما كنت بتقول قبل كده ؟؟
: لا يا صحبي انا بتكلم جد ، انا اتعلمت كتير ويا ريتني كنت سمعت وفهمت كلامك من بدري .
( للكاتب عادل عبد الله )
: طيب بص بقي يا صحبي انا بعد غربة ٤ سنين راجع ومعايا قرشين للعيال و عاوز اعمل مشروع و عاوزك معايا .
: عاوز تشغلني عندك يا صحبي ؟
: انت تعرف عني كده ؟؟!! قصدك معايا يا صحبي ، ده انت اخويا ، معقول اشغل اخويا عندي !!!
: لا يا ايوب مينفعش .
: مش بمزاجك يا صحبي ، انت خلاص اشتغلت معايا .
انتهت .
