الظل: غموض و إثارة - الحلقة العاشرة
" مممممممممممممم سمعت و شوفت كل التسجيلات تقريبا ً أكتر من مرة .... حاسس إن في حاجة غلط .. لما الأمور بتبقي هادية و طبيعية كدة أكتر من اللازم يبقي في حاجة غريبة ...."
- محمد باشا أسف علي التأخير و الله.
= اتأخرت أوي يا حسام و إنت عارف إني مستنيك من بدري ....
- أنا بجد أسف مرة تانية يا محمد باشا بس كان لازم أبقي دقيق قبل ما أعرض عليك النتيجة .... اتفضل وقولي إيه رأيك؟؟
" نور وصفت حد كانت بتقول إنها شافته أكتر من مرة .... بنت شبهها بالظبط .. نور وصفت البنت دي مرتين للدكتور في جلساتها معاه ممممممممممممممم".
- إيه يا باشا طمني .........
= إنتا رسمت نسخة من نور تقريباً .... الدقة في الرسم بتاعنا مطلوبة يا حسام ودي أهم رسمة في حياتك، فاهمني ؟
- طبعا ً يا محمد باشا دي شغلتي .... قولي بس ملاحظاتك إيه؟
= أنا شايف اتنين نور قدامي مع الفارق بس في حبة رتوش بسيطة ....
- بص يا باشا .. نور أول مرة توصف البنت دي كان ده أول مشهد صادم بالنسبة لها و أثر بشكل كبير علي حالتها .. فإستحالة الإنسان العادي ينسي تفاصيل صدمة زي دى .. فلما وصفت البنت دي وصفتها بالتفصيل الممل و لما هنطابق الرسمة الأولي بأول وصف وصفته نور للدكتور و نيجي نقارن ده بصورة نور نفسها هنلاقي إن نور وصفت نفسها بنسبة 90% و طبقا ً لعلم النفس الكلام ده هيكون صح بنسبة 99,9% و ده لو هنفترض إن نور إنسانة عاقلة مش مريضة بمرض نادر طبقا ً لتقرير حالتها، .. هو اه المرض ممكن يأثر علي العقل بشكل ما كبير بس زي ماقولتلك إنها إستحالة توصل للخلل العقلي اللي يخليها ممكن تكون نسيت أي تفصيلة في وصفها ده، و لما هنراجع سوا الصورة المرسومة هنلاقي الفرق بين الرسمة و بين نور إن البنت المرسومة شعرها يمكن أقصر بنسبة بسيطة زي ما نور قالت .... أما ملامح الوش تقريبا ً واحدة بس نور قالت إن البنت عينيها كان ليها لمعة كدة غريبة، مممممممم فأعتقد إني قدرت أوصل لنتيجة في الرسمة اللي مع حضرتك و هتلاقي الكلام ده و هتلاقي نسخة من نور بالظبط، مع فروقات بسيطة طبقاً لكلام نور ..اللي كانت و كإنها بتوصف نفسها تقريباً فهتلاقي النتيجة إختلفت شوية، و بتأكد صدق كلامها ....
يعني إحنا معانا صورة نور و رسمة لنور .. رسمة بتشبه نور بدرجة كبيرة أوي يا باشا .. كلام نور كان بيوصف بتركيز شديد اللي شافته .. نفسها تثبت إنها شافت واحدة شبهها بجد واقفة قدامها بس في حاجات طفيفة جدا ً مش موجودة فيها بتمثل الفرق الطفيف أوي بينهم ده .... بس الصدمة خليتها تاخد بالها من ده و وصفته بدقة و تفصيل.
= إنت عارف ده معناه إيه يا حسام؟
- إيه؟
= معناه إن في شخصيتين فعلا و صورهم قدامنا دلوقتي .. الأولي نور اللي ماتت و التانية حد شبهها و ده كلام صعب العقل يصدقه لكنه وارد لإننا قررنا نفكر برا الصندوق في القضية دي يمكن نوصل لحاجة، و لو ده صح فده معناه إننا لازم برضه نثبت ده بشكل فعلي لكن بمنتهي السرية .. زي ما قولتلك القضية دي كانت معقدة جداً و وقتها كانت كل الطرق مقفولة و مفيش طرف خيط نمشي عليه .. و واضح إن كان في طرف خفي .. بيقفل الطرق قدامنا صح .. عشان كده مينفعش حد غيرنا يعرف ده .. و أنا كلمتك لثقتي فيك.
- اطمن يا محمد باشا ربنا معاك وتقدر تعمل حاجة في القضية دي و في الظروف الصعبة اللي إنت شغال فيها دي.
= شكرا يا حسام إتفضل إنت دلوقتي.
- تمام يا فندم.
