مذكرات آدم المصري: بلا هوية - حلقة ٣

= هحتاج أسمع كل حرف .. كل كلمة .. كل همسة .. كل تفصيلة مهما كانت تافهة بالنسبالك .... لكنها هتكون مهمة جداً بالنسبالي عشان أقدر أشخص حالتك بالظبط .. و أقدر أحدد الطريق اللي هنمشي فيه من أول جلسة اللي هي اللي احنا فيها دي، و لحد ما يتم علاجك بشكل نهائي.
- اتفضل يا دكتور .. أنا سامعك.
= عظيم .. علي بركة الله نبدأ مع بعض جلستنا الأولي و اللي هتكون عبارة عن جلسة للتعارُف مش أكتر .... الاسم؟
- آدم إبراهيم المصري
= السن؟
- ٣٠ سنة
= ال........
- لأ .... مش أكثر من كدة
= يعني إيه؟
- يعني مش مسمحولك تعرف أكتر من اللي أنا جايلك عشانه .. كمان مش هقدر أتكلم إلا في حدود .... و في حاجة تانية أهم ....
= اللي هي؟!!
- إنك تعرف نهاية كل ده و اللي هيحصل من دلوقتي
= مش فاهم! أستاذ آدم ممكن توضح أكتر؟!!
- لازم تعرف إن بعد آخر جلسة هتتم بيننا .... إنك انتا .... و أنا .... هنموت
= نعم؟!!!!
- زي ما سمعت .... عشان كدة انتا من نحيتك حاول تطول عدد الجلسات علي قد ما تقدر .... بس أنا وقت ما أكتفي .... هكتفي .... و الموت .... كدة كدة جاي
= أنا .. أنا مش فاهم حاجة و .. و بعدين ما أحنا فيها .... أنا ممكن أرفض الموضوع كله من دلوقتي ....
- للأسف ما بقاش ينفع .. مصيرك اتكتب خلاص .... هتسمعني و بعدها .... هنموت .... أنا و .......
و انتا
= انتا كدة مجنون مش مريض نفسي و جاي يتعالج و ....
- و إيه؟ .... و إيه يا دكتور؟ .... علي فكرة أنا ممكن أقتلك دلوقتي عادي خالص و انتا حشرة أساساً محدش هيسأل عنك، و متنساش إن بكلمة مني بعد ما أخرج من هنا ممكن أهد كل اللي انتا بنيته في ثانية .... و هو الدكتور إيه غير سُمعة .... أعقل يا دكتور .... أعقل و حاول تستوعبني .... صدقني أنا مش صعب أوي كدة و لا مستحيل .... كل الحكاية مجرد قُدرة خاصة علي الإستيعاب .. و أنا واثق إنك قدها
= إيه المطلوب مني دلوقتي؟! .... أنا خلاص هسمعك .. شوف انتا حابب تحكي إيه و إحكيه ....
- جميل إنك بتحاول تستوعبني .... هتتعب معايا معلش .... قدرك و نصيبك بقي هتعمل إيه؟!!!.... عايزك تعرف إني مش جاي هنا أعرض عليك مشكلتي و اللي حصل فيها بس لأ .. أنا جاي هنا أحكي عن تجربتي .... عن حاجات تاهت مني و معنديش حتي أمل إني ألاقيها ..
عارف لو كنت فكرت إني أحكي لحد قبلك، و أقنعه بالوضع اللي أنا بقيت عايش فيه، يمكن كنت مُت قبل ما أقدر أقنعه .. و لو إني مجربتش .... بس أنا عايزك تعرف إنك بقيت بالنسبالي الملاذ الأخير
= آدم أنا اللي عايزك تعرف إنك دلوقتي بطل الحكاية .. و العنصر الأساسي في الأوضة دي و أنا هنا عشان أساعدك، فأطمن .. إحنا هنعمل اللي علينا و هنسيب الباقي علي ربنا
- أنا مراهن عليك فعلاً بس .... ساعدني أثق فيك أكتر 
= آدم .... أنا عايزك تثق فيا .. عايزك تتمسك بالأمل .. يا أخي ده في بطن الحوت كان في أمل و ....
- و أنا مش نبي .... أنا مكنتش في بطن الحوت ....
= طيب ارتاح خالص .. و اهدا .... و احكي ....
- جربت تحب أسوأ شخص ممكن تقابله في حياتك؟
أو تكره أحسن شخص ممكن تقابله في حياتك؟
= بالتأكيد لأ .. انتا جربت ده؟!
- بالنسبة للكره فأكيد أنا موصلتش ليه .. بس صدقني مرحلة الكره مش بعيدة عني .... أما الحب .... اه .... و اه أوي كمان .... كل يوم بحاسب نفسي إزاي ده حصل؟
= و إزاي ده حصل؟
- كنت كل يوم أشوفها بالنهار شئ و بالليل شئ تاني خالص .. كنت بشوفها ملاك بالنهار و شيطان بالليل .. قديسة بالنهار و عاهرة بالليل .... صادقة و مخلصة بالنهار .. و كدابة و منافقة بالليل .... حاجات كتير و عكسها ....
= و رغم ده كله حبتها؟
- دي لو سحرتني و لعنتني، كنت عرفت أخلص نفسي منها .... إنما .... واضح إن المزيج العجيب اللي في شخصيتها .. بقصد كل الصفات اللي فاتت و عكسها .. بتستخدمه بالحرف .. عشان تقدر تسيطر علي حد زيي بالشكل ده
= و ليه انتا بالذات؟
- هي محتاجة ده .. محتاجة ده معايا .... طبعاً متعرفش إنها نجحت .. و إلا مكنتش هبقي عندك دلوقتي .. هي مسلوبة الإرادة أصلاً .... و أنا سمحتلها إنها تعوض ده .. بس من غير ما تعرف إني دلوقتي بقيت أسير عندها .. و إنها .... إمتلكتني
= و انتا مجبر علي كدة؟
- كفاية إني أقولك إني و أنا قاعد معاك دلوقتي مش شايفك أصلاً
= أمال شايف مين؟!
- شايفها هي .. نفسي كل ده أحكيه ليها هي .... بحبها و نفسي أقولها إني بحبها .. و نفسي هي تعرف إن كل اللي أنا فيه ده بسببها هي .. نفسي 
= و إيه اللي مانعك؟
- لما الكره يقابله حب! يا تري ده معناه إيه يا دكتور؟
= معناه إنك حد جميل آدم
- حد جميل؟!! أنا؟!!! طب لما هو أنا حد جميل .. هي ليه مش شايفة ده؟!
= مين قال؟ ضروري هي شايفاك كدة و ....
- من فضلك يا دكتور لأ .... لأ متكملش .... أنا عايش علي الأمل ده و عارف إنه مش هيتحقق .. اتعشمت كتير في مجرد لحظة .. بس لحظة .... صدقني مكنتش بطمع في أكتر من كدة منها .... بس هي ............
= هي إيه؟ اتكلم آدم قول هي إيه؟
- هي كل حاجة وحشة في الدنيا .... و كل حاجة حلوة في حياتي .. للأسف مش بلاقي حل للعذاب ده غير إني أتمني الموت .... هو الخلاص للي أنا فيه.

تابع