الظل: غموض و إثارة - الحلقة الرابعة عشر
كثفنا تحرياتنا في الفترة دي لكن للأسف موصلناش لحاجة .... بعدها عرفنا بالحادثة اللي حصلت لنور و إنها ماتت .. و رغم إن الشرطة وقتها بذلت مجهود كبير جدا ً لحل لغز القضية دي إلا إنهم برضه موصلوش لحل .. كمان تقرير الطب الشرعي حسم القضية بالنتيجة اللي طلعها لما قال إنها ماتت بالسكتة .. إلا إننا الوحيدين اللي لازال عندنا خيط نمشي وراه في القضية دي .... مي .... مي هي اللي قدامنا دلوقتي هي اللي ممكن تحل لغز إستمر فترة طويلة من غير مايتكشف .... ومن هنا بدأنا نتمسك بالأمل مرة تانية.
بنعترف إن مكنش معانا أي دليل أو أي طرف خيط حتي ممكن نستجوبها بيه ....
كانت هي طرف الخيط اللي محتاجين نمسك فيه و كلنا أمل تطلع كل شكوكنا في محلها .. في البداية واجهتنا صعوبة .... لكن المقدم وليد كان له دور كبير .. وكان له رأي مهم جدا ً في إنه لازم كمان نستجوب الدكتور .... لأنه واثق إن عنده أسرار كتير مخبيها .... و..... وكانت مفاجأة لينا كلنا كم المعلومات اللي عرفناها من مي .... و من الدكتور ماهر .
في البداية عرفنا إن مي صديقة مقربة جدا ً من نور و إن نور كانت مريضة بمرض نفسي غريب و بتتعالج عند الدكتور ماهر اللي أقنع أهلها بضرورة إن يكون في تغيير في حياة بنتهم يمكن ده يغير ولو تغيير بسيط في حياتها كإنها تنزل تشتغل مثلا.. وفعلا ً نور إشتغلت ممرضة في مستشفي قريبة من بيتها .. هي اللي إختارت و مكنش ينفع أهلها يتدخلوا في إختيارها لأنهم أدركوا أخيرا ً إنهم لازم يسيبوا مساحة و حرية أكبر في حياة نور ويكون لها حرية الأختيار بشكل أكبر ويتناسب مع بنت داخلة علي عقدها التالت .... بعد كدة اللي قالته مي واللي عرفناه كان أقرب للخيال منه للواقع ...
من الناحية التانية حالة فدوي بدأت تسوء تاني ودكتور ماهر عمل معاها المستحيل والموضوع دخل في أوهام وهلاوس بشكل كبير جدا ً.... و خالد راح للدكتور في مكتبه وهدده إنه لازم يتصرف ويعالج فدوي ... بأي شكل .... وأي تمن ..
مي كانت أول مرة تدخل النوع ده من العيادات فكانت شوية متوترة .. وكانت مستغربة إن الدكتور اللي بيعالج صديقة عمرها طلب يقابلها .... علي أساس إنها محور حديث دايما في جلسات علاج نور بحكم الصداقة اللي بينهم.
حالة نور فجأة اتطورت وطبقا ً لتشخيص الدكتور اللي عندها هي حالة نادرة الحدوث بيسموها (وهم كابجراس) .. و هو إن نور بدأت تشوف حد هو نسخة طبق الأصل منها عايش معاها وبتشوفه كتير جدا ً وده كان صعب فعلا ً إنها تتحمله و أهلها كمان تعبوا معاها جدا ً .... في الفترة دي فدوي بطلت تروح الجلسات بتاعتها و .. إختفت فدوي ....
وخالد كمان....
بعدها الدكتور طلب من مي إنها تساعد نور تغير جو.. يعني .. تروح أماكن مختلفة أو تسافر حتي أو علي الأقل تطلع رحلة تغير جو و الأهم من ده إنها تقنع أهلها يوافقوا لأن ده كان صعب جداً .. كونهم وافقوا إن نور تشتغل دا حاجة ... صحيح هي المستشفي قريبة من البيت بس برضه كان صعب بس إضطروا يوافقوا عشان ظروف بنتهم و إنهم يحسسوها بشيء من الإستقلالية والحرية و تخفيف حالة الكبت والإكتئاب اللي كانت عندها .. اما إنهم يوافقوا علي سفرها ده كان حاجة تانية خالص .... في حكم المستحيل .. لكن إتحقق المستحيل و قدرت مي تقنع أهل نور إن نور تسافر معاها في رحلة للفيوم لمدة إسبوع تغير فيه جو .... ده هيساعد في تحسن حالتها بشكل كبير.
