ابعد عن الطب وغنيله

شوفتها فى الذكريات وقعت من الضحك فقلت تضحكوا معايا

دكتور بيقول

القصة دي ترجع لأيام ما كنا إمتياز وسنة الإمتياز دي سنة غريبة عجيبة ...

لا انت محصل فيها طالب ولا دكتور ولا حتى محصل ممرضة ...

المهم ... السنة دي ناس بتاخدها تهريج وضحك ..

مع الإستفادة طبعا

و دول أحسن ناس..

وناس تانية بتعمل فيها لا سمح الله دكاترة ..

كان معانا بقي زميلة واخداها من منظور الطب الطحلبي ...

هي كانت فاكرة نفسها الطبيبة الخارقة الحاذقة اللي تقدر تعالج العجل في بطن أمه ...

وفاكرة نفسها ورثت علم سيد باشا لاظوغلي ..

المهم

كنا مرة في العيادة الخارجية ، ف النايب المفروض بيكشف و احنا الإمتياز بنساعده ...

يعني ناخد تاريخ مرضي للعيان اللي هو اسمك ، سنك ، شكوتك ، أمك في العش ولا طارت ...الخ

هي بقي كانت واخدة الموضوع جد حبتين ، المهم النايب قال لها خدي history من العيان ده لحد ما آجي..

طبعا هي قفزت علي المكتب وعملت فيها مجدي يعقوب ...

العيان كان راجل بتاع ٧٠ سنة ، وفلاح بصحته ما شاء الله ، وجاي معاه اتنين ولاده كل واحد فيهم تقولش كما الدولاب ..😂

السَمنة بتبظ منهم ما شاء الله ..

المهم هي قعدت و علقت ع كتفها السماعة بعزة كده وفخر ...

وكان قدامها ورق و عمالة تعمل نفسها بتكتب (معرفش كانت بتكتب ايه)

بس يعني عاملة نفسها مهمة و كدة 👮‍♀

و ضاكتورة بقى..

الراجل قعد وبصلها ...

وبعدين بص لولاده ويكأنه كده استصغرها ...😏😏

فالدكتورة قالت له خير يا حاج مالك؟

قالها ( باستنكار كده ...)

هو إنتي اللي هتكشفي ؟؟

قالت : يا ريت حضرتك ما تضيعش وقتي و وقت عيانيني اللي بره ، بتشتكي من ايه .. ؟

الصراحة انا نفسي اتثبت من ردها ...

وكنت عايز أقوم اسقف ..👏👏

"عيانيني" دي كانت جامدة جدا.

قوم ايه بقي ...

قطع جلال و بهاء تلك اللحظة شكوى المريض لما قالها:

الصراحة يا ضاكتورة مشكلتي إن آني وأنا "بظرّط" في الغيط امبارح تعبت قوي من تحت ...🙄

بصراحة الكلمة خرمت ودني ..

الغريب بقى إن رد فعل الأخت الزميلة كان عادي جداً ..

و فضلت مكملة كتابة ويكأنها مسمعتش أيتوها حاجة غريبة !! 📝

الأغرب بقى كان ردها !!

هي تقريبا افتكرت ان (بيظرط) في الغيط دي شغلانة زي مثلا بيزرع أو بيحرت .. كده يعني 🤔

قالت له ماتزعلش منّي يا حاج ...

بس انت في سنك ده مينفعش تظرّط في الغيط  نهائي ..☝

الرجل وولاده وانا وكل الموجودين كأننا اتثبتنا فى الأرض بمسامير ..🙄

طبعا هي فهمت ان التظريط في الغيط دا حاجة ليها علاقة بالزراعة زي مثلا الري و الحرث .. الخ

مش ان التظريط ده لفظ فلاحى لا مؤاخذة معناه إخراج الريح !!

أنا بقي فى اللحظة دي كنت بقول يا أرض ابلعيني قبل الضرب ما يبدأ...🙈

-  الرجل اندهش وقالها ...

ليه بقي ان شاء الله يا ضاكتورة ؟

- فقالت له مش هخبي عليك..

التظريط خطر ع اللي في سنك انت كبرت يا حاج ..

المهم تعالي يا حاج اقيس لك الضغط..

الرجل استسلم لها تماما وعمال يقلب كف بكف وهو بيفكر إزاي التظريط خطر ع اللي في سنه ...😱

قالها ما احنا حدانا في البلد يا ضاكتورة الكل بيظرط عادي !!🤔

قالت له : ضغطك كويس بس بص ياحاج...

غالبا اللي حصلك إن التظريط تعب لك ضهرك فعمل لك تعب في الفقرات العصعصية فتعبك من تحت ..

ثم ختمت بجملة رهيبه و قالت له :

و لو يعني ضروري إنك تظرط يا حاج يبقى ماتظرطش لوحدك ..

ابقي خد ولادك يظرطوا معاك في الغيط..

أو يستحسن هما اللي يظرطولك وخلاص ..

طبعا الراجل فتح بقه و ما بقاش فاهم إيه اللي بيتقال ده ...😱

بس تقريبا حس إن في حوار ابن تييييت بيحصل..

فقام اتنطر من السرير وقال أستغفر الله .. استغفر الله ..

و بص لولاده الميتين علي روحهم من الضحك وقال لهم :

بقى ياولاد الكلب طالعين م البلد من قبل صلاة الفجر علشان تجيبوني لواحدة تقوللي ولادك يظرطولك ..!!

حتظرطلي إزاي يا واطي يابن الواطي منك له ؟؟!

و فتح باب العيادة و هو مصر انه يضربهم بالعصاية 😂😂😂