من صغري بحب اساعد الناس الكبار

من صغري بحب اساعد الناس الكبار

لقيت في مرة راجل كبير، قالي ممكن يا ابني تمسك الكيس الأسود ده مني، لحد  ما اعدي  اجيب حاجه من السوبر ماركت اللي هناك ده، واجيلك تانى، بس يا ابني اوعى تفتح الكيس، قولتله حاضر، وفضلت قاعد مستني يجي، نص ساعة، ساعة إلا ربع، ساعة، بدأت ازهق وعاوز امشي، بس كنت قلقان لحسن أمشي، الراجل يجي وانا مكنش موجود، وقعدت أفكر، طب أمشي وأسيب والكيس الأسود لما يجي ياخدوا ولا افضل مستني، لقيت نفسي مش عارف أعمل ايه، غير اني عمال ابص علي اللي حواليا، لحد ما لقيت حد قالي أنت تايه، قولتله لا، قالي امال قاعد عمال تبص حواليك ليه ؟، قولتله قاعد مستني راجل كبير سايب معايا الكيس البلاستك الأسود ده، بس مجاش، قالي طب انت تعرف الراجل ده ؟ قولتله لا، قالي طب الشنطة اللي ادهالك دي فيها ايه ؟ قولتله معرفش، قالي وانت ازاي تاخد حاجه من راجل متعرفوش، وازاي تاخدها من غير ما تعرف هو مديك ايه ؟ افتح نشوف الشنطة دي فيها قولتله.. قولتله لا عشان هو قالي اوعى تفتحها لحد ما يجي، قالي طب هو فين؟ قولتله في السوبر ماركت اللي هناك ده، قالي طب انا هروح اشوفوا، راح ورجع قالي مفيش راجل كبير في السوبر ماركت، قولتله ازاى انا شايفوا وهو داخل السوبر ماركت، قالي طب خلينا نفتح الشنطة فيها ايه؟ قولتله مش هينفع، قالي هات بس نشوف ايه اللي جواها ؟، بنفتح الشنطة لقينا فيها زبالة ههههه ودي كانت صدمة كبيرة اوي بالنسبالي.

تفتكروا ان الراجل الكبير كان قاصد ان يديني الشنطة البلاستك السوداء دي عشان ميروحش يرمي الزبالة وانا لما الاقي فيها زبالة اروح ارميها ؟؟

ولا هو كان في نيته يروح ويرجع ياخدها مني ويروح يرمها ؟

بس انا من ساعتها بقيت اسال الأول هي الشنطة اللى هاخدها منك دي فيها ايه ؟ اشوف الأول وبعد امسكها بقيت ناصح ههههه 

لو عجبكتم القصة دي قولولي وانا اقولكم قصص تانية كتير جدا