صدفة القدر تجمعنا
اجمل صدفه
الدخول كابلز
_ بقولك خطيبي جوا !!
_ أنا آسف مينفعش تخشي
_ يعني ايه مينفعش ! هو انا داخلة الحرم ! بقولك خطيبي جوا ... وسع
حاولت تدخل لكن ايده كانت اسرع، بعدها بغلظة و رجع يبصلها بنفس البرود
_ لأ يعني لأ
_ طب خش ناديهولي
_ آسف يا فندم دي الأوامر
_ معايا
التفتتلي في نفس اللحظة الي قررت ابطل فيها مراقبتها من بعيد، قربت .. خطيت خطوات باتجاهها وهي واقفة متصلبة مكانها
_ بيس
وسعلنا الطريق وشاورتلها بكفي أنها تدخل قبلي، مكدبتش خبر و لقيتها بتجري على جوا
وقفت على اول سلمة براقبها من غير صوت، الدوشة حواليها كانت عالية و لبسها بريئ مخالف لشيطانية المكان
كانت ماسة بتلمع رغم خفوت الاضاءة عليها .. وسط كم عُري لا بأس به ... ديسكو الساعة اتنين بعد نص الليل مش هنتلم هنا عشان نبيع سبح و نعمل خاتمة !
_ بدوري على حد معين ؟
كنت عارف أن صوتي عالي بالمقارنة بالاصوات حوالينا لكن تركيزها في وشوش الناس خلها تتخطاني و تمشي في اتجاه محدد .. عنيها كانت مسلطة عليه وهو واقف بيتلوى و بيرقص وفي حضنه واحدة !
_ سلمى ؟!
كانت واقفة ساكتة، عنيها جاحظة و بقها مفتوح، بتبص للبنت الي كان بيرقص معاها بزهول .. اكيد تعرفها
رجعت تبصله وكأنها متعرفهوش
_ سلمى اديني فرصة أشرحلك
بهدوء قلعت الدبلة من اديها، مسكت كفه و حطتها في ايده و سحبت نفسها
لقيتني بمشي وراها اما هو كان بيجري، نظرة سريعة على البنت الي كانت واقفة وسطهم .. أكيد تعرفها و اكيد هي الي جابتها لهنا
_ سلمى أرجوكي اسمعيني
_ وعاملي فيها بتغير و راجل جامد و أنت مقضيها مع الـ....
مشتمش، مسكت نفسها على آخر لحظة اما هو حاول يمسك اديها فبعدت خطوة لورا
_ اوعا .. اوعا تفكر تلمسني .. او حتي تيجي تترجاني قدامهم .. لأنك لو فكرت .. أنت عارف فضيحتك هتبقى عاملة ازاي
_ خلاص يا سلمى .. خليني اوصلك دلوقت و .…
_ انت تخرس خالص .. فاهم ؟
_ انا هوصلك
والتفتتلي من جديد اما هو بصلي بعد فهم _ انت مين يا كابتن
مهتمتش لكلامه و قربتلها _ يلا ؟
بصتله و رجعت تبصلي بثقة _ يلا
_ يلا فين ؟ .. مسك دراعها و قربها ناحيته _ هتركبي مع واحد متعرفيهوش
_ نزل ايدك بدل ما اصوت والم عليك الخلق واصحي الي معرفش
قربت انا وادخلت... مسكت كفها و بعدته عنها _ استني انتي في العربية السودا الي هناك
_ تعرفها منين عشان تركبها معاك
_ معرفهاش بس على الاقل مش هخونها
كنت قاصد كلامي وحاسس بكل حرف أثره هيبقى عامل ازاي
" لكل عاشق وطن ولكل طير مرساه "
ضغطت على الزرار وقفلت الكاسيت، معارضتهاش ولا فتحت بقي
_ نزلني هنا
_ انزلك هنا ازاي ؟ دي حته مقطوعة
_ وانت مالك مقطوعة و لا لأ .. انا قولتلك نزلني هنا
_ مش هينفع يطلع عليكي ناس مش كويسة !
ضحكت .. ضحكت بصوت عالي وسخرية
_ وانت بقا الناس الكويسة ؟!!!
مبصتلهاش فضلت مركز على الطريق، حسيت بيها بتعدل نفسها وبتبصلي
_ كنت في الديسكو بتعمل ايه ؟
فضلت ساكت اما هي كملت _ و بعدين حد يجي الديسكو ببدلة ؟
_ طب ما انتي دخلتي ببيجاما ومحدش اكلم
_ انا كنت نازلة اقفش خطيبي مع واحدة
_ وانا كنت جاي مع صحابي اشقط واحدة
اومأت براسها اما انا حسيت اني عايز اكلم _ على فكرة دي اول مرة ليا
_ وليا
شغلت الكاسيت مرة تانية
" ولكل شمس شروق بعد الغروب ...."
مدت اديها تقفله للمرة التانية
_ مقولتليش بتشتغل ايه ببدلة رجال الاعمال دي
_ ما شاء الله الاجابة في حضن السؤال
_ رجل أعمال ؟
_ ابنه
_ واو .. قصة مثالية
مفهمتش جملتها و هي فهمت
_ البريئة و المنحرف
_ انا مؤدب بعد تلاتة الفجر
_ وقبل تلاتة الفجر
_ ببقى في الديسكو مع الأخوة
ضحكت وبصت على الفون _ لسه مجاتش تلاتة
_ حلو .. الحق اخطفك بقا
_ مش شكلك الجو دا
وقفت العربية على جمب _ عشان البدلة ؟
_ عشان الدبلة
خلعت الدبلة وحطتها على التابلو _ متيجي ننزل نتمشى عالكورنيش شوية
_ اه مهي الساعة لسه مجاتش تلاتة بقا
_ انا ببقى مؤدب تلاتة الا تلت
نزلت من العربية ونزلت وراها، حطت اديها في جيوب الجاكيت و مشيت بهدوء، خصلاتها متمردة مع هوا و عنيها بتحاول تحارب نسمات غادرة، ماشية جمبي سرحانة و انا جمبها باصصلها
_ اقولك سر ؟
_ قول
_ انا كنت خاطب
_ ياه عالسر الي انت لابسه في ايدك و مفرجة للبشرية دا يااه
_ انا مكملتش كلامي
_ امممم
_ كنت رايح اقفشها في الديسكو مكنتش رايح أشقط ولا حاجة
_ ازاي ؟
اتنهدت ووقفت _ قولتلها متروحش عيد الميلاد عشان في صحاب ليها ولاد كتير و الديسكو مش مكان لعمايل عيد الميلاد
_ وعرفت منين انها راحت
طلعتلها الفون و وريتها الفيديو ليها وهي بترقص _ انا مكنتش هسيب شغلي واجري وراها من فراغ يعني
_ اقولك سر ؟
_ قولي
_ أنا مكنتش مخطوبة
وقفت في مكاني وبصتلها بزهول _ أنا وهو خطوبة صالوناتي كدا هو كان مرتبط بالبنت الي انت شفتها هناك دي وهي بتحبه فحبت تبثتلي انه حيوان زي ما هو و انا بصراحة لقيتها حجة و روحت اقفشه
_ واو .. مروحناش بعيد .. حكايتي بس بالمؤنث
_ انت مبتحبهاش ؟
_ تؤ
سكتت فقربت خطوة _ وانتي ؟ .. بتحبيه ؟
_ تؤ
بصينا لبعض و ضحكنا
_ بقولك ايه
_ ايه ؟
_ متجي نجوز
_ انت عبيط ؟ مفيش حاجة تيجي كدا ؟
_ اهدى حبيبي كدا
_ مش وقتك يا نانسي يا عجرم ... مش ناقصة جنان
_ انتي مؤمنة بالقدر ؟
_ اه طبعاً
_ طيب ما يمكن هو مرتبلنا دا كله عشان نتقابل، انتي تتخطبي لواحد متعرفيهوش و تجيلك مسدج من صاحبته عشان تشوفيه بيخونك و تسبيه في نفس اليوم الي يجيلي مسدج من واحد صاحبها كان مرتبط بيها قبلي و يبعتلي الفيديو و اعرف اني اخترت غلط
فضلت بصالي وهي بتضحك بسخرية _ انا بكلم بجد !
_ ايوه واضح
_ على فكرة بقا انا قررت انك مراتي
_ انت عبيط ؟ مجنون ؟ مش لايق عالبدلة خالص جو الفانكي بوي دا
_ يعني لو قلعت البدلة هتصدقيني
_ اه
_ لو دا هيثبتلك أني …
_ انك ايه يا مجنون
_ انتي هطلة ؟ انتي فكراني هقلع بجد و لا ايه الدنيا تلج اجننتي انتي؟
_ تمام اوي .. اتفضل روحني
وصلنا لبيتها ووقفنا بالعربية تحته _ فكري ووافقي بدل متلاقيني أربعة وعشرين ساعة تحت البيت
_ يا رب نعقل يا رب
نزلت من العربية ونزلت وراها _ هو بابا موقفه ايه وانتي داخلة اربعة الفجر البيت ؟
_ أولاً بابا متوفي .. ثانياً انا قايلة لعمتو اني ناولة اقفش خطيبي في الديسكو
_ وعمتو موقفها ايه
_ قالتلي هاتي فينو معاكي
_ جبتيه ؟
_ هو ايه ؟
_ الفينو ؟
_ عمو سلامة قافل
_ عدينا على سوبر ماركت في طريقنا على فكرة
لفيت وقربت منها وانا ببتسم _ تعالي نرجع نجيبه
ابتسمت بلطف _ لا احنا متعودين على فينو عمو سلامة
ولفت _ بقولك صحيح
_ هه
_ هي العمارة كام دور ؟
_ تسعة
_ بتحبي الأرقام الزوجية و لا الفردية
_ الفردية
_ انتي برج ايه ؟
_ العقرب
_ خمسة في خمسة
_ بخمسة وعشرين
_ ساكنة في الدور الكام ؟
ضحكت وهي بتقرب مرة تانية _ لو كنت سألتني دور كام كام من الأول هيبقي أسهلك
_ ما انتي وذكائك بقا
_ شايف البلكونة الي هناك دي
_ امو ستارة زرقا
_ البلكونات كلها ستايرها زرقا
_ اه لامؤخذة
_ شايفها
_ ايوه
_ الي جمبها
_ اه في الدور الرابع
_ ايوه شاطر .. انا في الدور التامن بقا
_ دا ايه الغتاتة دي
_ هه بنتعلم منك
طلعت و ابتسمتلها وانا بشاور زي العيل الصغير
من بعد اليوم دا وانا تقريباً قلبت عبدالحليم، بفضل تحت العمارة بتاعتها واقف عند الشجرة و مشعلق راسي لفوق و ببصلها وهي بتجري وتفتح البلكونة و بتبصي بزهول بتاع كل مرة
_ انت مش طبيعي بجد والله !
_ صح
_ انت مواركش شغلانة
_ انتي شغلانتي
_ بقولك ايه انا الجو دا مش بتاعي
_ قوليلي جوك ايه وانا اشتريه
تبتسم، تمشي خطوة بعيدة وتلاقيني لسه واقف _ طب ايه هتستناني لحد ما اجي من الشغل ؟
_ لو دا هيثبتلك اني ....
_ انت مجنـ…
_ انتي عبيطة ولا ايه انا كنت ماشي دلوقتي حالا أصلاً قال استناها على متيجي قال .. فاضي أنا موارييش شركات
_ انا هجبلك الأمن بتاع العمارة خد بالك
_ امن ايه .. عمو عبدالكريم دا الي ثبته بسجارتين كليوبترا !!! يا بنتي نهارك أبيض
_ يربي عالغتاتة
_ ألا عمتو عاملة ايه ؟ لسه عاوزة فينو ؟
سكتت وبصتلي بعدم تصديق اما انا قربت و غمزتلها _ اصلي جبت الفينو ومن عمو سلامة على فكرة
سابتني ومشيت وانا مبتسم زي العبط
بعدها بشهرين من المراقبة و التحريات الي اتعملت عليها قررت اقابل عمتها وقرينا الفاتحة وبتاريخ ٥ نوڤمبر .. عيد ميلادها اعلنت الجرايد و الصحف و صفحات السويشيال زواج معتصم سيف الدين ابن رجل الاعمال المشهور في مصر و الشرق الأوسط على بنت من خارج الوسط التجاري و السنيمائي و السياسي بعد ملحمة حب عمرها شهرين و أسبوع و تلت ساعات !
_ يااااه .. اخيراً .. اخيراً
_ اخيراً ايه ... ايه الأڤورة دي .. دا احنا اجوزنا معبرناش برليف يعني
_ تمام ماشي
_ ايه بتقرب ليه ؟
_ هي الساعة كام دلوقت
_ واحدة
_ لسه مجاتش تلاتة يعني
_ لأ .. لسه
_ أنا ببقى مؤدب بعد تلاتة
_ وقبل تلاتة ؟
_دا حوار هناقشه انا وانتي دلوقتي حاضر
