الظل: غموض و إثارة - الحلقة الخامسة عشر
تحرياتنا قالت إن آخر ظهور لفدوي كان عن طريق بطاقة تم تجديدها في إسكندرية بإسمها لكن دا ما تمش عن طريقها هي .. الموضوع تم عن طريق واسطة للأسف مقدرناش نحدد و نعرف هي مين؟.
البطاقة دي اتلاقت في الكامب اللي اتقتلت فيه نور .... كل ده معناه بشكل أو بآخر إن في صلة بين فدوي و خالد و الدكتور و مي كمان .... وبين قتل نور.
حاجات كتير كانت متلغبطة .. تفاصيل صغيرة متناقضة تحس إن مقصود بيها تمويه و تشتيت أي حد يحاول يدور وراها .. المعلومة في القضية دي كانت بتيجي بصعوبة شديدة جدا ً .... كمان التسجيلات اللي كانت عند الدكتور في العيادة بتختلف عن التسجيلات اللي راحت النيابة .... في تفاصيل صغيرة جدا ً مفقودة .. الدكتور قال لخالد إن علاج فدوي مش هيتم الا بصدمة من نوع خاص ... صدمة تغير حياتها .. تقلبها .. و فعلا ً....
شكل الدكتور كان بيجرب طريقة جديدة غريبة لعلاج النوع ده من الأمراض .... يمكن كان بيدور علي إنه يحقق مجد شخصي فقرر يعالج أغرب حالتين بيتعالجوا عنده في نفس الوقت و بطريقة واحدة و ....
وعرفنا إن فدوي عملت عملية تجميل في سرية تامة قبل ما تختفي بفترة وبقت نسخة طبق الأصل من ....
نور..
الدكتور فعلا ً كدة خلي نور تصدق إنها بتشوف نفسها .... و هو الوحيد اللي كان مصدق حالتها .... و حقق صدمة شديدة لفدوي .... تغيير جذري في مجري حياتها ... وصل لدرجة إن شكلها كله إتغير .... لا أهلها هيعرفوها تاني ولا هي حتي عرفت نفسها بعد العملية .. و بحسبة بسيطة تقدر تقول إن خالد قدر يجمع بين حبه لفدوى .. و بين مهمة خفية مافيش حد كان يعرف بيها غيره هو وبس ... إنه يجندها ... لأنه عارف إنه في يوم من الأيام هيسيب البلد و في حالة إستدعائه من الموساد إستحالة كان هيسيب البلد من غير مايخدها معاه .. وكمان هيضمن إستجابتها لأي حاجة هيطلبها منها ....
و بالنسبة للدكتور فهو قبض التمن وبزيادة كمان ....
خالد نجح في تغيير حياة فدوى .. و بما إن ماينفعش يكون في اتنين نور فخطط و قرر إنه يتخلص من نور الأصلية و لما حانت ساعة الصفر قرر إنه ينفذ دا بطريقته الخاصة .... ووبعدها.... يسافر ومعاه فدوى سايبين وراهم لغز كبير عشان نحله جندنا كل عقولنا و إستدعينا خبراء و دكاترة في علم النفس عشان نقدر نوصل للنتيجة دي.
أما مي لما عرفت إن نور إتقتلت كانت عايزة تتكلم بس ما قدرتش لأنها إتهددت بأبشع الوسائل .. والمفاجأة إنها كمان قبضت مبلغ خيالي مقابل سكوتها و إنها تفضل متقنة دورها في الحزن علي موت نور صديقة عمرها.
لازم نعترف إن سكوت و فساد البعض في مؤسسات الدولة المختلفة ساهم بشكل كبير إن جريمة زي دي تتم بالشكل الخيالي ده .... كل ورقة مزورة تخص الجريمة دي تم إستخراجها من أي مؤسسة هي وصمة عار فعلا ً و عدونا إستغل ضعفنا فإستعمل معانا أقوي سلاح في العصر الحديث .... المال .... و ببذخ .
علي فكرة كل اللي حكيته وعرفتوه في إجتماعنا دا، و لا حاجة .. لسة في أسرار تانية بس لازم تظل طي الكتمان لأن في قاعدة أساسية في عالمنا ألا و هي "المعرفة بقدر الحاجة".... و يمكن اللي إتقال ده خيالي بس ده فعلا ً اللي حصل....
- بعد إذنك يا فندم ممكن أسالك سؤال؟
- إتفضل ..
- كلام سيادتك معناه إن مي كانت محطة لخالد عشان يقدر من خلال صداقتها لنور و بالخطة اللي إترسمت بمساعدة الدكتور إنه يعالج فدوى و إن ظهور فدوي لنور كانت مي علي علم بيه علي أساس إن دي الصدمة اللي هتُستخدم لعلاج نور لكن في الحقيقة العكس هو الصحيح ... بس هل ده كان معناه إن مي كانت عارفة إن نور هتتقتل؟
= لا .... خالد خدعها و لما الجريمة تمت دفعلها تمن سكوتها .... و أكتر بكتير كمان و لو فكرت تتكلم مكنتش هتقدر تثبت ده و لا حد كان هيصدقها ... عشان ساعتها هتكون متورطة في جريمة قتل صديقتها نور بالفعل .. كمان مافيش دليل مادي واحد هتقدر مي تحصل عليه ....
فهنقول إن مي و لسبب ما دورها إنتهي بالنسبة لخالد .. يمكن لإن كان في إحتمال الجريمة تتكشف لأي سبب لو فكر يرجع مع فدوى مصر.. رغم إنه كان ممكن يتخلص منها وقتها بسهولة ... يمكن دي غلطة منه .... أو يمكن سابها لأنه ممكن يحتاجها لأي مهمة في المستقبل .... و يمكن لو كان عمل كدة كانت العملية هتتكشف أسرع .... المهم إن دورها إنتهي بالنسباله ....
