الظل: غموض و إثارة - الحلقة الثانية و العشرون و الأخيرة
- والدي يا فندم .... والدي الله يرحمه كان طيار .... كان عايزني أطلع زيه .... ورغم إني
فشلت في تحقيق حلمه ده .... ورغم إن ماليش في قيادة الطيارات إلا إني علي دراية كبيرة بكتير من المعلومات اللي تخص الطيران و ده يمكن ساعدني إني أعدي المرحلة الصعبة دي من المهمة.
- قبضوا علي الدكتور ماهر و إعترف بكل حاجة وبالتفصيل .... و كمان سمعنا كل التسجيلات اللي كانت علي ميموري نور .... كانت مفاجأة و صدمة كبيرة جدا بالنسبة لينا .... فعلا ً دي كانت النهاية الطبيعية ليهم.
- مي كمان إنهارت تماما ً بعد ما عرفت الحقيقة ....
= بس مكدبش عليك يا فندم أنا مش عارف أشيل
صورة نور من دماغي ... إزاي يكون في بني آدم شريط حياته يبدأ وينتهي بالشكل ده؟!!!!....
منظر أهلها لما بلغناهم و إستوعبوا القصة يقهر بجد .... أول مرة تواجهني حاجة زى دي في حياتي .. كُل طرف في الحكاية لعب و خطط لهدف شخصي يخصه هو و بس ... أول مرة القدر يلعب بالطريقة دي .... غموض لحد آخر لحظة و لأخر نفس ..
-كُنا هنتورط في صراع مع دولة مُعادية بلا أي داعي ... بس الحمد لله أنا دلوقتي بجد مطمن .... مطمن طول ما في رجالة زيك في البلد دي مستعدة تعمل أي حاجة في سبيل الدفاع عنها حتي لو ده كلفهم حياتهم نفسها.... و علي فكرة في مكافأة كبيرة جدا ً ليك يا وليد.
= و الله ده كتير أوي يا فندم .. أنا معملتش غير واجبي.
- لا كتير ولا حاجة .. إنتا كمان في أجازة لمدة أسبوعين من دلوقتي .. تقدر
تعمل فيها اللي إنتا عايزه حتي لو هتسافر لأي مكان تستجم و تغير جو .
= متشكر بجد يا فندم .... بعد إذن حضرتك.
- إتفضل.
_____________________________________
- إسبوع يابني وهي حابسة نفسها في أوضتها .... يمكن ربنا يصلح حالها علي إيدك .. إتفضل يابني.
= بعد إذنك يا حاج لو أمكن نكون لوحدنا.
- طبعا ً يا بني .. لو إحتجت حاجة أنا برا .
= حاضر يا حاج.
____________________
- مي .. مالك .. علي فكرة اللي إنتي فيه ده مش هيجيب أي نتيجة .. مش هيرجع نور ..
عارف إن الموقف صعب عليكي .. بس لازم تعديه و تكملي .. أنا سيبتك أسبوع ترتاحي.. مش عشان تتعبي نفسك و تستسلمي لحالة من الإكتئاب ممكن لا قدر الله يجرالك حاجة بسببها ....
أنا جاي النهاردة أسأل عليكي و أطمن .. و بصراحة معنديش أي نية أمشي من هنا من غير ما أطلع بنتيجة .... ده و الله من العشم و بحكم الصداقة اللي اتولدت و بقت بينا و المغامرات و.... كمليها طيب .... أيوا كدة إبتسمي خلي الدُنيا تضحك ....
صدقيني نور ما كنش ينفع تكمل حياتها كدا .... مكنش ينفع تعيش بالطريقة دي طول عمرها .... هي إختارت نهايتها بإرادتها .... و إختارت الوقت اللي تعرفنا فيه كُل حاجة .... بعد ماتكون ماتت بجد المرة دي .. أعتقد إنها قصدت ده .. يعني عشان تقتل أي عشم في إنها تكون لسة عايشة ....
إهدي ووحدي الله .
= لا إله إلا الله سيدنا محمد رسول الله.
- بس كدة .. خلصت .... علي فكرة أنا إنضميت بشكل رسمي للمخابرات العامة و إترقيت كمان.
= بجد؟!.. مبروك .
- الله يبارك فيكي .... الحمد لله أنا إطمنت عليكي أهو .. و عشان الراجل الطيب اللي برة ده وعدته إنك هتكوني بخير وتخرجي من اللي إنتي فيه بأسرع وقت وتعيشي حياتك زى الأول ... ما تخذلنيش .. ها .... من بكرا تنزلي شغلك وتخرجي وتعيشي حياتك مع صحابك .. إتفقنا؟
= حاضر
- تمام .... يلا هستأذن أنا.
= وليد....
- نعم؟.
= هشوفك تاني؟
- أكيد.... أكيد يا مي ........
مع السلامة ................
= مع السلامة.
تمت
