هشتاج قصص واقعيه هدير إبراهيم عمتى أسلمت جزء أول
#يُدبر_الأمر !
"وإن تتولوا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُمْ" !!
هشتاج باقي القصص 👇
#قصص_واقعيه_لهدير_ابراهيم 💌
🎀🎀🎀🎀🎀🎀🎀
قابلتني قِصة ليكِ قدرًا وأنا بقلب على اليوتيوب ولمدة 3 ايام متواصلين كنت شوفت كل القصص اللي على قناتك،
فضلت ادور بعدها على اكونت الفيس بوك بتاعك ومجرد م وصلتله لقيتني بفتح الرسايل وبكتبلك قصتي أنا كمان !
هي مش بس قصة إسلامي، لا وكمان زواجي والاتنين اغرب من بعض والأغرب منهم هو السبب الأساسي اللي وصلني لكل اللي هحكيه دلوقتي..
اصريت ابعتلك علشان لو قَدَّر ربنا وبنت أو شاب على غير الإسلام متردديين، يشوفوا الحلول السحريه والمعجزات اللي حصلتلي من ربنا في كل مشكلة ممكن تقابل اي شخص بيفكر يدخل ف الإسلام.. كمان علشان المسلمين اللي بيسمعوا قصتي يحمدوا ربنا ع انهم اتولدوا ع الإسلام ومعاشوش اللي احنا عشناه وبنعيشه ولسه هنعيشه احنا وولادنا !
انا اتولدت في أسرة #مسيحية معروفه في منطقتنا.. عيلتي اغلبها جواهرجيه شغالين في الدهب يعني، ومنهم والدي.. ف احوالنا الماديه كانت كويسه جدا.. وحياتنا كانت عاديه مفيش فيها أي جديد.. لحد اليوم اللي اتبدلت فيه حياتنا تماما وخاصة حياتي أنا !
ودا لما جه لوالدي مكالمة م جدتي، نزل بسرعه يجري ع السلم واحنا مش فاهمين حاجه، وبعدها بكام ساعه سمعنا صوت بابا وأعمامي الاتنين ع السلم. فتحنا الباب لقيناهم شايلين عمتي واللي هي بالمناسبة أختهم الوحيده وكان مغمى عليها واحنا مش فاهمين ايه اللي حصل ..
دخلوها الاوضه وقفلوا عليها، وخرجوا قالولنا ان ممنوع حد فينا يقرب م باب الاوضه دي مهما حصل، ونزلوا تاني !
كلنا فضلنا نبص لبعض بخوف وقلق ومش فاهمين أي حاجه لحد م رجع والدي.. وم غير م يكلمنا ولا يبصلنا اصلا دخل الاوضه، وخرج بعدها اخد والدتي ودخلوا اوضتهم وقبلها أمرنا ندخل اوضنا وننسى اللي شوفناه ومنحكيش لاي حد ولا نسأل عن أي حاجه!
مرت أيام واحنا ع نفس الحال مش فاهمين في إيه ؟ مالها عمتي؟! وليه والدي مانعها م الخروج او ان حد يدخل عندها، لحد م سمعنا والدتي وهي بتكلم خالتي وبتقولها: اللي هحكيهولك دا اوعي تحكيه لحد ابدا والا مش بعيد يبقى فيها موتي وموتك..
وعرفنا الصدمه وهي ان عمتي #أسلمت !!
كل كام ليله كان بيتجمع بابا واعمامي ويدخلوا الاوضه اللي فيها عمتي ونسمع اصوات عاليه وأصوت خبط وبعدها يخرجوا متعصبين اكتر، وواحد منهم يقول انها لازم تموت وبابا كان يقول مش هتخرج م الاوضه دي الا وهي راجعه عن اللي في دماغها او ع قبرها،
عدا عمي الصغير، كنت بحس ان قلبه بيبكي قبل عينه لانه مش بس اقرب شخص لعمتي لا دا كمان #توأمها !
ف الصدمه كانت صعبه عليه هو اكتر واحد، خاصة ان مش بإيده يعمل اي حاجه..
مر اكتر من شهر والحال زي م هو وعمتي متمسكه بإسلامها..
مفيش حد فينا كان عارف ايه اللي حصل معاها ولا ايه السبب اللي خلاها تدخل الاسلام !
عمتي دي كانت مُرفهه جدا واكتر بنت متدلعه في العيله وكانت كل طلباتها مُجابه.. عقلنا مكانش مستوعب!! كنا بنفضل نسأل هو ايه اللي كان ناقصها علشان تفكر تعمل مصيبة كبيرة زي دي !
لما مر فتره كبيره، والدي بقى يسمحلنا ندخل بنفسنا نِدَخَّلَّها أكل ومياه.. وكانت والدتي ومرات عمي يحاولوا يتكلموا معاها بالراحه يمكن يفهموا منها حاجه.. خاصة ان الكل طبيعي يعني كانوا شبه متأكدين ان ورا اسلامها دا شخص مسلم لعب بعقلها واكيد اقنعها بالاسلام والجواز طمعًا في ميراثها الكبير من جدي !
بس هي كانت دايما ترد ب ابتسامة هادية ان ربنا هدى قلبها للإسلام وللطريق الصح، وكانت تتكلم عن مكانة المسيح عيسى بن مريم عند المسلمين..
عمتي كانت مُقنعة جدا في كلامها لأنها شخص لبق وبيتكلم بهدوء.. ف مرات عمي خافت تتأثر بكلامها وبطلت تيجي عندنا او تقعد معاها !
عمتي اتعاملت معاملة سيئه جدا خاصة لما والدي لاحظ انه كل م يدخل عندها يلاقيها بتصلي، وكانت بتغطي شعرها بأي حاجه من لبسها، وكان رد فعله انه خرَّج لبسها كله بره الاوضه، ف اتصدم لما دخل ولقاها لافه ملاية السرير ع نفسها م شعرها لرجليها، راح مخرج ملاية السرير وأي حاجه ممكن تغطي بيها جسمها وتصلي، ومع ذلك كنا ندخل نلاقيها بتصلي بردو رغم ان شعرها باين واجزاء م جسمها مش متغطيه !
والدي كان بيتجنن كل ما يدخل يلاقيها مصممه ع الصلاه، ف قَرَّر انها لما تدخل الحمام، الباب ميتقفلش ولازم حد يكون واقف قدام الحمام علشان ميسمحلهاش انها تتوضا..وكان مانعها تستحمى كمان لانه خايف انها تتوضى وهي بتاخد دش !
كان عاوز يكسر كبريائها.. بس النتيجه انها كانت بتتوضا م المياه اللي بتدخلها مع الاكل.. ولما والدي لاحظ، منع عنها المياه.. ومع ذلك كانت بتصلي بردو، واللي عرفته بعدين انها كانت بتتيمم-يعني تضرب ب ايديها ع الأرض، والتراب تمسح بيه وشها وايديها- !
ورغم اننا كنا في الشتا ومفيش حاجه تتغطى بيها ولا لابسه لبس تقيل يدفيها، الا انها مستسلمتش !
عقلكوا مستوعب اللي هي مرت بيه !!
احنا كنا هنتجنن وعقلنا مكانش قادر يستوعب ابدا !
كنا دايما نسمع صوتها ف الاوضه وكأن معاها حد وبتتكلم معاه..
والدتي كانت دايما تقول انها #اتجننت لان اللي هي فيه دا مش طبيعي ابدا !
كنت كل م ادخلها الاقيها مبتسمة.. هي اصلا في العادي شخصيتها مرحه وطيبه وحنونه جدا..
مكنتش بلاقي كلام اقوله، بس كانت دايما تتكلم معايا عن مواقف لناس انا معرفهمش واول مره اسمع عنهم وعرفت بعدين انها مواقف بين الرسول صلى الله عليه وسلم والصحابة..
كانت بتتكلم عنهم بانبهار وحماس رهيب وان بقى كل حلمها انها تكون معاهم في الجنه !
وفي مره طلبت مني اتصرف واشتري مصحف واجيبهولها لانها مش حافظة غير كذا سورة صغيره بتصلي بيهم وعاوزه تقرأ سور اكتر من القرآن..
كنت خايفه جدا ومش عارفه اتصرف ازاي!! ف قولت لعمي اللي هو توأمها، وكان رده عليا انه هيتصرف.. وتاني يوم لقيته جابلي مصحف صغير وقالي ادخلهولها م غير م حد يعرف..
كنت عارفه انه مش فارقله هي ع انهي #ديانه وكان كل همه انها تكون مرتاحه.. ف عملت كدا فعلا ودخَّلتلها المصحف م غير م حد يعرف وبمجرد م شافته كانت بالظبط عامله زي الغريق اللي لحقوه ع اخر لحظه!!
كنت مستغربه كل تصرفاتها ف سألتها : هو الاسلام فيه ايه مميز عن المسيحية علشان تتمسك بيه للدرجادي وتستحمل كل العذاب دا ؟!
ردها كان غريب جدا بالنسبالي ومش مفهوم؛ قالتلي ان اللي بيحصل معاها ولا حاجه جنب اللي حصل للمسلمين الأوائل اللي شافوا وداقوا كل ألوان العذاب ومع ذلك صمدوا وكملوا في الإسلام ومنهم عمار بن ياسر وأهله! - وانا طبعا لا كنت اعرف مين عمار ولا اهله ولا ايه اللي حصل معاهم-
قولتلها باستغراب ان اغلب المسلمات اللي حوالينا غير محجبات واللي نعرفهم كويس ولا مره شوفناهم بيصلوا مثلا او بيعملوا حاجه تدل ع انهم مسلمين..
قالتلي في الزمن دا متاخديش الدين من الاشخاص وتصرفاتهم واخلاقهم، لان ناس قليلة اللي فاهمه الدين او مُتطلعين عليه، وللاسف اغلب المسلمين اللي اتولدوا ع الاسلام مش مُدركين النعمة العظيمة اللي هما فيها.. ومنهم اللي بيتبرأ من الاسلام وتعاليمه علشان كدا ربنا قال:
"وإن تتولوا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُمْ"
قولتلها: يعني ايه مش فاهمه ؟!
قالتلي: يعني الاسلام نفسه مش متوقف على حد،وان اللي اتولدوا ع الاسلام ومش حاسين بقيمته او فكروا يخرجوا منه ف ربنا قادر يستبدلهم بناس حريصه اكتر على الدين والقرب من ربنا..
ونصحتني اني مسلمش دماغي لعادات وتقاليد اتولدت عليها وان ربنا ميزنا بالعقل علشان يوصَّلنا لطريقُة..
واني لازم ادور بنفسي على طريق ربنا وانها متأكده اني لو مشيت ورا المنطق وعقلي، هيوصلوني ف النهايه للإسلام !
كنت عاوزه اسألها ازاي وليه دخلت الإسلام بس كان لازم اخرج قبل م والدي يرجع م بره وكمان عمتي كانت ف الفتره الاخيره تعبت جدا وجسمها كان حرفيا جلد على عضم لدرجة ان احيانا كنا ندخل نلاقيها بتصلي زي م هي ع السرير -انا اصلا استغربت بعدين هي كانت بتصلي ازاي وهي متعرفش اتجاه القبله- !!
بعد 3 أيام لقينا خبط جامد ع الباب اتفزعنا كلنا خاصة ان الساعه كانت تقريبا 2 بالليل !
ولما والدي فتح الباب لقينا عمي اللي هو توأمها داخل بسرعه م باب الشقه لباب اوضتها ولما والدي حاول يمنعه قاله انها كانت بتنادي عليه وبعتتله روحها تصحيه يروحلها وانه لازم يدخُلَها !
مش عارفه م الصدمه ولا ايه اللي حصل بس والدي سابه يدخلها وقعدنا كلنا قدام باب الاوضه.. ومش عارفه دي مبالغه مني ولا انا كان بيتهيألي ولا ايه اللي حصل، بس كنت حاسه ان كلنا كنا سامعين ضربات قلب بعض !
ولما عمي اتأخر جوه، والدي وقف وفتح باب الاوضه ولقيناه متسمر مكانه وفجأه حط ايده الاتنين ع راسه ووقع ع الارض قدام الباب..
جرينا بسرعه لقينا عمي ضامم عمتي لحضنه وبيمشي ايده ع شعرها وبيقولها وصوته كله دموع: كنتِ ملاك فعلا يا مريم،
مكانك مكانش على الأرض، مكانك الحقيقي فوق بين الملايكة، وخلاص نزلوا خدوكي !
وبصلنا وقالنا شوفتوا حد جميل كدا ومبتسم حتى وهو نايم !
وباس راسها ونيمها كويس ع السرير وقلع الجاكت بتاعه غطاها بيه.. وخرج بالراحه وهو بيكلمنا بشويش وبيقولنا سيبوها مفيش حد يزعجها ولا يزعج الملايكه اللي معاها في الاوضه..
وسابنا ومشي !
مشي ومشوفناهوش تاني ابدا من 2010 ولحد النهارده ومفيش حد عارف هو فين ولا ايه حصله..
كل اللي باقيلي من ريحتهم هو الجاكت اللي غطاها بيه ولبس عمتي اللي كانت لابساه والأعجب ان ريحته كانت جميله جدا والله بدون مبالغه رغم انه فضل عليها كذا شهر ومن غير م تستحمى ! وكأنها #معجزة !!
والدي لا هو شخص قاسي ولا هو شخص حنين.. بس اعتقادي ان حتى المسلمين لو حد من اهلهم خاصة لو بنت وخرجت من الدين هيتصرفوا نفس تصرف والدي..
ودا اللي والدي فضل يكرره علشان يقنع بيه نفسه،
عمري م انسى رعشة ايده وهو بيلمسها ودموعه اللي مغرقه وشه وهو بيقولها ليه وصلتينا لكدا! حقك عليا💔 وكانت اول واخر مره اشوف فيها دموع والدي !
وم وقت اللي حصل وهو بقى يراقب كل تصرفاتنا ولازم هو اللي يختار نصاحب مين ونعرف مين، وتفتيش شبه يومي منه هو ووالدتي لاوضنا والكتب اللي بنقرأها ولو هنتكلم في الموب لازم يعرفوا بنكلم مين وبنتكلم في ايه، وبقى في حصار علينا علشان ميتكررش اللي حصل مع عمتي..
كُره والدي للإسلام زاد جدا لانه شايف انه السبب انه خسر اخواته الصغيرين اللي فرق السن بينه وبينهم كبير وكان بيعتبرهم زي ولاده !
الغريبه ان مفيش حد فينا عرف هي أسلمت ازاي ولا امتى وفضل موضوع اسلامها غامض بالنسبالنا،
"بس اعتقد ان القراءة في سيرة الرسول والصحابة كانت م اسباب لين قلبها ودخولها للإسلام" لكن ايه السبب تحديدا او البداية جات ازاي معرفش للأسف!
كمان اخر لحظات لعمتي ف الدنيا قبل ما ربنا يقبض روحها كانت عامله ازاي مفيش حد عارف اللي حصل غير عمي توأمها اللي اختفى هو كمان تماما !
مفيش حد عرف ب اسلام عمتي غير الاشخاص اللي ذكرتهم، ف حبيت اشارك بقصتها معاكوا علشان لو مش هتعبكوا طالبه منكوا تفتكروها في دعائكم ❤
عمتي سبحان الله اسمها مُفضل عند كتير من المسلمين،وحتى لو كانت اتوفت ع اسم مسيحي ف المهم انها عند ربنا اتوفت وهي مسلمة.. بغض النظر كمان عن انها اتدفنت عادي ف مقابر المسيحيين ومتصلاش عليها صلاة الجنازة عند المسلمين .. الا اني بتمنى انها تكون في مكان اجمل كتير عند ربنا ويعوض تعبها وصبرها على العذاب والألم والذل اللي شافته.. ويرحم عمي اللي هو توأمها أيًا كان مكانه لسه موجود ع الارض او بقى ف السما هو كمان💔
عمري م نسيت ملامح حد فيهم ولا نبرة صوتهم ولا روحهم المرحه اللي انطفت اخر شهور قبل وفاتها خاصة عمي اللي كان اشبه بجثه من غير روح لان والدي كان مانعه يزور عمتي !
بس دايما كان يجيلي ف الحلم وهو قاعد هو وعمتي في مكان زي الجنينه كله شجر وفاكهه وقاعدين بيضحكوا..
مشوفتش الحلم دا غير بعد وفاة عمتي ب 3 سنين ونص بالظبط ودا تحديدا لما دخلت الإسلام انا كمان ودي قصه تانية لوحدها واكتملت الغرابه بزواجي من شخص مسيحي بردو وكان من اختيار أهلي، بس اكتملت معجزتي بيه واللي حصل كالتالي...!
يُتبع ....
الجزء التاني هينزل بكره ان شاء الله ع اليوتيوب ❤
#حكاوي_هدير
#هدير_ابراهيم
