نادين والنجم الساحر | الجزء الثالث
---
كانت نادين بتكلم النجم وهو على هيئة شاب، وفجأة سمعت صوت وراها بيكلمها.
بصّت بسرعة على مصدر الصوت، ورجعت تبص على النجم… لقيته اختفى! لكن كان في سلحفاة جنبها.
الصوت:
> "بتكلمي مين يا بنتي؟"
نادين بدهشة:
> "تيتا! حبيبتي، بتعملي إيه هنا؟"
الجدة بابتسامة دافئة:
> "كنت عارفة إني هلاقيكي هنا، فجيت أقعد معاكي شوية."
نادين تاخدها في حضنها بمرح:
> "تعالي يا حبيبتي، بقالي أكتر من 12 ساعة مشوفتكيش… وحشتيني."
الجدة بضحكة صغيرة:
> "يا بكاشة، ما أنا لو وحشاني بجد، كنتي تيجي تسألي عليا بعد الشغل. مش تجري على البحر تحكيله يومك قبلي."
نادين:
> "ما انتي عارفة يا تيتا إني برجع متأخر، وكتير بلاقيكي نايمة."
وفجأة، سمعوا صوت تميم من بعيد:
> "بقى سايبيني لوحدي، وقاعدين مع بعض هنا!"
الجدة بابتسامة :
> "كنت عارفة إنك هتيجي ورايا."
تميم :
> "بقى يعني يا ست الكل تقوليلي إنك جاية وتسيبيني وتخرجي كده، حتى ما استنتيش أجي معاكي؟"
نادين بضحك:
> "إيه ده! يعني جايين لي برضو؟"
تميم:
> "جايين نرخم على البحر شوية."
(السلحفاة كانت متابعاهم وبتقرب من نادين. أخدتها على رجلها وهي مبهورة بجمالها الغريب… مش سلحفاة عادية! دي كأنها طالعة من عالم الكرتون).
نادين:
> "السلحفاة دي جميلة جدًا!"
الجدة بانبهار:
> "أول مرة في حياتي أشوف سلحفاة بالشكل ده."
تميم بأعجاب:
> "بجد حلوة أوي… ينفع ناخدها معانا؟"
(نادين افتكرت فجأة حاجة وقالت في سرها: ممكن النجم يكون اتحول لسلحفاة!).
حدفتها بسرعة على الأرض وهي بتصرخ:
> "لأ لأ… مش ممكن!"
تميم متوتر:
> "اهدّي! إيه اللي مش ممكن؟"
نادين حاولت تداري:
> "لا مش ممكن الجمال ده… بجد السلحفاة تحفة!"
تميم بحماس:
> "حقيقي؟ يعني موافقة ناخدها؟"
نادين:
> "الرأي رأي تيتا."
(بصوا هما الاتنين للجدة… حتى السلحفاة).
الجدة بابتسامة:
> "موافقة يا حبايبي."
---
في المنزل
نادين بصت للسلحفاة وقالت:
> "ها بقى… سلحفاة بجد ولا نجم؟"
السلحفاة ردت بسخرية:
> "طلعتي بتعرفي تفكري… الله أكبر عليكي."
نادين باستياء:
> "عيب عليك! قولي بقى، هتفضل سلحفاة كده ولا هترجع نجم ولا شاب؟ لأني قربت أتجنن رسمي!"
النجم بخُبث:
> "هو إنتي لسه شوفتي جنان؟"
نادين بارتباك:
> "قصدك إيه؟"
(فجأة رجعت السلحفاة لشكل نجم، وطار في السماء وخرج من الأوضة. نادين خرجت وراه).
النجم بصوت قوي:
> "أنا بتحول لأي حاجة في أي وقت أنا عايزه… براحتي."
نادين بدهشة:
> "طيب ليه مرجعتش نجم لما كنت بكلمك وتيتا جت؟"
النجم:
> "لأن رجوعي لأصلي مش سهل… ومش بسرعة. وممكن تيتا تاخد بالها مني. وده كان هيبوّظ مهمتي زي اللي فاتت."
نادين:
> "مهمة إيه؟!"
النجم بتردد:
> "ولا حاجة… بكرة كل حاجة هتبان. اصبري شوية، خليني أرتاح. الدفا ده مخليني أنسى شكل البيت من بعد ما طردوني من القبيلة."
نادين مذهولة:
> "طردوك؟! يعني ظهورك ده عقاب ليك؟"
النجم:
> "أيوه… أنا كنت في مهمة رسمية هنا على الأرض وفشلت فيها. والأسوأ إني استعملت قوتي لمصالحي الشخصية. وده ممنوع عندنا."
نادين:
> "طيب… لما هو عقاب، ليه عندك مهمة تانية؟"
النجم:
> "ده جزء من العقاب. مش هرجع لقبيلتي غير لما أنجز المهمة دي."
نادين:
> "طيب والمهمة اللي فشلت فيها كانت إيه؟ والمهمة اللي لازم تعملها علشان ترجع لقبيلتك إيه؟"
النجم بصوت غامض:
> "بصي يا ستي… المهمة دي كانت عبارة عن……"
وهنا بدأ اللغز يكبر أكثر! فالنجم اعترف أن ما يحدث معه ليس مجرد صدفة، بل عقاب من قبيلته لأنه فشل في مهمته الأولى… لكن ما هي هذه المهمة الغامضة؟! ولماذا استُبعد من عالمه الحقيقي؟ وهل عودة نادين وارتباطها به صدفة، أم أن لها دوراً أكبر مما تتخيل؟
وهل السلحفاة السحرية مجرد هيئة عابرة، أم أنها ستكشف أسرار لا يعرفها أحد غيره؟
وتميم والجدة، هل سيكون لهم دور في اكتشاف السر، أم أن الأمر سيتعلق بندين وحدها؟
أسئلة كثيرة بلا إجابة… فهل سيحمل الجزء الرابع الحقيقة كاملة؟!
