قصتي مع الظلام ( انا والظلام )
قصتي مع الظلام ( انا والظلام )
السلام عليكم اسمي سما انا بخاف من العتمة اوي من وانا صغيرة بخاف منها مش عارفة ايه السبب بس حصلت معايا مواقف كتير أوي زادت من خوفي ده لدرجة أني أوقات بحس إن قلبي هيوقف من كتر الخوف .
الموقف الاول : وانا صغيرة كان عندي عشر سنين كان اهلي كلهم نايمين وانا بس اللي لسه صاحية كنت بحاول أنام وانا بحاول أنام عيني اتحركت على الصالة اللي مفيهاش نور وباب الاوضة مفتوح فجأة لقيت زي قطة ماشية في العتمة خوفت وقولت أكيد بيتهيألي بصيت تاني وشوفت نفس القطة تاني وهي بتعدي من الصالة كانت بتقف شوية وتبصلي وبعدين تمشي واللي حصل ده بقى بيحصل كل يوم بالليل لما ابص على الصالة والنور مطفي ومقولتش لحد على اللي حصل وبقيت بتجنب اني ابص على الصالة وأوقات كنت بنور النور في الصالة علشان لو بصيت ميكنش فيه حاجة .
الموقف الثاني : مش عارفة الصراحة ده كان بيحصل ليه اوقات بكون نايمة والكهرباء بتفصل وبصحى مفزوعة بستغرب ازاي بعرف أو بحس إن الكهرباء قطعت مع أنه كان بيحصل في الشتاء يعني لو كان في الصيف تمام كنت هقول صحيت لأن المروحة وقفت بس في الشتاء ليه وازاي فكنت بصحى خايفة واتفزع ولازم يكون في حد جنبي علشان مخافش بس كنت بحس بحاجات بتتحرك في العتمة معرفش ايه هي لاني مش شايفة حاجة ودائما بقول أن ده من خوفي ولسه لحد النهارده وانا عندي عشرين سنة بخاف من العتمة بس بقيت بعرف اتحكم في نفسي اني مثلا مبينش خوفي ده قدام أي حد .
الموقف الثالث : كنا بنطلع انا واخواتي على السطح بالليل نقعد مع بعض كنت ببص على الأراضي الزراعية وازاي هي عتمة بالشكل ده وبقعد اتخيل حاجات بتطلع منها فجأة وكنت بشوف القطط بردو فيها وعينيها تبقى باصة ناحيتي انا ، ولما كنت ببص ناحية الماية في العتمة احس بردو أن حاجة هتطلع منهم وأوقات بشوف خيال حاجات مش عارفة هي ايه على وش الماية فكنت بحاول اعمل اي حاجة علشان مبصش ناحيتهم بس بردو خوفي منهم لسه موجود لحد دلوقتي.
فيه أوقات لما كانت الكهرباء بتقطع بكون لوحدي مفيش حد معايا من اهلي كنت بحس كأن فيه حد ورايا مش شايفاه وممكن انه يمسكني لو لفيت وشي فاكرة اني وقتها كنت هموت من الرعب وعايزة أنادي على أي حد بس للاسف لساني مش بيتحرك ورجلي مش بكون عارفة أحركها من الخوف وكنت بدعي إن النور بنور بسرعة لاني مش قادرة مكنتش عارفة اعمل ايه لقيت نفسي بذكر ربنا وصلي على النبي ( عليه الصلاة والسلام) وامشي بسرعة للمكان اللي فيه اخواتي واقعد معاهم .
لما كبرت شوية بقيت افكر لما انا بخاف من العتمة للدرجة دي هعمل ايه لما اروح القبر اللي هيكون عتمة ومكان ضيق جدا ومن هنا بدأت ابحث عرفت أن الصلاة والقرءان هيحموني من عتمة القبر وضيق مساحته انا بصلي من وانا صغيرة أما دلوقتي فبقيت بصلي بقلبي وبدأت حفظ القرءان وكان حلمي اني أختمه كنت لما بقرأه بحس بإحساس جميل جداً ده كلام ربنا فبركز فيه بسمعه بقلبي وحققت حلمي الحمدلله وختمته و بالنسبالي فده أحلى إنجاز عملته في حياتي ، خوفي من العتمة قل بس لسه موجود حاجة مش بايدي انا معرفش السبب بس اللي اعرفه إن الصلاة والقرءان بيريحوني ويطمنوني .
