قصة الساحر الهندي الذي سحر الشيخ الشعراوي
ماذا اكتشف الشيخ الشعراوي في رحلته الى باكستان؟؟؟؟؟
القصة بتاعت النهاردة هي قصة غالبا ناس كتير جدا سمعت عنها. تجربة حصلت مع شيخ جليل كل الناس بتحبه وبتحب تسمع كلامه يوميا حتى من بعد وفاته، الشيخ الشعراوي.
الشيخ الشعراوي رحمة الله عليه حكلنا تجربة حصلت معاه كان بيقول فيها ان الجن ظهر قدامه.تجربة دي حصلت مع باكستان بس اكملوا معايا الفيديو للاخر وانا هقولكم كل التفاصيل بتاعتها
التجربة بتبدأ لما الشيخ الشعراوي رحمة الله عليه كان في زيارة للجزائر وهناك اتقابل مع السفير السعودي في الجزائر (رياض الخطيب). اتعرفوا على بعض هناك ومن بعديها بدأوا صداقة فضلت سنين وسنين. تخلص الزيارة بتاعته في الجزائر ويرجع على مصر عادي جدا ولكن بعدها بكم سنة تجيله زيارة تانية لباكستان. في نفس الوقت دا كان السفير السعودي بقى هو السفير السعودي في باكستان للسعودية وطبعا اول ما السفير السعودي عرف ان الشيخ الشعراوي هيروح باكستان قرر ان الزيارة بتاعت الشيخ الشعراوي تكون في ضيافته هو، لانه كان بيحبه وبيقدره وكان صديق شخص لي فمكنش ينفع انه يجي باكستان ويبقى في ضيافة اي حد تاني غيره. وبالفعل هو اللي استقبل الشيخ الشعراوي وفضل معاه، ولكن كان فيه قصة كده بدأ يحكيها للشيخ الشعراوي وقال له انها تجربة شافها بعينه، قال له انه حضر عرض لساحر هندي على الحدود ما بين باكستان والهند، وان العرض السحري اللي هو شافه دا ما كانش له اي تفسير لا عنده ولا عند اي حد شافه.
ومن غير ما يحكي اي تفاصيل للعرض طلب من الشيخ الشعراوي انه هو محتاجه يجي معاه علشان يشوف العرض دا علشان يقوله التفسير بتاع العرض دا وايه اللي بيدور فيه، لانه كان حاسس ان فيه حاجة غريبة بتدور جوه العرض السحري دا. الشيخ الشعراوي رحمة الله عليه قال له انه معندوش مشكلة وانه هو عادي يروح ويشوفه وساعتها بأمر الله يعرف هو ايه اللي بيدور.
يعدي يومين والسفير السعودي يبتدي يجهز علشان ياخد الشيخ الشعراوي ويروحوا يحضروا العرض دا، وبالفعل يوصلوا هناك والعرض كان كالتالي، الساحر الهندي بيبقى معاه مجموعة من القطن بيبتدي انه هو يحركها بشكل معين ويقول شوية حاجات من فمه علشان بعديها القطن دا يبتدي يعمل خيط طويل جدا. الخيط دا بعديها بشوية يتحول لحبل والحبل بعديها بشوية بعد تمتمة كتير يتحول لعمود قوي جدا، وساعتها بيبقى معاه طفل صغير بيبتدي يخليه يتسلق الحبل اللي تحول لعمود فجأة، كل دا قصاد الناس ومن غير ما يبدل حاجة مكان حاجة. طفل صغير بيبتدي يتسلق الحبل اللي بقى عمود وكأن الحبل دا مش حبل أصلا.
الشيخ الشعراوي كان قاعد بيتفرج على العرض وكان مستغرب وحاسس ان في حاجة غريبة بتدور حواليه، ما كانش فاهم ازاي البنى آدم دا بيعمل كده ولكن كان مركز جدا مع كل التفاصيل اللي بيعملها.
كان متضايق جدا لأنه هو مكنش مقتنع انه ممكن حاجة تسحره وتخليه يركز بالمنظر دا من غير ما يعرف لها تفسير، يرجع بعدها الشيخ الشعراوي للمكان اللي هو قاعد فيه عند السفير السعودي، ولمدة 3 أيام قاعد بيقرأ في القرآن ويسترجع كل الآيات اللي بتتكلم عن السحر. علشان بعد 3 أيام وبعد قراءة كتير يطلع بتفسير، تفسير بأن أغلب السحر بيكون سحر للعين، يعني الجن يقدر يخلي الإنسان يشوف اللي هو عايز يشوفه. وبعد ما قدر يوصل للتفسير دا طلب تاني من السفير السعودي انه يوديه يحضر العرض تاني. طبعا السفير السعودي ما يكدبش خبر، ويوديه يحضر العرض تاني ولكنه طلب منه انه يكون معاه حاجة كده.
طلب منه انه يكون معاه مصور يصور العرض من أول ثانية لآخر ثانية، ميسيبش لقطة ما يصورهاش، ويحضر العرض كامل ويبتدي انه هو يشوف نفس التفاصيل بتاعت القطن والحبل والحبل اللي يتحول لعمود والطفل اللي يتسلقه، لكن المرة دي كل حاجة كانت بتحصل كانت بتتصور. يخلص العرض ويطلب الشيخ الشعراوي ان الصور تتحمض علشان يشوفها، علشان تطلع الصور وساعتها الشيخ الشعراوي يتفاجئ!!!!!!
يتفاجئ لان كل الصور طلعت بيضة مفيش اي حاجة متصورة ولا باين فيها الساحر الهندي ولا باين فيها الحبل ولا الطفل الصغير ولا اي حاجة!!!!!!! ومن بعديها الشيخ الشعراوي يروح للسفير السعودي ويقوله التفسير عن كل حاجة اتشافت.......
يقوله ان الساحر الهندي ده هو معاه جنى بالفعل، وانه بيقدر يخلي الجني يتشكل في كل حاجة انتوا بتشوفوها بعينيكم، الجن هو اللي بيتشكل في هيئة القطن اللي بيتحول بعد كده لخيط اللي بيتحول لحبل جامد بيبقى عمود اللي بعديها بيكون فيه طفل بيطلع عليه.
كل ده الجن بيحاول يخدع الناس في أبصارها وبيحاول يخليهم انهم يشوفوا اللي هو عايزهم يشوفوه، وان لولا تسخيره للجني اللي معاه هو مش هيقدر يعمل اي حاجة من اللي الناس شافتها دي، لان دي الطريقة الوحيدة اللي بيقدر يسحرهم بيها.
ويقول ساعتها للسفير السعودي ان الجن بيقدر يتشكل في أشكال كتيرة جدا لانه ميقدرش يظهر بشكله الطبيعي للناس عموما كده. لان غالبا الناس لو شافته بشكله الطبيعي هيحصل لهم مشكلة رهيبة.
وبكده تخلص قصتنا النهارده تجربة واقعية 100% ورواية قيلت عن شيخنا الجليل الشيخ الشعراوي رحمة الله عليه.
