المعاشرة الجنسية بين الجن والإنس

المعاشرة الجنسية بين الجن والإنس

المعاشرة الجنسية اللي بتحصل بين الجن والإنس حقيقية جدا وحصلت معايا بشكل شخصي بكل مراحلها, وكمان مكانش جن بس, دي كانت بتجيلي جنيّة وتعمل معايا زي اللي بيعملوه في الأفلام القرف اللي بيعملوها..

أنا عشت فترة صعبة في حياتي من بداية ما كان عمري 14 سنة لحد ما بعد الجامعة بسنين كتيرة, المشاكل اتطورت لحد ما أمي جابتلي شيخ من مدينة "فاس" بالمغرب..

بداية حكايتي حصلت لما كان عمري 14 سنة, كنت بحلم حلم بيتكرر كل يوم لمدة 30 يوم, كل ليلة بنفس التفاصيل بالظبط, كت بحلم بصاحبتي اللي معايا في المدرسة جايه ناحيتي ومعاها طفل تقريبا عنده عشر سنين مكتوب على جبهته كلمة "جن" وهو باين عليه إنه جن من غير ما يتكتب فوق جبهته حاجه..

الأحلام والكوابيس في العادة بتكون خطرة وليها دلالة لما تتكرر مرة كل كام يوم أو كل شهر لكن الحلم بتاعي كان بيتكرر كل يوم لمدة شهر, كنت بصحى من النوم جسمي متكسر وفيه بقع زرقا في أماكن مختلفة في جسمي, فيه جمبنا مسجد كبيير الإمام بتاعه دكتور في الشريعة الإسلامية وفوق المسجد فيه زي قاعة صغيرة كدا بتروح فيها الستات والشيخ دا الله يرحمه ويجازيه الجنة كان بيعالجهم بالقراّن..

اللي عندها مشكلة كانت تقعد قصاده وقدامنا كلنا ويقرا عليها قراّن ومبياخدش جنية واحد وبيعمل كل دا لوجه الله, أمي في يوم خدتني هناك لكن للأسف مشكلتني متحلتش..

كبرت شويه ودخلت الجامعة والكوابيس مستمرة والشيوخ بتيجي وتروح, وموضوع المعاشرة بدأ وكان بيحصل زي اللي بيحصل بين الأزواج بالظبط, بيكون في البداية عبارة عن حلم والجن كان بيتشكل مرة في هيئة, مرة في هيئة حد مشهور عشان الموضوع يبقى طبيعي لكن بمرور الوقت بقى ميستناش أنام, كان بيجيلي وأنا بين اليقظة والنوم والموضوع بقى صعب جدا وبدأ يحصلي نزيف, مش نزيف لمدة يوم ولا يومين لا, نزيف لمدة أربعين يوم!

مفيش لا دكاترة ولا شيوخ ولا قساوسة لاقيين حل للي بيحصل معايا, والموضوع بقى صعب وعشت فترة صعبة كبيرة في حياتي لدرجة إني فكرت في الانتحار أكتر من مرة وكنت على وشك الانتحار لإني خلاص كنت على حافة الجنون..

في فترة الجامعة الأربع سنين اتقدملي 48 عريس حرفيا, وأنا رافضه ارتبط بأي حد, كنت بخاف من كل حاجه حتى النوم كنت بخاف منه, مكنتش بنام غير بعد الفجر, والنور مفتوح وباب الأوضة مفتوح ولازم أمي الله يرحمها تفتحلي دراعها وادخل في حضنها وانام, الكلام دا ما استمرش سنة ولا اتنين, الكلام دا لمدة 11 سنة.

المهم في يوم أمي جابتلي شيخ مغربي من مدينة فاس, كان موجود بالصدفة في محافظة من محافظات مصر, الشيخ جي واللي عمله واللي حصل مشوفتش حد عمله قبل كدا ولا حصل مع حالة زي حالتي قبل كدا..

قعد يمشي في البيت وهو بيبص في الأركان والزوايا ويرفع راسه للسقف أحيانا, مرات يبص كتير ومرات يبص بصة سريعة ويمشي, فضل على الحال دا أكتر من ربع ساعة وبعدين قال فين أوضتها, دخل اوضتي وبدأ يتمتم بكلمات بصوت واطي وبعدين بص ناحيتي وقالي انتي معاكي جن عاشق واهو قاعد على السرير مستنيكي تنامي وشاور بإيده على مكان في السرير, طبعا أنا اتنفضت من الخوف أنا وأمي وأبويا, بعدها كمل كلامه وقال حاولت أخليه يمشي بالذوق لكن مفيش فايدة, هاتولي السكاكين اللي عندكوا..

كان بيتكلم معانا وبيبص مرة علينا ومرة على السرير, أمي جريت على المطبخ جابت حوالي خمس سكاكين مختلفين الأحجام والأشكال, بص فيهم كلهم وأمي ماده اديها بيهم, كان بيبص على السكاكين مرة وعلى السرير مرة وهو بيبتسم ابتسامة زي ما يكون بيخوّف الجن اللي قاعد على سريري, بعدها اختار سكينة منهم وقال لأمي سخنيها لحد ما تتحول لجمر..

أمي سخنتها وجابتهالي, قعدني على كرسي من الكراسي وكشف فخذي وبطرف السكين اللي مولّع نار بدأ يكتب على فخدي كلمات مشبكه وخطوط وعلامات, وبعدين قال كلكوا اطلعوا بره وهو طلع معانا وقفل الباب وراه..

قعد على كرسي الانتريه وقال كلكوا اقروا اّية الكرسي وانتوا باصين على الأوضة, بدأنا نقراها ومفيش ثواني إلا ونشوف نار في الأوضة من خلال زجاج الباب من فوق, وبعدها بدأت تطلع دخان من تحت الباب وهو بيقول كملوا قراءة متوقفوش, قرينا اّية الكرسي كذا مرة لحد ما النار هديت والدخان اختفى وكل شيء رجع طبيعي, بعدها قام فتح الباب وقال تعالوا ورايا, دخلنا وبمجرد ما وقفنا في نص الأوضة فجأة الدولاب بتاعي اتفتح والهدوم بقت تخرج منه وتتحدف علينا لوحدها, والسجادة تتشد من تحت رجلنا والمخدة تتحرك وتترمي عليا, كإن أوضتي فيها عشره من الجن بيحدفونا بأي حاجه يلاقوها في وشهم, مشهد مرعب مفيش مخرج فكّر يعمله قبل كدا في أفلام الرعب…

بعدها عرفت إن الشيخ دا دجال ولا هو شيخ ولا حاجه, ومشكلتي برضو متحلتش..

شيوخ تانيين قالوا لأمي على أعشاب تخلطها بالمسك وتدهن بيها جسمي قبل ما أنام, وكانت تعمل كدا فعلا لكن لما اصحى كان جسمي كله كإنه حد معاه خرزانه وضربني في كل منطقة في جسمي من أول رقبتي لحد رجلي, علامات علامات لكن بدون ألم..

بعدها كنت عند أخويا وهو بالمناسبة متجوز مغربية, أخويا كان يعرف واحد ابن حلال اتصل بيه جابه, الراجل دا قال هاتوا حلة واملوها مياه, بعدين حط الغطا عليها وقالي حطي رجلك فوق الغطا, وبدأ يقرا والمياه بدأت تفور وفي الاّخر قالي انتي معندكيش جن عاشق ولا حاجه, انتي بالغلط مشيتي فوق عمل معمول لحد غيرك واترمى بلاعة المجاري اللي قدام بيتكوا, والموّكل بالعمل دا اتنين من الجن وجنيّة..

أنا لما رجعت البيت شوفت فعلا فيه غطا بلاعة قديم قدام بيتنا بالظبط مكنتش خدت بالي منه قبل كدا, يعني كلام الراجل سليم, بس مشكلتي برضو متحلتش!!

لحد ما في يوم سافرت المغرب مع أخويا ومراته وهناك عائلة مراته كانوا رايحين يزوروا مقام كدا لحد مشهور زي المقامات اللي عندنا في مصر وقالولي تعالي معانا غيّري جو واتفسحي, رحت معاهم ومجرد ما دخلت المقام بقيت أصرخ بشكل هستيري وفقدت السيطرة على نفسي, كنت اخرج بره الصراخ يسكت ولما ادخل تاني أبدا صراخ, شافني واحد في المقام هو شيخ تقريبا وقالهم على أعشاب يغلوها ويخلطوها بزيت الزيتون وبعدين يصفّوها وادهن بيها جسمي, وفعلا عملت كدا وخفيت, بس لمدة شهر واحد فقط..

والكوابيس والخيالات رجعتلي تاني, لحد ما في فترة كنت قربت فيها من ربنا, صليت ركعتين وقولتله يارب أنا تعبت, أنا مش معترضة على اللي بيحصل معايا لو كان ابتلاء بس أنا تعبت جدا, واتوجهت لربنا بكل جوارحي, ليلتها شوفت ملكين في المنام جايين وقالولي معانا رسالة من رسول الله صل الله عليه وسلم, وبيقولك انتي معاكي جن لكن اصبري وهتشفي..

أنا صحيت من النوم مبسوطة بشكل مش طبيعي ونسيت تعب الـ11 سنة اللي فاتوا, يومها قولت مش هستعين بحد تاني عشان يشفيني, أنا هستعين بنفسي وبقربي من ربنا والجن اللي هيجيلي في المنام هقرا عليه واحرقه..

اكتسبت قوة مش طبيعية, كنت بنام بعد الفجر لكن يومها نمت بالليل, كنت بسيب النور مفتوح لكن يومها قفلته, كنت بخلي الباب مفتوح لكن قفلته, وفعلا كان اللي بيجيلي في الحلم أو يقرب مني كنت بمسكه واقرا عليه واطلع فيه تعب السنين لحد ما خافوا مني ومحدش قربلي تاني..

بحكيلكوا تجربتي دي اللي مرت عليها 21 سنة, وبقول لكل بنت استعيني بنفسك وبقربك من ربك, هو الوحيد اللي هيشفيكي ويحميكي من الإنس والجن..

#قصة_حقيقية..

انتهت

أنا كتبت القصة كاملة لإنها تستاهل وتستحق إن الناس كلها تشوفها على بعضها بدون أجزاء عشان العبرة والعظة, ياريت تتفاعلوا عليها وتعملولها مشاركة عشان تشوفها كل بنت مريضة, جايز تكون القصة دي اتكتبت في الوقت دا في الأيام المباركة دي عشان تكون سبب في شفاء بنات كتير, القصة مبعوتالي من فترة كبيرة وأنا شيء بالصدفة النهاردا لما صحيت بدري قالتلي افتح القصص وشوف قصة فلانة وبمجرد ما سمعتها كتبتها فورا وقولت انشرهالكوا..

ياريت لو خلصت قراءة تكتب تم ومتنساش تضغط متابعة عشان يوصلك كل جديد ولو عندك قصة حابب تشاركها معانا ياريت تبعتهالي في رسالة..