عودة بعد الذنب
«عودة»
_ يعني كدا نسيني، وبقيت ولا حاجه بالنسبة ليه!
كنت بكلم نفسي، ببص لملامحي اللي بهتت من الزعل والحزن، بقول فين "نسمة" اللي حبّت، واتخدعت.
إزاي جالو قلب ينساني، بعد دا كلوا؟
بعد الحب، والرسايل، والوعود!
يسبني كدا فجأة وكأني ولا شيء!
بس تعرفوا أنا برضو اللي غلطانة، أنا اللي سمحت أنه يدخل حياتي، يستحوذ على أفكاري، يوقعني في حبه،
يكلمني من ورا أهلي وأنا عادي،
كنت دايمًا بـ برر لنفسي.
إني مش لاقية اهتمام، أهلي مشغولين، وهو هيديني كل حاجه حلوة.
قالي إنه هيسافر علشان نتجوز، بقاله فترة مختفي.
كل مواقع التواصل بينا أتقفلت، هو ذات نفسه مختفي، لحد ما شوفته في يوم.
كان مع واحده بيضحكوا سوا، لوهلة شكيت إني بتوهم، إن أكيد هو مسافر، حصله أيّ ظرف،
أكيد هو مش هيسبني كدا، بس لما سمعت نبرة صوته اللي مستحيل أنساها، عرفت.
عرفت إني كنت غبية، صدقته، وحبيته، وحطيت لغيابه أعذار،
حاولت أقرب منه وأواجهه يمكن أرتاح، يمكن أفهم،
بس مقدرتش.
أروح إزاي للي حبيته وأقوله إنتَ سبتني ليه؟
مش اللي بيحب مستحيل يزعل حبيبه؟
أو حتى يسيبه؟
دلوقتي أنا فهمت، أدي أخرة العلاقة الحرام،
كان لازم أبعد عنه، كان لازم يكون في بينا أيّ رباط شرعي،
على الرغم إن كان بينا رسايل بس مش أكتر ولا أقل، ألاّ إن دا كان غلط من الأول للأخر.
أنا عارفه إن غلطي كبير وأكيد ربنا دلوقتي زعلان مني،
بس أنا قررت.
أنا هتوب وهرجع لـ ربنا، مفيش أحلى من رضى ربنا علينا،
أنا حاسه إني فوقت، وإن دا وقت العودة لربنا سبحانه وتعالى،
يمكن دا درس علشان أتعلم منه.
«بعد شهر»
"وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ {البقرة:216}"
_ سبحانك اللهم وبحمدك أشهد أنا لا إله إلا أنت أستغفرك وأتوب إليك.
ختمت كلامي، بعد ما عرفت إن الجملة دي أحسن من قول"صدق الله العظيم"، والأفضل قول الذكر دا.
بصراحة،
أنا دلوقتي أحسن وحاسه نفسي أجمل وروحي رجعت ليّ تاني.
بقيت بقرأ قرآن على طول، لبست زيّ شرعي، حفظت جزء من القرآن في شهر، بروح حلقات دينيه في المسجد،
حتى أهلي مستغربين من التغيير الواضح دا.
وحاليًا متقدملي عريس، محتارة أوافق ولا لاء.
بس عرفت من المعلمة من قريب إن في صلاة بنصليها اسمها «صلاة الإستخارة».
الصلاة دي ركعتين وليها دعاء معين، بنصليها علشان ربنا يقولنا فين الخير.
«بعد أسبوع»
_ هيفرق معاك ماضي الشخص اللي قدامك؟
سألت الشخص المتقدم السؤال الأخير في المقابلة، كنت خايفه إن سرّ زيّ كده ينكشف في يوم، وكنت عايزه اعرف اللي قدامي بيفكر إزاي.
_ بصراحة لاء... ما دام الشخص أتغير وتاب يبقى أنا مليش دعوة بالماضي أبدًا، أهم حاجه الحاضر.
إجابة رائعة يا زوجي المستقبلي، همست لنفس بالكلام دا، من خلال كلامي معاه تبيّن إنه انسان ناضج، فاهم، وعاقل،
بيتكلم بثقة، كلامه اقنعني، ودا حاجه هتخليني مقدرش أرفض.
«بعد شهرين»
واقفه جمبه، بعد كتب كتابنا على طول، كل شويه يبصلي بحنية، مهتم لتفاصيلي الصغيرة، ابتسامته حلوة قوي، كنت واقفه مش مصدقة، دا العوض؟
يعني كرم ربنا حلو أوي كدا؟
دلوقتي عرفت إن مفيش حاجه أجمل من الحلال.
_ مبروك.
رديت عليه بخجل:
_ الله يبارك فيك.
تمت.
بقلم: سارة عبدالرحمن
