مدرسة نص الليل_ الفصل الثاني _الورقه الثانيه

مدرسة نص الليل الفصل الثاني

سلمى كانت واقفة في الطرقة ومش قادرة تاخد نفسها. الكرسي اللي كان بيتحرك لوحده وقف مرة واحدة، والصوت اللي كان ماشي وراها اختفى تماما. الدنيا بقت ساكتة بطريقة تخوف أكتر من الصوت نفسه. قالت لنفسها بصوت واطي: خلاص يا سلمى، انتي بيتهيألك، لازم تخرجي من هنا بسرعة قبل ما حد يقفل عليكي. لسه هتلف وتمشي ناحية الباب، سمعت صوت الدرج بتاعها بيتفتح لوحده. تكت. تكت. تكت. قلبها وقع في رجلها. رجعت ببطء وهي ماسكة في الحيطة، وفتحت الدرج بإيد بتترعش. لقيت ورقة تانية! الورقة الأولى كان مكتوب عليها: سلمى

. الورقة التانية كان مكتوب عليها بخط كبير ومرعوب: ارجعي بكرة لوحدك. سلمى صرخت ووقعت الورقة من إيدها، وجريت على باب المدرسة بسرعة، بس الباب كان مقفول! البواب عم محمد قفل عليها من بره ومشي وهو فاكر إن المدرسة فاضية. قعدت تخبط على الباب وتصرخ بكل قوتها: يا عم محمد!

 افتحلي! أنا جوه! حد يلحقني! محدش رد عليها. الشارع كان فاضي والدنيا ليل. فجأة، نور الطرقة كله اتطفى مرة واحدة. وبقى فيه نور واحد بس جاي من فصل الكيمياء. نفس الفصل اللي نسيت فيه الكتاب بتاعها. النور كان بيروح ويجي زي ما يكون حد بيولع ويطفي النور جوه. سلمى كانت مرعوبة وعايزة تعيط، بس عارفة إن مفيش حل تاني.

 لازم تدخل الفصل عشان تشوف الشباك مفتوح ولا لأ، وتطلع منه على الشارع. دخلت الفصل على أطراف صوابعها. ولقيت الكتاب بتاعها محطوط على الدكة، ومفتوح على صفحة معينة، وعليها دايرة حمرا بالقلم الأحمر! قربت منه ببطء وبصت في الصفحة، لقيت مكتوب: التجربة رقم ثلاثة عشر، ممنوع حد يعملها بالليل، لأنها بتفتح باب مش

 بيتقفل. إيدها سقعت. يعني إيه باب مش بيتقفل؟ وفجأة سمعت صوت حد بيقول من وراها بصوت واطي أوي: انتي جيتي أخيرا. سلمى لفت وشها بسرعة. وملقتش حد خالص. الفصل فاضي. بس لما بصت على السبورة، لقيت مكتوب عليها بالطباشير بخط طفلة صغيرة: متخافيش، أنا زيك كنت ناسية كتابي.

سلمى حست إن رجلها مش شايلاها. مين الطفلة دي؟ ومين اللي كتب على السبورة؟ وليه عايزها ترجع بكرة لوحدها؟ تاني يوم في المدرسة، سلمى راحت للدرج بتاعها وهي خايفة، لقيت ورقة تالتة. بس المرة دي الورقة كانت فاضية خالص. مسكت الورقة الفاضية وقعدت تبص فيها. قلبها كان بيقولها إن الفاضي ده وراه حاجة كبيرة. حطت الورقة

 في شنطتها وقررت إنها مش هتقول لحد. روحت البيت وهي بتفكر طول الليل. مش قادرة تنام. كل شوية تبص على الشنطة. الساعة بقت اتناشر بالليل، سمعت صوت ورق بيتحرك جوه الشنطة. فتحت الشنطة بسرعة، لقيت الورقة الفاضية بقى مكتوب عليها كلمة واحدة بس: اهربي. صرخت سلمى.