مدرسة نص الليل

*مدرسة بعد نص الليل - الفصل 

الأول*

أنا عمري ما كنت بخاف من المدرسة، بالعكس كنت بحبها. بس اليوم اللي رجعت فيه بعد المغرب عشان أجيب كتاب الكيمياء، كل حاجة اتغيرت.

أنا سلمى، في اولي ثانوي. اليوم ده كان عندنا امتحان كيمياء بكرة، وأنا نسيت الكتاب في الدرج. ماما قالتلي خلاص ذاكري من على التليفون، بس أنا مكنتش بعرف أذاكر غير من الكتاب بتاعي اللي عليه كل ملاحظاتي.

فضلت أزن عليها لحد ما قالتلي روحي بسرعة وارجعي، المدرسة جنب البيت أصلاً. لبست أي حاجة وخرجت. الشارع كان فاضي، والمدرسة شكلها غريب بالليل، مش زي الصبح خالص.

البواب مكنش موجود، والباب الصغير اللي جنب الحوش كان مفتوح حتة صغيرة. أنا اترددت شوية، بس قولت في نفسي هطلع بسرعة أجيب الكتاب وأنزل.

أول ما دخلت، حسيت بسقعة غريبة، مع إن الجو مكنش ساقع. طلعت السلم بالراحة، وكل خطوة كنت بسمع صوتها عالي أوي. وصلت الدور التاني، والطرقة كانت ضلمة. نور الفصل بتاعنا بس اللي كان منور، مع إننا كنا قافلينه واحنا ماشيين.

قولت يمكن حد من المدرسين لسه موجود، دخلت بالراحة وناديت، "يا مستر؟ في حد هنا؟" محدش رد.

مشيت ناحية الدرج بتاعي عشان أجيب الكتاب، بس أول ما فتحت الدرج لقيت ورقة قديمة صفرا، مش بتاعتي. فتحتها، كان مكتوب عليها بخط غريب: "متجيش هنا تاني بالليل".

إيدي بدأت تترعش. مين اللي حط الورقة دي في الدرج بتاعي؟ أنا لسه الصبح كنت فاتحة الدرج ومكنش فيه حاجة.

لسه هحط الورقة في جيبي، سمعت صوت كرسي بيتحرك ورايا. لفيت بسرعة، ملقيتش حد، بس الكرسي بتاع مريم صاحبتي كان متحرك من مكانه. مريم كانت قاعدة عليه الصبح.

أنا خدت الكتاب والورقة وجريت. نزلت السلم بسرعة، كنت حاسة إن في حد ماشي ورايا، بس كل ما أبص ورايا ملاقيش حد. أول ما خرجت من باب المدرسة، اتنفست، وحسيت إن قلبي هيطلع من مكانه.

روحت البيت، وماما قالتلي مالك وشك أصفر كده؟ قولتلها مفيش، بس أنا كنت مرعوبة. دخلت أوضتي وقفلت الباب، وفتحت الورقة تاني. المرة دي لقيت مكتوب تحت الكلام الأول، بخط تاني خالص: "أنا كنت زيك كده".

أنا فضلت صاحية طول الليل أفكر، مين اللي كتب كده؟ وايه اللي حصل للبنت اللي كانت زيي؟ تاني يوم في المدرسة، قررت أوري الورقة لمريم، بس أول ما فتحت شنطتي عشان أطلعها، ملقيتهاش. الورقة اختفت.

 يا ترى أي حوار الورق واي الي خلي مدرسة يحصل فيها مدن واي السر وراه ومين الي بيكتب كلام كل شويه وهل يكون في جن في المدرسة  والمدرسة ملبوسه ولا حد بيكون بيراقبها و عارف انها هتيجي المدرسة هنعرف في الاجزاء القادمه