قصة جعلتنى أبكى 😭

خليكم حنينين ياجماعة أنا من كتر اللي بقيت بشوفه بستغرب هحكيلكم قصة جعلتني أبكي من القسوة 😭
أم وأب سهروا وتعبوا وربوا علشان بنتهم تطلع احسن بنت في الدنيا ومرت الأيام والبنت اتخرجت من الجامعة واتجوزت ولأن الأم والأب كانوا حنينين مقدروش ابدا يسيبوها وكانوا موفرين ليها كل وسائل الراحة خلفت ٣ احفاد وعز الولد ولد الولد زي ما بيقولوا فضل الأم والأب جنبها يصرفوا عليها وعلي أولادها ومرت الأيام وكل يوم الأب والأم بيدوا بدون مقابل وبدون حساب أبدًا البنت وزوجها دخل الطمع جواهم بدأوا يعملوا قروض والأم كانت بتشتغل موظفة تروح تضمنهم ياعيني وياخدوا الفلوس ويدبسوها هي تدفع ويخلص القرض ويعملوا قرض تاني وهكذا اكتر من ٤ قروض ده غير الجمعيات وخلافه والأب كمان ياعيني زوجها يروح يشتري عربية وياخده هو الضامن يمضي علي الشيكات ويتدبس هو وهكذا بقي الأم بتقول لما جت علشان تطلب قرض كمان وانا كنت طلعت معاش قلتلها خلاص انا طلعت معاش واللي راح مش قد اللي جاي القروض قالولي ان هي حرام وانا عاوزة اقابل وجه كريم وانا طاهرة ومفيش علي ذنب سابوا الأم وراحوا علي الأب قالهم نفس الكلام تخيلوا عملوا ايه قلبوا عليهم وقالولهم انتوا معملتوش حاجة لينا احنا اللي عملنا كل حاجة ومنعت البنت نفسها وأولادها عن جدهم وجدتهم وتطور بيها الامر ان هي تسيب البلد اللي عايشة فيها وتمشي من غير ما تقول المكان اللي هي رايحة ليه علشان تذلهم وتكسر نفسهم ربنا دَخَل في قلب أهلها الصبر علي البلاء، ولكن ده كان الظاهر بس😢 والدتها من الزعل جالها القلب ومرضت ووالدها جاله مرض في الاعصاب ومبقاش يعرف يمشي زي الأول والبنت عرفت كل ده من اقاربها اللي كل ما حد فيهم يتصل ويبلغها بحالهم ويتكلم معاها بالحسني تعمل ليه بلوك وعدت ٣ سنين والبنت حبت ان هي ترجع لكن بشروط بقي تاخد فلوس وترجع تاني الأم بتقوللي انا عاملة جمعية هديهالها علشان نفسها تكون راضية متخيلين!!!!!!  
البنت مسألتش نفسها ولو للحظة هي جابت القسوة دي منين!!!! انا بلوم علي أهلها لأنهم هما اللي زرعوا الطمع في قلبها وقلب زوجها وأرجع وأقول في النهاية دول أم وأب بيتعاملوا بالعاطفة والحنان اللي جواهم 😢
والله ياجماعة الحنية لا تشترى بأى مال...  الحنان غريزة من عند الله سبحانه وتعالى هو اللي بيزرعها في قلب كل إنسان مش لاقية حاجة أقولها غير أهلَك...  لاتُهلك فمن أين لكم بهذه القسوة ادعوا دايمًا ربنا يكفيكم شر تقلب القلوب وشر النفوس 🤲🏻
وفي النهاية لو أمك وأبوك عايشين استوصوا بهم خيرًا .. وقل رب إرحمهما كما ربيانى صغيرا... احضنوهم واشبعوا منهم محدش عارف مين هيفارق مين!! 
قابل ربنا وإنت قلبك نضيف 🤍