يوميات أسرة مصرية بسيطة
_ حبيبتي الغدا جاهز عشان انا جعان أوي وورايا مشوار مهم ؟
= لأ معملتش أكل النهارده
_ ليه يا قلبي خير مالك ؟ انتي تعـ ـبانة وللا إيه ؟
= لأ مش تعـ ـبانة
_ زهقانة ؟
= لأ مش زهقانة
_ جـ ـربانة ؟
= أفندم ؟
_ آسف، حاولت التزم بالقافية بس
= ولا أي حاجة من دول
_ أمال معملتيش غدا ليه ؟
= ماليش مزاج النهارده، إيه مش من حقي ؟
_ حقك يا حبيبتي طبعا، ماشي مفيش مشكلة، نطلب دليڤري
= لا مش عايزة دليڤري
_ تمام هغسل وشي وانزل اجيب أكل
= لا متغسلش وشك
_ ولا يهمك، أنزل بالتراب على وشي عادي، آهو تمويه، كإني في الصاعـ ـقة
= مش قصدي، اقصد متنزلش خالص، ومتطلبش أكل من برا
_ عيوني، تعالي نقف في البلكونة انا وانتي نص ساعة نعمل بناء ضوئي جنب قصرية النعناع اللي جوا
= لا طبعا مش هينفع عشان بشرتي هتغمق ؟
_ مش عشان دا ضد العلم والمنطق ؟
= لأ مش قصتي
_ أكيد طبعا، طب هناكل ازاي دلوقتي، دا مجرد سؤال للفضول والله مش أكتر
= انت هتقف في المطبخ النهارده
_ احنا مش خلصنا كل أحكام الشايب بتاعة امبارح بالليل، واتصلت على 10 أرقام عشوائية وغنيتلهم في التليفون أنا أنا أنا أبريق الشاي ؟
= حصل
_ أمال عايزاني أقف في المطبخ ليه دلوقتي ؟
= عشان تعملنا غدا، المساواة بتقول كدا
_ المساواة قالتلك كدا بنفسها وللا قالت لحد يقولك ؟ عشان فيه ناس بتزود كلام بس
= لا قالتلي، وقالت اني مش خـ ـدامة في البيت دا، ومن حقي انك تساعدني في كل شغل البيت
_ وبعدين ؟
= يا كدا، يا تسيبني بقى انزل اشتغل
_ تمام
= أنا مش أقل منك
_ طبعا
= عايزة احس بكياني
_ أكيد
= واحقق أماني
_ بلا شك
= واتحدى زماني
_ .......
= محمد هاني
_ ........
= باسكال مشعلاني
_ ماشي يا حبيبتي أنا موافق، انزلي اشتغلي
= طبعا هنزل اشتغل، ومن بكرا كمان
_ ربنا يوفقك يا رب
= وهستقل، انا لازم استقل بقى إيه رأيك ؟
_ زي كوريـ ـا الشمالية ؟ ماشي
= وهشتري بيبسي حجم كبير وانا راجعة من الشغل، وهتشرب من عرق جبيني
_ طب ليه القـ ـرف دا
= إيه ؟
_ البيبسي، بقـ ـرف من البيبسي
= بحسب
_ طب خلاص يا حبيبتي نجهزلك الحاجات اللي هتحتاجيها بكرا في الشغل ؟
= تمام، نعمل كدا
_ إديني موبايلك كدا لو سمحتي
= زيرو عشرة 3 وحايد ..
_ لا دا مسيڤه وبفكر جديا امسحه، انا عايز الموبايل شخصيا، الجثـ ـة
= علشان ؟
_ هحطلك alarm
= يعني إيه الكلمة دي ؟
_ أنا واثق ان دا مش جهـ ـل لغوي، انتي الانجليزي بتاعك كويس، بس أكيد عمرك ما ظبطتي منبه في حياتك طبعا
= خالص
_ كنتي بتصحي لما بتحسي انك جاتلك قـ ـرح فراش بس
= تقريبا
_ لأ فيه صحيان الساعة 6 من هنا ورايح
= عادي يا حبيبي، طول عمري بصحى 6 المغرب أصلا
_ انتي هتشتغلي ريكلام ؟
= لا خدمة عملا
_ تمام، هتصحي 6 الصبح مش بالليل
= بس 6 دا انا هكون يا دوب لسه نايمة من نص ساعة
_ لا ما انتي هتضطري تنامي بدري بقى، على 9 ونص عشرة بالكتير تجيبي ضورفها
= ماشي
_ نحطلك بقى كام سنوز حلوين كدا
= ليه ؟
_ عشان الفراق صعب يا حبيبتي، انتي أول ما تصحي هتبصي للسرير بحـ ـسرة وتقولي خمس دقايق بس
= وبعدين ؟
_ هتروحي في النوم تاني وهتتأخري عالشغل ويتخصملك
= ماشي حط سنوز
_ خلاص يبقى نظبط المنبه على خمسة ونص، ومعانا نص ساعة سنوز لحد 6
= أوكيه
_ بتكتبي ورايا يا حبيبتي ؟
= بكتب
_ 5 صوابع فينو تخين وتُمن جبنة رومي
= ليه ؟
_ عشان تفطري بيهم بكرا في الشغل
= بس انا مبفطرش قبل الساعة 12، وباكل ساليزون وشاي بلبن
_ لأ دا عند طنط يا حبيبتي
= يعني ايه
_ يعني عند امـ ـك، اكتبي
= أوكيه
_ صن بلوك بقى
= بجد ؟ بص بقى السنادي احنا لازم نروح الغردقة، انا زهقت من مطروح
_ نشيل فيشة الوهم 10 ثواني طيب ؟
= فيه إيه ؟
_ الصن بلوك دا عشان بشرتك هتتحـ ـرق في الشمس، انتي هتبقي في الشارع كل يوم في عز الحـ ـر
= أوكيييييه
_ علبة كمامات
= ليه بقى الكـ ـورونا هديت الحمد لله
_ لأ دا عشان ريحة عرق اخواتك المواطنين اللي هتركبي معاهم المترو
= خلاص نخليهم علبتين كمامات بقى
_ لا علبة واحدة كفاية، انتي بعد فترة هتـ ـدمني ريحة العرق دي أصلا
= ماشي
_ ستربسلز
= ليه ؟
_ زورك هيتشـ ـرخ من المناهدة مع العملا، اكتبي يا روح قلبي
= حاضر
_ إيڤا فوت
= علشان ؟
_ دي بودرة قدم، ما انتي هتفضلي لابسة الجـ ـزمة 15 ساعة في اليوم لحد ما هتبقى جزء من شخصيتك
= حااااضر
_ سيبراليكس
= دا إيه دا كمان ؟
_ دا مهدئ حلو أوي، هيخليكي في الروقان، لا فارق معاكي رخـ ـامة عملا ولا عصـ ـبية مدير ولا أي حاجة
= هو المدير ممكن يتعـ ـصب عليا ؟
_ أمال هيتعـ ـصب على مراته ؟
= تمام
_ 5 اكياس مناديل فلورا
= هعمل بيهم ايه ؟
_ عشان لما تعيـ ـطي في حمام الشركة، وللا اقولك، ابقي نشفي دموعك في ورق التواليت مش عايزين تبذير
= حاضر
_ وكونسيلر بقى عشان الهالات السـ ـودا اللي هتطلع تحت عينك
= فيه حاجة تاني ؟
_ لا كدا خلاص، فيه شوية حاجات بسيطة كدا نبقى نجيبهم من عند أي عطار
= إيه ؟
_ بذر كتان، وفول صويا، وبذر سمسم
= هعمل ايه بالحاجات دي ؟
_ دي محفزات طبيعية لهرمون الأستروچين، عشان انتي كبيرك سنتين شغل وهتنسي انك سـ ـت، ممكن وانتي بتجددي البطاقة أصلا تكتبي فيها ذكـ ـر
= يعني مش هتستت تاني ؟
_ لا ما اعتقدش
= ولا هتدلع واهتم ببشرتي وصبغتي وماسكاتي
_ ربنا كبير
= هتطلب دليڤري ؟
_ لأ عايز آكل من إيدك
= حاضر
_ ملوخية بالأرانب
= معندناش أرانب
_ انزلي اصطادي من أي برية، آيرلندا جنبنا آهي مش بعيدة
= أوامرك
_ واعمليلي شاي، قلبتي دماغ أمي، حد يروح للهـ ـم برجليه ؟
وهذه المقالة الساخرة الضاحكة قد لمست بعض الجوانب الحياتية عن الأسرة المصرية أرجو أن تكون نالت اعجابكم
