الظل: غموض و إثارة - الحلقة السابعة
- دكتور أنا فيا إيه؟
= إنتي كويسة و زي الفل مافكيش أي حاجة خالص .
- أمال اللي أنا فيه ده إيه يا دكتور ؟! .. أنا بشوف خيالات .. زي ضل بيقرب مني و كل ما يقرب كإني بالظبط كدة قدام مرايتي .. بشوف نفسي .. مش لاقية أي تفسير .. بتعامل في البيت كإني مجنونة و ولاد الحلال قالولي أجيلك يمكن الاقي إجابة للي أنا فيه.
= ممممممممممممممممم طيب حضرتك ممكن تهدي .... إنتي مش مريضة و لا حاجة إحنا هنقعد مع بعض جلسة أو اتنين حسب قدرتك علي التحمل وهنشوف .. أعتقد دي مجرد ضغوط محتاجة راحة وتصفي ذهنك خالص من كل حاجة .. ما تقلقيش.
- دكتور أنا تعبت بجد و مبقتش قادرة أتحمل خلاص و مفيش قدامي غيرك.
= تفائلي خير و المهم ما تستسلميش لأي فكر سلبي يأثر عليكي و أشوفك إن شاء الله يوم السبت .. يعني كمان يومين و هتكون دي أول جلسة و إن شاء الله خير.
- يارب يا دكتور.
= شرفتي يا أنسة مي.
فلاش باك .. الدكتور بيفتكر الأحداث
- أول مرة أشوفها كان من سنتين تقريبا ً .. جاتلي العيادة و كان معاها والدها و كانت حالتها صعبة أوي .... و غريبة كمان .. يمكن لأن دى أول حالة تقابلني من النوع ده.
= غريبة إزاي يعني يا دكتور؟
- أول ما جاتلي كانت رافضة الكلام في الأول بس بعدها ابتدت تتجاوب بس قليل .. فطلبت من والدها إنها تجيلي جلسة تاني بس المرة دي تكون لوحدها .. هو ميكونش معاها .. كنت عايز أتاكد هل هي حاسة إنها مريضة و جاية بإرادتها تتعالج عندى؟ و لا مجبرة إنها تيجي؟..
في شغلانتنا دي يا فندم إرادة المريض عامل رئيسي عشان تقدر كدكتور تشخص حالته وهو يرتاحلك و يستجيب معاك لمراحل العلاج.
= وبعدين يا دكتور؟؟
- جاتلي بعدها بيومين حسب ما اتفقت مع والدها .. و كانت أهدي شوية .. فبدأت أسألها شوية أسئلة بسيطة عن حياتها و شغلها و أصدقائها .. فعرفت إن أهلها ضاغطين عليها و قافلين عليها خالص .. كل ده خلاها تخلق لنفسها أصدقاء وهميين و لها أخت توأم كمان من وحي خيالها و الجديد
إنها بتأكد إنها بعد ما عملت لنفسها دايرة من العلاقات الوهمية بدأت فعلا ً تشوف الناس دي في حياتها في الحقيقة .. أما أهلها بعد ما لاحظوا إن في اضطراب في تصرفاتها و بدأت ردود أفعالها وتصرفاتها
تاخد شكل عنيف أدركوا متأخر إنهم لازم يزيلوا عنها كل اللي كانوا بيعملوه معاها بغرض خوفهم عليها، و فكروا إنهم يخلوها تشتغل أي شغلانة ولو بسيطة حتي علي أمل إنها نفسيا ً تكون أحسن شوية .. تخيل حتي دراستها برضه كانت مجبرة علي كل حاجة فيها .. المدرسة .. الجامعة كل ده مش من اختيارها حتي ..
____________________________________________
( دكتور في اتنين من المباحث عايزين يقابلوا حضرتك!!!!….)….
- إزيك يا دكتور؟ .. أسفين علي الزيارة المفاجأة دي....
= لا يا باشا العفو ماتقولش كدة اتفضل حضرتك.
- شكرا ً.... أعرفك .. النقيب محمد..
= أهلا ً و سهلا ً بحضرتك .. إتفضلوا إستريحوا .... خير إيه الموضوع؟
- نور .... فاكرها؟؟؟
= قصدك البنت اللي كانت بتتعالج عندي و اتقتلت في الفيوم؟؟
- بالظبط.
= مالها؟
- طبعا ً إحنا وقتها ماسيبناش أي حاجة تخص حالتها من أول مرة جاتلك هنا لحد آخر مرة إلا و دورنا فيها .. حتي تسجيلات الفيديو اللي تخص جلساتها اضطلعنا عليها يعني بإختصار ماسيبناش خرم إبرة إلا و دورنا فيه مع بعض بس في علامات إستفهام و شوية رتوش كدة لما إتناقشنا فيها وقتها وموصلناش لحل قولنا إن السبب فيها راجع لهلاوس و أعراض المرض اللي كان عندها .. بس إنت عارف إن الشيطان دايما ً بيسكن في التفاصيل و أنا في تفصيلتين بس محتاج إجابة ليهم.
=وو أنا تحت أمر حضرتك يا وليد باشا .. بس هي القضية اتفتحت تاني؟
- - بنقفل شوية حاجات بسيطة في ملفات الأرشيف الخاص بيها بس و قلت آجيلك ندردش فيها سوا بشكل ودي.
- = خير يا وليد باشا عايز تعرف إيه و أتمني أقدر أساعدك بجد.
- بالنسبالي تاني تفصيلة دي محمد باشا هيشرحهالك واحدة واحدة بنفسه بس الأول خلينا في الأولي .. صاحبتها مي ...حضرتك ما اتكلمتش عنها لما حكيتلنا عن تفاصيل حياة نور و مرضها ....
رغم إن مي أقرب حد ليها و كمان حضرتك شوفتها بنفسك ده إنت حتي شوفت صورهم مع بعض... و كان تفسير حضرتك إن حتي نور نفسها ما اتكلمتش عنها .. مممممممممممممممم يعني يمكن يكون هزيان منها و إن ممكن حالتها تكون خلتها تنسي بعض التفاصيل في حياتها و بتأكد كلامك بإنها ساعات كتير بتتخيل أهلها بأشكال و هيئات تانية وكمان كانت بتشوف في البيت واحدة شبهها طبق الأصل كتير أوي و ده اللي صعّب حالتها أكتر و خلاك تشخص حالتها بالمرض الغريب ده ... بس أنا دلوقتي يا دكتور بأكدلك إن النقطة دي فيها لغز كبير رغم إن تفسير حضرتك منطقي من وجهة نظرك لكن بالنسبالي النقطة دي بالذات لا تمت للمنطق بأي صلة فعايزين نعيد ترتيب أوراقنا تاني في القضية دي عشان ظهرت حاجات جديدة ممكن تخلينا نفتح التحقيق تاني ... و هنبتدى من عند مي بس عشان نبتدى من عند مي، هنا هييجي دور سيادة النقيب في التفصيلة اللي تخصه و اللي بترتبط بالتفصيلة الأولي حسب تفسيره ووجهة نظره الشخصية .... إتفضل يا باشا.- ________
- تعرف صاحب الصورة دي يا دكتور؟؟؟
= ده والد نور.
- تمام ده والد نور .. يعني حضرتك شوفته قبل كدة طبعاً.
= اه طبعا ً أخره مرة بعد الحادثة أثناء التحقيقات.
- وطبعا ً شوفته قبلها؟
= اه أكيد ... أول مرة جاتلي كان هو معاها زى ماقلت لسيادتك.
- هما المرتين دول بس؟
= اه مفيش غيرهم .. بس حضرتك بتسأل ليه ؟
- لا أبدا ً بس هنحتاجك كتير يا دكتور الفترة الجاية .. إحتمال يبقي في أدلة جديدة وغالبا ً هنستعين بيك بصفتك كنت الطبيب المعاج للحالة .
= وأنا تحت أمركم في أى وقت ....
- تمام .. نستأذن إحنا دلوقتي ...
- إتفضلوا .. شرفت يا وليد باشا ... شرفت يا محمد باشا.. مع السلامة.
