الظل: غموض و إثارة - الحلقة السابعة عشر
إذا ً مفعول السم ده سريع جدا ً ومش بيطول و مع خطورة المنطقة اللي أصابتها الطلقة المسمومة هنلاقي فعلا ً إن ده هيخلي الجريمة تتم بسرعة جدا.
يعني نقدر نقول إن لما نور نسيت الموبايل و رجعت عشان تجيبه كان خالد مستنيها و نفذ عمليته بسرعة جدا ً و هو كظابط محترف مش هيكون صعب عليه إنه يدخل الكامب و ينفذ جريمته ويهرب من غير ما حد يشوفه ..
و كان ممكن كمان تكون الرصاصة مكتومة .. لكن خالد كان قاصد ده أكيد .. كل دي تفاصيل و معوقات سابها وراه و هرب.
هو عمل حساب حتي التفاصيل الصغيرة اللي زودت من غموض القضية دي بشكل كبير .. و نفذ جريمته بأسلوب مذهل و معقد جدا ً إستحالة شخص عادي ينفذها.
جريمة تم التخطيط ليها علي أعلي مستوي .. عملية مخابراتية بجد ....
بكدة نكون وصلنا لحل لغز قتل نور و إزالة الغموض اللي كان حواليه ....
- يعني من الآخر يا فندم خالد إستدرج مي لقبرص عشان يقتلها هناك بس قبل ده حب يفتخر بعبقريته اللي
نفذ بيها الجريمة و ....
ودي كانت صدمة مي لتاني مرة في إن نور مطلعتش برضه نور.
- بالظبط كده وبعد ما إتناقشنا في كل التفاصيل دي وكل واحد فيكم قال رأيه مش باقي غير نقطة واحدة مهمة و هي إن العقيد طارق هو اللي هيتم تكليفه بالمهمة الصعبة دي .... إنتا هتسافر قبرص .... خالد و فدوي و مي هدفك .... ترجع بيهم مصر يا طارق ..
= أنا يافندم ؟!.
- أيوا انتا .. انتا من أكفأ الظباط الموجودين هنا وعملت أكتر من عملية خارجية و أنهيتها بنجاح منقطع النظير .... و لا إيه؟!..
= لا طبعا ً يافندم مش قصدي .... تمام يا فندم.
- يبقي علي بركة الله .. إحنا كُنا هنبعت رسالة برجوع المقدم وليد .. بس فكرنا و قُلنا هنخليه هناك
لمساعدتك .. و بالمناسبة جاتلنا إشارة إنه بقي أحسن كتير دلوقتي.
= الحمد لله.. طيب هتحرك إمتي يا فندم؟
- الوقت ضيق جدا ً.. ولازم نتحرك بسرعة ..كل ثانية دلوقتي ليها تمن .. إحنا حجزنالك علي طيارة اليونان بكرة بالليل الساعة 8 و منها هتطلع علي قبرص و .....
" سيادة المدير .. أسف جدا للمقاطعة بس الموضوع ضروري مايستحملش تأجيل .. رسالة جديدة من قبرص "....
- خير في إيه؟؟
= للأسف يا فندم .... مش خير خالص....
واحد من عملائنا موجود دلوقتي في مطار لارنكا بيقول إن في طيارة خاصة وصلت من حوالي نص ساعة وسط حراسة مشددة في نفس الوقت اللي وصلت فيه عربية إسعاف نزل منها مجموعة من
الأشخاص و معاهم صندوق إسود كبير وطلعوا بيه الطيارة وبيستعدوا للإنطلاق حالا ً....
العربية عليها شعار و إسم مستشفي سان رافاييل , أما الطيارة و وجهتها ....
فهي دي الصدمة يا فندم ....
الطيارة هتنطلق لأخر مكان حضرتك تتمني تسمعه دلوقتي....
مطار بن جوريون ....
تل أبيب
- إيه؟!.
= عارف إنها كارثة يا فندم بس ده اللي حصل للأسف و الوقت أضيق من إننا نقدر ناخد أي خطوة نقدر نمنع بيها ده.
- المسألة كدة إتعقدت أكتر يا طارق...
و مهمتك دلوقتي بقت أصعب..
بكتيييييير.
____________________________________________
- أدون أوري .. الطيارة وصلت المطار من خمس دقايق و كلهم إتحركوا وفي طريقهم للمكان المتفق عليه.
= جميل .. جميل حاييم .. بعد ما يوصلوا بلغ ديفيد يضاعف الحراسة هناك و ...
عايز أشوفها....
في أسرع وقت.
- أكيد أدون أوري إطمن .. كل شيء هيتم زي ما هتحب بالظبط .. كمان دكتور رامزن بلومان إتصل و بيقول إن أكبر جناح في مستشفي أستونا جاهز لإستقبالها.
= عظيم غالبا ً هنبقي جاهزين بكرا.
- تمام أدون أوري .... ده بالنسبة لسارة .... و خالد هنعمل إيه معاه؟.
= إقتلوه .... و بلا رحمة .... دوره إنتهي .. إحنا إستغلينا نقطة ضعفه و إشتغلنا عليها وكان أكبر نجاح لينا من خلال أكبر نقطة ضعف عنده .. حبه المجنون ليها .. و مكنش في ما يمنع إنه يشتغل لحسابنا طول الفترة اللي فاتت .. يعني فرصة سهلة نغطي بيها علي خطتنا الأهم يا صديقي .. عارف إيه معني
إن سارة النهاردة تكون موجودة في وطنها الأم اللي المفروض تكون فيه .... ده إنتصار لينا علي العرب عامة و المصريين تحديداً و من غير و لا نقطة دم واحدة .. طبعاً ده غير إن حياة المواطن اليهودي
ما تتقدرش بتمن .. و لا بكنوز الأرض حاييم .....
- فعلا أدون أورى.
