الظل: غموض و إثارة - الحلقة الثامنة عشرة

"سيادة المدير .. رسالة من قبرص" .

- مؤنس؟

= أيوة يا فندم .. بيقول إن الكل بخير و غادروا قبرص بسلام علي طيارتنا الخاصة في طريقم للقاهرة.

-  الحمد لله .. كنت عارف إن عندنا رجالة هناك .. بس يارب تكمل علي خير.

= بحييك بجد يا فندم علي خبرة سيادتك في إدارة الأزمات عن بعد ... إحنا كُنا علي وشك كارثة بس الحمد لله علي وشك تنتهي.

-  ما تشكرنيش .. الشكر كله لرجالتنا هناك اللي قدروا ينفذوا المطلوب منهم بمنتهي الدقة بمجرد توقعنا إن الموساد كان لازم هيبعت طيارة خاصة عشان يرجعوا خالد و سارة .. و الحمد لله تم تغيير الصندوق في اللحظة الأخيرة.

= بس الفضل يرجع ليك يا فندم بعد ربنا يا فندم إنك توقعت و رسمت سيناريو لكل ده.

- ربنا يكملها علي خير .. أنا المهم عندي دلوقتي مش خالد ....
 الأهم دلوقتي وليد و مي و ....
  فدوي ..

و دي النقطة المهمة جدا و الحكاية اللي كنت هكلمكم فيها ....

حكاية بنت إتولدت في إسكندرية من أسرة يهودية و هربت نتيجة إضطهاد الأهالي ليهم وبنتهم إترمت في ملجأ في حارة اليهود لحد ما إتبنتها أسرة بسيطة و صرفت عليها وعلمتها و كبرتها لكنها كانت دايما ً كارهة العيشة معاهم و مش مرتاحة و الظاهر إنها عرفت حقيقة أصولها اليهودية و من هنا بدأت الحكاية ....
حكاية فدوي أحمد عبدالسلام أو .... سارة بنيامين ..
و محاولات و إتصالات كتير جدا نجحت إنها تكون علي إتصال مع بعض اليهود من خلال الإنترنت و بعدها قدرت إنها تكون علي إتصال مع الموساد الإسرائيلي .... في محاولة منها إنها تسافر إسرائيل .. لكن 
الظاهر إن الموساد إستغل الموضوع بغباء كالعادة و حول الموضوع لقصة تجسس و قرروا يستفيدوا منها و من خالد أكبر إستفادة  ممكنة قبل ما يسعوا لتحقيق حلمها بالسفر لإسرائيل.

و بالنسبة لخالد يا فندم .... هنسيبه؟
-  لما يكتشفوا الخدعه هتكون فدوي معانا .... ساعتها هيرجعوه غصب عنهم عشان يبادلوه بفدوي 
  .. هي أهم عندهم دلوقتي .. و لو إن اللي زيه مصيره متقرر .. سواء هناك ....
  أو هنا.
____________________________________________

- ديفيد .. أدون أوري وصل حالا .. حاول تتص..............
- ششششششششششششش إخرس خالص .... إحنا إنتهينا .... عمره ماهيغفرلنا اللي حصل ده  
  و.....
" أدون أوري أهلا.........."
-  الصندوق فين ديفيد .... طمني فاقت؟
- إتفضل أدون أوري.
-  إيه دي؟!
-  الورقة دي كانت في الصندوق.
" كالعادة خسارة جديدة تعكس فشلكم وغبائكم .. مع تحيات المخابرات العامة المصرية ".
- لااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

____________________________________________

- سيادة المدير في حاجة غريبة؟؟
= خير؟
- فقدنا الإتصال بالطيارة يا فندم.
= معناه إيه الكلام ده؟
- ده اللي حصل يا فندم .. الإتصال اتقطع فجأة و الطيارة إختفت من الرادار نهائي.
= وصور القمر الصناعي ؟ عايز أعرف آخر مرة ظهرت فيها الطيارة كانت إمتي وفين..؟ وبسرعة..
- تمام يا فندم.
= ممممممم اللي حصل ده معناه إما إن الطيارة وقعت لا قدر الله أو  .... تكون الطيارة إختفت يا طارق.
- إزاي الكلام ده؟
= عندك تفسير تاني؟ .... فقدنا الإتصال بالطاقم بالكامل و إختفت من علي شاشات الردار و بنحاول نوصل لأخر مشاهدة ليها  من خلال صور القمر الصناعي .. يبقي إيه معناه؟ .... في حاجة بفكر فيها... لو صح .. يبقي المجموعة كلها في خطر.
- اللي هي؟؟
= خالد هرب .. إختفي في قبرص بعد إشتباكه مع وليد هناك .... لما الموساد بعت طيارة خاصة هناك لتهريب فدوى... طبيعي إن خالد كمان يرجع .... لكن أنا أعتقد إن خالد ما رجعش إسرائيل يا طارق .... و زمانهم هناك كشفوا الخدعة .
-  يعني إيه؟!.. معني الكلام ده إن خالد دلوقتي ممكن يكون علي الطيارة .... يعني خالد خطف الطيارة؟....
= للأسف مفيش تفسير تاني ....
 لحد دلوقتي.