حبيبتى وال 100 جنيه
حكاية حب بطلتها ورقة
ورقة فئة ال 100 جنيه
سلام المحبة للقلوب الطيبة
المليانة حب نقى طاهر
انا باسم سرور
وجاى النهاردة احكيلكم حكاية حصلت معايا
حكايتى مع صديقتى الجميلة اللى اتعلمت منها ان الحب هو اعظم شئ فى الوجود
الحب الصادق اللى من القلب نابع … ونوره زى الشمس فى السما ساطع
وزى ضياء القمر بين النجوم يشق عتمة الليل بضيائة الرائع
وهى دى حكايتى
مع صديقتى
ال 100 جنيه
حصلت احداث حكايتى فى بدايات صيف عام 2000
فى يوم قررت اخد حبيبتى ونتعشى فى مطعم
طلبت من صديقتى الجديدة ال 100 جنيه انها تكون معايا فى الخروجة دى
لأنى هاكون بجد محتاجلها تكون معايا
وافقت صديقتى الجديدة ال 100 جنيه وفعلا كانت معايا انا وحبيبتى
دخلت انا وحبيبتى مطعم شيك جدا
فى اجمل مكان فى القاهرة
حبيبتى قعدت وانا قعدت وال 100 جنيه معايا مش مفرقانى
طلبت العشا واتعشينا وطلبت الفاتورة
الحساب 100 جنيه
لقيت ال 100 جنيه خرجت تجرى فرحانة
سألتها باستغراب : مالك فرحانة وبتجرى كدة ليه ؟
ردت ال 100 جنيه وقالت :
لأنى خلاص مش هابقى وحيدة وهاروح القى مئات كتير شبهى
اقعد معاهم واتكلم معاهم
رديت وقلت بدهشة واستغراب : طب وانا هاتسبينى لمين ؟ انا مقدرش اعيش من غيرك
هاتصرف ازاى واتحرك ازاى وازاى هاقدر اعيش من غيرك ؟
ردى عليا وجاوبينى
ردت عليا ال 100 جنيه وقالت : من اول ما دخلت حياتك وانت عارف انى مش هافضل كتير معاك
وفى اول مشوار هابعد عنك وعلى طول هانساك
انا لقيت اللى منى لكنى عارفة انى مش هافضل معاهم كتير هناك
كلها دقايق وهايجى اللى ياخدنى . وابقى شوية هنا وشوية هناك
انما انت …
معاك ملاك بيستناك انت بعدت عنه عشانى وانت عارف انى مش ديمة معاك
ارجع لحبيبتك وملاكك دى شريكة عمرك كله . يا سعدك بيها يا هناك
هى دى اللى ديمالك وهاتفضل طول العمر على الحلوة والمرة معاك
بلاش تحب الفلوس لأنها مش دايمة معاك
خدنى ليك مثل وافتكر ازاى فى اول لقاء سبتك وعلى طول هانساك
اختار الحب الابدى اللى اعطهولك مولاك
سلام يا صديقى والى ان القاك
ذهبت صديقتى ال 100 جنيه وعينى كانت متعلقة بيها لبعض الوقت
التفت لحبيبتى وللأول مرة اشوف فى عيونها نظرة حب وحنين مكنتش بشوفها قبل كدة
او يمكن كانت موجودة بس انا اللى كنت عميان عن حبها اللى مالى قلبها
حسيت فعلا وقتها انها اجمل هدية اعطاها ليا رب السما
قربت منى وقالت هافضل ديما معاك
على الحلوة والمرة معاك
انت نصيبى وهاتفضل حبيبى ولأخر لحظة فى عمرى هاعيش لرضاك
افتكرت كلام صديقتى لما قالتلى
معاك ملاك بيستناك
بجد حبيبتى دى هى أجمل وارق ملاك
حطت اديها فى اديا وعيونها مفرقتش نظرة عنيا
ما هى بجد كل اللى ليا
مشينا انا وهى على شط النيل مع هدوء حركات المية
حسيت بنبض قلبها اللى بيعلى شوية بشوية
ودفء حبها اللى حاسس بيه بلمسة ايديا
بصيت للسما وشفت القمر بين الغيوم بيتدارى
ما هو ميقدرش يشوف قمرى وهو معايا منور دنيايا
وعن البشر والدنيا ووسط نجوم السما ما يتدارى
التفت اليها وباديا مسكت اديها ونظرة حب وشوق من قلبى وعيونى وانا باصص لعنيها
اعاهدك يا ارق ملاك
هافضل طول العمر معاك
صباحى ومسائى هادعى ربى يطول فى عمرى عشان اكون سبب سعدك وهناك
ما انتى النور اللى منور حياتى يا سعدى بيك يا ارق ملاك
احبك يا حبيبتى واعدك ان اظل عمرى كله احيا لرضاك
احبك
