حقك من حقك
يوم من الايام ميتنسيش:
من حوالي أسبوع كده بعد مالبنزين زاد علطول، كنت بره في مشوار وقررت أروح أفول تانك العربية.. المهم كان التانك شبه فاضي وهحطلي بتاع 80 ولا 90 لتر، لاقيت شاب شكله غلبان كده واقف على الاستاند بتاع المساحات والمناديل ومنظفات الماتور دي، فقولت إحنا في أيام مفترجة، لما انفعه بإني اشتري حاجة عشان ياخد الكوميشن بتاع البيع واسيبله إللي فيه النصيب!
فخدت من عنده منظف انجكشن للموتر أحطه عالتفويله الكبيرة دي، وقالي تمنه 400 جنية! أنا الأنواع اللي بستخدمها بتبقى في الرينچ دا تقريبًا، ودورت عالنت لاقيته مناسب لعربيتي، فقولتله هاته ويالا بينا! لاقيته محترم وذوق ومتجاوب معايا، فقولت والله لاشتري منه حاجة كمان وربنا يرزق الجميع، فقولتله هاتلي ياعم جوز مساحات من العادية دي، بالرغم من انه مساحاتي سليمه وشغاله ومكملتش شهرين، بس قولت 100 جنيه ولا 120 مش هتفرق، وأهو من نصيبه!
الراجل كان فول العربية، وأنا في العادي بدفع فيزا وأنا بفول! قام جاي بنفسه فاكك المساحات وقالي دي جديدة حرام تترمى، قولتله هاتها وركب الجديدة عادي! فبدل ما يجيلي يقولي حسابهم كذا، لاقيته رايح لبتاع البنزينه والفيزا في ايده بيقوله حط 800 جنية!
فأنا لقطت الكلمة واستغربت هو بيوشوشه ليه! فبقوله هو الحساب كام بتاعك! قالي 800 جنية، 400 منظف و400 مساحات!
فبقوله مساحات إيه اللي ب400، دانت فاكك اختها جديدة من العربية جايبها ب125! اختها حرفيًا ونفس العلبة والكارتونة، جبت منين الباقي دا!
فجأة الطيبة والذوق دا اختفى، وقعد يقولي يا باشا دانا جايبلك أرخص حاجة عندي، دانا عندي بوش ب1500 وبتاع على أساس يتلاعب بغـ. روري يعني وكده فاتحرج وأقوله خلاص ركبها! قولتله ابقى بيعها للي راكب موديل السنة، هي تمنها كذا، ليه كل دا! فبدأ يقولي دي تسعيرة الشركة والله والمكتب اللي انا واقف فيه موظف! قولتله طب فكهالي! انا مش عايزها ورجعها تاني!
فجأة بقى يقولي طب عشان خاطرك والله يا باشا هتبقى ب350 وهشيل انا ال50 من جيبي! قولتله بقولك انا بجيبها علطول مابتزيدش عن 150! فمش فاهم ليه جمع باقي اللي شغالين في البنزينة وكبر الموضوع وتعالوا شوفوا يا جماعة فاكرني انا اللي حاطت السعر وبتاع وعايز يشيلهولي من جيبي!
قولتله وتشيلها ليه يابن الحلال، مش عايزها خالص ورجعها لكرتونتها عادي! فقالي طب خلاص والله عشان خاطرك هكلمهم وهتبقى 300 بس! أنا فهمت طبعًا إن هو اللي ضارب سعر من دماغه، بس إلتمست إنه هيقسم الفرق بينه وبين العاملين في البنزينة، اللي ربنا وحده يعلم مظنش حد بيديهم إكراميات قدي! فذوقيًا قولتله انا عارف تمنها بس هعديها لو ب200 وأنا مسامح في الباقي!
قالي والله يا باشا دانا هبقى دافع من جيبي، هي 250 وخلاص! فلاقيته طـ. ماع أوي، فقولتله شيلها بعد إذنك انا مش عايزها ولو ب100 جنية، فبصلي بصه مش لطيفة كده وخلعها ومشي!
أنا من عادتي أي حاجة بشتريها للعربية، باخد معايا الكرتونة او العبوة او الجيركن عشان ابقى اسئل الميكانيكي بتاعي عليه، وكمان يبقى ضمان ليا لو حاجة حصلت يعني وكده! فبعد ما حطلي علبة المنظف، انا خدتها معايا في العربية!
وأنا مروح في الطريق فكرت هو أكيد نزلي في السعر بسرعه كده عشان هو معوضها مني في ااحاجة التانية! وبعدين إيه يمنعه زي ماكان عايز يضحك عليا في دي، إنه يكون ضحك عليا في المنظف!
فأول ما روحت بدور عليه، لاقيته بيتباع الـ6 بـ500 جنية! على باقي المواقع بحوالي 90 جنية للعلبة الواحدة! فحسيت جوايا بكمية من الضيق غير طبيعية! لإنه السبب الأساسي اللي خلاني اصلًا اشتريها، إني كنت عايز أعمل خير وحاجة لله اساعد بيها غيري! فيتنصـ. ب عليا منه!
قولت أديله حسن الظن، وجايز يكون مختلف عن إللي موجود عالمواقع، فجيت العلبة ودخلت دورت لغاية ما وصلت للتوكيل اللي جايبها لمصر أصلا! حرفيًا هو الوحيد اللي بيدخل المنتج دا، وبعتله عشان اتفاجئ برد اقسم بالله قعدني لمدة يومين وكأنه في حجر على صدري!
قالي الكارتونة 24 واحدة، ب1400 جنية! يعني الواحد تقريبًا ب58 جنية.. يعني أنا اتضحك عليا واتباعتلي بحوالي 7 أضعاف سعرها! حسيت اتنـ. صب عليا واتغفلت ودا شيء مابعرفش اعيش معاه ولا ارتاحله لغاية ما اخد حقي، وفضلت يومين قاعد مش عارف ليه مع إنه الموضوع تا- فه، إلا أنه فكرة إنه حد اشتغلك وانت كنت بتحاول تساعده، بتضايق أوي!
قومت واخد نفسي اول أمبارح وواخد العربية ساعة الشتا ورايح عالبنزينة! ركنتها عالجمب ودخلت عملت نفسي بسئل ع الاسعار وهو مكنش واقف، لاقيت اللي واقف بيقولي 300 جنية! يعني السعر متغير عن إمبارح! ففهمت أنهم بيسعروا على حسب اللي بيشتري، وبيضربوا الباقي في جيبهم!
فدخلت للمكتب بتاع البنزينة وقولتله عايز المدير! شوية وجالي وحكيتله اللي حصل، وفتحتله أسعار المنتج عالمواقع، ووريته الرسالة بتاع التوكيل وهو بيقولي السعر!
طبعًا الولد اللي بيبيعلي كان جه وسمع الكلام، وفجأة بدأ يزعق ويقولي انت جاي تأذيني في أكل عيشي ليه! قولتله وهو أنا كلمتك يابني! فين الاذية دي! وقومت قايل للمدير من فضلك أنا عايزة حاجة من اتنين!
يا حضرتك تجبلي فاتورة للمنظف بمبلغ ال400 جنية اللي انا اشتريته بيها، وساعتها هتبقى مشكلتي مع الشركة اللي موقفه عندك الاستاند دا، وهشتكيهم في خدمة المستهلك! يا اما حضرتك تقولي السعر الحقيقي للمنتج وتديني فرق السعر، لإنه انا دافع حق التفويله بالفيزا ومعايا الوصل فيه لوجو واسم البنزينه بتاعكم بالوقت، ومعايا داش كام في العربية مسجله الحوار بالكامل، هعمل بيهم محضر، اكيد سمعت الريس وهو بيقول اللي هيزود أسعار فيها قضاء عسـ. كري!
المدير قعد يقولي اهدى، والواد اللي كان ذوق إمبارح بيهرب من الإجابة ويزعق ويقولي هو انت عايز تأذ- ينا ليه! قولتله يابني انت مش موظف هنا وهما اللي حاطينلك التسعيره! انت دخلك ايه! شركتك اللي تتحاسب، وهو يقولي انت قاصد تأذ- يني! وأنا اوضحله انه لو عايز اعمل دا، كان زماني دلوقت رايح للشر- طة! يقولي طب روح هاتلي علبة مكانها وانا اديك فلوسك! قولتله انا مش مجبر!
المهم المدير قام غامزله، وهو بصراحة كان محترم في الكلام وواقف معايا، وقاله تعالى نكلم الشركة نشوف الكلام دا! ومش عارف السبب خده في حته بعيده متداريه يتاع 5 دقايق وجايلي اعتذرلي وقالي حقك علينا، وفتح محفظته بيديني ال400 جنيه! (محفظته).. الشاب اللي بعهالي.
قولتله لأ انا اشتريت علبه، هقول تمنها 100 والباقي ليه، حقي هو 300 بس! وخدتهم منه بالفعل! وبعدين المدير على قد ماهو كان محترم وذوق، بس واضح إنه كان بيشتغلني، وعارف إنه الشاب حاطت فرق السعر دا كله في جيبه ومكنش عنده مشكله بردو ياخد قده في المساحه! كان هيضرب مني لوحدي حوالي 600 جنيه في حيبه وهو مروح!
قالي انا كلمت الشركة وضحتلهم انه يا يبعتهولي فاتورة بالمنتج دا عشان اديهالك، يا يرجعولك فلوسك، يا ياخدوا الاستاند بتاعهم ويمشوا، عشان انا لو اشتكيت، اسم البنزينة هو اللي عالريسيت اللي معايا واللوجو بتاعهم، وهما اللي هيتضروا، مش الشركة بتاع الاستاند! وانا مش مجبر اجبلهم بديل ليها عشان اخد حقي! وهما ياعيني وافقوا انهم يردولي فلوسي بالكامل عشان يهمهم رضا العميل وكده!
كان واقف ناس تانية قدامي بتشتري منهم وانا واقف، قولتلهم خدوا بالكم من السعر، وخدوا منه فاتورة أو دوروا على سعرها أونلاين قبل ماتشتروها عشان بيضريوا أسعار وهمية، فالشاب اتضايق آوي إني قولتلهم كده!
ومدير البنزينة قعد يقولي حقك علينا ومتشكر إنك جيت بدل ماتشتكي، وبعد كده تيجي هنا صاحب مكان، الشباب اللي واقفة قالتله دا هو زبونا ودايمًا يروق علينا كلنا وبالذات في المناسبات!
فأنا بصراحة حسيو بانتصار واني مسمحتش لحد يضحك عليا، بالرغم من انه المبلغ مكنش كبير أوي، وخصوصًا انه ريسيت الدفع بتاع البنزينة كنت راميه قدامهم قبل مامشي الاسبوع اللي فات ومذنتش هعرف اشتكي بيه ولا حاجة 😂
بس بجد، ليه الناس تعمل كده! ليه لما تبقى كويس مع حد، هو يطمع أكتر بالمنظر دا! مش هقولك بقى إننا في رمضان وأيام مفترجة وكده، بس ليه تستحل اي فلوس تروح بيها وتصرفها وانت عارف إنه مصدرها غشيت حد، كان بيحاول يبقى كويس معاك!
المفترض إنه دا يمنعني أبقى كويس مع غيره بعدين، بس الحمدلله متربي في بيت مانعني أخد الكل بذنب فرد واحد! وصوابع أيدك مش زي بعض.
ماتسبوش حقكم مهما كان..
