نفق الصراخات المرعبة في كندا ( النفق المسكون بشبح طفله ) !!
نفق الصراخ المرعب النفق المسكون بشبح طفله !!
السلام عليكم و رحمه الله و بركاته
العالم مليان بالاماكن المرعبه و الغامضه
واللى بيحصل فيها احداث و ظواهر غريبه ملهاش اى تفسير
اما المكان اللى حنتكلم عنه النهارده
فهو مكان اتصنف بانه من اكتر الاماكن المرعبه فى العالم
وهو عباره عن نفق مخيف موجود فى منطقه شلالات نياجرا المعروفه
اما الغريب فى النفق ده
فهو ان اى حد بيحاول يولع عود كبريت او اى نار صغيره علشان ينور الطريق
بيسمع فى ساعتها صوت صرخات مرعبه
و بعدين بتيجى ريح خفيفه بتطفى النار اللى ولعها
يا ترى ايه هى القصه
و ايه سبب الصرخات المخيفه دى و بتيجى منين
تابع معانا علشان تعرف قصه نفق الصراخ المرعب…
نفق الصراخ هو عباره عن نفق من الحجر الجيرى اتبنى سنه 1900
طوله 38 متر و ارتفاعه حوالى 5 متر
النفق ده بيمر تحت خط السكه الحديد اللى بيربط بين نيويورك و تورنتو
وكانت الناس بتستخدمه كممر بيعدوا منه من تحت شريط القطر
وكمان كان بيستخدم كوسيله صرف للميه الزياده من الاراضى الزراعيه القريبه
السكان المحليين فى المنطقه القريبه
بيتكلموا عن ظاهره غريبه جدا بتحصل فى النفق ده
وهى ان اى حد بتجيله الجرأه و يدخل جوا النفق
بيحس باحساس غريب و بيشعر انه مش لوحده
ولو حاول يولع اى شعله او نار صغيره علشان ينور بيها طريقه
بيسمع فورا صوت صرخه مخيفه
و بيحس بنسيم بارد جه على وشه و طفى شعله النار اللى ولعها
وعل مدار اكتر من 100 سنه
انتشرت قصص و حكايات و اساطير كتير حوالين النفق الغامض ده
وكل القصص دى رغم اختلافها فى بعض التفاصيل
الا انها بتتفق فى حاجه واحده
وهى ان كان فيه بنت عايشه فى مزرعه قريبه من النفق
وفى يوم من الايام اشتعلت النيران فى المزرعه دى
وان البنت اللى كانت عايشه فيها كانت بتهرب من حاجه معينه
واثناء هروبها دخلت جوا النفق
وهى جواه اشتعلت فيها النيران و فقدت حياتها
ياترى ايه اللى حصل فى الوقت ده
و البنت دى كانت بتهرب ليه و من مين و ازاى النار مسكت فيها و اتوفت ؟
سكان المنطقه بيقولوا انه من اكتر من 100 سنه
كانت فيه عيله مكونه من الاب و الام و بنتهم الصغيره
ساكنين فى بيت قريب من النفق المرعب ده
وللاسف الاب كان مدمن على شرب الكحول
وكانت الام و بنتها بيعانوا معاناه شديده جدا من طريقه معامله الاب ليهم
خصوصا انه لما كان بيوصل لمرحله السكر
بيتحول لراجل عنيف جدا و بينزل فيهم هما الاتنين ضرب و اهانه
وفى كل مره كانت الام بتستحمل و تمنع الاب من اذيه بنتها
كانت دايما بتحاول تحمى البنت الصغيره و تبعدها عن ابوها
و تاخد هى الضربات لوحدها
كانت بتستحمل كل ده على امل ان جوزها حيفوق و حيرجع لعقله
وان الوضع مش حيفضل كده والامور حتتحسن و حترجع طبيعيه
بس للاسف الوضع متحسنش و استمرت معاناه و الم الام لفتره طويله
و فى يوم من الايام كان الاب فى حاله سكر و غضب شديد جدا
و مسك بنته و قعد يضرب فيها بطريقه بشعه ومن غير وعى
ساعتها خافت الام على حياه بنتها الوحيده
فاتشجعت و طلبت الطلاق من جوزها
لانها زهقت من الحياه البائسه اللى هى عايشاها هى و بنتها
ونفسها تعيش حياه طبيعيه وهاديه و تربى البنت الصغيره فى ظروف احسن من كده
ساعتها زاد غضب الاب بصوره كبيره
و مسك بلمبه زيت و قربها من الستاير
وهددهم انهم لو حاولوا يسيبوا البيت و يمشوا حيولع البيت باللى فيه
فحست الام بغضب شديد جدا من تصرف جوزها
وراحت زقاه بعنف و هى بتصرخ
و فى لحظه قام الزوج برمى لمبه الزيت على الستاير وولع فيها
و ابتدت النار تمسك فى البيت كله و توصل للسقف اللى كان مصنوع من الخشب
مش بس كده
اثناء انتشار النار فى البيت كان الزوج نازل ضرب فى الام بايديه و رجليه بعنف شديد
لدرجه انها فقدت وعيها ووقعت على الارض
كل ده كان بيحصل قدام البنت الصغيره
اللى طبعا حست بالرعب من اللى هى شايفاه
فجريت وخرجت من البيت و حاولت تهرب و هى فى حاله شديده من الخوف
كانت عاوزه تعدى النفق علشان توصل لبيت الجيران الموجود على الناحيه التانيه
وهى بتجرى بصت وراها فشافت البيت كله بيتحرق وامها كانت لسه جواه
وشافت ابوها شايل لمبه زيت تانيه و بيجرى وراها علشان يلحقها
فخافت جدا و جريت باقصى طاقتها و دخلت جوا النفق
ونتيجه للضباب و الظلام الشديد
اتعثرت البنت فى حجر صغير كان موجود على الارض
ووقعت على وشها ورجليها اتلوت
حاولت تقوم مره تانيه و تكمل جرى
بس للاسف الالم كان شديد و مقدرتش تقف تانى
لغايه ما الاب وصل للبنت المسكينه اللى كانت فى غايه الرعب
خصوصا وهى شايفه ابوها و هو بيصب عليها كل الزيت اللى معاه
و بعدين سمعت صوت عود كبريت ابوها بيولعه و بيترميه عليها علشان يولع فيها
الصرخات اللى كانت طالعه من البنت المسكينه دى
كانت مؤلمه و مرعبه فى نفس الوقت
وفقدت البنت حياتها محترقه بايد ابوها و هى بتصرخ جوا النفق
اما الاب فرجع تانى للبيت المشتعل و دخل جواه علشان هو كمان يفقد حياته
و فيه ناس بتقول انه هرب و متمش القبض عليه
القصه اللى فاتت دى هى القصه المنتشره عن اللى حصل فى نفق الصراخ
بس فيه قصه تانيه اقل انتشارا بتقول ان فيه بنت اتعرضت للاغتصاب جوا النفق
و بعدين تم اشعال النار فى جسمها لاخفاء الجريمه
و برغم اختلاف القصتين الا انهم بيتفقوا ان فيه بنت فقدت حياتها حرقا داخل النفق
وبعض الناس اللى زاروا المكان قالوا انه مكان كئيب جدا
و ان اللى بيدخله بيحس باحساس غريب و مش مريح
ودايما مليان بالضباب و بتيارات الهواء البارد
رغم ان الجو برا بيكون مشمس ودرجه الحراره عاليه
وتم انتاج فيلم سينمائى بيحمل اسم ( ذا ديد زون ) من بطوله كريستوفر والكن
الفيلم ده بيعتمد فى قصته على قصه نفق الصراخ المرعب
ولغايه دلوقتى مازال نفق الصراخ الموجود فى كندا
مكان مثير و غامض لكل زواره
و محط اهتمام كتير من الباحثين و المهتمين بالظواهر الخارقه و الاحداث الغريبه
اللى بيحاولوا يعرفوا حقيقه الصرخات والنسيم البارد اللى بيطفى اى شعله او نار تولع جوا النفق الغريب ده
وصلنا كده لنهايه القصة
اتمنى انها تنال اعجابكم
بشكركم جدا على حسن المتابعه
و السلام عليكم و رحمه الله و بركاته
