يوم ما شمس وقمر وعموره فكروا إن البيت مسكون
دي قصة حقيقية حصلت من سنتين مع 3 عيال جيراننا في دراو هنا: شمس عندها 9 سنين، وقمر أختها 7 سنين، وعموره ابن خالتهم 8 سنين. والتلاتة شقاوة في شقاوة.
ونبدأ حكايتنا بالصلاه على النبي المختار علية افضل الصلاة والسلام الهم صلي وسلم وبارك على سيدنا محمد وعلى آله وصحبة وسلم
الحكاية بدأت في عز الصيف والكهربا قطعت الساعة 11 بليل. الجو حر نار، والمروحة واقفة، والعيال زهقانة وقلقانة. قاعدين بالكشاف في أوضة واحدة وبيحكوا قصص رعب من التيك توك.
عموره بقى الفهلوة بتاع الشلة قالهم: "تعالوا نعمل مقلب في ماما. هنخبي الكشاف ونقعد نعمل أصوات أشباح وهي هتخض". شمس وقمر وافقوا فوراً عشان بيحبوا المقالب.
الساعة 12 بليل الدنيا ضلمة كحل. عموره قال “الخطة كالآتي: أنا هقعد تحت السرير وأعمل صوت واو واو زي العفريت. وشمس هتخبط على الشباك من بره البلكونة. وقمر هتقول بصوت تخين: مين سرق الكحك؟”
اتفقوا ودخل عموره تحت السرير فعلاً. شمس طلعت البلكونة عشان تلف من بره وتخبط. وقمر استخبت ورا الستارة مستنية الإشارة.
عموره بدأ الخطة: "واوو أنا العفريت الجعااان" بصوت مكتوم. قمر كتمت ضحكتها وقالت: "مين سرق الكحك؟" بصوت عجوز.
شمس بقى طلعت البلكونة، بس وهي بتتشعبط عشان تخبط على الشباك، رجلها اتزحلقت في طبق رز بلبن كانت ماما حطاه يبرد. تزحلق بجلاجل... ترااخ!!! وقعت على الكرسي البلاستيك اللي في البلكونة فـ الكرسي اتكسر تحتها: طااك!
الصوت كان مرعب بجد. قمر اللي ورا الستارة اتخضت بجد ونسيت إن ده مقلب، فـ صرخت بأعلى صوتها: "الحقووني في عفريت بجد".
عموره تحت السرير سمع الصوت والصراخ فـ اترعب هو كمان وافتكر إن في عفريت بجد جه، فـ قام يطلع من تحت السرير بسرعة خبط دماغه في السرير: دوووم! وطلع يجري وهو بيقول: "توبة يا رب مش هعمل مقلب تاني".
ماما صحيت مفزوعة من النوم على صريخ قمر وصوت الطرخ، جريت بالكشاف لقيت منظر فيلم رعب: شمس مرمية في البلكونة هدومها كلها رز بلبن، وعموره واقف ماسك راسه وبيعيط، وقمر متلصقة في الستارة ومش راضية تطلع.
ماما بصت لهم وقالت: "في إيه؟ في حرامي؟" التلاتة في نفس واحد: "لأ... أصل... كنا بنعمل مقلب فيكي"
ماما سكتت ثانيتين، وبعدين قامت ضحكت ضحك هستيري لدرجة قعدت على الأرض. قالت: "يعني انتوا اللي عملتوا الرعب ده كله؟ ده أنا افتكرت البيت وقع".
ومن ساعتها بقى اسم الخطة دي "عملية الرز بلبن". وكل ما حد فيهم يفكر يعمل مقلب، التاني يقوله: "إوعى، هنخلص بطبق رز بلبن تاني".
والأحلى إن عموره لحد دلوقتي لما النور بيقطع بيقول: "يا جماعة نقعد ساكتين أحسن، عشان العفريت بتاع الرز بلبن ميظهرش".
لو ناوي تعمل مقلب، اتأكد الأول إن مفيش رز بلبن في البلكونة 😂
