نصيحة اعجبتني لسيدنا عمر بن الخطاب رضي الله عنه

كنت بتفرج مره علي برنامج في التليفزيون واحدة اتصلت و بتسأل أستاذة مستضيفنها في برنامج ما "ازاي أعرف مين بيغير مني وبيكرهني انا الموضوع دا شاغل تفكيري ومهتمه بيه جدااا ؟

" ردّت عليها وقالتلها : "لو احنا مسموحلنا نشوف اللي جوا قلوب الناس اللي حوالينا ونشوف بيحبونا ولا لأ مش هنعرف نعيش ! انتي ليكي بالظاهر وبس، محدش يقولي فُلان بيقول عليكي كذا أو بيحبني ولا بيكرهني، سيبوني أتعامل معاه بنيّتي أنا، في الآخر ربنا قادر يمنع عني الأذى ويحفظ علاقتي بالناس اللي تستحق وجودي" ♥️
ساعتها افتكرت مسلسل كنت شوفته قبل كده اسمه  نصيبي وقسمتك كان فيه حلقة لحكاية بعنوان "شكرًا يا بني آدمين" للممثل هاني سلامة وبتحكي الحكاية دي انه كان رجل اعمال  عنده شركة كبيرة وناجحة وحَب يعرف بيحصل ايه في شركته من وراه، كان واثق جدا إن الناس كلها بتحبه وبتحترمه ، لكن كان عنده حُب استطلاع يعرف كل صغيرة وكبيرة بتحصل ..
فقرر إنه يراقب الشركة كلها بكاميرات بالصوت والصورة، للأسف اكتشف إن الناس اللي كان بيثق فيهم ثقة عمياء بيتكلموا عليه كلام وحش جدا، وبيحقدوا عليه وعلى نجاحه، ومحدش بيحبه حُب صادق عكس ما كان متوقع  للأسف 
هو كان بيسمع ويشوف اللي كان المفروض يسمعه ويشوفه، لكن فضل يدوّر وينخور وكانت النتيجة إنه دمّر حياته وفقد ثقته في الناس كلها ومابقاش عارف يعيش وفي آخر حلقة قال جمله مهمه جداا  : "ياريتني ما شُفت، يارتني ما عرفت"
ربنا مدينا نعمة كبيرة أوي لازم نحمده عليها ، وهي نعمة إننا مانعرفش ايه بيتقال من ورا ضهرنا، نعمة إننا مانعرفش كل حاجة في قلوب الناس ولا نعرف جوا نفوسهم ايه لينا 
خليك عايش في سلام أحسن ومتخيل إن كل  اللي تعرفهم بيحبوك، باختصار بلاش تحاول تعرف نوايا اللي قدامك ولا تتدخل في الحاجة اللي ربنا مقدّر إنها تبقى غايبة عنك .. الواحد يتعامل بأصله الطيب وبس ..
زي ما قال سيدنا عمر بن الخطاب رضي الله عنه : "عاملوا الناس بما يظهرونه لكم، والله يتولى ما في صدورهم". ♥️

لا تدقق في القول ولا تنبش في الفعل ولا تخوض في التفاصيل ولا عن مكانتك في اعين الناس وصِدق مشاعرهم
تغاضوا عن كل هذا ليبقى الود وإلا ستقطع ارحام وتكسر قلوب وتهدم علاقات
#يوميات_فاطيما