يوميات زوج هيطأ الحلقة الثانية
يوميات زوج هيطأ
الحلقة الثانية
بدأ جرس الباب يرن .......
- السلام عليك.
- بابا الحمد لله على سلامتك.
- شكرًا يا حبيبي.
- عامل إيه يا بابا.
- الحمد لله.
- أنت كويس؟!
- جرى ايه يابني في ايه؟!!
- ولا حاجة يا بابا يا حبيبي.
- هو الواد أتجنن ولا ايه؟!
- اتجنيت علشان اتطمن عليك يا بابا؟!
- ما خلاص يابني هو امتحان مقولتلك الحمد لله!!
- صحتك عاملة ايه يا بابا أنت كويس؟!
- جرى أيه؟! في أيه؟! يا واد انت يا وهيبة يا وهيـــــــبة تعالي شوفي ابنك دا جراله ايه؟!!!
شكله علق ولا الشريط اللي في مخه سف ولا حاجة؟!
- في أيه يا مصلح جرى أيه؟!
- أبنك يا ستي من ساعة ما جيته وهو هريني أسئلة ازيك ، عامل أيه ، صحتك كويسة؟؟!!
- هو حد جبلكم أخبار وحشة عني مثلًا ،ولا أكونش تايه ولقتني متردي يا ستي في ايييييه؟!!
- ولا حاجة يا راجل أبنك بس فرحان برجوعك – ونظرت للفتى بطرف عنيها كأنها تزغر له أيه اللي أنت بتعمله دا –
- فرحان أيه يا وليه أنتِ؟؟!!
هو أنتِ كمان خرفتي ولا ايــــــــــــه؟؟!!
- ولا خرفت ولا حاجة يا حاااج صحتك بالدنيا – مع أبتسامة –
- صحة ايييييه يا ست يا خربانة أنتِ؟؟!!
هو حد قالك أني بموت جرالكم ايه أنتم شربين حاجة أنتم الأتنين؟!
أوعى يا واد تكون أتلميت على شلة عيال ضايعة غير اللي تعرفهم شربوك حاجة غلط؟؟!
ليه كده بس ياااااارب ابني اللي حلتي من الدنيا!!!
ليه يا ربي بس تحزنني عليه؟؟!
- أييييه يا بابا اللي أنت بتقوله دا؟؟!
"قاطع والده كلامه"
- مش شايف عملت إيه في أمك خلتها هتتجنن شبهك ، حسبي الله ونعم الوكيل في أصدقاء السوء ، حسبي الله ونعم الوكيل
- جرى إيه يا بابا؟ و أصدقاء سوء أيه؟ وحاجة غلط أييييه اللي أشربها؟
مفيش الكلام دا!!
- أمال مالك يابني جرالك أيه؟!
- مفيش حاجة يا بابا أنت كويس؟!
- اييييييه الواد المتخلف دا ، يا بني أنت عايز تشلني؟
قاطعت الأم كلامه فجأه
- لا يا حاااج الشلل مش دلوقتى لسة!!
"تنبهت لكلامها فسكتت فجأة عن الحديث"
- لسة أيه يا ولية يا مجنونة أنتِ؟ أنتم عاملين اييييه من ورايا انطقوا؟
- لا يا بابا ولا حاجة هي بس قصدها بعيد الشر عنك في أمر الشلل يعني؟
- أنا قصدي متقولش على نفسك يا مصلح إلا يحصلك كده.
- جرى أيه يا وهيبة متخلي لسانك حلو أييييه الهباب اللي بينقط منه دا؟
- لا لا لا يا بابا ما تحطش في بالك أدخل بس حضرتك غير وحضر نفسك علشان تلحق تتغدا.
- ايـــــــــــــــه الكلام اللي كله لوغاريتمات دا من امتى يا لوح أنت كان يهمك أكل ولا مكلش ، ولا أيه الأسلوب الجديد دا؟
بعدين تعالوا هنا ايـــــــــــــه تلحق دي؟
هو أنا ورايا ماتش كورة لازما الحقة في أيه يا عيلة مناخوليا؟؟!!
- ييييييي جرى أيـــــه هو أنت يا مصلح مش طايق لنا كلمة ليه كدها النهاردة؟
- مهو لو كلامكم معقول كان ممكن أعديه منا بقالي معاكي أكتر من 23 سنة وبعديلك الكلام عادي.
- ط ومالك وقفلي على الواحد ليه النهاردة.
- في أيـــه يا وهيبة هو كلامك مفهوم أصلًا علشان اعديهولك؟
- في أيــه يا مصلح وهو كان كلامي قبل كده مفهوم؟؟
- لأه؟
- ط خلاص عادية ذي باقي الكلام يا راجل حصل أيـــه ياعني؟!
- مهو الغريب أن أبنك شكلة لقط الصانعة على كبر ولا أيه!!
- لا يا بابا مفيش الكلام دا – وابتسم ابتسامة عريضة –
- لله الأمر من قبل و من بعد!!
ربنا يرحمنا برحمته.
لما أقوم أغير هدومي يمكن أرجع إلقيكم عقلتم!!
"في صوت واحد" أتفضل يا حــاج ، أتفضل يا بابا.
- العيلة دي جرالها حاجة أكيد!!!!!!
- إيه يا واد اللى انت بتعمله دا؟! هتخلى ابوك يقفشك!
- يقفش أيـــه يا ماما هو أنا سارق سريقة؟؟
- قصدي يعني أنه يقفش عليك ويتضايق!
- اعمل ايييييه بس يا ماما مهو اصل أنا متوتر.
- متوتر من أيه يا عنيا قال يعملوها الصغار ويقعوا فيها الكبار.
أسمع يا واد أنا مليش علاقة بالموضوع دا أديك شوفت أبوك من كلمتين قال علينا مجانين استحمل انت بقى.
- يا ماما ربنا يخليكي ليا يااارب.
- لا يا خويا أنا اللي فاضل من صحتي يادوبك أعيش بيهم أنا مش حمل علقة من أبوك أنت صغير تقدر تستحمل.
- ايــــه يا ماما دا ؟ أيييه اللي بتقوليه دا؟؟
- ذي ما سمعت يا عنيا أنا صحتي خلاص معدش زى زمان.
- يا ماما ربنا يديكي الصحة والعافية كلها بس سعديني بالله عليك يا ماما.
- المساعد ربنا يا حبيبي.
- أدخلى طيب جهزي الأكل وأنا هتصرف بس تساعديني بردك يا ماما!!!
- حاضر حاضر هنبقى نشوف.
"بدأت تبرطم في سرها" الواد هيشل أبوه الراجل اللي حلتي هيودع النهاردة ز
- بتقولي أيـــه يا مــــــاما؟؟!
- لا يا عنيا ولا حاجة.
تم تحضير الطعام واجتم الولد والأم حضر الأب
- بتبصو لي كده ليه في أيـــه؟! يا جدعان انا قولت هطلع ألقاكم عقلتم في أيه الله؟؟!
- ولا حاجة يا مصلح أتفضل.
- ولا حاجة يا بابا تعالى كل.
- منا جي أكل يا واد وهو أنا مستنيك تقولي أنت بــ تعزم عليا في بيتي يا واد هو في أيـــه؟
- ولا حاجة قصدي علشان ناكل بس يا بابا.
- وهو أنت من أمتى بتستناني على الغدا أصلًا.
- من النهادة يا بابا.
- أنا مش بقولك اتجننت أوعى أوعى خليني أعرف أعد وأكل.
"جلس الأب وعند وضع أول ملعقة أرز في فمه"
- بابا انا عايز اخطب – مع ابتسامة عريضة .
– يُتــــــــــــــــــــــــــــبع –
