حبة تين شوكى ثمنها 90 جنية

حبة تين شوكى ب90جنية 😂 
امبارح نزلت انا وزوجى نشترى حاجات كهربا من مكان قريب من البيت اتمشينا واشترينا اللى عايزينه ولقينا قدامنا عربية تين شوكى قالى عايزة اشتري لك  قلت له ايوة 

كان البائع مجهز مجموعة اطباق سبق تجهزها ومغلفة واكتشفت انه مش لابس جوانتى سالته لية مش لابس جوانتى عشان الشوك؟؟ قالى ان الشوك بيدخل من الجوانتى وبيوصل لصوابعى وملوش لازمة  

قلت له فى نوع تانى سميك عن  الجونتى اللى بتستخدمه يشبه بتاع الزرع المهم 😄
سالنا البائع بكام الطبق قال ب50ج وفى طبق ب  25ج انا واخدة عهد على نفسي ان الباعة المتجولة  دى مش هفاصل معاها طبعا  لانهم ناس حالهم رقيق وعلى قدهم ومش هى دى الحاجة اللى نفاصل فيها وانا استغربت من السعر لان السنة اللى فاتت كان بنص التمن ده ..زوجى قاله ده غالى كدة لية 
قاله كل حاجة غليت يا باشا عشان خاطرك انت بس انا هبيعه لحضرتك  ب 45الطبق بس خدنا طبقين والراجل اصر انى ادوق قشر لى واحدة باليد بدون جوانتى  سبحان الله كانه اتعود على ملمس الشوك وهو طبعا بيقشرها بدون لمس الثمرة من الداخل واخدتها منه وكلتها 
روَّحنا البيت وحطيت الشنط على السفرة واتغدينا وانا كنت اليوم ده تعبانة التعب زاد عليا وكان تركيزى شبه منعدم 😃 المهم 
تانى يوم  فى حاجة جت فى صباعى شكتنى افتكرت شوك التين الشوكى وافتكرت اية😁 
 افتكرت ان طبقين التين الشوكى 

سالت زوجى انت شلت اطباق التين الشوكى فى التلاجة قالى لا قلت انا مش فاكرة انى شلتهم طبعا جريت على السفرة بصيت على الشنط الموجودة فيها ادوات الكهربا لقيت شنطة التين الشوكى و مازالوا  موجودين فى شنطة جمب شنط ادوات الكهربا على السفرة 🤭 🥲 من امبارح 🥺🥺 يعنى مر على وجودهم فى الحر ده اكتر من 12 ساعة 🥺طبعا فسدوا وحمضوا  واترموا وال90 جنية كانوا تمن حبة التين الشوكى اللى دقتها 😂😂😂😂 ودى كانت نهاية قصة حبة التين الشوكى اللى ب90جنية 😄