المفاتيح الشقية بوظت السفرية
المفاتيح الشقية بوظت السفرية
من وقت للتانى بنحاول انا وزوجى نسافر يومين نجدد فيهم نشاطنا بالسفر ورؤية البحر
و قررنا نسافر وناخد بناتنا ونقضى ال week end فى الشالية بتاعنا فى راس سدر جهزنا شنطنا واستعدينا ونزلنا من البيت باكر عشان حرارة الجو والحمد لله وصلنا بالسلامة دخلنا القرية ووصلنا للعمارة ونزلنا حاجتنا وبدانا نضع كل الشنط فى مكان واحد عشان هنبدا حملة النضافة للشالية🙂
زوجى قرر يروح السوبر ماركت عشان يشترى شوية حاجات واهمها المية المعدنية وقالى: انا نازل هاتى مفاتيح العربية
قلت له: مش معايا شوفهم على الترابيزة
بص عليهم ملقاش حاجة دور فى شنطة يده مفيش اثر
دورت انا كمان فى شنطتى برغم تاكدى انهم مش معايا مفيش اثر دورنا على كراسى الانترية ملقناش حاجة
نزلنا نشوفهم عند العربية يمكن وقعوا جمبها مفيش حاجة
قلنا ممكن نكون قفلنا عليهم شنطة العربية المهم ملقناش اى اثر للمفاتيح حاول زوجى وانا نتمالك اعصابنا وذهب للسوبر ماركت اشترى طلباتنا والمية ورجع وحاولنا نظهر للبنات ان الموضوع عادى عشان يستمتعوا بالوقت وغيروا ملابسهم ونزلوا البسين وانا وزوجى مازال القلق ياكلنا استمرينا ندور فى اماكن احنا نفسنا متاكدين ان المفاتيح مش فيها بس محاولة
فكر زوجى وقال انا هخلى عبدالله (حارس العمارة فى القاهرة )يحضر لى النسخة الموجودة مع السايس فاقترحت عليه انه ممكن يرسل المفاتيح مع سواق باص هيعدى على القرية واحنا ناخده منه اثناء ذهابه فى طريق شرم الشيخ وفعلا تم الاتصال ب عبدالله واتفق معاه زوجى على التفاصيل وذهب عبدالله الى موقف الباص فى مدينة نصر وترك النسخة من مفاتيح العربية مع شخص هيسلمها للسائق لان السائق كان نائم لان الرحلة تقريبا الساعة12بعد منتصف الليل وترك للسائق ارقام تليفوناتنا واتصل عبدالله بنا واعطانا رقم السائق
ومن باب التذكير حاولنا الاتصال بالسائق الساعة واحدة بعد منتصف الليل ولكن الموبيل مغلق و حاولنا مرات ومرات والموبيل مغلق بدا القلق مرة اخرى وزاد القلق لان المفروض السائق يتصل 3صباحا عشان زوجى ينتظره امام القرية لياخذ المفتاح وهو فى طريقه لشرم الشيخ زوجى كان شبه مستيقظ على كنبة الانترية وانا شبه مستيقظة فى غرفة النوم خوفا ان يتصل السائق كانت ليلة من اطول ليالى العمر حرفيا وفضلنا حتى الثامنة صباحا على نفس الحال وفجاة رن عليه رقم غريب رد عليه زوجى والمفاجاة انه السائق ولما اخبره زوجى اننا بنحاول الاتصال به طوال اللليل اخبرنا ان الرقم اللى معانا لم يعد يستخدمه 😁🙃🙃 ساله انت فين اجاب السائق انا للاسف نسيت اتصل وانا خلاص وصلت شرم الشيخ 🥺 طيب العمل اية؟؟
رد السائق انه هيريح ويرجع على الظهر ويصل اتنين او تلاتة ظهرا عند القرية وفى المعاد انتظر زوجى امام القرية والحمد لله اخيرا اخدنا المفتاح وعرفنا نتحرك بالعربية داخل القرية وكملنا باقى اليوم وكان ده يوم الجمعة وبالليل كنا بنجمع الشنط عشان نتحرك السبت 😁 واتحركنا ووصلنا بالسلامة للبيت بعد مغامرة وتعب اعصاب واول ما وصلنا البيت زوجى نزل فورا عمل نسخة تانى احتياطى لمفاتيح العربية ومن ساعتها وهى معايا فى ميدالية المفاتيح لاتفارقنى 😀
وكدة خلاص سلمنا ان المفاتيح ضاعت او بمعنى ادق اختفت
المفاجاة الاخيرة ان زوجى جالى وبيقولى انا لقيت مفاتيح العربية 😳😳 فين ؟؟ قالى فى جيب شنطة الكتف بتاعته فى جيب صغير فيها 🙃🙃 الشنطة دى تحديدا انا وهو دورنا فيها حوالى تلات او اربع مرات 🙂
بس الحمد لله قدرنا 😉
