الأستاذ خرجو عينيه
الأستاذ خرجوا عينيه من الهدرة و التبلعيط منبعد قالتلي روحي لكلاصتك خلاص و خليها عليا و إن شاء الله رايحين نغلقوا على هاد السوجي نهائيا.. خرجت و خليتهم متحاكمين و هو يقولها و الله ماكان منها خليها تجيب باباها......قلتلها نبيلة وش خداك هبلتي؟ كيفاش تريسكي كامل هكدا؟ قالتلي خلاص خلاصت حكايتو و حكاية السريقة دوك نخمو كيفاش نديروا للتلفون.. فهديك لعشية كي خرجنا من الليسي راحت نبيلة عند امين للمكتبة قالتلو خلي التلفون عندك حاليا و قالتلي روحي جيبي منقوشتك و غدوا نتلاقو.. رحت قبالة للفرماصي باش نجيلها و كي دخلت ماصبتوش لتم صبت وحدوخر سقسيتو قلتلو لي
كان الصباح هنا ما خلاش عندك وحد الأمانة قالي لالا.. قلتلو راني مخليا عندو منقوشة.. قالي أنا ما علاباليش غدوا الصباح ارواحي شوفي معاه يكون هنا.. قلتلو لالا دوك تعيطلو ولا ربي يسهل عليك.. قالي شوفي ختي قلتلك ما راهوش هنا و ما عندوش تلفون غدوا الصباح يخدم ارواحي ادي امانتك.. خرجت نجري باش نخبر نبيلة و نلوم في روحي وين كان عقلي كيفاش
نمدلو منڨوشتي بيدي.. كي رجعت للمكتبة صبتها راحت سقسيت أمين على السيد لي يخدم فالفرماصي و خبرتو بكلشي.. قالي أنت مريضة؟! كيفاش تمدي منڨوشتك.. قلتلو الله يسترك ما تزيدش عليا دير فيا مزية غدوا روح ليه قولو مولات المنڨوشة راهي جاية ليوم.. رجعت للدار خايفة إدا يما تسقسيني عليها.. ملي دخلت للدار و أنا مدورة الخيمار على راسي و مخبيا ودنيا و فالليل كي نحيتو و جيت نرقد شافتني ختي نضال غير ناضت يما الصباح راحت خبرتها و يما جات ليا قالتلي و راهي منقوشتك؟
حكيتلها قالتلي رجلي على رجلك رحنا للفرماصي صبناه لتم مدهالي كي خرجنا صبت مهدي خويا لبرا يعس فينا و أمين جاي
للفارماصي كي شفتو الدم جمد في عروقي وليت ندعي باش ما يهدرش معايا لخطر هو يتعامل بزاف مع لبنات يشريلهم تلفونات و الناس كامل يعرفوه.. كي لحق عندي حبس قالي زينب عطاك منڨوشتك.. يما شافت فيا قلتلو إيه إيه ربي يحفظك خويا.. و رحنا و خليناه.. جا مهدي يجري قالي تروحي قبالة للدار ماكاش قراية ليوم.. جات يما تفهمو قالها تروحوا للدار سينو نديرلكم تبهديلة هنا قدام الليسي.. يما خافتو قالتلي غاولي امشي نروحو.. جاتني عادي لخطر موالفة بهاد الهدات ماشي جديدة عليا.. كي جينا طالعين في وحدة الطلعة شفت نبيلة حابطة بصح ماهدرتش معايا كي شافتو علابالها بلي حالف فيا باش
نصاحبها.. شريتلها بلي كاين مشكل و مانيش جاية ليوم فهمتني.. كي دخلنا للدار قالي مهدي دوك تقوليلي وش كاين ما بينك و بين امين مول المكتبة.. قلتلو المنڨوش ديالي كان فالفرماسي و وصيت مول المكتبة باش يخليها عندو.. جا يضربني تخبيت مور يما قالي و أنا ما عمرتلكش العين؟ وش راني ندير هنا علاش ماجيتيش قولتيلي نجيبهالك.. قلتلو علاش أنت تخليني
نحكيلك كيما أخ ختو؟ دايمن جابد روحك عليا حتى رجعت نخاف نهدر معاك معمر غير توسويس.. قالي ااااه تحوسي على الرجال باش يقضيولك الصلاح.. على هاد الكلمة بزقتلو في وجهو خطفني من مور يما و مسح بيا لقاعة.. يما تسلك و هو يضرب و أنا نضرب بصح ماخلاش فيا حتى طاحت يما طلعلها السكر باش خرج و خلاني في حالة بصح نورمال موالفة.. غدوا منداك رجعت نقرا عادي صبت نبيلة تستنا فيا حكيتلها قالتلي مهدي خوك خليه دواه عندي أنا نجيبلك حقك.. قلتلها كيفاش محسوب؟ قالتلي
ماعلابالكش علاش راهو يظل عند الليسي أنت غير سبة برك راهو يدور بابتسام لي تقرا دوزيام.. قلتلها ماكاش منها.. قالتلي والله.. قلتلها و أنا فواش تفيدني هادي؟ قالتلي لازم نظموها لينا.. ضحكت قلتلها الطفلة آية فالجمال و الطايح عليها كثر من النايض هاديك دور معانا حنا؟ قالتلي لالا ماشي معايا معاك أنت برك ياك تسكن قدامكم لازم ديري معاها طريق و خوك وحدو يجي يهدر معاك.. قلتلها بصح الطفلة حاسبة روحها شويا كيفاش نتقرب منها.. قالتلي روحي ليها و قوليلها عندي الكراريس تع ا
